ابسألك يا حظ لو كان ماكان
متى على الله تنولد لي حبيبه؟
بنات هذا الوقت زودن ونقصان
واللي يبي راسي عجز لا يجيبه
ودي ببنت(ن) تاخذ القلب بأحضان
دايم على عطب المواجع طبيبه
ودي بها نغمة على كل خوان
ودي بها نسمه حنان ونجيبه
ودي بها دايم معي كل الازمان
ودي لها في منبر الحب هيبه
من شانها اكتب قصيدي بالاوزان
و اداوي جروح(ن) بعدها عطيبه
ابكتب شعوري على عذب الالحان
واطير المعنى واعوّد واجيبه
من شان من يقرى شعوري على لسان
يحس بالمعنى ويحس بلهيبه
قلبي وطن ماهو مثل كل الاوطان
فيه الامن وافي ولا به ضريبه
يعطي وفا ولا ينتظر ايت احسان
يعني مثل ماقيل يرقب نصيبه
متعودن يكبت شعوره بكتمان
يصبح على ضيقه ويمسي بمصيبه
هذا المقدر مالنا فيه نكران
وكلن على ماقيل ينضح بعيبه
وان كان حظي في سما الحب مابان
حظن ضعيف وكل شيٍ يشيبه
ابرمي اوراقي على جال الاحزان
واقول يالله تبتليني بحبيبه