للنوم في حياتنا مواقف محرجه ، وفي هذه القصيده كان سبب كتابتي لها هو النوم ...
شديت عزمي بالقصايد ولا فاد = حتى القصايد من خطاي اتركتني
نخيتها آبعتذر بنت الأجواد = يمكنّها عقب الخطا ارخصتني
يمكنّها راحت أو بقلبها ساد= شخصٍ خذاها بالغرام ونستني
ويمكنّها اجتاحت على الحب ميلاد = ويمكنّها من زود حبه اكرهتني
واعدتها ويوم الأحد كان ميعاد = عز الصباح وقلت أنا له أبتني
هيأت نفسي يمكن الحظ انقاد = الله وكبر هذي فرصه وجتني
أدري مهو ميعادٍ بدار وبلاد = غير المواعيد التي صادفتني
لكن حظي نام هي عادتك عاد = تصحى وتنفعني بيوم اطلبتني
ماهي جديده ماتبي قول وانشاد = حظي ردي من يوم أمي ولدتني
نمت وتركت الموعد بسبه اسهاد=و( النوم ساس اللوم ) يامواعدتني
أدري خطاي انه كبيرٍ ويزداد = وأعرف ردى حظي إلا طِق متني
آسف عدد ماسيِّل بدارنا واد = ولا عدد ما غلطتي غربلتني
ولاعدد ماجونا للبيت وفاد = ولاعدد ما ضحكتك دوختني
عسى الأسف يلقى تراحيب وترداد = وعساني أسعد التي ما أزعلتني
هذا قصيدي يعتذر لك بما جاد = والشكوى لله كان عاذل نحتني
العرض العادي
