يا الله أخليكمـ مع الجزء الأول من القصة
:.:الـجـزء الأول:.:
طلعت ريمـ من غرفتها و نزلت لغرفة الطعامـ بهدوء و شافت جدتها (جدتها) تجهز الريوق(الفطور)
ريمـ : صباح الخير جدتي
أمـ فيصل: صباح النور حبيبتي .. يا الله تريقي عشان تلحقين ع المدرسة
ريمـ تشوف الأكل الي ع الطاولة ما لقت الي تبيه:
جدتي أبي كورن فلكـس
أمـ فيصل : لا اكلي شي مفيد
ريمـ نزلت راسها (ريمـ دايمـ تنزل راسها إذا زعلت بدون ما تتكلمـ)
و بهذي اللحظة يدخل فيصل مع اخته فاطمة كانوا يسولفون
فيصل: صباح الخير لأحلى أمـ بالدنيا (و يبوسها على راسها)
أمـ فيصل: صباح النور يا وليدي
فاطمة: صباح الخير يمه
أمـ فيصل : صباح النور و أخيرًا قررتي تتنازلين و تحضرين محاظراتس
فاطمة: يمه الدكتور ما يعرف يشرح ليش أحضر يعني! و أساسًا دراستي حفظ مو فهمـ يعني ما احتاج أحضر المحاضرة
أمـ فيصل: و في دكتور ما يعرف يشرح!
فاطمة: اييي في واجد دكاترة ما يعرفون يشرحون.. أنا بحضر اليومـ لأنه الدكتور قال راح يبتدي ياخذ الحضور و الغياب بس
فيصل انتبه إنه ريمـ ما تاكل : ريومتي شفيتس ما تاكلين حبيبتي؟
ريمـ : أبي كورن فلكـس
فيصل : زين قولي للخدامة تجيبه لتس
أمـ فيصل: فصووول لا تدلعها خلها تاكل هذا أحسن لها
فيصل: بس اهي ما تحبه .. خليها على راحتها يمه لا تضغطين عليها
أمـ فيصل: الين متى تخليها على راحتها! اسمع الكلامـ يا فيصل و خلها تاكل هالريوق
فيصل: بس يمه تسذا ما راح تاكل ما ابي بنتي تروح المدرسة (جوعانة)
أمـ فيصل: انت ما منك فايدة.. و انتي(التفتت على ريمـ) روحي قولي حق ميري (تجيب) لتس كوفلوكـس
فاطمة: ههههههههههههههههه يمه اسمه كورن فلكـس
ريمـ راحت المطبخ بسرعة قبل ما تغير جدتها رايها
أمـ فيصل: الي اهو خلها تجيب لها السمـ الي تاكله و تخلي الأكل المفيد عشان يرتاح أبوها
فيصل: يا الله صباح خير.. شفيتس على ريومـ يمه.. بنتي فاقدة حنان الأمـ .. المفروض تعوضينها عن حنان نورة الله يرحمها مو تقسين عليها
أمـ فيصل(افتحت عينها ع الآخر): أنا قاسية على ريمـ يا فيصل!
فاطمة تحاول تتدارك الموقف: لا يمه فيصل ما يقصد
فيصل: أنا أقصد إنه ريمـ توها صغيرة و ما له داعي أضغط عليها و أجبرها على شي ما تبيه
أمـ فيصل: هذي بنتك و انت حر ..و انتي و خري عن طريقي (تدز فاطمة)
فاطمة: و أنا ش ذنبي يمه تطلعين حرتس من فيصل فيني
فيصل: يمه الله يهديتس ش هالكلامـ ريومـ بنتس بعد مو بنتي بروحي
أمـ فيصل: توك تقول إني قاسية عليها!
فيصل: ما كان قصدي .. الله يهديتس يا يمه كل هذا بس عشان ريومـ قالت تبي كورن فلكـس؟
أمـ فيصل : لا الموضوع أكبر من تسذا و انت عارف هالشي
ريمـ دخلت غرفة الطعامـ مرة ثانية : بابا أنا خلصت
فاطمة تحاول تلطف الجو: ههههههههه شنو هذا ريوومـ طالع لج شارب أبيض ههههههه
ريمـ : كنت أشرب حليب
فيصل: عفية على بنتي الشاطرة .. يا الله حبيبتي روحي غسلي عشان نروح المدرسة
ريمـ : زين
*
نفس اليومـ العصر
أمـ فيصل تسولف مع صديقتها أمـ خالد ع التلفون و فاطمة تتابع مسلسل بيت من ورق و ريمـ قاعدة ع الأرض مندمجة تلون في دفتر تلوينها
و يدخل فجأة سالمـ مع زوجته نوال
سالمـ: السلامـ عليكمـ
فاطمة تقومـ تسلمـ على أخوها و نوال: هلا والله في المعاريس
نوال : هههههه أي معاريس فطومـ الله يهديتس صار لنا 3 شهور
ريمـ تركت الألوان الي في يدها و ركضت عند خالها الي شالها و باسها على خدها
سالمـ: هلا بحبيبتي الغالية ريوومـ شلونتس ؟
ريمـ: زينة
أمـ فيصل بعد ما سكرت التلفون : هلا سالمـ .. شلونتس نوال؟
نوال راحت سلمت على خالتها و سالمـ نزل ريمـ ع الأرض بس مسك ايدها و راح عند أمه و سلمـ عليها
رجعت فاطمة قعدت في مكانها و سالمـ قعد يمـ نوال و ريمـ قعدت يمه
سالمـ: فاطمة قصري على صوت التلفزيون نبي نسولف مع أمي
فاطمة: بس أنا متابعة المسلسل
سالمـ : قومي شوفيه بغرفة ثانية
فاطمة: بسمع سوالفكمـ و أتابعه بنفس الوقت
أمـ فيصل: سجليه و سولفي معانا و بعدين شوفي التسجيل
فاطمة: لا ما لي خلق
أمـ فيصل: بتقومين و إلا شلون!
نوال: وااي فطوومـ إنتي على منو طالعة كـسلانة تسذا !
فاطمة: زييييييييين خلاص..بسمـ الله كلكمـ قلبتوا علي! ريومـ قومي سجلي المسلسل و قصري ع الصوت
سالمـ: لا ريومتي ما تقومـ.. المسلسل انتي الي راح تتابعينه قومي سجليه حق نفتس
فاطمة: لا والله! شفيها يعني لما أطلب منها و بعدين ترى ريمـ مو ناقصها دلع يكفيها دلع أبوها
فيصل: شفيه أبوها بعد! لا إله إلا الله 24 ساعة باليومـ طايحين حش فيني
ريمـ متعودة أول ما يرجع أبوها من الشغل تروح له و تقعد معاه .. فأول ما دخل راحت عنده و باسته على خده
سالمـ: ريييييييييييييييمـ هذي جزاتي الي أدافع عنتس ! أول ما دخل أبوتس هديتي ايدي و ركضتي على حضنه!
فيصل: احمـ احمـ .. و ما الحب إلا للحبيب الأولِ
سالمـ : زين نشوف من يدافع عنتس يا ريمـ
فيصل : لا يا حبيبي طوول ما أنا عايش بنتي ما تحتاج غيري الله يخليني لها
أمـ فيصل: اي بس ما تقدر تسوي كل شي حق ريمـ .. ريمـ بحاجة لأمـ
فيصل بعصبية: يـــــــــــــــــمـــــــــــ ــــــــــه
أمـ فيصل: نعمـ؟ قلت شي غلط؟
نوال(تحاول تطلع ريمـ من الصالة): ريومتي عندتس دفتر تلوين غير هذا ؟
ريمـ: اي عندي واجد بغرفتي
نوال: زين وريني اياهمـ
ريمـ راحت غرفتها و لحقتها نوال
بعد ما تأكد فيصل إنه ريمـ بعيدة و ما تقدر تسمع كلامهمـ
فيصل: شفيتس يمه؟ شلون تكلميني بهالموضوع قدام ريمـ؟
أمـ فيصل: يعني تبي تتزوج بدون ما تعرف؟
فيصل : و منو قال إني أبي أتزوج أصلن!
سالمـ: يا جماعة ذكروا الله ما له داعي العصبية تكلموا بهدوء
فيصل(يحاول يهدي نفسه): لا إله إلا الله
فاطمة: ملينا من هالسالفة كل يومـ تعيدون و تزيدون فيها .. انتوا ما تتعبون؟
أمـ فيصل : مو عاجبتس لا تقعدين معانا ذلفي غرفتس
فاطمة صعدت غرفتها بدون ما تعلق
سالمـ : يمه يا قلبي يا حبيبتي خلي فيصل على راحته متى ما حب يتزوج راح يقول لتس .. انتي الحمد لله عندتس عيال غيره إذا على سالفة الأحفاد شوفي عندتس ريمـ و فهد و مريمـ و لولوة و إن شاء الله بتشوفين عيالي و عيال فطومـ
أمـ فيصل: السالفة مو سالفة أحفاد الحمد لله كلكمـ فيكمـ البركة.. الله يخليكمـ و يحفظكمـ لي و أشوف عيال عيالكمـ يا رب.. السالفة إني ما أبي أخوك يعيش وحيد
فيصل: عارف قصدتس يا يمه بس عندي ريمـ .. ريمـ مالية علي الدنيا كلها و تكفيني
أمـ فيصل: باجر تكبر و تتزوج و تروح بنصيبها و تبقى انت بروحك
فيصل: بنتي مستحيل تستغنى عني راح تزورني دايمـ مع زوجها و عيالها إذا الله كتب لها
أمـ فيصل: و لو.. ما راح تكون زيارتها كل يومـ .. راح تمل من الوحدة
فيصل: أستغفر الله يا ربي.. أنا بروح داري
و صعد غرفته
سالمـ : حرامـ عليتس يا يمه فيصل توه راجع من الدوامـ تعبان و تدرين إنه ما يحب يتكلمـ بهذا الموضوع .. ع الأقل كان اخترتي الوقت المناسب
أمـ فيصل: اي حرامـ علي لأني أحبكمـ و أفكر في مصلحتكمـ (راحت غرفتها و هي متضايقة)
سالمـ يكلمـ نفسه: يا ربي.. ش سالفتهمـ الواحد ما يعرف يتكلمـ معاهمـ إلا زعلوا!
الفصل الأول عبارة عن تعريف لكمـ بالشخصيات و أسلوب تعاملهمـ مع بعض
الأحداث تبدي من الجزء الثاني إن شاء الله بس بعد مالقى ردودكم
".