إرجعي يابنت راحت في سيول الغدر عاد=جاها سيل ٍ قد تسمى سيل من خان الأمانه
أهـ . ياقلبي عليها كيف انا اطيق البعاد=من يملّي الدار عقب اللي ضوالي في مكانه
وش يفيد إن كان سمّو مايسمونه فساد=الفساد اللي جرالي بالحياه وشهو عشانه؟
يافساد الطبع ماني واقفه ضِدِه عناد=مير خل البنت صدري غص ياويلي حنانه
هلّت إدموعي وهمّي زاد فالدنيا وزاد=فوق هم القلب هم ٍ يقطع اليومه رجانه
هم خلاّ اليوم جِده كل مافيها سواد=كِنّها الدنيا تخلّت مابقى فيها سوانه
راحت اليومه ضناي وكم بكى اخته ( زياد ) =ماقطعها يوم راحت بالذِكِر مره لسانه
قال يمّه وين اختي وين وديتوا سعاد=قلت راحت ياضناي وكل يوم ٍ في حضانه
كان إلامِنه بغاها جا يناديها ثعاد=لجل تلّعب وإتّسلى دوم يعطيها حصانه
مابقى له في حياته كود يالذكرى جهاد=كل مامرّت طواري الاخت يبكيها زمانه
أهـ . ياقلبي تقطّع لوهو اليومه جماد=ماصِبَر واللي يشوفه ( فوق ) لاقيل الخيانه
من ربى في دار عِز ويسرق اليوم البلاد؟=خان دار وخان ربع وخان حتى فالديانه
نار في صدري ولاهو عاقِب النار الرماد=نار ماتطفي وانا اللي في لهايبها مدانه
ليتني كِنْت وبِدَلْها مير ليت القول فاد= لولا ديني في صلاتي عقلي زوّد في جنانه
احمد الله الولي اللي عدل بين العباد=مايضيع الحق دامه بالعدل ربي كسانه
يالله اللي لارجيتك إهدني درب الرشاد=إهدني للرشد قلبي زوّدِه من صبر عانه