غضّي الطرف المعنّا ياعيوني
وارحمي نفس الشقي لا زاد همّه
وش تبين اليوم باللي مايبوني
لاتردين النظر لا مر يمّه
غضّي الشوف وتغطّي ياجفوني
بكتم الأنفاس حتى لا أشمّه
ريح طيبه خايف يحرك شجوني
والبلا لانفسي الشفقا تضمّه
طوله اللي شدني وأبدا لحوني
قمت اغني والشعر فيه أستهمه
له وصوفٍ طاغية دكت حصوني
ماقدرت اصبر عن إوصوفٍ تعمه
من شعر راسه ليا حد المتوني
من تَحَتها وصف صعب إني أتمه
احمر البسمه ترطبها السنوني
بسمته مافارقت في يوم فمه
فيه قسوه مير اقول انه حنوني
نظرة العشاق حتى ماتهمه
لانظرني حرك الدنيا وكوني
كني إبعالم جديد يروح يمه
غير إحساسي وإدراكي ولوني
والشعور اللي احسه ما اذمه
زين وأبدا فالغزل جملة فنوني
مير عاجز احتوي فكره والمه
ياظنونه وافقي مرة ظنوني
لجل اعيش إبعالم إحساسه ودمه
لايكون إبلحظة إفيومه بدوني
لين اشوفه واحفظه بالغيب اصمه
ليتني طعت الذي عنه نهوني
قالوا صعب تطول حتى يوم كمه
وليت احلامي على الواقع يجوني
كان اقوم وحالتي من فوق قمه