رواية "الا ليت القدر" للكاتبه بقايا شتات..
خالد لمح اريام طالعه من غرفة سامي ..مستعجله على غرفه ثانيه..وقرر ينفذ اول خطوه من موال براسه..
دق الباب ودخل: السلام عليكم..
:وعليكم السلام..
:ها بشر كيف صحتك اليوم سامي؟
سامي ما توقع زيارته: لا الحمد لله كويسه..
خالد قرب من عنده ورفع ملف جنب راسه..
:لالا ما شا الله..كل امورك تمام والحمد لله..واتوقع دكتوره اريام ما قصرت..متابعه حالتك بدقه..
سامي مر طيف اريام مر عليه مع انه ما قد شاف وجهها..
:لولا الله ثم هي ما وصلت للي انا فيه الحين...
خالد ضحك: ههههه الحمد لله اني عرفت اختار وحده نشيطه ومثابره..
سامي ما فهم شي..
خالد اللي حس ان سامي ما فهم قصده..
:ربي يوفقنا ا نشا الله..ادعي لها هالدعوه بس تكون وفيت جميلها..
سامي انصدم: انتوا مخطوبيـــــــــــــن!!!
خالد واخيرا ووصل للي يبيه: ايوه ما عندك خبر هههههه شكلي خربت مفاجأتها ولا شي..على العموم لا تقول اني قلت لك لا تزعل علي وتقول ملقوف..وربي يشفيك ويديم الصحه والعافيه..والسلام عليكم..
وطلع بعد ما قلب الدنيا رأس على عقب..
>>>>>>>>>>>>>>>>>>>>>>>>>>>>>>>>>>>>>>>>>>>>
سامي مو قادر يستوعب.."اريام مخطوبه.......مخطوبه!!...طيب ليه ما قالت ي...ليه خلتني ابني احلام واعلق امال...ليه؟؟؟...حرام عليك يا اريام...حرااام..انا قلت مستحيل احد يكون وافي وصادق..مستحيل...حتى انتي يا اريام حتى انتي.."
&&&&&&&&&&&&&&&&&&&&&&&&&&
بالليــــــــــــــل..
وفي صالتهم الصغيره..جالسين ومنسجمين مع التلفزيون..
وفجأه رن موبايل سلطان..
سلطان طالع جواله وكشر وتغيرت ملامح وجهه..
رد بدون نفس: هلا..
:طيب ...الحين؟؟
:وثامر؟؟
:خلاص..خلاص اوك انا جايكم..
وقفل السماعه وهو ياخذ نفس عميق ويزفره بأقوى ما عنده..
كانت في عيون خفيه تراقبه وخايفه عليه..
: سلطان من كنت تكلم..
سلطان ارتبك: واحد....من العيال..
مدى: وايش يبي؟؟
سلطان قام وهو يصرف يدور شماغه: وين شماغي..؟
مدى وهي رافعه حاجب: شوفه وراك...
سلطان اللي حس انه بين توتره ابتسم ابتسامه باهته: ما شفته..يله يمه انا طالع..اذا تاخرت لا تقلقون علي اوكي..."وطلع"
ام سلطان: وين راح هالولد؟؟
مدى وقلبها مو متطمن وبدت الشكوك تزيد: ما ادري عنه..يقول مع اصحابه..
ام سلطان: الله يحرسه من كل شر..
مدى بنفسها "امين..والله يستر عليه بعد"
:ابتهال قومي نحط العشاء..
ابتهال بجووووو ثاني" يعني يمكن عزام يكون حبني من اول نظره..يكون خق علي..عاد ذاك اليوم كاشخه..وطالعه حلوه..ولو ما خق اكيد ما عنده ذوق...وش اللي ما عنده ذوق انا بعد..والله لو يشوفني بطرف عين يحق له..صدق اني غبيه..وضابط بعد..يعني كل ماله الامل يقل ..بس قلبي وش يفهمه الغبي..لو اني حابه عبد الله اخو مشاعل كان احسن"
: ابتهااااااااااااااااااااااااال وصمخ..
ابتهال لفت عليها مخترعه: نعم نعم نعم...وجع وش هالصراخ..
ام سلطان: والله انتي ما تسمعين يمي..
ابتهال احمر وجهها: طيب وش تبون؟؟
مدى مسكت راسها: يارب صبرك..لو اني حاطه العشاء لحالي اهون..
ابتهال: كان حطيتيه الله والعشاء عاد..صحن ونقطه وانتهاء لازم النكد والنكاده..؟
مدى راحت وخلتها وهي مولعه ..واعصابها تعبانه اصلا من ضاري وسالفته.. وغير سلطان اللي ما تدري وش دنياه..
&&&&&&&&&&&&&&&&&&&&&&&&&&
توجه سلطان للاستراحه..
دخل عليهم: السلام عليكم..
الكل: وعليكم السلام..
مهند ابتسم: هو والله وغلا..حياك سلطون اليوم بنسوي حفلة لاول نجاح لك..
سلطان بدون نفس: الله والنجاح!!
رائد بلع ريقه لا يعصب مهند: ههههه المفروض تفرح يا سلطان..
سلطان طالع ثامر: اخبارك ثامر..؟
ثامر ابتسم وعرف انه يبي يسكتهم: تمام والله..
مهند اللي استوى في مكانه من القهر واسلوب سلطان...
: اليوم الارباح ما شا الله عامره..وراح نقسمها على الشكل التالي..سلطان راح ياخذ النص لانه اكثر واحد اشتغل...انا وعبد المحسن ورائد ناخذ ثلاث ارباع النص الثاني..وثلث لك يا ثامر لانك كنت تراقب بس ...الكل موافق؟؟؟؟
الكل رد الا سلطان: ايوه...
دخل مهند الغرفه لثواني وطلع بعدها وفلوس بيده...
وبدا في التوزيع والابتسامات ماليه وجيهم كلهم..
سلطان بعد ما اخذ نصيبه: ثامر هات نصيبك..
ثامر عطاه الفلوس: ليه..؟
سلطان جمعهم وعدهم وقسمها بالنص بينه وبين ثامر
:والله تستاهل اكثر من كذا يا ابو ثامر..
ثامر ابتسم بحياء من سلطان دايم افضل منه بكل شي:تسلم والله يا اخوي..
سلطان غمز له: لا تنسى اللي بينا..
مهند والشله اللي معاه فا دمهم..
مهند: ما عجبتك القسمه يا سلطان..
سلطان: الا...بس اتوقع اني حر بفلوسي..
رائد: انت حر..بس تحتاجها اكثر...
عبد المحسن: وفرها لنفسك احسن..
سلطان: قلت لكم انا حر...فلوسي لو احرقها محد له دخل فيني..ويله عن اذنكم "ومشى كم خطوه"
مهند صرخ: راح تجي معانا في المره الثانيه..؟
سلطان وقف بدون ما يطالعهم: ما ادري ...اتصلوا علي "وطلع مع الاستراحه"
ثامر لحقه بعد دقايق..
مهند بحقد: طيب يا سلطون لا اكسر خشمك ما اكون مهند..
&&&&&&&&&&&&&&&&&&&&&&&&&&
مدى شافت ابوها لسه داخل وجلس بالصاله كالعاده فاقد..وجلست عنده..
:يبه..
ابوها ما رد..
:يبه...ابو سلطان..
بدون نفس: نعم..!!
مدى : تتوقع كم الدين اللي عليك..؟
ابو سلطان عصب: الله يلعن هالديانه..ما ملّوا..
مدى ضحكت: يعني ما عندك نيه تسدد..تبيهم يملون..محد يمل من حلاله..المهم يبه ما تعرف كم بالضبط..
ابو سلطانه ولسانه ثقيل: وانا ايش دراني عنهم..جعلهم ما ياخذون ريال..
مدى ضحكت وهي كلها الم: بعد ما كلت حلالهم تدعي عليهم..
وسمعت صوت الباب الخارجي ينفتح..
:مدى صاحيه؟؟؟
مدى: ما جاني النوم...
جلس جنبها: ليه..؟؟
مدى: قلت احسب دين ابوي واشوف كم ...؟
سلطان حك راسه: اتوقع انه مبلغ كبير...
مدى تنهدت: عارفه..بس ابي اعرف كم..عشان ابدا اسدد فيه..ملينا والديانه تدق بابنا...
سلطان بثقه: خلاص ولا يهمك انتي خلي دين ابوي علي..
مدى: هههه لا يا اللي عنده مال قارون...
سلطان: لا اتكلم من جد...خليه علي...انتي عليك التزامات كثيره...
مدى استغربت: ومن وين الفلوس..؟؟
سلطان: ادبرها..
مدى: طيب وشلون...؟؟
سلطان قام يودي ابوه لغرفته: انتي ما عليك اخوك يحلها..
واخذ ابوه بيده وسنده عليه وراح لغرفته..
مدى والافكار تاخذها يمين وشمال...ما تقدر تشك باخوها وبنفس الوقت الشك مالي قلبها..
&&&&&&&&&&&&&&&&&&&&&&&&&&