[دامي ♥]

السلام عليكم ورحمة الله

كل الشكر الى مشرفي همس القوافي .. لاتاحة هذه الصفحه وغيرها من الصفحات .

هذي قصيدة "لطيف الروح "

من اختياري واتمنى ان تروق لكم

جيت أتظلم سيـدي وأطلبـك لفـت النظـر=هل تنصف المظلوم من ظلم الزمان اللي وطـاه
معذور لو جيت أعتذر غيري تعذر وأنعـذر =ماخطيت لكن الزمان أخطـى وحملنـي خطـاه
حقٍ علي أصبر ومن صبّر على شيء صبر =والصبر لو فيه المـرارة مـن ملـذات الحيـاه
على سفينة حبكم ظميان في عرض البحـر =هبت عليه العاصفـه ثـم انتثـر ماعـون مـاه
يبّس شفاياه الظمـا ولا تصبّـر مـا قـدر =ولا شرب من البحـر زاد الظمـا علـى ظمـاه
بين البدايـه والنهايـه لا إتجـاه ولا مفـر =يقبـل ويقفـي يستديـر بـدون وجهـه وإتجـاه
والموت قام إدارج التابوت لأبـواب القبـر =والموج غاضب والكفن منسوج بخيـوط الوفـاه
وحارت بعينه دمعته لوجات في صلد الحجر =ذاب الحجر كما يذوب الكحل فـي عيـن الفتـاه
قطع رجاه من الحياة وبّركـه حكـم القـدر =بارك كما يبرك بعيـر شـال حمـل مـا قـواه
ما هو بوده يلفظ أنفاسـه ولا حولـه بشـر =أمـا صديـق بيّحـه وإلا ولـد عــمٍ بـكـاه
وإلا عفيفاتٍ يطرَّنّ الجيـوب مـن القهـر =هذي رمت عنها القناع وذي رمت عنهـا العبـاه
على ظهر سفينته يطـوي مسافـات العمـر =مستوحش وحشة نبـي الله يونـس فـي دجـاه
فجأه وهو ساهي خطف عينه سنا برق ظهر =يبرق على بعد المدا ويضيح فـي الغبّـة سنـاه
وحنت مباكير الرعود وهب نسناس المطـر =ريح المطر يطرق وريده والسحب غطت سمـاه
وأسقاه ربي من سحابه وأنجلى عنه الضجر =وشرب وصدّر وأرتوى وأبحر على درب النجاه
وتذكرك يا ظامر السرجوف يا ترف النحـر =يا غايته ومناه فـي دنيـاه ويـا شمعـة هـواه
أنت السفينة والبحر لا جاك علمي والخبـر =أنت الظما والمـاء بليّـا شـك وبـدون إشتبـاه
البارحة لك وأمس لك واليوم وأيـام العمـر =الليل ليلـك والنهـار يشـع مـن خـدك ظيـاه
يابو جديل أشقر مثـل الشعـاع إذا انتشـر =وإلا كمـا نبـع الغديـر اللـي تحـدر للوطـاه
يابو حجاج دارته تشبه هلال أتلـى الشهـر =والخشم سيف جّرده حامي السريـه مـن خبـاه
والعين نجدية ترعرع في محاجرها السحـر =لا سجت برموشها جـرت فـؤادي مـن عـراه
خدٍ كما روض الزهر وإلا قمر خامس عشر =من استلذ بحبتـه حـوّل علـى جمـر الشفـاه
جمر الشفاة اللي تواقد فوق وضـاح الثغـر =ومبسمـك لا وا هنـي مـن قبلـة و إلا سقـاه
ياقوتة فـي رقدتـك كنـه مـبللها الخمـر =خمر الثمان ومن طعم خمر الثمـان أدرك منَـاه
والعنق عنق الجازية لا روّحت حل العصر =لا روحت من بطن وادي وامرحت في اللي وراه
وتفاحتيـن بابليـة فـي بساتيـن الـصـدر =الصدر راوي والخصر طاوي كما خصر المهاه
فخذك فخذ بكر تغض الطرف وتحب الستر =والساق تحفه عـاج لا مثلـه ولا فـي مستـواه
وخضاب كفك جنةٍ خضراء على ضفة نهر =وإلا جناح الطير لا فزعه حـس قنـاصٍ رمـاه
هذي وصوفك يا لطيف الروح يالظبي العفر =وأنت الذي ربي على كـل المزاييـن اصطفـاه
وأنت الذي طيفك يسامرني على ضوح القمر =أوسده يمناي وأقلـب صفحـة الذكـرى معـاه
وقف ترى عمري بدونك يا بعد عمري هدر =وإلا تعال أودعك وأكتب معـك لأهلـي وصـاه
وصاة مجنون قضى نحبه وهو يهذي شعـر =يهذي بحب اللي غرس رمح المحبه فـي حشـاه
يا سيدي حلمك علي وأنا أعتذر عن ما بـدر =أصفح عن المذنب ولا تسمـع دعايـات الوشـاه
يا ونتي ونة كسير عظم ظهـره مـا جبـر =و إلا فونة الأسحم اللي طاردينـه مـن عشـاه
وأنا حصان طمرته تعجب عيونـك لا عثـر =يصهل صهيل العز والطـراد مـا يلحـق مـداه
ياما عليك أجـر ونّـات العشايـا والفجـر =وأبكي كما يبكـي يتيـم يكسـر الخاطـر بكـاه
هذا وأنا سيدي جيت أطلبـك لفـت النظـر =هل تنصف المظلوم من ظلم الزمان اللي وطـاه

وسلامتكم

مع اطيب تحيات دامي خاطر