سمعت خالتي تقول : مهند خذ زوجتك للمستشفى مو تقعد تبحلق فيها كذا ..!
ضحكت عمته سارة : ههههههههههههههههههه يبحلق غصب اجل يشوف هالزين ومايبحلق .
سمعت ساميه اللي استغربت وقفتها مع مهند وهي باللبس هذا : مهند حبيبي ماشبعت منها لسه .. اللي يشوفك يقول اول مرة يشوفها
رد مهند وضحك : هههههههههههههههههههههههههه الحين مو ادخلكم عندي تقعدون تعلقون وتتريقون ترى بطلعكم برا ....بعدين التفت علي مهند قال كيف انكب عليك ... ناظرت خالتي الجوهرة ( ام مهند ) قلت : ها ..؟ انكب مادريت عنه .
قالت خالتي الجوهرة : لا لا لا مو مادرت عنه .. كبته بنت عمتك المصون من كثر الحقد اللي معمي قلبها .
فز مهند واقف قال : ايش ..؟ وهذي شاللي يقربها من ديمه ..؟ وش جابهم اصلاً ماكفى كلامها امس .
والتفت علي وانا احاول التهي عن نظراته ولا مواجهته واطالع في يدي ورحت للمراية بشوف الحرق احسه للحين يألمني بس اخف بكثير طبعاً بعد المسكن ..!والكريم اللي يقول ان فيه مادة مخدرة خفيفه .
لحقني وقال بحنان : ديمه قلت لك لاتخافين
ابتسمت له عشان الناس : مو خايفه انا بس لسه يألمني ..
: يألمك كثير ولا خف عن اول
: لا خف عن اول طبعا .. بس لسه فيه الم
قالت خالتي سارة : مهند يمه اذا تبون ترتاحون ترى غرفتك مجهزينها لكم والله لو فضيت لاشتري لكم غرفه كبيرة بس انا ناوية أأثث لكم الجناح الشرقي وماابي العجله ودي احط فيه اثاث يناسبكم وعلى مهل
قام مهند وسلم على راسها : الله يخليك لي يايمه احنا لنا جناح ببيت ابوي لاتنسين ومتى ماجينا لابها بنجلس فيه
:وهذا بيتك يامهند وبإذن الله راح احط لك جناح عندي والليلة ناموا هنا بيت ابوك يبي له وقت يرتب وينظف .
: الله يخليك لنا يايمه ويديمك ذخر يالغاليه
استغربت من مهند ليه يكلم عمته كذا وساميه تقابله بالطريقه هذي اجل كل هالغيره وتقابل ساميه وتضحك معاها استغفر الله العظيم اكيد يعتبرها اخته وماابغى اظلمه .
التفت على مهند وهو يقول : ديمه انتي تدرين ان عمتي سارة تصير امي من الرضاع وان السيدة سامية اللي وراك تصير اختي
التفت لساميه وضحكت كويس اني ماظلمتهم ولا عصبت : هههههههههههههههه ليه ماقلتي لي طيب لنا ساعه نسولف مع بعض .
: يؤ حسبتك تدرين اجل ماعرفك عن نفسه الأخ مهند
رد مهند : ترى مالنا الا شهر من تزوجنا مايمدي اقولها كل شي
ضحكوا كلهم وسمعنا الباب يدق راحت ساميه تشوف مين طلعوا البنات وكلهم جوا سلموا على مهند بنات يوسف واحمد يقولون ياعمي وبنات عزيزة ودلال يقولن ياخالي تطمنوا علي وسألهن مهند عن عمته نورة وبنتها قالوا راحوا اول مادخل ...!
كانت دانه تعلق وتضحك تقول : جات فاطمه تجري كل جسمها يهتز وكلمت امها في اذنها وبسرعه امها ارسلت الشغالة تجيب عباياتهن ودقايق الا هن عند الباب شكلهن يحسبنك بتجي تضربهن .
سكتتها امها ماتبيها تقول شي على خالتها مهما كان
انا ماعلقت ولا حتى ضحكت البارحه حرق والليلة حرق بس كل حرق يفرق عن الثاني والشبه بينهم قوة الألم .. ممكن الاثنين يشوهون للأبد ..
بس ان شاء الله مايصير تشوهات ولا يصير لها اثر .
كل شوي مهند يقرب مني يشوف الحرق ويقول لا احسن الحمد لله يالله البسي بنروح للعيادة نضمده لك
: ضروري
: ايوه الحين تقدرين تلبسين عبايتك
: اجل بروح ابدل مااقدر اروح عند الدكتور وهذا شكلي .. اشرت على فستاني ومكياجي
: مممممممممممم اقولك انا اضمده لك اجل اوديك دكتور وانا دكتور
: بس هذي مو شغلة دكتور شغلة ممرضات .. قلته وانا ابتسم ..
قرب مني وابتسم قال : عادي اصير لك ممرضة مو كله طب وكله دارسه ..
طلع مهند ضمادات من الصيدليه وشاش وقطن وبلستر قال : الحين بلف كتفك كله ويدك كلها من فوق
: ياالله شغله ..!
: لاعادي بس راح تقيدك شوي ..
لف يدي بالضمادة والشاش وحط على كتفي ضمادة بعد مازاد الكريم عليه وحط قطن ولف عليه بطريقة ماهرة وحط عليه بلستر عشان يمسك الشاش
سمعنا صوت عمي عند الباب ودخل علينا وجوال مهند في يده يقول خير وش فيه وش اللي صار .. التفت على مهند قال : وش فيك فجعتني رحت ماعطيتني خبر باللي صار ورميت جوالك والله اني قلت صاير مصيبه ..
رد مهند عليه : من وين بيجي الخير واختك وبنتها في الأرض
قالت خالتي سارة لعمي السالفة وعمي كشر : حسبي الله ونعم الوكيل وصلت معهن لهالدرجه .. نورة هذي ماتربت فضحتنا في بنت الناس .. امسحيها بوجهي ياديمه ولاتشيلين بخاطرك . سودت وجهينا معك ..
رديت انا : وجهك ابيض ياعمي عسى الله يخليك لنا .... وانتم مالكم دخل في اللي صار .. فاطمة تعاني من شي كبير وكل هذا ينعكس على تصرفاتها . الله يهديها بس .
ضحك مهند وقال : تحدث علم الاجتماع الحين وطرق التحليل للتصرفات .
ضحكوا كلهم حتى عمي ضحك وقال : والله ياديمه ماياخذ لك حقك منها غيري وانا ابو مهند ..!
: الله يخليك ياعمي ويطول لنا بعمرك ... ماابي انتقم ولا ابيك تتمشكل مع اختك بسببي . جزاهم بيلاقونه عند رب العباد وانا الحمد لله ماصار فيني شي مجرد حرق بسيط ماله أي اثر بإذن الله .
كانوا البنات ساكتات يسمعوني وانا اكلم عمي قالت دانه : ديوووم
: هلا
: من فين تعلمتي الردود هذي والاسلوب هذا من الجامعه ولا كل بنات جده ؟
: ههههههههههههههههههههههههههه الله يخلي لي اللي يعلمني كل شي .
ضحكوا كلهم منها بعدين قال مهند : لاتجيبون سيرة ناصر تسوي لنا رسالة ماجستير ودكتوراه وأبحاث في ناصر بن عبدالهادي .
جلسنا نسولف كلنا وعمي ومهند عندنا البنات كانو متجمعات في الجهه الثانية وخالتي ام مهند وخالتي سارة وبناتها دلال وعزيزة عندنا نادتني ساميه تبغاني اجي اسولف عندهن بس قال مهند لا ماتقدر تجيكم .
ابتسمت لساميه وانا منحرجه من تصرفه يعني مو داري اني زعلانه منه ولا اذا سوا هذي الحركات هنا يحسبني راح ارضى عليه ..!
قام عمي يقول بروح اصلي الفجر وانام وقام مهند معاه بيروح للمسجد وانا رحت فوق لغرفة مهند وخالتي دخلت غرفة تحت خصصتها خالتي سارة لهم .. والبنات راحن بينامن لأنهن تعبن اليوم بما فيه الكفاية ..
دخلت الغرفة ياربي شلون انام بغرفه زي كذا ياليت فيه كنبه انام عليها ولا كان السرير اعرض شوية .
كنت ابغى اتحمم بس صعب وبصراحه مااقدر على هذا الوضع .. بدلت لبسي ولبست بيجامه قطنية بنطلون اصفر وبدي سماوي وصليت ونمت على جنبي الأيمن بحيث يصير مهند ناحية ظهري اذا نام على السرير .. ياربي يقدر اني زعلانه منه واني مو متعوده انام معاه ويروح ينام بمكان ثاني .
طبعا هربت للنوم عشان مااواجه مهند ... صحيت من مهند اللي يناديني وسكت شويه مارديت عليه الين قدرت افتح عيوني.. فتحتها وتمنيت اني مافتحت كان مهند بجنبي على طول ومتغطي معاي بنفس الغطا انحرجت كثير قلت له: بغيت شي ..؟
قال : انتي نايمه ؟
: ها..؟ ليه قلت شي ..؟
: لا ماقلتي شي بس تتقلبين كثير على بالي انك صاحيه ومو نايمه ..
ابتسمت لأنه مايدري عن طبعي : انا دايما اتقلب في نومي هذا طبعي ..!
: اجل آسف اني صحيتك كملي نوم
: كم الساعه الحين
: احنا الساعه 12 الظهر باقي مااذن ومحد صاحي بهالوقت بس نامي ..!
حاولت انام والمشكله مااقدر انام الا على جنبي الايمن ولا انقلب على بطني بس مستحيه من مهند ومااقدر آخذ راحتي ابداً ..
قرب مني مهند حسيت بأنفاسه قريبه مني .. حط يده على راسي قال : ازعجتيني وازعجتك ..!
: آسفه
: بتكملين نوم ..!
مارديت عليه وقرب مني قال : ديمه زعلانه مني ؟
قلت له من دون ماالتفت عليه : لاتكلمني
: لمتى ؟
: لين انسى .
: طيب سامحيني !
: هه قديمه وسمعتها كثير خلاص صارت سامجه .
: ديمه
: ترى اذا بتطول الكلام بطلع انام بغرفة ساميه ولا عند وحده من البنات
: لا لا فكينا من الفضايح نسكت احسن .
: للأسف ماتفكر الا بالناس وكيف تصير علاقتنا قدامهم .
: ديمه
: الله يخليك نام .. ولا اقولك خلاص بقوم احسن . وقمت جلست وجلس هو كمان ومد يده لفها من تحت صدري وسحبني عنده صار ظهري قريب من صدره جمع شعري اللي كان مغطي ظهري وحطه قدام على جهتي اليمين
قال :وريني حرق الكلبـه ..؟
التفت عليه وشفته قريب مني كثير بلعت ريقي وقلت : أي حرق قصدك ..؟
: ها ..؟ كيف أي حرق فيه غير هذا ..؟
: قصدك حرقها لي البارحه واللي قبل البارحه ..؟
طالع وجهي ودقق فيه شاف العلامه اللي الزرقا قال : اليوم اخف بكثير عن امس ..وبسرعه باسني عليه .. قمت على طول من حضنه بس سحب يدي قال : تعالي ياخوافه بشوف الحرق .
مارديت عليه وفتح البلاستر وشافه قال : لا خلاص ماله داعي الشاش الحين اصلاً انا حطيته عشان مايضايقك وانتي نايمه لأن المسكن مفعوله قصير وخفت يرجع لك الألم بس الحمد لله الحين كويس .. وفتح الشاش عني ولمسه على طول حسيت بالحراره قلت : لا لاتحط يدك يألمني ....
جاب الكريم اللي طلعته معاي لمن جيت انام وحط عليه منه ..
قلت : طيب كيف استحم الحين
:ممممممممم مو لازم
: شو مولازم ..؟ الا ضروري
: اوكي ..وابتسم بلؤم بعدين قال استحمي واطلعي لهم عشان يعذورني بعد بحلقتي فيك البارحه .
طالعت فيه وبعد شويه فهمت قصده رميته بالمخدة الصغيرة وقمت وهو قعد يضحك بصوت عالي .. قلت له : لاتروح مكان عشان اذا استحميت تحط لي كمان مرة ثانية من الكريم
: مصممه تتحممين
: ايوه مااقدر انزل كذا ..!
طالع فيني وابتسم قال : اش رايك ننام شوية وبعدين تتحممين براحتك واذا تبيني اساعدك ترى ماعندي مانع ..!
مارديت عليه ودخلت الحمام وانا معصبه منه .. الحين انا زعلانه وهو مسوي الموضوع عادي .. صدق ثقيل دم . وماعنده احساس .
استحميت بحذر وطفش بس احلى شي ان الموية كانت بارده شوي لأن جو ابها بارد ويجنن مو جدة الحر والرطوبة والقرف .
.......................................
::يــــــــــــــــــــــتــــــــبـــــــع::
.......................................