الاياذيب وش طاريك لجيت العوا ياذيب=حداك الوقت ياسرحان وانت الذيب سرحاني
بماضي الوقت كنت الرمز منك البدو في تحسيب=وذلحينه محد يطريك لاقاصي ولاداني
وقال العفو يارجل بعقله فاهم ولبيب=انا ذيب وابابقى ذيب قناص وقوماني
ولكن يوم ناظرت الجبل وليا المكان عجيب=مغير الطير والارياح كل اليوم والثاني
قعدت اشرف على المرقاب كني بالديار غريب=ولجيت العوا لأني من الصدقان وحداني
طلبت الله يعوضني اذا لي في الزمان نصيب=تعوّد ماضي الايام يوم العود رياني
وذلحينه قعدت وجرح وقتي بالضمير عطيب=وشاب الراس والعارض وجور الوقت يبراني
وقلت اهلا وحيا بك بمشرق شمسها ومغيب=هداك الله نقضت الجرح اللي قبل وذّاني
على قولك ديار مابقى فيها نخل وركيب=وانا والله لذاك الوقت ياسرحان ولهاني
زمان الخير والنخوة زمان الطيب واهل الطيب=يجيك الرجل بالفزعه على الميعاد عجلاني
زمان القنع والألفه بمنحي كان او في قريب=زمان عز فيه الجار والضيفان والعاني
زمان راح في فاله وربي للعباد حسيب=وجانا وقت ساد الكره حتى بين الاخواني
وعادات وتقاليد يكاد الراس منها يشيب=وصار القطع في الصدقان بين فلان وفلاني
وصارت قيمة الرجّال في ماله وملي الجيب=وإذا فتشت محصوله تلاقي الحال فقراني
زمان صار فيه الصقر باير فيه كل العيب=وصار البوم راعي جاه شانه في العرب شاني
زمان فيه امراض عويصه مالها تطبيب=وربي شافي الامراض يحميكم ويحماني
صحيح مثلما قالوا ترى كل القريب حريب=تسّوّي فيه معروف وكنك مخطي جاني
ألا ياذيب طاوعني وربي عالم ورقيب=نبدّل دارنا بدار والحيّان حياني
وصلوا عد ماهلت مزون ماطر وسكيب=على من جا لنا بالدين والسنه وقرآني