[شوقي لوليف روحي]

بــآقــــي التكمــــلــــه...................









انبسطت مع هدى وسولفنا بس كل شوي تقول ليه نحفانه وليه وجهك كذا لايكون حامل وانا احلف لها اني مو حامل .. وكنت بقلبي اقول تراني زي مارحت من عندكم ..
دق مهند على بيت خالي وردت هدى قال انا مهند وابغى ديمه لو سمحتي
جات هدى بتعطيني السماعه وبسرعه فزيت ورحت لغرفتي اشرت لها قلت قولي مو هنا طلعت لغرفتها وشوي ترجع
استغربت هدى وعرفت ان فيه شي وقالت له اني مو هنا .. بعدين قالت لي : ديمه مسرع الزعل .. دوبكم في بداية حياتكم
: اسكتي ياهدى الله يخليك لاتفتحين مواضيع زي هذي معاي انا جاية ارتاح عندكم .
دخل خالي علينا على الساعه 12 وسلمت عليه وكان فرحان فيني بس خاصمني عشان وزني اللي نزل ووجهي يقول باين انه تعبان وسألني اذا انا حامل ولا لا وأكدت له لا
.. .. قال : اجل برجع لك وزنك اليوم وبكرة اذا بتجلسين عندنا
: ههههههههههههههه كل عام وانت بخير ورمضان كريم .
: اوه نسيت ههههههههههههههههه وانتي بخير وصحة وسلامة بس ماعليه الوعد على السحور والفطور .
يازين الحياة في بيت خالي بالرغم انو مافيه الا انا وهدى وخالي والعيال دايما يلعبون عند التلفزيون ولا في المراجيح برا في الحديقه ومع الشغالة ..


اليوم الخميس جلست اذاكر لحد ماحسيتني طفشت نزلت المغرب افطرت وجلست مع هدى الين اذن العشا بعدين رحت فوق صليت العشا والتراويح ونزلت مرة ثانية تحت لقيت خالي معاه صينية القهوة رايح للمجلس وسألته فيه احد عنده قال لا مافيه ..
دخلت المجلس وانا لابسه برمودة جينز كحلي وأطرافه لونها رمادي وبدي لونه ابيض وكت كان لبسي مبين ان وزني نازل بس المهم اني شياكه هذا اللي يهمني والنحافه علي حلوة .
دخلت ورى خالي وشفت مهند قاعد اوف ... ليه قهرني خالي يقول مافيه احد .
طالع مهند فيني وعرف اني مادريت عنه لأنه بين علي متفاجأة ولأني رجعت على طول للصالة من مااكلمه .
الحين بنخلي كل الناس تعرف ان بينا زعل .؟ ياربي ماكنت ابغى كذا .. ليه يجي هو .
لحقني خالي قال : تعالي ليه رجعتي ؟
: ها..؟ خليتكم تاخذون راحتكم
: الحين زوجك من امس ماشفتيه تدخلين وترجعين حتى السلام ماسلمتي ولا قلتي له كل عام وانت بخير ..
: خالي الله يخليك لاتقول تعالي عنده او كلميه
: ليه ..؟
: لاتسألني ليه بس لاتجبرني على شي ولاتعصب
: اوكي هذا بيتك ياديوم والزم ماعندي راحتك .. بس لمتى ماتبين تقابلينه ..؟
: بكرة الجمعه ارجع انا مع السواق بس ابي ارتاح عندك اليوم ..
طالعني خالي بقلق قال : بقول لمهند انك بتجلسين عندي لبكرة .. بس ياديمه تدرين انه مايرضيني انك تزعلين ولا تتضايقين من دون مااعرف وش فيك بالضبط .. ترى يمكن اساعدك انا .
: ادري ياخالي الله يخليك لي .. اذا ماقدرت اواجه مشاكلي انت ملجأي بعد ربي .. وصدقني مابينا شي لدرجة اني اكبر الموضوع مجرد اختلاف بسيط واذا اعصابنا هدت بنرجع زي اول .
طاعلني خالي وهو يبتسم قال : عاقلة ياديمه وماخيبتي ضني فيك .
بادلته الابتسامه وقلت : ههههههههههههههه صنع يديك .
رجع خالي للمجلس وهو يضحك .. اووه الحمد لله .. كنت خايفه من خالي وردة فعله بس تفهم موقفي عسى الله يخليه لي ..

راح مهند وسهرت مع خالي اللي جلس عشاني وماخرج .... عاد هدى كانت بتحتفل عشان خالي جلس بالبيت وماراح يسهر مع اصحابه .. وتفاجأنا بجية خالي سامي اللي ماعاد يجي لجدة زي اول لأنه اذا جا لبيت خالي ناصر غالباً يكون برا وهو يستحي يدخل البيت ومافيه الا هدى زمان لمن كنت فيه كان عادي يجي وانا اقابله واجلس معاه وحتى لو ماقابلته اسم ان فيه محرم له في البيت .. سلمت على خالي سامي وكان مرة فرحان انه حصلني هنا
قال وهو مصافحني ولسه مافك يدي قال : والله ياديمه اني ادعي ربي الاقيك هنا
: بس انا زعلانه منك ولامرة تجي تشوف بيتي .
ترك يدي وراح يجلس بعد مانزل شماغه قال : بجيك ان شاء الله .. المشكله استحي من اهل مهند لاتنسين انك معاهم في بيتهم ومو حلوة كل شوي طاب عليكم وفيه بنات وحريم ..
جلست عنده وقلت : لاتخليني اقول لمهند ننقل واروح في بيت لوحدي عشان تجيني واخرب فرحة اهله لمن سكن معاهم .
: لا لا لا بالعكس احسن تكونين عندهم واذا على جيتي وعد اجيك بس اذا طلعوا اهل مهند قولي لي اجيك لو من الطايف .
: هههههههههههه تسلم لي ياخالي
طالعني بتدقيق قال : وش هالتغيير ؟ ليه جسمك كذا ووجهك اصفر ؟
: الزواج يغير ..!
: اللي اعرفه انه يغير للأحسن
: الحمد لله بس تعرف مسئولية ودراسه
: الحمد لله انك بتخلصين وتبيضين وجيهنا ..
: عاد اهم شي تحضر الحفلة ترى خالي بيسوي لي حفلة كبيرة
: اكيد بنحضر حفلة بنتنا .. بس ترى ناصر كلمني يقول بسويها في قاعه
: لا لا اذا بيسوي حفلة كبيرة في الاستراحه ولا في البيت غيره لاوالله .. بلا قاعات وبلا بهرجة زيادة .
: اول شي ناصر فرحان لك .. ثاني شي انتي تستاهلين من يتكلف عشانك .
: الله لايحرمني منكم ياخالي انتم عطيتوني اللي ماحصلنه اغلب البنات عند اهلهن
قاطعني قال : تدرين ليه .؟
: ليه ؟
: لأنك انتي اللي فرضتي محبتك واهتمامنا فيك ومافيه بنت اليوم تلاقينها مثلك
: هههههههههههههههه الله يخليك لي بس والله فيه بنات احسن مني بمليون مرة
دخل علينا خالي ناصر قال : شفت ياسامي كيف نحفانه البنت حسبتها حامل وبتجيب لي حفيد ويقول لي جدو بس هي تقول لا .. مسح على راسي وكمل .. ماتبي تكبر خالها ماادري ماتبي تفرحه ..
انحرجت من خالي سامي لأن خالي ناصر عادي اكلمه في أي موضوع كأني اكلم ابوي ولا امي .. لكن خالي سامي استحي منه في المواضيع الخاصة زي هذي
ضحك خالي سامي وقال لمن شافني انحرجت وحب يغير الموضوع بطريقه ثانيه : ههههههههههههههههه يارجال مااتخيل شكلك واحد يقول لك جدي من بدري .
ضحكت وقلت : عيالي راح يقولون لخالي يبه مالي دخل
ضحكوا خوالي مني وقال خالي ناصر : عاد مهند بيذبحني يكفي انه يغار عليك مني . تبينه يغار على عياله معك ..
قال خالي سامي وهو يضحك : ههههههههههههه الله يعينك بيحقد عليك من قلب .

كنت افكر واقول في نفسي .. يووه ياخالي ماتدري عني ولا تدري ليه ماحملت للحين خلها على ربك بس ، يمكن اصير كذا دايما ويمكن ارجع لبيتك واترك مهند وانا زي مارحت من عندك ..
تسحرت مع هدى وخالي سامي و خالي ناصر تسحروا مع بعض .ونمنا بعد الفجر ...... جلست يوم الخميس في بيت خالي ورحت مع هدى لأمها مرة مشتاقه لها من يوم ماتزوجت ماشفتها وبجد واحشتني ...
سلمت على خالتي ام صالح ولاحظت ان وزني نزل .. قعدت تخاصمني ليه نحفت وشكلي متغير .. تعذرت لها بالاختبارات والرسالة كانت متعبتني كثير والحمد لله هانت ... بس مامشت عليها لأنها قالت : من يوم عرفناك ياديمه وانتي عندك دراسة واختبارات وشادة حيلك .. بس انك ماتاكلين زين .
.






سهرنا عندهم وجا خالي تسحر في بيت عمه ابو هدى وبعد الفجر رجعنا لبيت خالي .
طلعت لغرفتي وقرأت سورة الكهف ونمت ..
قبل المغرب كنت صاحية وجلست اقرأ قرآن الا دخل علي خالي قال :مهند بالطريق جاي ياخذك واستحيت ارده اذا بينكم شي قولي لي بس اذا مابينكم شي يستاهل انك تجلسين كم يوم روحي معاه وبلاش تردينه مرة ثانيه .
قلت وانا مقهورة وماحاولت ابين لخالي : اوكي ياخالي اللي تبغاه يصير ..بجهز اغراضي واروح معاه .
ياربي كنت مرة مبسوطه في بيت خالي جا هذا بينغص علي لو ماكنت زعلانه منه بس كان ارتحت هناك لأن عمي وخالتي وريم ناس تنحط على الجرح يبرى ..
قمت لبست نفس لبسي اللي جيت فيه من بيتي .. ومهند برا مادخل قال خالي اطلعي له يقول مستعجل ....
خرجت بسرعه وركبت السيارة قلت : السلام عليكم
: عليكم السلام
شفته يلف بطريق مو طريق بيت اهله
: فين رايحين
: بنفطر برا
: مايحتاج نروح البيت احسن
: مو بكيفك
: مهند اذا سمحت بنروح للبيت او رجعني لبيت خالي
خلاص خلاص نروح للبيت ولو انك بتحرجيني مع اهلي لأني قلت لهم ماراح نجي على الفطور
: مايهمني اجل رجعني لبيت خالي وافطر انت برا بعدين تعال خذني نرجع لبيتك
: بيتك ..؟
: بيتك بيت اهلك بيتكم كلها واحد
: ليه ما تقولين بيتنا ولا بيتي
: والله بيتي اذا حسيت فيه بالراحه والأمان وضمنت انه راح يكون فعلاً بيتي ساعتها اقول بيتنا ولا بيتي
: اوووف اللهم اني صائم ..
: لااله الا الله محمد رسول الله .... قلتها بصوت واطي وصديت عنه ناحية الشباك
: ديمه
: نعم
: لمتى طيب
: لاتحاول تفتح معاي مواضيع عقيمة ..
: لابفتح وماراح يتسكر الا وانتي راضيه عني
طلعت مصحف صغير من شنطتي وجلست اقرأ .. وهو سكت ماتكلم
دخلنا عند اهله لقيت ابوه جالس في الصالة وخالتي وريم يحظرون الفطور بغرفة الطعام بسرعه نزلت عبايتي وسلمت على عمي ورحت اسلم على خالتي وريم قالت خالتي : وين اللي بيفطرون برا اشوفهم غيروا رايهم
دخل عمي ومهند وراه .وانا رديت بسرعه : والله ياخالتي مهند قال اش رايك نفطر برا بس بصراحة ماحبيت افوت الفطور معاكم لاتنسين انه اول رمضان اقضيه عندكم .. وهو ماصدق اقول بنفطر مع اهلك على طول وافق
: ههههههههههههههههههههههههههه الله يحييك يمه وماابرك منه الشهر اللي تكونين معانا فيه
: الله يخليكم لنا انتم بركتنا وخيرنا ومانرتاح الا معاكم .
تكلم عمي : والله ياديمه انتي خيرنا وبركتنا تعالي يابنتي اجلسي خليهن يحضرن الفطور
كان مهند ساكت وماعلق باين انه تعبان يمكن مني ويمكن عشان مادخن .. نادى ريم :ريم هاتي التمر الحين مو اذا اذن نقعد ننتظر حضرتك
قال عمي : انت لو تترك هالعلة عنك كان تعافيت وهدت اعصابك وانتظرت على مهلك مو تاخذ لك فنجال وتمرة وقمت تجري كأن فيه احد يطردك
: بتركه ان شاء الله بس دعواتك يبه
: الله يهديك وانا ابوك ويفكك من شر هالعله ويستر عليك
: الله يخليك لي ويجعلك ذخر
جلسنا كلنا خالتي مقابله لعمي ومهند جلس بجنبي وريم قابلت لنا
سألني عمي عن اختباراتي قلت اني قدرت اقدمها في رمضان لأن علاقتي بالدكتورات كويسه وقلت لهم ان عندي ظروف وابغى اقدمها
التفت مهند علي وهو يوخر الكرسي بيقوم عشان يطلع يدخن
: وانتي شو ظروفك حتى تقدمين امتحاناتك وماتختبرين مع الناس
التفت له وانا ابتسم : طفشت من الدراسه وهمها خلاص ابغى ارتااح وماعاد فيني استنى لبعد رمضان لأني اساساً مذاكرة ومختمه كل المواد قلت اختبرها قبل الاجازة وارتاح
تكلم عمي : متى اول امتحان عندك
: بكره ويوم الاثنين والسبت الجاي والاحد ..
: ماشا الله تبارك الله اربع مواد بس
: ايوه دعواتكم بس لي .
خالتي وهي تبتسم : الله يوفقك يمه ويسعد قلبك
: ويخليك لنا يمه ويطول بعمرك
رحنا صلينا المغرب ورجعنا نكمل فطورنا .
رمضان عند بيت عمي غير حالتي النفسية وطقوسه كأنها فتحت شهيتي للأكل وصرت اكلم مهند عندهم لأني ماابغى اضيق عليهم او اخليهم يشيلون همنا
جانا مهند وجلس بجنبي وريحته كلها دخان .. قال بصوت واطي اذا افطرتي اطلعي فوق ابغاك .
الله يستر منه اش يبغى هذا مني اكيد بيفتح معاي مواضيع مالي خلق اسمعها
جلسنا لحد مااذن العشا وطلع عمي للمسجد ومهند قال باخذ لي شور واروح للمسجد اشر لي وانا قمت معاه على طول ..
دخلنا الجناح حقنا ..
: ديمه
: مهند روح تحمم والحق ابوك للمسجد بقعد اذاكر الله يخليك لاتكلمني بأي شي الين اخلص امتحاناتي
: وبعد الاختبارات
: بعد مااخلص يصير خير
: اوكي بس لي شرط
: شو
: تتركين المحراب اللي تنامين فيه وتجين تنامين بغرفتك ..
: شو ..؟ لا لوسمحت بنام في المكان اللي ارتاح فيه .
: وقربي مايريحك ؟
تنفست بعمق ماابغى اتكلم معاه ولا اجادله بس لازم اتحمل واسايره لحد مااخلص اختباراتي من دون ماينكد علي ..
قلت : ماقلت كذا بس خلني على راحتي
رجعت للمغاسل اللي برا على الصالة وجلست اغسل يديني عشان اهرب منه بس .
سمعت الحمام حق غرفتنا انقفل ارتحت شوية ورجعت للصالة.. احسني مرتبكه وافكر كيف افتك منه .. هذا الحين اكيد يقول لي خمسه شهور وبديت بالسادس ماكأني متزوج ..!
قلعته يحسن اسلوبه معاي وتصرفاته بعدين يبشر باللي يبغى .
خرج من الحمام لابس شماغه وثوبه وقرب مني كان عطره يخترقني كلي قال :شوفي بعطيك فرصة بس والله وورب البيت لو ماصرتي حرمة سنعه لتشوفين شي عمرك ماشفتيه تراني دلعتك وخليتك على كيفك بما فيه الكفاية .
بصراحه خفت منه وقعدت ارتجف قلت وانا معقدة حواجبي : طيب طيب اللي تبغاه بس روح صل الحين







مر اسبوع وانا وياه مانكلم بعض الا عند اهله حتى هو ماصار يكلمني زين ولايلتفت فيني اذا كنت بالجناح .. بصراحه انقهرت منه وهو يدخل يسوي نفسه ماشافني ويتجاهلني كثير وانا اصلاً صرت اتعمد ماالبس الا اشياء عادية تنانير جينز طويل ولا جلابيات اذا نزلت عن اهله .. واذا صرت بجناحي البس بيجامات طويلة بكم طويل قطنية وعادية ..!
وشعري دايما ارفعه شنيون فوضوي ومااحط ميك اب ابداً .. كل هذا عشان ماالفت نظره هذي الأيام ويشغلني عن مذاكرتي ...
صليت التراويح وجلست بفتح لي كتاب اذاكر فيه بس مالي خلق مذاركة والحمد لله انا مختمة وحافظتها كلها يبغا لي مراجعه اخيرة قبل الامتحان على طول وخلاص . .اخذت لي كراسة جديدة اشتريتها قبل فترة من المكتبة بس مارسمت فيها شي لسه وأخذت قلم رصاص مشتهية ارسم .. ..
مافي راسي شي معين ارسمه .. بس رسمت اطار ولقيتني ابدا رسم كأنه شي يملى علي وانا لاشعورياً ارسم ... !
خططت العيون ، الرموش ، الحواجب ، الجبين ، وخط الشعر من الجبين ، الأنف .. الشنب .. لو بحلف لكم اني ارسم بسرعه مجنونة وبإتقان رائع محد راح يصدقني .. طلع لي وجه مهند .. وكأنه يناظرني .. كان وجهه اسرع لوحة رسمتها بحياتي .. وبالقلم الرصاص .. حتى تفوق على خالي ناصر اللي كنت ارسم صورته بكل مكان حتى بدفاتري زمان بالمدرسه اذا كنت طفشانه في الحصة ولا ماعندنا استاذة... لدرجة اني صرت متعودة ارسمه لاشعورياً وبسرعه . بس مهند اليوم تفوق على خالي ناصر رسمت وجهه كامل ورسمت يده وفيها زقارة ودخان خارج من فمه .. هذي هي صورة مهند في الغالب .. اهلكه الدخان الله يفكه منه قريب ومن غير شر ومكروه ...!
كنت مرة طفشانه ورسمت بصفحة ثانية شمعة تذوب .. كتبت تحتها
حين يقتل الخوف الأمان
وتنتهك القسوة الفرح
لتحيلها الى شروخٍ من خوف

هذه انا بيده
ديمه


ماادري ليه كتبت كذا يمكن لأني حبيت اعبر عن نفسي ويمكن لأني واثقة ان مهند ماراح يشوف الكراسه لأنها بدرج المكتب اللي صار لي ..

الصفحة الثالثة رسمت بحر ورسمت وحده تشبهني بشعرها وجسمها تمشي فيه بسرعه ظللت الصورة ورميت الكراسة لأني مااحب ارسم من الواقع اطفش لكن الخيال اذا رسمته اطول واستمتع فيه ..
يوم السبت في الليل بعد ماجا مهند من المسجد دخل عندي وانا على سجادتي اصلي التراويح في الصاله .. وجلس على الكنبة وقمت نزلت شرشفي لأني خلصت صلاتي وطبقته مع السجادة .. وجلست على الكنبة الثانية ..
ناظر فيني بتمعن وانا لابسه بيجامه بيضا قطنية بكم طويل وواسعه وفيها رسوم بالأوسد على الصدر .. ادري اني كثير متغيره عن اول بدءاً بوجهي وشعري وعيوني وانتهاءً بجسمي اللي نحل كثيير .. وهذا بشهادة اهلي واهل مهند وزميلاتي بالجامعه وام هدى واخواتها وكل من شافني .
قال بهدوء اتوقع انه مصطنع : سبحان الله اللي غير شكلك وحالك ، الحين انتي ديمه ماغيرها ؟
ابتسمت بسخرية قلت : الزمن مايخلي احد مثل ماهو . ووقفت على طول اخذت السجاده وحطيتها بمكانها بجنب المكتبه .. ابغى اهرب منه وادور شي يشغلني عنه ..
وقف مهند ومسك ذراعي بيده قال : يعني بتقولين ان التغير اللي صار فجأة من الزمن ولا من الحياة هنا .
: والله انت ذكي وتقدر تفهم شو اقصد بالضبط ..
نفضت يدي منه بقرف ووخرت عنه رحت للغرفه .. وجود مهند معاي وبمكان واحد ولوحدنا صار يخنقني ..
سمعته يقول : اها ... مكبوته وبصوت واطي .. حتى شكله مافتح فمه .
رحت اشوف شكلي بالمرايه كان لوني اصفر لأني ماآكل كثير كلها لقمتين على الفطور والعشاء يادوب ملعقتين شوربه والسحور آكل فاكهه ولا سلطه والدوخه عاملة معاي العمايل باين ان عندي فقر دم ..خلاص بكرة آخر اختبار لي بالجامعه وافتك من هم المذاكرة ولازم انتبه لنفسي اول شي بروح ازبط شعري عند الكوافيرة .. ثانياً : بنزل السوق بشتري ملابس يمكن تغير من حالي .



يتبـــــــــــــــــــــع
.........................................