صباح الخير الساااهر
يعافيك يارب وشاكره متابعتك ^_^
الــجـزء الـعـاشـــــــ(10)ــر
"مــاضي مدفـون "
كان منزل راسه على المكتب وهو متضايق ما يدري ليه الحلم كل
دقيقه ودقيقه يمر عليه وبنفس الوقت خايف ان عملية خالد ما تنجح
ويرجع يتحطم من جديد ..صحي على صوتها وهي تناديه
مي .." دكتور اسامه فيه مريضه جايه وشكل حالتها حرجه .."
اسامه وهو منزل راسه على المكتب .."روحي لدكتورة إيمان هي
اعرف بالحريم .."
مي .." دكتورة إيمان طلعت بدري .."
اسامه .." طيب دخليها الضماد ..وانا جاي .."
مي .."هي الحين فيه .. وهذا ملفها .."
اخذ اسامه الملف وقام يقلب فيه و أنصدم بالي قراه
اسامه بعجله .. "وش اسم المريضة .."
مي .."على ما اذكر رحمة .."
تركها اسامه بسرعه وهي ماهو مصدق دخل وشافها مغمى عليها
اسامه بخوف .." وش بلاها .."
مي .. "ارتفاع بدرجة الحرارة مع ضيق في التنفس .."
اسامه و يقيس النبض والضغط وباهتمام واضح ..."بسرعه هاتي
الاكسجين وحطيه عليها.."
وانتبه لكلمة عليها بعني راح يضطر يكشف وجهها ..
و يشوفها على طبيعتها
لف وجهه لجهة الثانيه وهو مايبي يعذب قلبه بشوفتها ويزحزح
ألصوره المرسومة عنها
مي وتكشف وجها بعجلة وتحط الأكسجين
اسامه طالع بالجدار وحاول يضبط نفسه ويتماك حاله ان مايطالع فيها
ويسكت الفضول بداخلة
مي وتنادي .." دكتور اسامه .."
التفت لها بخوف وعجلة وبدل ما تستقر عينة على مي استقرت عينه
على رحمة
=============***============
دخل البيت وهو مبتسم أحداث أمس لسه ما غابت عن عينه
شاف رهف حاطه يدها تحت خدها وباين عليها الملل قرب منها ومسح على رأسها
"ايش فيك رهوفه "
رهف رفعت عينها وما هي مصدقه الي تسمعه .." سعود .."
سعود بمزح.." لا ام سعود .." ايش فيك شكلي خربت عليك جوك
رهف قامت وقفت على الكنب وحطت يدها على جبينه تقوس الحرارة
.."أنت تعبان اليوم .."
سعود بضحك .." لا شايفه شيء .."
رهف .." ايه شايفه الحنيه ناطه عليك مره وحده .. وطالعت فيه
بحاجب مرفوع .."كل هذا عشان داليا رجعت .."
سعود باستغراب .." ليه هي داليا جئت"
رهف وتقعد ." ايه رجعت عمي ابو نواف جابها بعد ما عرف ان ذاك
الصايع هو الي ظلمها وانها هي مالها دخل .."
سعود وهو ما هو مستوعب .." انتي وش تقولي .."
رهف .." اذا ما انت مصدق روح اسأل امي .."
تركها قبل ما تخلص كلمتها وهو أشبه بالدوامة و حاس ان المصائب
راح ترجع عليه ....وصار ينادي امه بصوت يهز البيت
=============***============
جالسه تلعب بخصلات شعرها وباين عليها الشرود والتفكير
هزت رجولها بقوة وهي تتذكر كل كلمة وحب وغرام كانت تسمعها
منه وتطرب أذانها لها
جلست على جهاز الكمبيوتر وفتحت على الماسنجر وعبست وجها يوم
ما شافت احد ...سمعت دق على الباب ونادت بملل
"ادخلي"
دلال وتنفض شعرها بيدها .." وش رأيك بالقصة .."
داليا بدون ما طالع .." حلوة .."
دلال وترفع رأسها .." طيب طالعي .."
داليا وطالع .." حلو لو انك خلتيه أقصر شوي .."
دلال .." تتوقعي وليد راح يعجبه شعري .."
داليا فتحت عينها على الأخر .." ليه هو خطبك .."
دلال .." لا بس قريب إن شاء الله .."
داليا بحزن على حالها وتذكرت أحلامها الي ضاعت وهي ما انبنت
"الله يسعدك"
دلال وتمسك يدها .."داليا لا تتحطمي لسه انتي باول الطريق والكل
يتمناك واذا على الصايع تركي راح يلاقي جزاءه.."
داليا وتحاول تظهر اللامباله وتنام على السرير وتتغطى بالحاف
"لا طلعتي قفلي النور"
=============***============
في المستشفى
دخلت وحطت الثلاجة على الطاولة .. وشغلت الأنوار ...وفتحت
الستاير وضربة على يدها بخفيف تصحيها من نومها
"رحمه .. رحمه اصحي.."
قامت وهي تتثاوب وتلتفت .." وين انا .."
حنين بمزح .." في باريس يعني وين شايفه .."
رحمة .." اوه ما كنت ادري ان الحرارة توديني المستشفى .."
حنين.." تقصدي البلاهه .. خوفتينا عليك .."
رحمه وتسعل بخفيف .." هو انتي من متى تخافي علي كل همك
المطبخ لا يطيح عليك .."
حنين .." ايه صح ليش ماغسلتي بلوزتي قبل ما تمرضي اليوم ما
داومت على حسابك .."
رحمه .." أقول حنين فكينا من شرك وقول لي شخبار امي .."
حنين .." ما عليها تسلم عليك وما قدرت تجي البارحة طول وقتها
سهرانه عليك .."
رحمه .." والله تعبتها وياي .. الله يساعدني وارد لها جميلها .."
حنين .." وانا مين البارحة ودموعي ما كفت كلها خوف عليك وأخرتها
طلعتي تدلعي علينا "
رحمة .."ايه يا حبي لدلع .."
حنين وتصب لها كوب حليب .." اذا تحبي الدلع اشربي هالحليب ترا
اول مره بحياتي اسوي حليب بالزنجبيل .."
رحمه تبعده بيدها .." لا ما احبه والحمد الله احس نفسي احسن .."
حنين .." هي ماهي شغلة تحبيه ولا ماتحبيه المهم تشربيه ترا الزنجبيل
ينفع لصدر .."
رحمة .." خلاص راح اشربه بس ما هو الحين .."
حنين قربت الكرسي وجلست عليه .."صح رحمه سألت عنك وقالوا
ان صحتك كويسه وتقدري تطلعي بس لازم يمر عليك الدكتور
يكتب لك الخروج .."
رحمه .." الحمد الله .. اصلا جو المستشفى يجيب الهم .."
=============***============
نايمه على بطنها ورافعه رجولها تلعب بالهواء طاحت خصلة من
شعرها على وجها ورفعتها وهي تقلب صفحات مجلتها
المفضلة..استوقفها مقال وشد انتباها وعدلت جلستها وصارت تقرا بنهم
"حرب اكترونية على الإسلام"
كشفت دراسات ان عدد المواقع الاكترونيه التي تهاجم الاسلام تتعدى
عشرة الالف موقع على الانترنت وان الميزانيه المرصوده لمهاجمة
الاسلام في جميع وسائل الاعلام ومن ضمنها
الانترنت تتعدى المليار دولار سنويا وقالت نفس الدراسه ان عدد
المواقع الاسلاميه على شبكة الانترنت في المقابل لا تتعدى مائتي في
المقابل ان الجهود المبذوله لدفاع عن الاسلام قليلة وفرديه ولا تتعدى
مليون دولار.."
رفعت رأسها لسماء وحست بالم بصدرها
ياااه كل هذا همة في نشر دينهم واحنا عاجزين عن خدمته والدعوة له
تذكرت ريتا شغالة خالها ابو نواف الكافرة
ان وش يخسرني لو اشتريت كتب عن الإسلام و أعطيتها لها
ونصحتها وجهتها لخير
وقفت على صوت مسكت الخير .." لا انا ما أصلح اكون داعية عندي
من الذنوب ما فيها الكفاية وأخاف ربي يعذبني لأني أمر بالخير وما
اجيه وغشا إبليسها عيونها باية تصدق كلامها .. َ
أتَأْمُرُونَ النَّاسَ بِالْبِرِّ وَتَنسَوْنَ أَنفُسَكُمْ وَأَنتُمْ تَتْلُونَ الْكِتَابَ أَفَلاَ تَعْقِلُونَ }البقرة44
صدقت الشيطان واتبعت أوامره وتركت الخير لاهله ونست انها من
اهل الخير.... سكرت المجله واتصلت على حنين واستغربت انها
ماترد رجعت اتصلت فيها ثاني
ونفس الجواب شغلت التليفزيون وحاولت تشغل نفسها بالمتابعة
=============***============
جالس في الصالة ومفترش الكنب بجسمه وهو يفكر فيها ويتذكر
طفولتها وبراءتها ويتذكر أحلامه الي بناها معاها ...
ابتسم وهو يطالع في أخته وهي تلعب بدميتها وتغني لها وتمشط
شعرها سحبها من يدها وحطها وراء ظهرها
وليد بضحك.." اذا انتي قويه تعالي خذيها .."
ريماس و ترفع رأسها وطالع فيه .." لا انت كبير وما اقدر أخذها منك
وليد .." خلاص اجل ما راح أعطيك إياها .."
ريماس وتصيح وتضرب فيه على رجوله .." هات لعبتي والله لا علم عليك امي .."
وليد.." اذا ودك اللعبه تجاوبيني وما تكذبي .."
ريماس ببراءة .." اصلا انا ما أحب الكذب والي يكذب ربي يحطه في النار.."
وليد .." اجل خذي أللعبه وقولي لي مين كان عندكم امس .."
ريماس .." محد جانا امس .."
وليد ويأخذ أللعبه .." ما اتفقنا انا ما نكذب .."
ريماس .." طيب انا ما كذبت ..محد جانا .."
وليد .." ودانه نستيها .."
ريماس وتضرب راسها ايه ..صح تذكرت ...وتعد على أصابعها .."
جتنا خالتي ام نواف ودلال ودانه و اريام .."
وليد .." جلستي معاهم وسمعتي وش يقلون .."
ريماس .." لا امي ما خلتني تقول عيب الصغار يجلسوا مع الكبار .."
وليد .." طيب مين تحبي تزورنا دائما دلال ولا اريام .."
ريماس .." امممم أحب اريام تزورنا لأنها تمشط شعري وأحب دلال
لأنها تعطيني شوكولاته يعني ابيهم الثنتين يزرونا كل يوم .."
وليد وبنظره خبيثه .." مين احلى دلال ولا اريام .."
ريماس وبنظره طفوليه .." عيب هذا الكلام تبيني اعلم تركي ونواف عليك .."
وليد بخوف وضحك .." لا ترا بعدها ما اوديك الملاهي .."
وقطع ضحكة وطالع في ابوه
ابو وليد وهو نازل من الدرج .. "وليد تعال على مكتبي ابيك في موضوع.."
وليد قطب حاجبه وعرف موضوع ابوه .." حاظر يبه .."
دخل أبو وليد مكتبه ودار كرسيه وجلس عليه .." وليد فكرت في
الموضوع الي قلت لك عليه
وليد .." ايه ونفس الجواب عندي .."
ابو وليد وينزل النظارة الطبية .. وليد انت الحين كبير وفاهم وما ابي
اغصب على شيء انت ماتبيه واختار الي تبيها وانا جاهز.."
وليد بترجي .." يبه الله يخليك اذا لا تغصبني على شيء ما ابيه ...
والحين احس نفسي ماني متهيئ لزواج.."
ابو وليد.." اجل متى ناوي تتزوج ..انت شايفني هادني المرض
والقلب ماهو راحمني وايبي افرح فيك و أشوف أعيالك قبل ما أموت
ام وليد وهي داخله .." بعد الشر عنك يا أبو وليد .. وطالع بولدها
"وليد انا راح اخطب له و اظنه ما راح يكسر كلامي ويرفض لي طلبي .."
وليد .."يمه الله يخليك اذا تبي تختاري لي بنت ابو نواف انا من الحين رافض .."
ابو وليد تلقائيا .."اجل خذ أخت تركي وما اظن انك راح تلقى احسن منها.."
وليد .. يبه اريام اعتبرها مثل اختي وما أفكر فيها .."
ام وليد .."اجل مين نزوجك ترانا تعبنا وياك .."
وليد قبل ما يطلع.."زوجوني الشوارع احسن لي .."
وضحك على كلمته وسكر الباب ورآها
=============***============
ضرب الجدار بقوة ... وكان جسمه يرتجف من الغضب .. ما كان
يتخيلها بهالدرجه وكل الي مرسوم بعقله انزاح بنظره وحده لها
والوقت يمشي بطئ وما هو مسعفه ...كان عازم على قرار ومستحيل
يتراجع عنه ... شم ريحه عطرها وعرف إنها دخلت
مي .." دكتور المريضة رحمة منعت الزيارة عنها .."
أسامه بامتنان .." مشكورة أختي .."
رفعت مي عينها وطالعت فيه وهي عندها مائة سؤال وسؤال عن
الاهتمام ألمفاجئي بها المريضة بالذات و أسامه عرف ان نظراتها
ورآها ألف سؤال وسحب نفسه قبل ما تواجهه
دخل جناحها وهو متضايق منها وتننح عشان تتغطى
أسامه بغضب مكبوت .."شخبارك اليوم يا رحمة .."
رفعت رأسها وهي مصدومة ما توقعت ان الطبيب المشرف عليها
يكون اسامه ولفت وجهها الجهة الثانية.." بخير وانتظر الأذن بالخروج
اسامة ويتمالك نفسه .." بس لسه بدري على الخروج لازم نحولك على
العيادات النفسيه اولا .." وضغط على أسنانه على الكلمة الاخيره
رحمة بحركة سريعة لفت وجها وطالعت فيه .." وش تقصدا انا بعقلي والحمد الله .."
اسامه .. "والي بعقلها تكذب على الناس وتقول انها محروقة وتلفق الكذب حولها .."
رحمة بصدمه.." انت شفتني ..وسحبت الشرشف وقربت منها بقوة
وصرخت..." لاانا ما اكذب انا صدق محروقه .."
اسامه باستخفاف .." يمكن عقلك محروق بس ما هو وجهك صح .."
رحمة وتصرخ بصوت عالي .." انت مين سمح لك تكشف وجهي قولي مين .."
اسامه ببروده.." الطب عندك مانع" .. وقرب منها رحمة
ليه..."تعذبيني بحقيقة مالها اصل بالوجود واذا انتي خايفه من شيء
انا مستعدا اساعدك واقف معاك .."
رحمة وتنافخ من الخوف.." انت مالك دخل في فاهم مالك دخل في
وانا حره بتصرفاتي ولا تظن اني في يوم احتاج لك واطلب مساعدتك.."
اسامه ما استحمل ومسك يدها بقوه .." لا ما انتي حره وتصرفاتك
الغبية انا راح اوقفها عند حدها فاهمه "
رحمة بتوسل وخوف .." طيب فك يدي .."
اسامه أنحرج من حركته وفك يدها بسرعة .." أسف ما كنت اقصد المسك .."
رحمة.." لو سمحت اطلع برا انا تعبانه ما ابي أشوفك .." وحطت يدها على رأسها
اسامه ويسحب كرسي ويجلس .."ما راح اطلع قبل ما نتفق على كل شيء .."
رحمة بخوف ودقات قلبها تزيد بسرعة .." على ايش نتفق احنا مابينا
أي اتفاق .. وبصوت عالي .."فاهم مابينا أي اتفاق"
اسامه بصوت خافت .." رحمه الله يخليك هدي شوي وخليني أتكلم.."
رحمة بعصبيه .."وأنا ماني مستعدة أسمعك فحس على دمك واطلع برا
اسامه .." راح اعتبر نفسي ما سمعت أي كلمه" ..ولف وجهه الجهة
الثانية "رحمه انا محتاج لك ...والله محتاج لك انتي ما تعرفي انتي
ايش بالنسبة لي واذا انتي عانيتي في حياتك ترا حتى انا عانيت ومع
هذا صبرت وبنيت حالي
ورفع عينه عليها .."رحمة انا محتاج لك مثل انتي ماانتي محتاجه لي
وخلينا نبدا حياتنا من جديدا ونساعد بعضنا ونبي أحلامنا .."
وسكت فتره طويله ...وتشجع يوم شافها سكتت وقام وطالع من الشباك
و بدون ما يلتفت لها .." رحمه انا احبك و ابي أتزوجك .."
صحت من غفوتها على هذي ألكلمه كانت كل شيء تقدر تصبر عليه
الا هذي الكلمه كل شيء يطاق ويهون عندها الا انها ترجع وتسمعها
من جديد وصرخت بهستريا وبصوت عالي وكان نار اشتعلت بجوفها والزمن رجع يلعب لعبته
لا..لا..انا ما ابي ازوج .. مابي اعيش ...واشارت بأصبعها وهي
ترتجف ..."وانت كذاب والله انك كذاب ما تحبني انا اعرف انك تبي تلعب علي تبي تحطمني من جديد ...
وصارت تهذي بدون عقل" ..كلكم خائنين كلكم كذابين تضحكوا علي
بكم كلمه عشان ترضوا غروركم ترضوا انفسكم الله ينتقم منكم مثل
ما دمرتموني مثل ما قضيتوا علي أحلامي.. وانا أكرهكم وما ابيكم
خلوني اعيش بحالي خلوني اعيش حياتي بروحي
وصارت ترتجف من الخوف وتغطي وجها با شرشف بقوة وهي
تشوف الماضي قدامها وتحس انه راح يرجع لها من جديد
اسامه أنصدم من ردة فعلها ومسكها بقوة وحاول يهدي فيها
"رحمة .. رحمة ايش فيك"
رحمة وتحاول تنزع نفسها منه بدون عقل وتصيح بكل قوتها .."
لا..لا.. اتركني لا تمسكني انا اعرف انك تبي تقضي علي تبي دمرني
بس هالمره مستحيل اسمح لكم والله مستحيل "
اسامه و بصارخ نادي على الممرضات وبسرعة جوا و أعطوها ابره
منومه وارتخت على السرير ونامت وهي تأن الماضي الدفين ..وتبكي العذاب القديم "
=============***============
في المانيا كان واقف يطالع بعمه رفيق دربه حس ان قلبه يعتصر الم
وحزن على حاله.. ورفع عينه لسماء برجاء يدعي ربه يشفيه
شاف الدكتور يشيل الشال عن عينه ضغط على نفسه وهو متوتر
وخائف انها تكون مثل لعملية الأولى
الدكتور ويشيل بالشال .." ان اذا نجحت العملية في هالعين راح نجري
عمليه ثانيه لعين الأخرى واذا فشلت نضطر نوقف العلاج لفترة طويلة
خالد .."انا متوقع انها راح تفشل وعمري ما راح أشوف.."
فيصل .." عمي ليش هالتحطيم .."
الدكتور .." ليش التشاؤم انت يالمسلمين اعرفكم دايم متفائلين .."
خالد بانحراج .." ايه الامل موجود ..بس العمليه صعبه .."
الدكتور ونزع اخر لفه .." هاااخالد تشوف شيء .."
خالد وهو يركز ويفتح عينه .." لا كل الي اشوفه ظلام بظلام .."
الدكتور .." طيب ارجع غمضها وافتحها من جديد .."
خالد ويرمش بعينه بسرعة .." لا ما أشوف الا ...
وسكت فتره وصار يرمش بعينه بقوة
الدكتور .." أستاذ خالد جاوبني تشوف شيء .."
سكت خالد وما هو قادر يستحمل شاف نور يضيء حياته من جديد
رفع رأسه وتعلقت عينه بالنور الي قدامه ...
فيصل ويحط يده على ظهره .." عمي .. انت تشوف شيء .."
خالد .." لا انا ما أشوف إلا ظلام ونور جاي من بعيد
الدكتور .." يعني تشوف هذي ورفع يده بجهة عينه .."
خالد .. ويحاول يركز .." أشوف شيء قدامي بس ما اني قادر أوصفه
الدكتور بفرح .." يعني العمليه نجحت..وبإذن الله راح ترجع تشوف من جديد .."
خالد وضربات قلبه تزيد .." يعني فيه امل ارجع اشوف "
الدكتور .." ايه وراح نضطر نجري عمليه للعين الثانية .."
فيصل والفرح ماهي واسعته .. مبروك السلامه عمي ..
الف الحمد الله على السلامه.. وبدا صوته يختنق .."
=============***============
في بيت ام ريان
جالسات مع بعض يكملن محاضراتهن ويلخصن كتبهن
ريم وتحط القلم بفمها .." الدكتور يقول لازم نقدم التلخيص قبل
الاختبارات و إلا ما راح يقبله .."
حنين ومنشغلة بالكتابة .." ما عليك عندنا وقت نقدمه قبل الاختبارات"