الله من همٍ معي وين ماروح= ماغير أكنّه عن عيون الخليقه
أضحك وأنا مهموم والقلب مجروح= وأدوّر المخراج بأية طريقه
مثلي مثل طيرغدا اليوم مطروح= حطو مسابيقٍ عن الجو تعيقه
وليا كفخ مع غفلة الناس مسموح= حد الحبال اللي برجله عليقه
من عقب ماياتي مع الجو ويروح= مع الفضا الواسع تفاجا بضيقه
البارحه غنيت والصوت مبحوح= جرحي وتر ودموع عيني مسيقه
ياللي نهارالسبت بيدينك تلوح= خليتني بين الوهم والحقيقه
ألين شفت الدمع من عينك سفوح= وخطاك تقصرها ورجلك طليقه
حاولت أقاوم لحظة البعد وأروح = ولايمشي الضميان لاجف ريقه
وقفت قدم الخلق واضح ومفضوح= وأهداب عيني في دموعي غريقه
مقدر أكن جروح قلبي ولابوح= والصدر فيه من اللواهب حريقه
ليت الوداع المر ماكان مشفوح= ووادعه مثل الصديق لصديقه
لكن على الله يازمن كل مانوح= مصيرها تبرى الجروح العميقه
العرض الشجري
