ألف أولف يااهل الحب أشعار=وأنثر غلا "حمامة الجوف " أزهار
اللي غلاها ما انوجد مثله وصار=ربي عطاها الملح والزين ياناس
والباء بدون عيونها كيف أنا اعيش=لو أنها ترسل سهام ٍ كما الجيش
ماهي صغيره عاقله مابها طيش=بعيونها تجمع تفاسير وأسرار
والتاء تعالي يابعد كل غالي=يافرحتي أهواك ماهو لحالي
أنا وروحي بعدها القلب تالي=يالولو ياياقوت ضحكاتك أنهار
والثاء ثواني بغيبتك ما أتحمل=طالبك أنا يازين فيني تجمل
مادام ربي بالحلا فيك كمل=أنثر عبيرك خفف الشوق جبار
والجيم جيتك شايل القلب كله=بكفوفي الثنتين شعر ٍ واهله
آمل قبوله وأنت شمسه وظله=أسق الغلا اللي باذره وأقطف ثمار
والحاء حياتي يابعد روح روحي=يابلسمي ودواي بدد جروحي
حبك بنى في خافقي لك صروحي=وخلا صروح الغير ياخلي تنهار
والخاء خايف يوم تنسى حنيني=ويزداد هم ٍ فوق هم بسنيني
لاياحبيبي طالبك ياظنيني=خلك معي وأهديك عمري ولا أحتار
والدال دامي فيك هايم ومشتاق=طالبك أنا بالله لا تطري فراق
عانق شعوري حيل ياصاحبي عناق=من فارق أهله ثم عوّد على الدار
والذال ذكرك ياغلا يجري بدم=شريان قلبي ليتني لك ولد عم
محتاج لك بالحيل أطرد بك الهم=في شوفتك ماكن همي ولاصار
والراء ربي يوم أبدع بتصويرك=خلا حلاك يفوق وصفك وتعبيرك
مالك شبيه ٍ لا حشى ما احد ٍ غيرك=ربي عطاها الزين قدر ٍ ومقدار
والزاي زولك ياصلاة النبي كن=بالمسطره مرسوم ذوق وتفنن
يحق لك بالزين والله تسلطن=ياغيمة ٍ هلت علينا بالامطار
والسين سقت لخاطرك شعري أبيات=ألفية ٍ عنوانها أنت بالذات
ومحمّله مني أماني وتحيات=يحفظك ربي من تصاريف الأقدار
والشين شافك هالقمر واستحى منك=يعني على باله يتحداك يفتنك
مايدري أن الزين مصدر تفننك=أنتي الأصل والا القمر راعي أسفار
والصاد صوتك يطرد الهم والآه=معذور أنا لو همت في صوتك آهواه
همسك دوى لجروح ما مثلها اشباه=ضحكك يداوي جروح في قلبي أدوار
والضاد ضيفك يابعد روحي أكرمني=أسق الخفوق من الغلا حيل وأغرقني
وبربك المعبود لالا تعذبني=تدري غلاك بخافقي زهور ٍ كثار
والطاء طبعي صادق ٍ بالمشاعر=أترجم الأحساس بأحساس شاعر
قلبي وروحي فيك دايم شواعر=للموت أحبك يابعد عمري أعمار
والظاء ظلي في حياتي قريبه=طول العمر تكفين من دون غيبه
حياتي والله دون وصلك صعيبه=أضيع بالدنيا إذا ابعدتي أشبار
والعين عل الروح تفداك وأفداك=أفداك أنا كلي ولا لحظه أنساك
أقصى آمالي يالغلا يوم لقياك=وأسقيك دلة عمري البن وبهار
والغين غالي حيل ماهو قليّل=ظلك ظليل يوم غيرك ظليّل
طالبك أنا يازين يمي تميّل=وأعانق عيونك غلا عناق ٍ وحار
والفاء فتني فيك ربي وخلاّ=مشاعري تنساق لك ما تعلاّ
ولاشافك الخفاق هلاّ وهلاّ=هلاّ وهلاّ ثم هلاّبك امرار
والقاف قرب من حياتي أمانه=طالبك أنا بالله ربي عشانه
يامن أنا محتاج كلي لحنانه=وأعرف إذا ما جيت قلبي لكم سار
والكاف كنت وحاضر الوقت لازلت=في وسط قلبي يالذي به تعللت
جالك هديه لاحشى ما تسللت=ضحكت زماني ضحكتك شعت أنوار
واللام ليلي دونك اشباح وهموم=فوق القساوة يجرح القلب ويلوم
أحس كني فيه تايه ومحروم=ياهي شنيعه بدون شوفتك الاسهار
والميم مد يديك لو ماتكلّم=بدد جروح ونزف قلب ٍ تألّم
ياما شكى من الوقت ياما تظلّم=كني غريمه غايته يكسب الثار
والنون نرجس ضحكتك يالغلا فاق=وصف الحلا بل أعتقد وصفها ضاق
ضحكتك مثل اللوز خوخ ٍ ودراق=ضحكتك عالم عشق وأنفاسك أسوار
والهاء همي ينجلي يوم اشوفك=وافرح بضمك يوم الامس كفوفك
هذا أمل عمري ولا اقدر أعوفك=مزنك دخيلك هلّه بقلبي مدرار
والواو والله طول ماالقلب عايش=ما احد ٍ سواك لخافقي دوم حايش
ولو الملا عني يقولون طايش=أطيش فيك ولا أقدم بك أعذار
والياء يالله طالبك وانت قادر=تحفظ حبيب الروح من كل غادر
دام الخفوق بحبها حيل خادر=طالبك تحفظها أولف بها اشعار
العرض الشجري
