الشوق .. ريشة اماني .. والغلا مُحبره
والعشق بركان ما يرحم قلوب الرجال
ياسيّدي قلبي الملتاع .. جبْت خْبره
واصبحت واقع حَدثْ .. ما يقبل الاحتمال
لو كلّ من ينّكسر قلبه قدر يجبره
ما احدٍ شكى الجرح .. وهموم الحمول الثقال
ياقلبي اللي يعاني همّ .. ما احدْ سْبره
الهمّ مُتعب .. ولو جا في قلوب الجمال
لو إنّ قلبي ليامنّي نويت اقبره
يموت معْه الغرام .. ولا يجيله مجال
ماكان قلبي تعذّب .. باصغره .. واكبره
ولاصرت واقف تَحَتْ شمسك بليّا ضلال
وانا شريتك غلا .. والعِشق في مَنبره
وصِرتْ اتخيلْك لين اصبحت احبّ الخيال
اركض ورى احلام ورديّه .. وهي مُدْبره
واضيع في معمعة بعض النقط .. والسؤال
ياخي خف الله .. مادام انّ الغلا تَخْبره
وش ينقصك لو تكرّم لي بكلمة تعال
وإخذ القصايد .. ومعها الطَرْسْ .. والمَحْبَره
دام الهوى ياحبيبي هزّ روس الرجال