السلام عليكم
الله يقطع الحب شو بيزل ويغير من عيشة الواحد .. ها اليومين أمر بقصه عاطفيه قوية .. وقلبي يرقع تسن فيه سماعات شكشكة .. هي صح انها انتهت بس ما زال اثرها في نفسي ومسببه لي بعض العقد الي تبي واحد يفككها.. و أبوردها لكم عشان تعيشون معي الجو العاطفي جو الالفة والمحبة الي عشتها .. الله يلعن بليس
ذيك اليلة جالس انا و الدحمي نسولف وكنا مخربينها سهرانين الين الساعة 12 جت الساعة 12 ونص بدا الدحمي يتثاوب ومع المثاوب القوي والتوجد على النوم .. شصب ثمه ومعاد انصك .. نبية ينصك نرصصة يمين يسار ثم الرجال شاقص ... والقطه واودية يم مستشفى الحوطة العام .. حاولوا يصكونه ما قدرو ويجى الدكتور ابراهيم .. حنا نسمية دكتور:: برية .. دكتور حوطي بس رهيب وفاهم قلب الدحمي على راسة ووطى على حنتسة يبية ينصك ما فيه فايده .. طقطقناه يمين يسار ماش ...
قال مالك الا مستشفى الشميسي في الرياض .. يا دكتور بعيد وليل قال ما فيه الا ها الحل خويك فيه شد عضل قوي في حنكة ويبي له واحد مختص .. وان تركته وقت طويل يمكن يعيش باقي عمره وهو فاق ثمه .. يعني معاد ينصك ابد .. .. يوم قال ذا الكلام ... ونركب في الكراسيدا ووينك يا الشميسي ... وفم الدحمي مفتوح طول الخط وقفنا عند تفتيش الخرج ونشبوا في حلوقنا يقولون والله ما تمشون الين يصك هذا افمه كان قصيمي الي في النقطة ... يا ابن الحلال خلقته كذا قال ولا تمشون انا اعرف حركات شباب الخرج يبينا ما نعرف شكلوه الين رجع .. والله الحالة ..
ونحاول وحنا وياهم واشوى عقب الشين اقتنعوا وخلونا نمشي ... طيران للمستشفى امشي 80 قلت اما غناة الذيب والا مماته ... ونوقف عند المستشفى .. عاد وانا جايين ماكان في السيارة مكيف وفاتحين ادريشة .. ودخل فيه بعض الطيور والجراد والفراش الي على الخط .. جا الدكتور سلامات قلت والله الرجال تثاوب ولا عاد انصك ثمه ونبيك تصكة والا تدبره ..
قام الدكتور يكشف ويناظر ومع الانهماك والقلق .. ويناظر رجلين الدحمي الينه الله يكرمكم ذاك اليوم لابس جزمه قال الدكتور افصخ جزمته عشان يرتاح .. قلت لا يادكتور بيتسبب في مشاكل على المستشفى واختناقات .. قال لازم يرتاح .. الله يعزكم وافصخ جزمته وتفوح ذيك الريحه تقول منفقش في وسط الغرفه كرشة .. معاد قويت اقعد في الغرفه قلت بطلع برا حتى كان معنا ممرظتين طلعو قبلي ما بقي الاالدكتور واسمع الممرضات يقولون ان الدكتور طالب كمام وصراحة يحق له .. جلست برا .. ما دريت الا ذيك الي جايه بنقابها .... عيون وطول وش فتنه .. يا ارض احرسي .. وكلمتني قصدها لفت انتباهي ... قالت لو سمحت انت راعي الكراسيد السموك سلفر .. انا صراحه مدري وش معنا سموك سلفر...
ما فهمت قصدها قلت اكيد تحتك .. قلت ايه أي خدمة .. قالت طلعها انت صاك علينا وحنا نبي نمشي .. واطلع ابطلع السيارة والدحمي بين يدين الدكتور ولا ودي ابعد و اتركة .. البنت مشت قدامي تسنها على حمار مره تميل يمين مره يسار وامشي ورها بدون ما احس قلت بشوف وش عندها وكل هذا بحسن نية ... وقفت عند السيارة اليني لاصكيت عليهم ولا شي توقعت انها تبيني اوخرها من ها المحل واحطها في محل ثاني .. قلت بحسن نية وين تبيني اوديها يا الحبيبة ... ابتسمت و قالت بس طلعا لحد ما نطلع وارجع .. قلت توصين بشي ثاني .. ابتسمت مره ثانية من ورا الشيلة وسوت حركة بيدها كنها تقول الساعة خمس .. ما فهمتها ( كش )
.. وخرت السيارة وبكل حسن نية رفعت يدي اسلم علي سواقهم احترام له ... هم طلعوا وانا رجعت بلبق السيارة ما دريت الا البنت راجعه ثانية قالت لو سمحت .. جيت يمها قلت سمي وانا مطمن راسي وكلي خجل ما تعودت اكلم حريم .. قالت انا معجبة في سمو اخلاقك .. هي قالتها او ما قالتها .. معاد بزتني الارض .. قلت شكر وانا معجب بسماحه ذاتس ... ابتسمت وقالت انت وش اسمك .. قلت مالي الا اني اقولها اسم رومنسي وجذاب :: قلت اسمي حمد ... قالت اسم حلو ورنان انا استحيت اسئلها عن اسمها .. قالت لي انا اسمي هيلة قلت ونعم قالت ما عليك زود .. واسترسلت قائلة :: يا حمد مشينا نجلس في البخشة ..
رحت معها .. جلسنا بدت البنت تسولف عن اعجابها بي واني طلعت السيارة وهي ما سكرت عليهم يعني يقدرون يطلعون .. وما ترددت .. واني ايضاً تركت خويي وهو في امس الحاجة لي ورحت عشان اوخر السيارة وهذا الي خلاها تعجب فيني . وتحتك بي .. والا عيال الناس واجد .. شوي قالت ممكن اعطيك رقم تلفوني قلت بكل سرور قلت بس ارجوك لا تعطية احد قلت طيب عطتني رقم تلفونهم وقالت اتصل الساعة حدعش في اليل .. صراحه ها الوقت العاده اكون نايم بس قلت عشان خاطرها ناخذ فنجال قهوة مسمار (عويدي ) عقب العشاء يصبرنا الين الساعة ثنعش .. قالت انا مطره امشي هالحين تأخرت توصيني بشي يا عيوني .. ( هي تقوله لي ) قلت خلاص .. الوعد التلفون .. قالت ودي اقول لك شي ومستحية قلت قولي تستحين من شعرت قلبتس .. كلي لتس .. والماضي لتس وبكره لتس وبعده لتس .. قالت اخاف احرجك .. انا عاد تحمست وقلت قولي الي تبين .. لو تبين لبن العصفور .. قالت يعني عادي .. قلت مره عادي .. قالت ممكن سلف 400 ريال بس ثلاث أيام وارجعها...
قلت لا خذيها ولا ترجعينها.. كلي لك كم عندي من هيلة ... واعطيها الاربع مية وتودعني وعيونها فيها دموع .. مدري حزن مدري غشيانه من الظحك ... ونتفرق واروح للدحمي الين حنتسة توهم مرجعينه .. وراشين الغرفه بديتول ومنطرين الله يكرمكم كنادره برا وفيه مدخنه مليانه عود ( طيب ) .. واسولف انا وياه اشوا رجع زي ما كان .. ونجيك راجعين للحوطة ... يوم جا الساعة 10 ونص من اليل ها الكلام ليلة اليوم التالي و اشخص واتطيب واروح للكبينه .
.... ابتصل على شوقي وعلى كياني الي توه متكون .... وادق الرقم الي عطتني ويرد علي ذاك الآدمي يا شين صوته ... قال الوه وش تبا .. سكرت السماعة ما ابي احرجها قلت يمكن اخوها ... واصبر يوم جت الساعة 11 تمام وادق .. ويرد علي نفس الصوت قلت الوه ..:: قال انت وش تبا .. من اليوم وانت تتصل وتصكه .. انت تبا تبلغ . عندك شي تبا تقوله .. قلت على بالي بصرفه لا أحرج البنت .. لا هذا مهوب بيت ... كاريس بشار .. قال بشار هذا وشنهو .. هذا الدفاع المدني قسم الناصرية .. من الروعه والصدمة .. سكرت بدون ما اقول مع السلامة ..... حسبي الله عليها ... عقب ما قال الكلام حسيت اني ملعوب علي .... والاربع مية راحت ... والقلب انكوى .. والحب اتبعثر ...
وهذا قصتي باختصار وسلامتكم
العرض العادي
