اسعد الله اوقاتكم بكل خير
هذي القصة قصة حقيقية حدثت معي عام1426هـ
كنت في صيف ذاك العام طالع للمخيم
وطبعاً فيه ابل خالي وغنم امي
وكان فيه في المخيم خيمة لنا
هذي الخيمة نطلع لها كل شتاء وننام فيها
وطبعاً في فصل الصيف نهجرها
المهم
كنت متضايق وودي اطلع للبر
وطلعت ذاك اليوم
وسبحان الله حدثت معجزة
فبعد ان صليت العشاء
كنت ناوي ادخل الخيمة باخذ فراش وانام خارج الخيمة
وكان في يدي سراج!!
ومن طبيعتي إذا مشيت اضرب الأرض بقوة برجلي وهذي هي طبيعة مشيي
إلا إذا كان فيه احد نايم لا امشي على الخفيف
المهم قبل ما ادخل الخيمة
كان شيء عند رجلي فكان له صوت زي الوشوشه
فلما حطيت السراج عليه هرب مني كأنه فار
الحقيقة اعتقد في البداية انه فار
لكن بعدها تأكدت أنه
حيه!!
فرفعت فراش الخيمة
وإذا حية تحتها بيضتين!!
فطبعاً كان وشيشها كان دفاع عن بيضها
فألتفت في انحاء الخيمة
وإذا شيول ( محفر )
اللي يحفر فيه التراب!!
المهم
ضربتها ضربات في حد الشيول!!
حتى قطعت جسدها
وبعدها أجهزت عليها وضربت رأسها
ثم في صفحة الشيول!! (ظهر الشيول)
كسرت البيض!!
فأخذتها ووضعتها على طريق السيارات
وخفت ان انام حول الخيمة لأني أسمع ان الداب له طراد!!
وتوجهت إلى مخيم السودانيين
وكان عند الغنم والأبل
وكان يبعد حوالي 700 متر
المهم توجهت إليه
فقلت لهم لقيت داب بمخيمنا وذبحته
وشكلي والله برجع للديرة
قالوا ماعليك كل يوم حنا نقتل (دبيب)
دبيب يعني داب بلغة السودانيين
فقلت انا بمشي
قالوا تمشي عشان خايف من دبيب
وانت اصلك بدوي
واخذوا يضحكون علي
فقلت والله لـ أنام الليلة عندكم ولو يجي الف دبيب
فقاموا وجهزوا لي سرير متواضع
فقسماً بالله العظيم يا اخواني القراء
حين جاء الفجر
وإذا محمد السوداني
عند رأسي ويقول لي
بندر دبيب!! دبيب!!
أنا توقعت انه بيخوفني عشان البارح كنت خايف من الداب!!
فكملت نومتي وتركته هو وكلامه
المهم لما طلعت الشمس
إلا المسألة حقيقة
وإذا الداب كان مقترب من رأسي متر تقريباً
ولكن ولله الحمد كان محمد مستيقظ لصلاة الفجر
فقتله
وقلت والله يامحمد احسبك تمزح علي الفجر
قال والله يابندر إني لحقته وهو عند راسك لما كنت اصرخ فيك
وسبحان الله
لم يختار من كل الثلاثه إلا أنا
حينها تأكدت إن للداب طراد
والداب لا يميز الإنسان بصوته او شكله
إنما براحته
وحاسة الشم عند الداب في لسانه
وفعلاً كان دخل الخيمة ووجد زوجته وأبنائه مقتولين!!
فقطع 700 متر تقريباً كي يثأر مني
فيا اخواني القراء
احذروا
وإياكم ان تذبحوا داب
وتنامون في نفس المكان او قريب منه
فصدقوني سوف يلحقكم طراده
أسأل الله ان يحفظ الجميع
فوالله انها معجزه من الله الذي انقذني
تحياتي واحترمي