عمرك سمعتي قصة القلب العفيف ... اللي رسم بالحب قلبينن ودار
خاض المحبة وانتهاها بالنزيف ... واحتل ليله كل مافيه النهار
بدل ربيع العمر من شانك خريف ... وان كان شرقن وانت بالغرب استدار
حاول بحبه لك يقاسمك الرغيف ... واختار ينتظرك وخلاه القطار
كان الحنون وكنت يا قاسي عنيف ... يسقيك حبه وانت تسقيه المرار
حتى عذوله صرت في صفه حليف ... يحسبك نور وانت يا غدار نار
جا لك كبير القلب واحساسه رهيف ... وانته تركت اليوم ما يملك دمار
جا لك يفضفض صرت بجروحك تضيف ... واخترت هجرانه وما بيده خيار
كان ابشعوره عن هوى غيرك كفيف ... ما كان يتوقع تخلينه وصار
ماكان يعرف ليه في حبك وكيف ... ما كان يعرف غير حضنك له مسار
دمعه سبق خطوه على وجه الرصيف ... وانته فؤادك في دروب الفرح سار
كنت ابحياته كل شي حلو وظريف ... واليوم فرحه عايش انفاس احتضار
تهدينه اجروحه على خنجر وسيف ... ما ردك اسمه فوق نقشات السوار
ياللي قتلت الحب فالقلب العفيف ... باكر تعرف الحق وينزاح الستار
وترد له والدمع من عينك ذريف ... تبكي ندم تبكي على ذاك القرار
ما تدري انه صار لوجودك يعيف ... وانك بقلبه ركن غطاه الغبار