مرحبا،، ومساكم الله بالخير،،

اليوم جايبتلكم طبخة حلوة بيتنا يحبها وقبل يومين مسويتها لهم..
واسمها: مسحب الدجاج..


المقادير:

دجاجة مغلية ومنتفة قطع صغيرة/ قطعة ماجي/ ملفوف ابيض مقطع قطع طويلة/ فلفل اخضر بارد مقطع قطع طويلة وضعيفة/ بقدونس مفروم/ فطر/ صويا/ كريمة/ مايونيز/ روب او زبادي/ بصل مقطع جوانح/ 3 حبات بطاطا كبيرة/ بهارات حسب الرغبة..


الطريقة:-

1-فوحي= اغلي البطاطا او حطيها بالمايكرويفل لمدة 10 دقايق ليما تستوي، وخليها على صوب
2-حطي ملعقتين مايونيز وملعقتين روب وربع كوب كريمة واخلطيها بالملعقة او بالخفاقة،واتركيها على صوب,
3-بعد ما تنتفين الدجاجه اخذي قدر وحطي فيه شوية زيت والبصل ليما يحمر شوي وحطي الدجاج المنتف و البهارات والماجي و خليه على نار هادية لمدة 5 دقايق وحطي البقدونس بعدين الملفوف بعدين الفلفل الأخضر وخليه ليما يذوب شوي وبعدين حطي شوية صويا شوي مو وااايد عشان ماتصير مالحة
4-اخذي الخلطة البيضة وحطي نصها عالدجاج واخلطيه وخليه عالنار ليما يجف شوي .
5-اخذي صينية بايروكس وصفي البطاطا بعد ما تقشرينها وتقطعينها دوائر(مو مشكلة اذا تفتت)
6-حطي الدجاج فوق البطاطا في الصينية واخذي باقي الخلطة او الصوص البيضة ورشيها فوق الدجاج..
7-دخلي الصينية الفرن وشغليه فوق عشان يحمر وجه الصينية واذا تبين حطي جبن موتزريلا مبشور..



وهني وعافية
اختكم:: كويتية ذوووووق