بعد بحث دام شهورن وسنينن ( من اولها نصب ) من الكرف والتشرد في انحاء الديره عشان نطلع لكم بهالموضوع الذي يختص بمعالجت ظاهرتن بدت تنتشر في مجتمعنا المحافظ
وتتفشى كالجدري بين الناس وتضرو بمصلحتي الشعب والامه <<<~~ شكلهن بيخطبن للجمعه ، وبمساعدت مراسلاتونا من البنات الي وزعناهن في الشوراع والاسواق والاماكن العامه عشان يلقطون لنا الصوره الصحيحه للوضع الي داير <<~~ ماودكن تنطن في السولافه ، نروزو قدامكم هالقضية الي نتمنى منكم التبرع لصالحها والمساعدتو في علاجها بالمتسشفيات والدخاتره الخصوصيين
تخيل نفسك تمشي بشارع من شوراع الرياض اللي تشرح القلب والهوا البارد يلفح جبهتك والغابات تحاصرك من كل مكان ماتدري وش تسوي مع هالطبيعه الخلابه والا وانت ماشي في امان الله ومتمتع بالحاله اللي تمر فيها ( كثر منها ) الا تشوف قدامك تمساح شمحوط طويل عريض لابسن شورتن ملزق مطلع الكراعين السنعه والفنيله العلاقيه اللي تطلع لك الكتوف المورمه ( اكيد فيه عرق ) يتبرد بهالجو الي وش زينوه وبيده ماسكن حبلن وش طوله .. ذا الحبل مربوطن به تسلب ( كلب للي مايفهمون طلياني ) وقاعدن يمشيه اكيد بيصكك هالمنظر على خشتك الزينه لأنك وقتها بتشك في نفسك هو انا في الرياض ؟ هو انا في السعوديه شكلي الظاهر ضيعت الطريق وانا طالعن من بيتنا ، ساعتها بنقولك لا ترتاع ولا تسقط مغشين عليك
لان اللي قاعد تشوفه يعتبر احدث وسيله في غزل التماسيح
الحين ماتمشي بالرياض الا تشوف لك هالشباب كل واحدن شارين له تسلب ولا قطو وقاعدن يتمشى هو وياه في البراري
والله لو ان اميمته ولا وخيته قايلتن له مشني ولا ودني السوق معك كان ماسوى بهم مثل مايسوي مع تسلبه ذا ، شلون عاد لو شفت ان هالشمحوط اللي قدامك ذا معه تسلبن صغير يقال له ( ببي ) لاهوب الي لايقن على مقاسه ولا هوب الي يجي من وراه نفع يعني وشوله شاريه مادري ، مثل اخونا في الله راعي الموستنق الحمرا المكشوفه اللي قبله يترزز عند عماير السيركون وبعد تمحيص ومتابعه من وحده من مراسلاتنا ، اكتشفت ( ليلى ) انه يستخدم هالتسلب عشان يساعده في ملاحق البنات ، داري ان بعض بنياتنا الله يهديهن مخفات ولا قد شافن عيشه فيخقن على هالصغير اذا شافنه بس يغفر له انه اطخم <<<~~~ مايطالعن ابد
هذي حاله من الحالات الي شفناها .. وفيه نوعيه ثانيه من الشباب غير الي ذكرناها يجيك معصقل مسلوع لو تشوفه ماتدري هو غصن شجره مر من جنبك ولا هو عظمه نست تروح للقبر ولابس لك هالجنز المرقط من ذاك الي يبيعونه في بسطات البطحا بخمسه قروش ، وفنيلتن مشقوقتن على جنب مافكر يخيطها ويتمشى مع تسلبن اكبر منه واطول واعرض تشوفه اكشخ من كمه لا واملح بعد الظاهر انه شاريه عشان يصير البدي قارد لو حاولو يخطفونه المافيه مثل ما وافتنا مراسلتنا المرتكزه عند عزيزية التخصصي ( سوسو ) والي تراقب الوضع عن كثب عن راعي اللومينا البرتكانيه الي يتسكع في ذيك المنطقه مع تسلبه ، يعني لو هم نفس المقاس كان تمشي بس يعني انك تجيب التسلب اكبر منك واملح على تسذا بيسرق البنات منك ولاهوب معطيك شي
لو السولافه على تمشيات كان تتصرف منا ولا منا بس انها تعدت هالمرحله واجد ( صار عرس ) تشوف كل راعين التسلابه والقطاوه مسنترين عند الفيفا اللي بالملز ولا عالم الطبيعه اللي بصلاح الدين رايحين يتقضون لتسلابتهم مقاضي خاصه من نعال وهدوم وشامبوهات وصوابين وكريمات واشين ماتخلص ، والله لو ان هالمقاضي لراعيه كان ارحم بس تقعد تقضي لتسلب ولا قطو واخرتها تطلع فاتورتك تطق الالف والا الالفين مثل ما رصدت هذه الحاله مراسلتنا ( ريومه ) اللي دخلت عالم الطبيعه متلطمه تستكشف الاوضاع ولقت واحدن جايبن تسلبه المصخن يتنافضى ضايقن صدره عليه يبي يطعمه <<~~ ياربيه ، طبعن الدختور طلعه بمقاضي عشان المصخن يطيب وطلعت فاتورته صكه <<~~ مالقى للفلوس مونه ، مهوب لونه متعشين فيها كان ارحم على الاقل في بطنه الاخو المذكور معه بي ام بنفسجية اللون متل ، لوحتها ثلاث سبعات ( كشخه ) ومسمي كلبه هوكي
ندري الحين بعض التماسيح بينشبون في حلدوزنا ويقولون هذي تكلمه للكشخه حقتنا والرزه ( امحق رزه ) وهذا ان دل على شي فهو يدل على مظاهر الطخطخه والجخجخه ، مثل ما بلغتنا مراسلتنا الي متسلمه الفيصليه (هيوني ) اللي لاحظت هالشي على ذاك الي مرتكز عند بوابة الفيصليه الي على شارع الـ30 ، في سيارته الفياقرا السودا ويلعب كلبه ساعه ويأكله ساعه ولوحته ثلاث ستات ( ستات = بنات )طبعن هو مسنتر هناك ليس حوبن في التسلب بل عشان يلقط البنات وعاد بنياتنا حدث ولا حرج
بس هذي حاله نادره مهوب كلن معه فياقرا تشفع له ، اجل قد شفتوا بدوي مسوي لنا فيها رومنسي ويربي قطوه ، صح سيارته لكزس بس بدوي وقطوه الله يرحم ايام البعارين والخرفان بس نسى الماضي وصار يربي قطو ؟ لا ومن زين الخشه في الفالنتاينز دي مطقمن هو وياها احمر الله يفشله لو تشوفه تقول ذا بيروح للاعدام هو وياها على ذا اللون ، ودوامه ياتلقاه هو والقطوه مرابط عند مدارس منارات الرياض ولا الرواد ولا رياض نجد بس طبعن عند اقسام البنات
ولا راعي الاودي السبورت الي لونها احمر جيزاني يفقع العيون هو وقطوته اللي مرابطين عند العقاريه <<~~ ياقدمه ، ولابس لك هالنظاره الشانيل العنابيه ( باين انها تقليد ) هذولي وين نوديهم فيه؟
هذولي عار على الديره والمجتمع وعلى جنس الرجال
الظاهر ان الشباب عندهم طاقات مهدره وهي الحفاظ على البيئه وتربية الحيوانات ، اول يربون لك حمام فوق السطوح وعشش وحاله ولا ارانب ودجاج في هالحوشه والحين تطوروا يقالك ، صاروا يربون تسلاب وقطاوه
يقطع ابو تسذا تطور بس يعني بزعمكم بتسوون لنا كشختن في ذي بعد ولا كل ماطب امريتسي في شي طبيتوا مثله المشكله لو انها لايقتن عليكم تسان مايخالف ، يعني الامريتسان اجسام تهبل ( الله يخلف ) ولا فيه تناسق بعد يعني جثتن وش كبره ويربي قطو ؟ هي لو ان البنات يربون قطاوه مايخالف يليق عليهم بس انتوا ؟ ولا مسلوع ومعصقل ويربي تسلبن وش كبره
ارسلنا مراسلتنا ( لولو ) عشان تسأل واحدن من المختصين في الطب الجنوني .. قصدنا النفساني عن هذه الحالات فاجاب قائلان :
هذولي الله يسلمكم ناس عندهم نقص ، يعني هالعصل يشوف قوته في تسلبه الجثه يعزيه ويواسيه على الشين اللي فيه ويحاول يلقط له بنات عشانه داري ان صاحبه ماعليه سوق <<~~ امحق دختور
اما التمساح الدب البرميل اللي يربي قطو ولا تسلبن صغينون فهذا لعاب وماعنده ماعند ماي قراند مازر ( طلع العرق المصري ) يبي يجذب البنات عشانه عارفهن مخفات ويحبن القطاوه واذا شافنه بيقولن عنه انه رجالن نشمي وحنين وش حليلوه مايدرون انهو يطق هالقطو في البيت ويعذبه وينطله في السطح يتشمش في عز القايله
<<<~~~ هذا اور فيس ان ما سحبو منه الشهاده بعد هالمقابله
كنا ناوين نوفر لكم صور عن الحالات الي جبنا طاريها اب ، بس اننا حاطين الفلم يتحمض عند هندي دلخ ( ارخص ) على اننا بنستلمها اليوم بس يوم رحنا نجيبها لقيناه مسكر الظاهر حقين المتخلفين طبوا عليه
لكن انشالله سوف نوافيكم بالصور في حال ورودها <<-- ايمان بنوره
هذا هو الخيط والمخيط
فهل المنقلعين والمنقلعات يؤيدون ام يعارضون الانتخابات الي في فرنسا ولمازا وكيف واين ولعل واخوات كانا
واللي مهوب مصدق يروح للمواقع الي ذكرناها ويطالع بام عيونه ويصدق واللي مايبي يصدق ولا يرد على الموضوع يصقع راسه في المونطر ( هذي الشاشه للقراوى )<<<~~~ قلت الخاتمه
:D :D :D :D :D
العرض العادي
