صباح الخير اذا بانت خيوط الفجر واشعاعه=صباح الشمس تشرق مثل وجهك لونها صافي
حبيبي ليتك بجنبي وانا واياك ذي الساعه=على شط البحر وتبين المكنون والخافي
احبك وانت تامرني ولك سمعا ولك طاعه=أحبك واعلن اني لك مطيع ولك بعد وافي
أحبك وانت في قلبي وعقبك صك مصراعه=مخصص لك خفوقي مملكة يازين الاوصافي
أحبك واعلن ان النفس لك في الحب خضاعه=أحبك لو تذوبني غلا ما قلت لك كافي
احبك مركبي مرساه في شاطيك بشراعه=احبك ثم احبك ضمني في حضنك الدافي
احبك يامصيف القلب يامشتاه ومرباعه=احبك لو تناديني مشيت بلهفتي حافي
تهيم الروح في حبك لحسنك جتك منصاعه=وتشهد لك بساعات التلاقي رعشة اطرافي
أحبك يامنسيني جروح القلب واوجاعه=احبك يادوا القلب العليل وبلسمي الشافي
احبك وانكتب حبك بقلبي حفر وطباعه=ويكفي انك ملكت القلب وانك ساكن شغافي
معك قلبي على درب الهوى ماغير اطباعه=وشوقي لك على طول المدى تيار جرافي
احبك يامنى مستور يادنياه واطماعه=وغيرك من بنات الكون ماتسوى وتنعافي
مستور محمد الحارثي