الظاهر اني مبرمج على القصص القديمة والحكايات الاسطورية القديمة... اما ما جاء في المستقبل والخيالات.. فالظاهر ان عقلي ما يقدر يفهمه !!! والدليل اني لما اشوف عدنان ولينا واسمع ( عم الخراب ارجاء الارض ... والحرب العالمية الثالثة اللي مبعد جت ) يوقف عقلي ما اقدر افهم شئ !!! واسكر التلفزيون او الفيديو ..... والى يومكم ما ادري وش نهايتها ...
عموما مشكور يا اخوي انسان ... واستسمحك في اني ارد على اخوي وحبيبي العمدة بالغصب :D واقوله يا بعد عمري ....
انا من اشد المعجبين بأفلام كرتون كلها ... اللي تجي اول طبعاً يوم كنا صغار ولا اخفيك الى الان اطالعها ... ومعاك في انها ما اثرت فيني ولا راح تأثر ... بس يا بعد قلبي ... على ايامي وايامك ما كان الزمن بالطريقة هاذي .. ولا كان الاطفال متفتحين على الصغيرة والكبيرة .. يعني بعبارة ثانية ... ندربي دميجاتنا ما ندري وش السالفة ... بس اطفالنا الان لا ... تغير حالهم وصاروا يفهمون كل شئ ... قبل ما نفهمه احنا يا الكبار ... ويسألون عن كل شئ !!!!
يمكن تكون ( عدنان ولينا ) ايام اول ... مدبلجة إلى العربية لكن مهي مقصودة انها تغير افكارنا مباشرة .. لكن اللي صاير الان في افلام كرتون المدبلجة إلى العربية ... كلها موجه إلى اطفالنا ومعتقداتهم وعاداتهم وتقاليدهم ... والبركة في اعدائنا واعداء الاسلام اللي يخططون لنا على مدى عشرين سنة قدام !!! .. واظن الاخ انسان ... جاب الموضوع على عدنان ولينا وهو في حد ذاته تنبيه على جميع الافلام الكرتونية الموجودة حالياً ... واللي صارت موجهة ومركزة بشكل مباشر لاطفالنا اللي بيكونون شبابنا في المستقبل ...
وابغى ازيد على موضوع اخوي انسان ... انه لازم ناخذ بالنا من افلام الكرتون اللي يدبلجونها الان بالعربية بلهجة مصرية او غيرها من اللهجات ... والمقصود منها انهم يخلون اللهجة المصرية عالمية او انها تكون هي اللهجة العربية المعتمدة !!! تراها والله شوي شوي بتمحي لغتنا العربية ... مثل مسلسل سمبا وطقته !!!
كنا نقول اول لما نجي نلعب مع بعضنا واحنا صغار ... كنا نقول مثلاً :
سوف اقتلك !!! الحين اطفالنا صاروا يقولون : حأطعك حتت حتت !!!!! للأسف
يمكن اكون متشائم شوي بس والله النظرة البعيدة تقول كذا ... وتقول اننا لازم نخاف على لغة ودين صغارنا واحبابنا !!!
ارجو اني ما اكون طولت ولا تفلسفت اكثر من اللازم :D