ما كل من يركب على الخيل خيال
ولا كل خيل تعجبك هي أصيله
ولا كل من يعجبك هرجه برجال
بعض العرب ملسون وإيده بخيله
الكل يلبس ثوب وشماغ وعقال
وعند اللزوم افعالهم هي قليله
الرجل تثبت له أقاويل بأفعال
لا قال شيء ونفذه هو دليله
والرجل لاشفته مع القيل والقال
أبعد عنه هذا صفاته عليله
والكذب خله عنك مافاد لو طال
قول الصدق ياصاح غنم وجميله
وخلك شجاع وذي صفات للأبطال
اللي كما سيوف تبارق سليله
واللي شراك أشريه لو كان بالمال
خلك معه وان مال دور بديله
واصبر ترى الدنيا تبدل بها أحوال
وما كل شئ صافي تشوفه تجي له
وبعد الكدر تشرب صفا عذب وزلال
هذا الزمن فيه استقامه وميله
وصاحب خليل لو جفا الوقت مامال
ترى الرجل يعرف بقيمة خليله
واقفل على سرك بكتمان واقفال
بعض العرب يسمع وينوي بحيله
وخلك أمين إذا توليت الأعمال
من خان في يوم الحشر يا حليله
خل التواضع فيك واضح بالأفعال
ترى الكبر يردي بيوم وليله
ولا تحسد اللي عنده أموال وعيال
وش ينفعك لو كان حسدك يزيله
ولا تزور تقلب الزين بطال
الله عليم بالنوايا الدخيله
وخلك رزين ترى المخفه للأطفال
واصفح عن المخطي ولو زاد قيله
واحمل همومك لو تزن وزن الاثقال
بكره تروح وتنجلي لو ثقيله
وصل الفروض ولاتنسيك الأشغال
محدن في الدنيا درى وش بقي له
وزور الاقارب للرحم كون وصال
وخلك عظيم الشان وسط القبيله
وصلاة ربي عد ماهل همال
على النبي اللي صفاته جليله
تقبلو نقلي واتمنى ينال اعجابكم واستقبل اي ملاحظه على طرحي سوى بالنقل او الاسلوب
العرض الشجري
