ونيت ونة من سرى الليل حشّـاش=عقب الطرب ياطا على كل منقود(1)
خلى هدوم الخزّ والجـوخ وقمـاش=ومجالس فيها من الـزلّ ممـدود
قم سوّ فنجالٍ ترى الـراس منـداش=لعيون من قرنه على المتن مرجود
يابن مهارشكبّ حمسـات الادقـاش=تاتيك حمسات الينابج بهـا سـود
ودقّه بنجرٍ يسمعـه كـل طـرّاش=أيضا إلى حرّك على الهون به زود
وحطّه بدلّة مولـعٍ كنهـا الشـاش=وبهارها مقدار خمسة عشر عـود
الهيل حطّه لا تدانـا ولـو جـاش=ومن الزباد اقنع على شذرة العـود
كنّه بعرض الصين ورسٍ إلى ناش=أو زعفران كلّمـا عـلّ مـردود
أبيه رسـمٍ للنشامـا عـن الـلاش=اللاش لا فاقد ولا هـوب مفقـود
الطيب شدّه والـردي ذاك ببـلاش=واللي يريد الطيب ماهوب مـردود
لـذاذة الدنيـا معاميـل وفــراش=وصينية يركض بها العبد مسعـود
وصفرٍ إلى جا العصر مع كلّ هباش=تطاوحن قلـب المناحيـز بالعـود
في ربعةٍ يلفـي بهـا كـل هتّـاش=يفرح بها اللي من دناياه مضهـود
يالله طلبتك عند سرحات الادبـاش=ذودٍ مغاتيرٍ ويبـري لهـن سـود
مرباعها الصمّان تبعد عن الطـاش=ومقياضها دخنة الى صرّم العـود
ياما حلا وقت الضحى طقّ شوباش=وقامت تنازى بالمناعيـر جلعـود
وأنا على مثل النداوي إلـى حـاش=تنزع كما ينزع من الكف بـارود
ومن لا يروّي شذرة السيف لاعاش=يصبح عليه مورّد الجيـب مقـدود