|
((( كيفك حبيبي؟ ))) كلمةٍ قيلت وانا مشتاق حيل قالها خلّي على خط الرسايل إيه ياوتساب رناتك فــليل كنّها الزهر الندي فالغصن مايل ميل ياغصن الهوى والشوق ميل دام للشفقة على شوفه دلايل كم قضيت اوقات فالليل الطويل آتخيّل شوفه إبعينٍ تخايل وأثر حصّاد الهوى ماله حصيل غير عينٍ ساهرة مع دمع سايل |
لا تلوموني وانا اكتب عن عناي اصبروا حتى ولو مل الورق وين ابلقالي دوى في طب داي هو حصيلت عمري إف قلب إنحرق كم صبرت آقول إن العمر جاي واثر شاب الراس والعمر إنسرق ياسنين العمر هذا منتهاي ماحسبت ولا في شيٍ قد فرق النوايح تنتخي مع صوت ناي والغريق فحب شوقه وقد غرق |
علموني كيف نحسب عمرنا؟ بالسنين او بالتجارب والظروف؟ وكيف نرسم خط حد لصبرنا؟ خوف نتعدى الحدود ولا نشوف |
قالوا صحيت؟ قلت عيني ماتنام كيف انام وخلي رسومه فعيني حتى فكري اللي ابا شوفه امام يرجع ورى وبماضي ايامه يجيني |
ماقلت لك ياصاحبي فرقاك عيد والزمان إن طال بك مايستوي والنهار إن راح به يومٍ جديد والخوي لاصد من عقبه خوي وانت في ذا اليوم وشهو مستفيد وش بقى ياذيب لك غير العوي ياما نصحت وقلتلك وانته عنيد تشوف وقت الممطره ماترتوي حتى زهابك مابقابه من رصيد السبب ممشاك يومك تلتوي |
لا تحسب الزلات لامني خطيت ولا تعدد الغلطات مع عد الهلل ولا تبحث الخافي ليامني خفيت كم خافيٍ نخفيه يخفيلك علل ما ابدي العيبه ولا عمري بديت احسب على القصّار غلطه او زلل اغض طرف العين كنّي ما دريت اضحك وانا اللي داخلي ضيق وملل وارفع مباني العز لامني بنيت ماورّي العذّال في نفسي خلل لنّي على درب النقا دربي مشيت امشي ولا احسب فالخطى جهد وكلل من يوم ابوي اللي على عزّه ربيت شيخٍ يصد بماقفه خطبُُ جلل يرسي وبفعاله انا مثله رسيت له سمعةٍ تبقى ليا شد وحلل وفعول نقّاص العرب عنها رقيت في شامخٍ لاشيف يحداهم شلل أرفع مع الوافين لي سمعه وصيت أبني مع الأشراف في قصور وفلل |
حفله مع الشيطان كتبتك قصّه إلعمري وخليتك بلا عنوان عشان اخفي حقايق قصةٍ للناس مقريّه وأبيّن كيف حولنا الهوى والشوق للحرمان وكيف إن الغرام يضيع بيديكي وبيديّه نسينا عمرنا كله وكيف نصدق النسيان وكيف العُمر ذا اللي راح في خانات منسيّه وكيف إن السَعَد يرجع مابين المخطيه وغلطان وكيف إن الحياة بطيب صارت بين ندّيه بدينا عمرنا عشّاق يجمعهم زهر بستان وأنهينا الحياة وعمرنا بهموم مشكيّه وهذا حالنا كلٍ ترى من فعلته ندمان وماعاد الندم ينفع دوى لقلوب مكويّه بقلك وش بقى فينا ؟ بقى حفله مع الشيطان نهنيه بوساوس جابها مع سوء فالنيّه فكرة من الخيال لنهاية الحياة الزوجية |
ياوصوفه لى متى وانتي فعيني لي متى ماشوف غيره في حياتي صرت احلم به وكل ليله يجيني حتى زوله ما يروّح في صلاتي ما نسيت اللي مع المُدّه نسيني كيف ابا انسى غاية الروح ومناتي اربع سنينٍ مضت بينه وبيني كنّي الغرقان وادوّر نجاتي لمسة إكفوفه تَحَسسها يديني حتى انفاسه تَحَسسها لهاتي وكل شيٍ فيه حس فيوم فيني باقيٍ فيني ليا حزة وفاتي |
سلام والخاطر وضح كنّه الشمس وابرد من هبوب الشتا فالشمالي حنا نجي للعلم ثم نلمسه لمس من دون ندخل في الغثا والجدالي ياصاح بانتلي العناوين من امس فعلك بدى للعين ثماً قرالي محنا نطارد هرجةٍ جات بالهمس ولا احنا ندور علم قيلٍ وقالي عديت خمسٍ معها خمسٍ وفي خمس غلطاتك اللي مارقت للطوالي ياصاحبي ماتمحي الطيب بالطمس ياكيف تمحي بالجهاله جبالي |
بيني وبينك سفر وديار والكبتن يحدد المده لابد ابا اركب مع الطيار وآطير وآجيك من جده |
دار الزمان ودار الوقت وإنعادت الحال منرده اكيد انا لليالي إشتقت ماشفت انا الخل من مده |
كتبت انا الشِعر قاف وقاف نظم ونثر واكتب الكسره كله لجل كامل الاوصاف ابكي عليه وابدي الحسره |
ياوردنا - يازهور - الشوق ياريح - ريحان - مع كادي ياطعم شهد ولذيذ الذوق ارجوك لايطوّل إبعادي |
احنا كما الماء والسكر إنذوب في نظرة الحلوين اي صاحب العين ذي يُشكر هو جايب الزين ذا من وين |
223377 احيان للحق المعلا براهين واحيان نسكت لجل نبقى رفاقه محنا من اللي سدد الدين بالدين ولا احنا من اللي قطعوا فالعلاقة ياصاحبي لا تقابل الناس بالشين خل الحكي لاقيل ذوق ولباقه مادام عن تالي الوقت مقفين لا تلاحق اللي (ظاهرٍ في نفاقه) خلك من اللي عادلٍ فالموازين راعي الوفا لاجاك طوّل عناقه ووفي مع اللي لادنوا منك وافين وابعد عن اللي فيه لؤم وحماقه كم واحدٍ لحّن لك القول تلحين وليا نصيته اثنا عن الدرب ساقه ايام تصفالك مع اخوان صافين وايام تقطعك عن قوم ورفاقه هذي حياة الناس عسرٍ مع لين وهذا الزمان احوال يصعب سباقه |
راحت حياة الناس في جمع اموال وطبوع بعض البشر فيها طماعه واشوف ذا الوقت عاسر بالاحوال حتى مشاعرنا يجي فيها مجاعه يافهد يابوك ياثقل الاحمال مال الرَجل يابوك كود ارتفاعه يرقى على عالي مراقيب وجبال ومن العقل له شور دون اندفاعه كم فالحياه تشوف يابوك جهّال تقصر مواقفها عن اطوال باعه ما للفتى غير الشرف والعز مثقال سبعٍ يغير مع الفلا من سباعه ما يُورَث العز من ورث الاخوال كود العمام وربعنا والجماعه |
قبل العصر بكتب الحاني وأشيدلي قاف من بيتين خلّي من العام ماجاني وانا مدري وينه إلين الحين |
اقتباس:
بعد العصر جوني الخطّار خلّي وناسٍ بها نمّه كل يوم ذا حالي والافكار تدنيلي الورد واشمّه ياليت جاني بلا زوّار يلعن ابو جده وعمّه وياليتني في محل الجار من شان لاشفته أخمّه حاولت انا اكتم الاسرار مير العنا قلبي وهمّه هذي حياتي مع الازهار تنثرني له حَب وتلمّه |
الساعه خمس ومعاها خمس توقيتي الان في مكه جيت انا عانيٍ من امس جيت اذ الباب منصكه قلت برجع وعيّا الجمس حلف قال ما ابرح الدكه طفى وامتنع عن مسير ولمس قال والله ما امسك السكه |
ياصاحبي بكتب العنوان وارسل مع( الود ) لك صوره وإن كان تعرف جبل نَعمان اي - فالهدى الارض ممطوره وبين الشجر فايح الريحان والزَهَر رص في سوره حلٍ سكناه في بستان يوم اقطف الورد بجذوره |
ياليتني اعرف التيك توك والا اسوي حساب سناب والا على صفحة تويتر اعرف اغرد مع الاجناب مير الهوى دايمٍ للود ارسم انا في فضاه كتاب واحس ذا الود هو بيتي ودخل ولا سكر الابواب اخوان واصحاب في حِلّه كن الصداقه نسب اقراب |
يامحرض الجهّال بالهون بالهون اشقيت حال الردي واشقيت حالك اسمع واغظ الطرف واصد بعيون وادري انا وشلون تجميع مالك حنّا هل القاله وحنّا هل العون وحنّا من اللي حقه بوسط مالك وحنّا عطانا مانحسبه دين مديون نعطي وتذكر منهو اللي شرالك |
بانت اللوحه وزان العلم زان وانتشر علم الفتى بين الربايع بين رقصات العذارى ليل دان قد سرت ذياعته والعلم ذايع ارقص بعود الفرح والخيزران يافتى عجل وهاتلنا الودايع يمكن إتطول الليالي والأمان والحمى النسوان ودقات الدرايع |
البارحة مرني عنوان مع جملة اخبار فالنشرة فيها حكاوي بلا ميزان إن مَرِتِك يوم لا تشره ياحارق القلب كالعيدان مره تحب وعشر تكره؟ هَد وتعوذ من الشيطان والحال لا تِلحقه حسره |
بعض العرب ظاهره الماس مير البلا داخله فحمه يمشي ينم إف عرض الناس ويفرق صفوف ملتحمه |
ابيات رائعه تسلم اخ نايف
|
احيان تجبرك الضروف القاسيه تاقف مواقيف الرياح من الشجر وتهز غصنٍ بالفروع الراسيه تقلع ثوابت عرق وتطير حَجَر وتهز روسٍ فالخزى متواسيه لاجيتهم سيلٍ عرم قبل الفجر ياكيف تفطن لك عقولٍ ناسيه إلّا ليا صار الجحر إلهم حَجُر |
اقتباس:
السلام عليكم ورحمة الله وبركاته يامرحبا اخوي نصراوي تشرفت بمرورك وكلماتك الطيبة شكراً لك |
بقلب الصفحه واخطط بالقلم واكتب القيفات في اربع سطور ياكيف يسكن داخلي جرح والم مادام عشت وعالمي ورد وزهور باخطّها معنى وتصريح وعلم ذكرى وتبقالي على مر الدهور مادام كنتي في حياتي لي حلم واصبح حقيقة شوف مع قرب وحضور |
حِـــلـــم البارحه من عالم اشواقي صحيت مدري انا قد نمت والا في سهرر احلم وكنّي وسط روض وفيه بيت وذا الحلم شفته قبل اكثر من شهر بيتٍ وانا من حول اسواره مشيت له جلسةٍ تشرف على شط ونهر غصبه وقفت وفوق اسواره رقيت شفت الغصون المثمره ورد وزهر في وسطها ظبيه لها سمعه وصيت بنت الشيوخ بها عقلي انبهر ناديتها يابنت انا توّي لفيت كنت انتخي بإسمك انا سر وجهر ضحكت وانا اللي فرحتي منها بكيت لن الظبي من غيبته بان وظهر ياليتني مصحى من الغفوه وليت ابقى انا في حلمه شهور ودهر والمشكله إني عقب شوفه صحيت أحدٍ صحى في خاطره ضيق وقهر؟ |
كنت ابغى اعدّل نومتي قبل إرمضان واثر السَهَر عاده وصارت دايمه من سبة اشواقي وإحساس وحنان ووصال ماشفته ودايم صايمه |
لازال في راسي عناد لاتسألين الناس عنّي الراس بوصوف الجماد والطبع انا بوصوف جنّي |
مستغربه قولي وانا اللي عشت عمري في عناد ماعرفتي فالسنين الماضيه وش كان فيّه كم رجالٍ نوخوا يومنّي شديت الشداد وكم حرِيبٍ عوّدوا لاحدهم دربٍ عليّه ولو تشوفين الهداوه هاديٍ وقت الرقاد ولا صحيت اصحى وتثني في مواقفهم يديّه حرمةٍ قادت صغار القوم واشباه الجراد طيّرتهم وقفةٍ منّي وخلتهم ضحيّه قصةٍ جابتك تنشد ياظبي رد البلاد مرحباً مليون جيتوا واثر جابتكم حميّه ياهلا والفين حيّه ليه طوّلت البعاد كنت احلم بك صبح وآشم ارياحك عشيّه كنت مثل الزرع لاشاف السحاب ولا استفاد وكنت مثل القاع جف ولا روت ارضه سقيّه ايه انا صلب وأواقف جيش مقيود وعتاد مير اضعفلك واسوق الروح لك منّي هديّه |
فك الاقواس وتحرر من قيودك لاتهاب كم سنينٍ قد مضت وانتي على اللقيا جفيّه لا تردين المواصل وافتحي مليون باب دامنا ياخل نمشي دوم في طرقه نقيّه كم ضمينا في ليالي وكم طردنا فالسراب لين صار الحب فاقد ياغلا اصل الهويّه كنت احبك مثل حبك يوم كنّا فالشباب وكنت اجمّع في ورد الحب لك فالمزهريّه كنت انا الصّح فحياتك كنت لك دوم الصواب وكنت لك غيثٍ يهل وكنت لك كفٍ نديّه وصرت انا جرحك وجرحي مايطيب من الغياب فيك جرح اليوم منّي مثل جرح الغدر فيّه ليتنا محدٍ سمعنا - ليه صحتي للغراب؟ جات نعقاته وشالت من طواريه الرديّه تذكرين إش كان قولي - الحذر مما يُعاب لايسوقلنا علومٍ من كبارات الفريّه غاب واقفا في حياته يوم حلّبنا خراب وحالنا ذا اليوم يشبه من صلخ كبش الضحيّه شوف كلٍ في حياته زان له وقته وطاب يوم حالك مثل حالي في عنا نفسٍ شقيّه عوّدي وإن كان ودّك منزلٍ فوق السحاب او مع الرّحال دربك وإلحقي درب السريّه |
قلتها لك واوجز القول المفيد اربعه كلمات مازوّدت فيها ماعليّ من المشاكل لو تزيد والعلوم التافهه ماني اجيها والحيا مادام دمّي فالوريد آصل ليا حد النجوم اللي أبيها والكرامة دائماً عندي تزيد لو تِمَسْ آقف وبالروح اشتريها وإن غزيت ارمي وفالغزوه اصيد ماخسرت فيوم حاجه منتقيها ارسم الأهداف ما عنها احيد إليا تباطيت الصوايد احتريها هذي إطبوعي وأقسى من حديد ارقى على صخور الجبال وأعتليها ولاتظنيني عن الطيبه بعيد طيبتي تكمل وتوفي منتخيها صملةٍ فادت ومنها نستفيد ترفع الرجال لا جا محتميها |
قلبي حس إليا بدا قلبك يدق واسمع الأهات فنفاسك تجيني وادري إنك فالهوى قلبك يرق وإن إحساسك يهيض إبك ويبيني إيه انا ياروح عمري أستحق لن منزالك تشوفه وسط عيني وين ماناظر اخايلكِ واحق رسم وصفٍ مايغيب ولانسيني |
انتِ شفتيني وانا اللي ما اشوف مير شوفي فاق ماقد شاف شوفك لو دريتي كم خيالٍ بي يطوف كم حضنك وكم سكن في وسط جوفك كنت اناديكِ واعدد فالحروف وإسمك يكفّي موفيلك وصوفك كنت احس إني امد إلك الكفوف وآتخيّل كيف لالمست كفوفك وآتخيّل نظرة الطرف العطوف واتخيّل فاللّقا لابان خوفك واتخيّل يوم تجمعنا الظروف ليت ياعمري تزاين لي ظروفك |
لا تنصدم من وقفة الرجل الضعيف ولا تحتري في وقفته عز وكرم وإليا لحقك من الأذى شيٍ خفيف اشكر الله طوف وإسعى فالحرم |
احلا الليالي ياعرب ليلة خميس
شفت العرب يوم اللقا متصالحة لاعاد حيٍ إرتحل ماله ونيس حتى العشى لا ماتعشى البارحة |
جنيف شد الرحال وحوّل اليوم فجنيف مادمت ياقلبي على الترحال قاوي من يوم راح الشتاء واقبل الصيف وانته على ذيك المرابيع ناوي مادام وقتك رايق ورايق الكيف شد الرحال ونقّي اللي تخاوي الصاحب اللي كاملٍ بالتواصيف الناعم المملوح والجسم راوي فيه من الملامح وصف ناقي ولا شيف مصيون ومن كل التواصيف حاوي وانته معه تحت السحابه وفالريف وداوي الجراح وخِلّك اللي يداوي |
| الساعة الآن 02:59 PM. |