-
وهم في السيارة داليا وهي تتأمل السيارات والناس ... استدركت شيء مهم
( اميرة ماتعرف وش صار بأمي اكيد بتصير مناحة الله يعين )...
داليا : احم احم
هشام : وش عنده وجه ابن فهره متأدب اليوم هههههه لا ويقولون بالقوة ركبتِ معنا..
داليا بقهر : انت قلتها يقولون يعني يمكن احد كذاب قايل لك وإلا فيه احد مايبي يركب مع هشام
اميرة : هين شغلك بعدين
داليا : بعدين بعدين وش اخذين من الدنيا .....
هشام : ياليل التبن خخخخ لا تكونين تبين اكل مطاعم مقفله
داليا : الله يخلف عليكم بس دوافير من جد ألزم ماعليكم الفلس ههههه المهم اميرة ياليت تتوكلين وتروحين مع رجلك
اميره : لا هشوم وافق بنام عندكم الليلة وبكرة ارجع ؟؟؟
داليا ( تفكر في المناحة اللي بتصير ) : ياشيخه عيب تتركين زوجك تعالي وقت ثاني
هشام : لا من جد متغيره خلاص بندور لك على عريس هههههههه
اميرة نزلت مع داليا البيت ...داليا تفادياً لأي مناحات سلمت على امها و دورت ابوها مالقته كالعاده في المزرعه ....مرت على زينة القت السلام و دخلت غرفتها ....... قفلت الباب ...تكأت ظهرهاعلى الباب ..تنهدت بعمق وكتمت دمعتها بحسرة فظيعة ......
" نسرين نايمة وعيالها عند ابوهم "
" ومحمد و عبير في الشرقية كانوا لان محمد يشتغل هناك .."
.. اميرة بملامح تكسوها الدهشة شافت زينة وسلمت عليها ...
بكت اميرة كثير يوم شافت امها وحزنت وتمنت لو انها ماسافرت خير شر..!
اميرة دمعتها بعيونها : ليش محد قالي مالكم حق..! اسألكم وتقولون بخير ....وين داليا ذي انا اوريها !
زينة تواسيها : خلاص اميرة عاد عمتي تتأثر حرام عليك بعدين موعد ابرتها الحين وخري بطقها ( ابتمست لها زينة )
وطقتها زينة برفض من ام تركي اللي كانت تكره زينة ولا تبيها تقرب لها ابد
مع العلم ان زينة اهي اللي قايمه فيها وتسنعها ولا وحده من بناتها تسوي لها كذى ...
زينة تعاملها بطيب آمله تكسب قلبها وتسامحها وتبي الأجر من الله فوق كل شيء ...
ام تركي شاتت يد زينة بقوة مع نظرة قاسية جدا و عدم إنصياع لقبول زينة بقربها ..
" زينة كل عبارات الوصف لا تفي بوصف حالتها وهي تقابل بالصد وعدم القبول وكأنها مجرمة حقاً ..."
اميرة : زينة طولي بالك ولا تشيلين هم والله مااراح يلحقك غير الاجر ...........
زينة وعيونها تدمع : ان شالله ... انتِ يا أميرة شفتِ امك وتدرين عن حالها بس انا امي لي فترة طويلة سنه و كم شهر ماادري وش اللي صار لها مادري اهي بخير او لا تخيلي ... اسأل ابوي عنها يقولي بخير وبدر يقولي طيبة وهي عندهم اطلبها بس مدري وش فيها ماترد علي ابد..
و بكــــت زينة بحسرة تقطع القلب
زينة تفكر بينها وبين نفسها بـ :
( مدري ليش امي سوت فيني كذا ..تتخلى عني وتتركني عند بندر اشبعني ضرب وإهانات ..مليت من الحياة ليش الناس كذا مايعرفون التسامح ابد )
جــوهرة عاشت حزينة وابتلعها اليوم حــوت
عاشت الماضي حزين وحزنها الحاضر سنين
طبعها مثل الملاك وطعمها سكر و تـــــــوت
بس لو تمشي يسار فحظها يمشي يمــــــين
اميرة : ان شالله انها بخير زينة ذي امك وانتِ ابخص فيها
زينة تمسح دموعها : الله يسامحها بس.............
قطع الجو رائحة عــــــــطر بالــــــــــــــــــــكاد سببـت لزينة توتر لا يضاهــــى ...
بندر يبتسم : ماشالله وانا اقول الرياض منــورة اثاري الشيون شرفوا ههههههههههه
زينة تجفـــف دموعها بسرعه قبل يشـــوفها بنـــدر ( ماعاد يستاهل أي دمعة يا زينة خلاص )
اميرة تضحك وعيونها مدمعه :هههه شفت كيف اظلمت الرياض بدوني
بندر : اتعب انا ياثقه هههههههههههه ( طبعا جلس عند راس امه وبوسها )
بندر ناظر في زينة وبانت عليه جدية حازمة : امي اخذت الابرة ..؟
زينة شعرها على وجهها : ايه ....
ام تركي مسكت يد بندر وبوس يدها وجلس جنبها يوكلها بيدينه ...<< رحوم لامه بشكل لا يتصور
اميرة و زينة طلعن راحن المطبخ ...
زينة : وش رايك صرت طباخه ماهره ههههههههه
اميرة : أي حسيت ان بندر كارفك ههههههه
زينة تبتسم : مره بشكل فظيع بس الحمدلله استفدت شكلي بفتح مطعم
اميرة بحمـاس : لااااا لا تخسرين هشوم ذي فكرة مشروع بنسويه انا واياه هههههه
زينة وهي تطلع كأس من الدرج : حلوووو قاولوني وانا اطبخ لكم
أميرة : لااااااااااااا يختي تبين تشوهين سمعة مطعمناااااااااا هههههههه
زينة واهي تغسل يدينها : ههههههه حرام عليك تذوقين طبخي و تحكمين
بندر دخل وعاود زينة ذلك الإحساس اللعين : هاه ما شاء الله اشوف العالم تضحك ..؟
اميرة تبتسم : وليش الضحك ممنوع ؟ يقولون لك هو الوحيد اللي مابعد ارتفع سعره للحين
(زينة تنهدت بحسرة آكثر شيء ارتفع سعره بالنسبة لي الضحك يا اميرة )
بندر : مو ممنوع بس ماالومك مع هشام اكيد بتأخذين طبعه إلا قولي لي للحين خبل او عقل ....
اميره كانت تشرب مويا اخذت شوي ورشته على بندر
زينة : ههههههههه
بندر عصب وناظر في زينة : يعني جازت لك هااااااااااااااااااااه
زينة بإرتباك : ههههههه سوري بس غصب طلعت
-
-
-
(16)
ناس تـدس الهـم بيـــــــــن الحنايـا
وناس وربي مادرت وش صـــــــــاير
هذاك حظه مثل بيـض الــــــــثنايـا
وهذاك حظه مثل سودالضـــــفايـر
مـــرت الايـــــــــــــــــــام تجـر بعضها حتى اصبحت شهر او ربما شهرين او ثلاثة
"اميرة طلعت حامل وحتى بعد ضي ماشاءالله حملت الامر اللي جنن نسرين وخلاها تخاف على اموال عيالها وتفكر في حيلة انه تذبح اللي في بطن ضي..."
"ام تركي ماتحسنت حالتها من اسوا لاسوا .."
" علاقة بندر وزينة لا تزال في تلك الجفوة العميقة و القسوة من بندر "
" طــــــــول هالفتــــــــرة زينة هي اللي تقوم في ام تركي وتسنعها على اتم وجه حتى الخاله ام تركي تقبلتها وصارت تموت على قربها ولا تنام إلا اذا مسكت يدها وقرت عليها زينة ............".
" نسرين فكت عن زينة هالايام في ضي وخالد اللي حقدت عليهم بجد "
هذا موجز التغييرات في تلك الحياة المكتظة بأهازيج الحزن و شهقات الألم وملامح القسوة ...
( بداية المشهد 15)
في بيت سعــــــود....
ود جالسه على الاريكة ومعها الريموت تتفرج على التلفزيون قناة mbc تشوف طبعا المسلسل اللي احدث ضجة " سنوات الضياع " ....سعود يقرأ الجرايد
ود : حياتي إلا ماودك نسافر تركيا ...
سعود : هههههه قلب حياتك انتِ إلا ماودك نصور مع لميس
ود بعصبية : وش معنى لميس هاه معجبتكم هالفلبينية
سعود :ههههه كح كح والله ماقامت ولا جلست عندي الله يخليك لي بس
ود بدلع : ايه على بالي لا تكون مثل اخوك بدر بعد
سعود : هههههههه بدر من جد مضيع مع اخت رفيف الدكتورة مدري وش اسمها
ود : يا سبحان الله مزاج بدر ذا ههه ليش يعني كل ذا عشان وردة حملت هين والله ان ماقلت لوردة
سعود : حياتي دنيتي اركدي وبلاش هالحركات
ود : ياسلام يعني هينه كذا تشوف انها هينه
سعود : فكينا يابنت وردة خلقه تغار يعني بالعقل تغارون من ممثلة بالتلفزيون ليش وشذالتفكير ههههه
ود قربت لسعود : تدري حياتي مهند جنان وإلا يحيى اخ بس يا رزته
سعود يبتسم ومسوي نفسه معصب اتجه لها ومسك خدودها ....
إلا والباب يطق ......
ود ببراءة : الباب يطق
سعود : بحريقة خليهم وش علينا منهم تقولين لي يحيى اجل هاه ..؟
ود بعدته عنها وهي ميته ضحك وراحت تفتح الباب
الهنوف وريم : احم احم ....
ريم تهمس للهنوف : تكلمي انتِ دقتني ام الركب انا خفت والله
الهنوف : احلفي بس انا اتكلم وليش ماتحكين انتِ
ود : ههههههه وش فيكم الحمدلله والشكر
الهنوف : شوفي على بلاطه << ماعندها وقت عربجية خخ تهاوشنا مع نواف وقفل و mbc1 mbc4
و انا اعرف افتحها بس تفاديا لعدم تقطيع شعري اللي رايح فيها من كثر الهوشات والاهم تفاديا لمعصية اخوي الملحوس نواف ممكن نشوف سنوات الضياع عندكم خصوصا واني قريت بالنت الحلقة ما تنفوت
ود : ههههههههههههههه خلصتِ وإلا باقي شيء طلعي كل اللي بقلبك لا تكتمين
ريم : يادنياااااااااااااا حتى ود قامت تشخص اقووول هنيف ادخلي بس
ود : حياكم هههههههههههه
سعود : اهلن اهلن اهلن اهلن.....وش عندهم الاخوين الرحباني خخخخ
ريم : هنيف ماكنا في محل تريقة
سعود : تريقة أي تريقه محشومه انت واياها مع ذالخشه اللي مادري وش تبي ...الحمدلله والشكر بس
الهنوف : الخلق خلق ربي الحمدلله والشكر وبعدين بدال ما تضبطنا عند المدام عل وعسى تفكر تخطبنا تقول كذا
سعود بحلق عيونه ونزل عقاله بحركة تضحك : لا ياللي ماتستحين وش معجلك على الزواج هاه هههههههههوبعدين ياللي مسويه ذويقه نعنبوعدوك تسمعين بالذوق انتِ ترى للمعلومية مالنا اسبوع او اقل جايين من شهر العسل ومسيرة انتِ وذالخبله علينا لا والساعه 1 ونص بالليل
ريم فقدت اعصابها : لاااااااااااا موع شانك ولا عشانهاا ود ابد لا تفكرون كذا
الهنوف : انا اقولك نواف الملحوس ذا قفل ام بي سي وجينا نبي نشوفها فقط ليس إلا
سعود يناظر ود مشخص : لا تقولين لي بعد بتشوفين يحيى معلم هالشاورما ذا ...
ريم شهقت : لا تغلط
سعود : وش قلتِ ( مسك عقاله يستعرضه ) انا هالعقال شكله وده ينضرب اليوم ..
ود كتمت ضحكتها ......
الهنوف شهقت : ريم ريم ناظري تيييييييم والله اني شفته شكله هرب من السجن
ريم وقفت مندهشه .....: بكرة الساعه 12 الظهر إعادة نشوفها طيب
سعود : ارحم الله ابو هالوجه لو انها صلاة ماصحيتِ لها من جد هالمسلسلات التركية خطر قادم
الهنوف : سعود اخوي الله يخليك ويوفقك ويرزقك بالولد الصالح ترا اكره مااشوف كلام المنتديات ذا بليز
سعود : فاضيات من جد يالله حياتي انا طالع الإستراحه وراجع إن شاءالله
ود : وين بتروح ....؟
سعود : بروح الشباب من زمان عنهم ...ماراح اتأخر ...مع ان الوقت متأخر بس يالله مو مشكلة
طلع سعود و ود طبعا هاوشت البنات لإن سعود طلع..
ريم : ماتملين انت من مقابل خشته 24 ساعه لازم يطلع يشم هواء
ود : ريموت انكتمي بليز والحمدلله مازال فيهم شوية ذوق
جلسوا لحد ما رجع سعود والحمدلله مازال فيهم شوية ذوق وادب و نزلوا خخخ
-
-
-