تجري الرياح وهذي السُفْنِ تجري
والعمر يمضي مايعوّد لماضيه
ولكِل عبد اعمال وكتاب مقري
حقه يجيه ولازم الدين يوفيه
والعمر يفنا وانت فالحَبْ تذري
والطلع ينبت لالقى حي يسقيه
بكتب معانيّه وانا الرب يدري
عالم الأسرار والكون مجريه
يعلم بماشلته وماشال صدري
من لي سواه إليا تعثرت برجيه
وآرجيييك ياقافي توفّي في شعري
وإليا قصربي شي تكفى تغطيه
مدام جيتك والقَلَمْ حيل مبري
والخط له معنى بخطّه وابا اعنيه
انت الدليل العاقل وشلت قدري
تفزع لياجيتك ولي علم مبدِيه
شيٍ في نفسي لا تذكرت يطري
والبال كيف إليا تذكرت ابا الهيه
اسرح مع الهاجوس فالليل وأسري
محدٍ قضى ليله كما ليلي اقضيه
اذكر زمانٍ طال انا فيه صبري
مرّت ليالي العُمر ماني بناسيه
راحت سنين وراعي الصبر يدري
يدري عن الأحوال والطرف مغضيه
ياما على الزلات والطعن غدري
اصبر وأسجل وأنسى ماصار وامحيه
الطيب مربى والعفو صار مغري
إليا عفيت يزيد من كنت تعفيه
والنَّاس تبغى وإن تعذّرت عذري
محدٍ يباه ولاهو العذر مرضيه
بقفي عن الجاحد على الله أجري
واللي نفى بجحود بالصد بنفيه
نذرٍ عليّ ونذر لأوفيه نذري
دربٍ تركته ماني اليوم ماشيه
هذي طبوعي ماهو الطبع مكري
واللي زرعلي الشوك بالكف يجنيه
يالله ياوالي وبيديك امري
ياللي ليا ضاقت على العبد يدعيه
ادعيك تلطف في زماني وتبري
علة صويب الغدر يالله وإنجيه
ياعلمٍ بثقال من فوق ظهري
تعلم بما نظهر وما احنا نخفّيه
تغفر ذنوبي كان قد زاد وزري
ياللي تميت الحي من ثم تحييه