رواية "الا ليت القدر" للكاتبه بقايا شتات..
مدى بعدت عن جو البيت والاختبارات وخصوصا بعد ما رجعت لهم جانيت وخصصت غرفة لزوجها داخل القصر....
صارت تدوام مع اريام بالمستشفى .. تروح معاها وترجع معاها .. وطول وقتها مع موضي .. صارت تاخذ لها كتب وتقراها عليها او تسولف علي راسها .. بس القران ما قدرت تقرا عليها ابد .. حاولت بس حست نفسها تتعب بشكل غريب ..
: ادعي يا خالتي للبنات .. الاختبارات الاسبوع الجاي .. وان شا الله يرفعون راسك مثل ما كنتي تتمنين.. كان يعجبني فيك ان ودك اولادك يكونوا في مستوى عالي دايم .. وما ترضين بالقليل.. وهذا الشي كان يعجبني كثير فيك .. ولا قد قلته لك .. بس الحين بقوله .. ..... ودك تسألين عن اخباري انا وضاري ؟؟ صرنا مثل الاغراب في بيت واحد .. لا يعرفني ولا اعرفه .. ما ادري ارتاح للشي هذا ولا قلبي ينقبض ..
" تذكرت شي" الصغار يسلمون عليك ... ترى اشتاقوا لك ودايم يسألون عنك.. راح اجيبهم يوم عندك.. صح يزعجونك . بس ترى الاطفال احلى شي في الحياة ..
"وحست بشي غريب جواها" آحم ما ادري ايش فيني ..
" وعلى طول جاها شعور بأن ودها ترجع ...وراحت بسرعه لدورة المياه الموجود بسويت موضي .."
غسلت فمها... واخذت لها نفس .. احساس اللوعه هذا جديد.. مو نفس اللوعه اللي كانت تعاني منها قبل.. وهي اصلا بدت تشك بشي وحبت تتأكد ..
طلعت من الغرفه على طول راحت لقسم التحاليل ..والنتيجه راح تطلع اخر الليل .. بما انها قريبة اريام.. وما راح تطلع من المستشفى الا متأخر ..
وهي راجعه للغرفه .. صادفت اريام ..
: ايش عندك هنا ؟؟
مدى توهقت ما تدري وش تقول لاريام ..: كنت... كنت ادور الكافتيريا بس ما حصلتها ..
اريام: يا قلبي عليك .. انا اسفه بالعاده اجيب لك الاكل بنفسي .. سوري هالمره نسيت ..
مدى ابتسمت لها : لا عادي ..
اريام: انتي ارجعي للغرف هوانا اجيب لك الاكل واجيك ..
مدى: اوكي ..
وعلى اخر الليل .. طلعت من الغرفه وتوجهت لقسم التحاليل مره ثانيه ..وهي حاطه ايدها على قلبها .. حاسه وما تبي تأكد الاحساس هذا ..
ووقفت عندهم وطلبت النتيجه.. ثواني جات لعندها النيرس..
: انتي مدى !!
النيرس بأبتسامه حلوه: مبروووم مدام... انتي حامل..
مدى الخبر صقعها .. صح كانت متوقعه بس ماتبي .. وابدا مو وقته ..
: متأكده !!!!!!
النيرس بفرح: ايوووه اكيد.. مافي يفرح ؟؟؟
مدى ابتسمت وكأنها راح تبكي ما تدري تضحك ولا تصيح .. فعلا مشاعرها من اول ملخبطه ..
اخذت ورقة النتيجه وخبتها ورجعت للغرفه ..
وحطت ايدها على فمها وهي تطالع موضي ..مافي الا هي تقدر تقول لها
: خالتي..... انا حامل ..
مدى شافت ايد موضي ارتفعت لفوق .. ما صدقت عيونها .. موضي تحركت ..
قربت منها وهي مو قادره تستوعب الصدمه الاولى من الثانيه ..
مدى مسكت ايدها: خالتي انتي فرحانه لي ... ولا ما ودك ؟؟
موضي هالمره ضغطت على ايدها بقوه..
مدى حست ان موضي تبي تعبر.. تبي تتكلم : فرحانه ؟؟؟ "حست الضغط اقوى "
مدى فرحت لفرحة موضي.. بس داخله يأس : انا مبسوط هاني فرحتك ... بس ماني حاسه اني فرحانه ..
موضي تحرك اصابعه .. تبي تقول شي ..
مدى بحسره: خالتي ودي افهم عليك ... بس .. بس كيف راح افهمك؟؟؟؟
وطلعت موبايلها من شنطتها واتصلت على اريام .. لحد الان موضي ما تجاوبت الا مع مدى بس..
جات اريام بسرعه وهالمره فعلا شافت ايد امها اليمنى متحركه وماسكه مدى ..
اريام دمعت عينها : والله السالفه جد ؟؟
مدى مبتسمه: تعالي ... تعالي امسكي ايدها ..
اريام قربت ومسكت ايد امها : يمه ... انا اريام ..
موضي فكتها ..
اريام استغربت: ليه ما تبيني .... يمكن تبيك انتي ..
مدى ما صدقت... مو معقول تترك بنتها .. وتبيها هي ..
بس مسكت ايدها: خالتي تبيني انا ؟؟
موضي شدت عليها... مدى طالعت اريام بدهشه .. واريام استغربت.. ما تدري ايش السر ؟؟
>>>>>>>>>>>>>>>>>>>>>>>>>>>>
بالقصر وبالغرفه الخارجيه بالتحديد..
جالسه على السرير ما قدرت تنام ... وعينها على الورقه ..
ما تدري ايش راح تسوي بالوضع الجديد !! السالفه مو كلام وبس .. السالف هان بعد كم اسبوع راح يكبر بطنها.. وراح يعرف الكل ان في عضو جديد جاي بالطريق..حطت ايدها على بطنها تتحسسه .... ايش راح تسوي ؟؟ علاقتها مع ضاري ما تسمح بالحمل الحين ؟؟ ولو عرف ايش راح تكون ردة فعله..
تنهدت بتعب لان تفكيرها ما توصل لشي ..
: تكفين مدو طفي النور ابي انام.. بكره دوام
خرعها صوت ابتهال من وراها وبسرعه خبت الورقه مع ان الغرفه ظلمه الا من نور خفيف ..
مدى طفت الاباجوره: اوكي .. نامي الحين ..
حطت راسها على الوساده تريحه شوي من التعب ومن ثقل الافكار فيه .. وهي تدعي ان ربها يستر من الجاي ...
>>>>>>>>>>>>>>>>>>>>>>>>>>
بدت الاختبارات.. كان جو القصر متوتر ومشحون بالحماس .. والاعصاب مشدوده .. الكل من جهه يزيد على الثلاثه توتر وضغط ..واشواق كانت الرابعه معاهم .. تبي تضرب عصفورين بحجر واحد ..منها تذاكر مع البنات .. ومنها تشوف سطام كل يوم ..ولوقت اطول ..
مدى مرت عليهم: بسم الله عليكم ... همه ... ربي يعطيكم على قد تعبكم ..
دانا حطت راسها على طاولة الاكل اللي قلبوها للمذاكره ..
: مدى هلكنا .. لو ما اجيب نسبه بيجيني شي ..
لانا: انا لو ما دخلت الجامعه بيصير لي شي ؟.
ابتهال: انا لو ما انجح واجيب معدل واخذ عزام بموت مو يجيني شي ههههههه
اشواق: اجل انا لوما اجيب نسبه لامي بنجلد هههههه
مدى: ههههههههه الله يوفقكم .. اختي انسي شوي عزام خلي بالك مع الدراسه ..
ابتهال: والله يا مدى ما اقدر .. قدري اني اعيش حالة حب ..
دانا ضحكت بصوت عالي : حب !! الضعيف ماشاف منك الا القهر .. أي حب تعرفينه ..
ابتهال رمتها بالاوراق: انتي من كلمك ؟؟
مدى: انا بروح اسوي لكم عصير واجلس معاكم ...
راحت للمطبخ ..
وطلبت من الخدامه تسوي لهم العصير .. شويه ينشطهم ويساعدهم على الدراسه ..
دخل من الباب الخلفي ..وباين انه مستعجل ولا توقع وجودها ..
مدى اخترعت من دخلته الغريبه.
هو انصدم لما شافها وهو بصعوبه يلاحق انفاسه ..
مدى: في احد يلحقك ؟؟
سطام وهو راكع يحاول يلقط انفاسه: لا ....
مدى: اجل ليه تركض ؟؟
سطام اخذ كوب مويه من الخدامه ..
: صار لي اسبوع اسوي رياضه..انا من جيت هنا واحس وزني زايد .. ولا في حركه تنشط .. من الشركه للبيت ... ومن البيت لاصحابي وهم نفس الشي يحبون الجلسه .. يعني الحركه معدومه...
مدى وهي ترتب الكاسات: حلو.. وعشان ما يطلع لك كرش..
سطام اغراه شكل العصير قرب منها لدرجه انه لزق فيها واخذ كوب بحيث دخل ايده من بين ايدها وهي ترتب الكاسات..
اخذ الكوب وشربه دفعه وحده وهو يطالعها..
مدى ما انتبهت لقربه .. بس منصدمه كيف شربه دفعه وحده..
اخذت الكاس منه بالغصب: انت اشربه بشويش.. لا تموت علينا ...
سطام قرب وجه شوي منها وبأبتسامه: يعني خايفه علي ......."وطاحت عينه على جهة اليسار واختفى الدم من وجهه.."
كانت مصدومه وبقوووه.. حتى حركة ايدها كانت ثابته .. من كثر ماهي قادره تستوعب الموقف اللي صار قدامها ..
مدى حست ان سطام يطالع احد لفت وشافت اشواق... مدى اللي ما كانت حاسه انو في شي غلط
: أشوقه ... تبين شي ؟؟
اشواق حاولت تطلع الحروف معاها.. : احم.. كنت... لا لا خلاص مابي شي .."وطلعت "
مدى طالعت سطام: ايش فيها ..؟
سطام اخذ منديل مسح فمه وبعدها جفف العرق اللي على وجه: وانا ادري عنها ..."وطلع من الباب اللي جاء منه "
مدى طلبت من الخدامه تسوي كاس رابع جديد.. واخذت الصينيه للبنات..
وحست ان العدد ناقص : وين اشواق ...؟؟
دانا: ما ادري عنها.. فجأه قالت انو اهلها اتصلوا عليها وطلعت..
مدى وهي تحط الصينيه: غريبه !!
>>>>>>>>>>>>>>>>>>>>>>>>>>
ما تحملت تجلس اكثر ... مو معقول الموقف اللي شافته عيونها .. المنظر غريب .. وكأن جبل طاح على قلبها من قوته .. مشت الحديقه بخطوات سريعه .. وللاسف صادفت سطام واقف وعند الباب يكلم الحارس..
وقفت عند البوابه تنتظر الحارس يفتحها ..
سطام: اشواق ...!!
اشواق لفت عليه وبملامح جامده: نعم ....؟
سطام: انتي فهمتي الموقف غلط ...
اشواق: غلط !! مو معقول تكذب عيوني .. الحركات اللي تسويها مع مدى ما تخفى علي .. لا تنسى اني من الجنس الثالث على قولتك يا اخ سطام ... "ومشت"
سطام مسكها : انتي فهمتي ايش ؟؟
اشواق طالعته من فوق لتحت: اول شي اترك ايدي ..."سطام تركها".. ثاني شي الحين فهمت ليش دانا والبنات كانوا معصبين عليك .. ودانا تقول عنك يسوي الغلط وهو ماهو حاس بنفسه .... يا اخ اذا انت ما تدري انك تلاحق مدى .. وتحاول تغريها .. ما ألوم ضاري اذا هذا حاله ما دام انت موجود في حياته ..."وراحت وتركته"
سطام عارف نفسه.. لكن ما يدري ليه يوم جاء الكلام جاء في وجه صدمه..وكلمتها رنت في راسه " تحاول تلاحق مدى وتغريها "... انا احاول اغريها ؟؟؟؟
>>>>>>>>>>>>>>>>>>>>>>>>>>>>