فدوة عيونك لو غـدت روح مغليـك
وش عاد لو راحت لعينـك عشايـر
أبيع مايغلى علـى الكـون واشريـك
واسوق لى جتنـي علومـك بشايـر
وازعل جميع الناس بالحيل وارضيك
واصبر ولـو دارت علـيّ الدوايـر
واخذ من ايامي لـك أيـام واعطيـك
وان راح عمري لك فلا هو خسايـر
أحب أنا شوفك وصوتـك وطاريـك
دايـم وفكـري فيـك هايـم وحايـر
بالصمت أهوجس بك وبالصوت أناديك
والله علـيـم البيـنـه والسـرايـر
أنـا وقلبـي والهـوى بيـن أياديـك
عنـدك مفاتيـح الهنـا للضمـايـر
من روحي آحبك ومن روحي أفديـك
يامن غرامـه والحسـن فيـه ثايـر