الاحبة في همس القوافي
سلام الله عليكم جميعا وكل عام وانتم بخير
مصافحة اولى اتمنى لها القبول
.
.
.
.
خلاص نسيتها ..
ماعاد احس اني لها محتاج ..
لواني كل ماعدّا السحر .. حنيت لسراجه
بقى من عطرها .. بعض القصيد يمرني دوّاج
وجرحن من غلاها .. تعبت الايام فـ علاجه
نسيت غرورها .. بحضورها .. ونسيت شكل التاج
نسيت ومانسيت وصالها .. عذبه وثجّاجه
نسيت الخنجر اللي شق صدري ماطرف بحجاج
نسيت ومانسيت الخاطر المتكسر زجاجه
نسيت قيادها .. وبلادها .. والراحلين أفواج
نسيت ومانسيت وداعها .. والفقد .. وخلاجه
غصب حبيتها..كانت قدر.. ما حال عنه سياج
ملت في القلب شطرن ماحدن من قبلها داجه
حزينة..حطمت فيها الجروح التاج والديباج
عنيدة..طاح كل عنادها من عالي ابراجه
غريبة..صادفت قلبي الغريب..وحظي الهجّاج
رمابي في غياهب بحرها وملاطم امواجه
يارب انك تبيح ذنوبها مالبّوا الحجاج
وبلغها رضاك ودلها للنور وفجاجه
يارب وحبها واكتب لها من كل ضيق افراج
مثل يارب ماحببتني فيها بلا حاجه
كريمة يالجروح اللي تضوّي في الصدور سراج
تصحّي الطيش .. وترد البعيد يعوّد ادراجه
سترك الله عن سود البطان .. وهرجة الهراج
وجعل حظك من الصفح الجميل وفضل منهاجه
عفينا .. وانتهينا .. وافترقنا والزمان علاج
ولاظنيت حتى بالصدف في يوم نتواجه
ولاباقي لها ذكرى معي .. غير الهجوس ادراج
وجرحن من غلاها .. صرت احبه.. واكره علاجه
اخــــــوكم
.
.
.
.
محمد