السلام عليكم ورحمة الله وبركاته
اخواني الاعضاء هذه رسالتي لكم في مطلع هذة السنة الجديدة
كل عام وانتم بخير
يادنيتي وش بلى قلبي عجز يكره=من كان ما ينوصف بالقلب تقديره
الصاحب اللي عجزت اوصف مدى قدره=روَح ولا له طواري داخل الديره
هاجر وليته ترك حبه بدل هجره=واخذ معه روح خله... وجل تفكيره
كنت ارتوي دوم من صافي عذب نهره=واليوم ظامي بعد فرقا مساييره
اسلي النفس يمكن رجعته بكره=ولا بد له في غيابه الف تبريره
واطرد سرابه ولو كان الامل حسره=وابني قصور الاماني في بحر حيره
ياليت يرجع وانا باقي تحت امره=اوفيه بالحب والاحساس والغيره
هذا خفوقي تعَنا مل من صبره=ناره تشارف على حرقه وتدميره
آهات آهات من خاطر زفر زفره=تجتاح قلبي وتخلف له معاييره
تعيش في داخله لو سببت كسره=وتمنع بسلطانها طبه وتجبيره
حتى القلم في يميني يسكب العبره=من جور واقع تجاوز حد تعبيره
واقع خيوطه تعانق وخزة الإبره=يدعم امل مستحيل انجاز تحريره
حفر لباقي الهقاوي للاسف قبره=ودفن معه حلم كم حارب لتقريره
قصة الم عشتها تحكي صدى عثره=عنوانها (اتعظ يا قاري السيره)
خذ من مآسي الهوى فيمن سبق عبره=خل العشق وانتبه تقرب محاذيره
العشق بحره عميق ومركبه جمره=ومن هو نجا منه لا يامن اعاصيره
بالمختصير والمفيد اقدر على حصره=في بيت يمكن يكون اشبه لتصويره
مهما اختلف طابعه وإلا اختلف عصره=(يبقى لدرب المهالك دوم تأشيره)
المهندس الشاعر/ثامر الحارثي(شاعر الدرر)
15/1/1431