السـلام عليكـم ..
عطر الله صباحكم ومسائكم
بالأنس والمسرات وطاعة
الرحمن
هأنا أعود لكم بعد نجاح روايتي (ورود الأمل برائحة الألم) التي كنتم السبب بنجاحها بعد توفيق الله سبحانه و تعالى ،، عدت لكم
لكن هذه المره بـ(قصه) وليست روايه
في قصتي هذه سأصور حياة المراهقات ومعاناتهم
خاصه حين ينفصل الأم والأب ويكونون هم الضحيه
أو حتى لم ينفصلوا !!!
في قصتي سأكتب وأنقل شعورهم
فقد تكونون عايشتم أمثالهم
في قصتي هذه سأنقل معاناة
المراهقات على جزئين فإن
أعجبكم الجزء الأول أكملت لكم الجزء الأخر وإن لم
يعجبكم سأكون شاكره لكم وآسفه على وقتكم الثمين
الذي ضاع بقراءة قصتي ،، وأنا لست من الكاتبات
اللواتي تترك من شجعها وقرأ قصتها أو روايتها بدون
تكملتها (واسألوا من قرأ روايتي عن انتظامي في كتابة
الأجزاء رغم كل الظروف) أترككم مع....
** همـــــوم المراهقـــــات **
في أفخم مدارس الشرقيه وأغلاها
جالسه عالكرسي بطريقتها العربجيه و(سروال السنه) الطويل واضح من تحت المريول الواسع وساقها اللي نقول عنه ساق رجال من كثر الشعر واضح من تحته ،، وشعرها موقف (سبايكي) ومقصوص بوي ،، و صدرها مفتوح وبان نحرها المزينته بعقد رجالي وريحة العطر الرجالي تصرع أصلا مجرد منظرها بعيد كل البعد عن الأنوثه ،، وتناظر البنات وساكته
جلست بجنبها صديقتها وماتقل عنها بالخرابيط وقالت بصوت رجالي:الله يلـ###
ناظرتها من ورا النظارة الشمسيه الرجالي ورجعت تناظر قدام وقالت بهدوء وصوتها المبحوح واللي تزيده بحه وخشونه:شفيك ؟؟
جاوبتها بالضجر:بنت الـ#### دينا مادري على إيش شايفه نفسها ؟؟
بنفس الهدوء وهي تناظر البنات:أنا قايله لك واضح عليها مو راعية هالحركات وبتفشلك_ناظرتها_بعدين من زينها ألحين
أشرت بإيدها وقالت بعربجيه طاغيه:والله إنها فلقه
مرت بنت مع شلتها وضحكت ضحكه عاليه دلوعه:هههههه
صفرت:الله يلـ#### هذي الفلقه مو خويتك
البنت سمعتها والتفتت وقالت بدلع:نعم ؟؟
:أبوك ياالعيون ارحمينا
البنت أجابتها بضحكه وكأنها تعطيها القبول المبدئي:ههههههه
وقفت بتروح لها لكن صديقتها مسكتها:مالك نسيت ساره
مالك أو ملاك بالأصح ناظرتها:عادي هذي تسليه
صديقتها:والله لو شافتك بتزعل
ملاك سحبت إيدها:أقول طيري بس أنتي وساره حقتك وراحت مع البنت اللي ابتسمت لها
في زاويه أخرى من زوايا المدرسه ،، جالسه وسانده ظهرها على الجدار وماسكه صورة ماجد المهندس وطايحه تبويس:آه يالبيه أحبه
صديقاتها:ههههههههه
وحده من صديقاتها:ربى ممكن أسألك سؤال ؟؟
ربى وهي تتأمل الصوره:أسألي
صديقتها:شتحسين فيه ؟؟
ربى:أحس إني أحبه أحس إنه ملكي أحس بقلبي ملكه وحلاله
صديقتها:والله تلاقيه سكران ومادرى عنك
ربى ضمت الصوره:آه فديته ومادل بيتي
صديقتها:لا أنتي ميؤس منك هههههههه
في زوايه أخرى وشخصيه جديده
جالسه في دورات المياه بداخل الحمام وتحكي تلفون بصوت وااااطي وهي تلعب بشعرها:هههه علينا بلاغه
الطرف الثاني بصوته الرجولي:أوه الله يعينكم غثيثه حصة البلاغه
بدلع:بالعكس أحبها
:ياأختي أحبها عشانك
:هههههههه تسلم
:آه فديت هالضحكه ، بنو
البندري:لبيــه
:يلا عاد متى يحن قلبك وترسلين لي صورتك أبغى أشوفك
البندري:مو أنت شفتني عالحقيقه خلاص شتبي بالصور ؟؟
بكذب:عشان كل ما طفشت أناظر وجهك وأتامل ملاحك وأهيم فيك وأحس إنك جنبي
البندري:أوكي أرسلك صوره بس ماعندي صوره حلوه
:انتي لو صحيتي من النوم تهبلين
البندري:ههه تسلم
قصر صوته:يلا حياتي جا الدكتور أحاكيك بعدين ولا تنسين الصوره باي
البندري:باي
باس الجوال وسكر الخط ،، ناظرت الجوال مبتسمه بعدها دخلته بصدرها وطلعت ولا كأنها مسويه شي
(مـــلاكـ _ ربـــى _ البنـــدري)
هم أحبابـــي هذهـ المـرهـ
العصـــر
مــلاكـ جالسه في صالة بيتهم وتناظر فلم أكشن وتاكل فشار ،، مشعل (أخوها) نزل وبإيده بزته العسكريه:السلام عليكم
ملاك ناظرته وابتسمت ابتسامه تطيح الطير من السما لكن للأسف مشوهتها بالحلقات والستايل البوي:وعليكم السلام على وين ؟؟
مشعل:بأروح للرياض لأمي تجين معاي ؟؟
ملاك ناظرت البلازما:لا إذا أمي ماني رايحه
مشعل جلس بجنبها وقال بحنان:ملوك أمي تبغى تشوفك من زمان ماشافتك من دخلتي متوسط والله كل ماأزورها تقوم تبكي وتـ...
ملاك قاطعته وهي توقف وتقول بطفش وعصبيه:أووووف كل ماشفتني عدت نفس الحكي_ناظرته_قلها هي ماتبغى تشوفك وإلا أقول قلها ماتت وفكني منها وطلعت لغرفتها فوق
مشعل ناظرها (الله يهديك):..
ملاك وهي تطلع درجهم الطويل كانت بوجهها ميساء (زوجة أبوها) اللي قالت:شوبك ؟؟ (شفيك)
ملاك دفتها:مالك شغل حلي عني وطلعت
ميساء ناظرتها باستغراب وناظرت مشعل:شو مالها ملاك زعلانه ؟؟
مشعل سحب نفس ووقف:أنتي اتركيها ويصير خير
ميساء ابتسمت ولا كأنه محتقرها:شو رايح لماماتك ؟؟
مشعل:مالك شغل وأخذ بزته وطلع
ميساء رفعت صوتها:أحكي لها ماما ميساء بتسلم عليك
مشعل سكر الباب بقوه من القهر:طراااااخ
ميساء:ههههههه
في بيت البندري
جالسه في الصاله وتبرد أظافرها و صوت الدي جي مالي المكان
أخوها (حذيفه) دخل ورمى بنفسه عالكنب:هيه انتي روحي جيبي لي غدا
البندري مركزه مع أظافرها:ماابغى لك لسان تنادي الشغاله
حذيفه صرخ:سيتـــي سيتــــي ياحماره
سيتي جات تركض:نعم
حذيفه بنفخه:جيبي لي الغدا بسرعه
سيتي:حاضر وراحت بسرعه
جلسوا ساكتين ويسمعون الأغنيه .. قطع سكوتهم صوت رنين جوال حذيفه بنغمة أجنبيه مزعجه ،، ناظر الشاشه وابتسم ورد بصراخ:هلا حيا الله الخوي
الطرف الثاني:الله يحيك
حذيفه:وينك يارجال اشتقنالك
الطرف الثاني:اشتقت لنا وإلا لسهراتنا ؟؟
حذيفه:ههههههه اثنينهم
الطرف الثاني:أجل جهز نفسك اليوم السهره
حذيفه:إيه يارجال هذا الحكي الصح متى ؟؟
الطرف الثاني:من ألحين حياك
حذيفه:ينصر دينك ياشيخ ألحين جاي_سكر ووقف_خلاص ماابغى غدا
البندري:...
حذيفه ناظرها باحتقار وطلع
في بيت ربـى
جالسه قدام البلازما وتناظر كليب ماجد المهندس وتردده معاه ومنسجمه وخاااقه خقة ميب صاحيه
الشغاله جات:روبى
ربى مندمجه وتناظر:نعم
الشغاله:بابا عند الباب
ربى طاح صحن الحب منها وناظرتها بصدمه:اييييش ؟؟
الشغاله:باسم الله أنا قول بابا عند الباب
ربى بدت أطراف تنفض:أوكي منو بالبيت ؟؟
الشغاله:مافي بس انتي وجوانا
ربى رجعت خصله طاحت من شعرها الناعم ورا أذنها بإيد ترجف:...
الشغاله:خلي يدخل ؟؟
ربى صرخت فيها:لا طبعا مجنونه تدخلينه
الشغاله توها بتنطق قطع عليها باب البيت الحديدي وهو ينفتح بقوه ويدخل رجل أربعيني وهو يصرخ:ربــــى ربــــى وينك ؟؟ ربى حطت إيدها على فمها وعيونها غرقت دموع:...
الرجل أو أبو ربى بالأصح بدا يتلفت بالبيت وطاحت عينه عليها ، ابتسم بحنان وقرب منها:ربو حبيبة بابا ليـ...
ربى قاطعته وهي تصرخ وترجع ورا وإيدها على أذنها ومشهد طفولتها ينعاد قدامها:لاااا ابعد عنــي لاااا
أبو ربى يقرب:ربو أنا بابا ليه خايفه ؟؟
ربى تصرخ ودموعها مغطيه وجهها:لا أنت تبغى تقتلني مثل ماقتلت ماما ابعـ...
أبو ربى قاطعها وهو يمسك إيدها بقسوه وملامحه الحنونه انقلبت ١٨٠ درجه وتحول لوحش وقال من بين أسنانه:هذي مو ماما لا عاد أسمعك تقولي هالكلمه فاهمه
ربى تناظره بضعف وانكسار وصوتها بح من الصراخ وبدت تشهق:...
صرخ:فاهمه؟؟
ربى رجعت تصرخ:اتركني أنت بتقتلني اتركنـــي
أبو ربى توه بينطق قاطعه أخوه وهو ويبعده عنه:غســـان اترك البنت
أبو ربى ناظره:هذي بنتي
ربى ارتمت بحضن عمها:بابا ابعده عني يبغى يقتلني
عمها ضمها لصدره:لا خلاص لاتخافين
ربى:.....(تبكي)
أبو ربى يتقطع من داخله بنته وحيدته ترفضه وتروح لحضن غيره (صعب أشرح لكم شعوره) أشر بإيده:بس ....
أخوه قاطعه وهو ياشر بإيده:غسان خلاص_جلس ربى وسحبه ودخله المجلس_ليه جيت ؟؟
أبو ربى بانفعال:جيت أشوف بنتي ومحد يقدر يمنعني من شوفتها
أخوه مسك كتفه:غسان اهدى
أبو ربى صدره يرتفع وينزل من العصبيه:...
أخوه يحاول يهديه:غسان أهدا أنت تزيد هم بنتك كذا
أبو ربى جلس وقال بانكسار ونظره تايهه:بنتي يافهد بنتي ترفضني بنتي وحديتي تخاف مني وغطى وجهه يخفي دموعه
فهد جلس بجنبه وحط إيده على كتفه:معليه ياغسان هذا مو بإيدها ولا بإيدك_بتردد_ولا تلومها ترا اللي شافته منك مو قليل
غسان صرخ:كله منها كله من غاده هي السبب بكل اللي أنا فيه_بحرقه_حسبي الله عليها جهنم تاكلها إن شا الله
فهد:غسان الحرمه ميته لا تدعي عليها
غسان ناظره:أحسن تستاهل اللي سوته مو قليل_أشر على نفسه_أنا زوجها وماتت وأنا مو راضي عنها خل لعبها وخيانتها تنفعها الـ#### الـ....._ماقدر يكمل زياده هو يحكي عن زوجته وحبه الأول اللي قتلها بإيده بسبب خيانتها له وفي بيته ،، نزل راسه بحزن_
فهد شد على إيده:هونها وتهون ياغسان معليه اذكر ربك
غسان مسح وجهه بتوتر وزفر:استغفرالله
فهد ضرب فخذه:يلا تغدا معنا
أبو ربى وقف:ما تقصر وراي سفره لتايلند_ناظره_لا أوصيك على ربى
فهد:أفا عليك بعد كل هالعمر توصيني عليها
أبو ربى:فمان الله_حضن أخوه وودعه وطلع.