جيتك تسابقني على شوفك اخطاي
تلهث حروفي والقصيده تناديك
مع لوعة الاشواق واحزان دنياي
مبحر بدنيا الحب ناصي موانيك
يااحلى لحن حزني وتر خذني الناي
خذني ابتسامه ترتسم بين اشافيك
ياعمري الماضي ياعمري الجاي
يالهفة المشتاق يافرحتي فيك
حبي لك اكبر من قصيدي وبلواي
كل الحروف تضيع ساعة الاقيك
مشتاق اشوفك بس انا كل رجواي
انك تجيني بالهوى مثل ماجيك
وان كان لي ميزه ترى اكبر مزاياي
اني عزيز النفس تعطيني اعطيك
ان بعتني بعتك واذا كنت شراي
شاريك انا بالروح والقلب شاريك
.............................................
جيتك ودمع الشوق في نظرتي حار
منك وعليك العين ترجي عدمها
جيتك حقيقه عطرها شوقي الحار
غيمة فرح في وسط قلبي رعدها
جيتك قصيده تنتظر لفت الانظار
حتى لو انه ما يرفرف علمها
جيتك جسد في داخله يشتعل نار
وحبال غربه طول بعدي عقدها
جيتك عقب ترحال مليت الاسفار
راحة خفوقي فيك قلبي وجدها
جيتك عطش مزروع وسط الانهار
جيتك معاني شوق فكري حصدها
جيتك حروف حطمت قيد الاسوار
تنثر بقايا البوح تصرخ وحدها
جيتك قوافي ترجمت كل الاسرار
صعب على التلميح يحصي عددها
جيتك وكلي للقاء عزم واصرار
اسابق الخطوات واخفي جهدها