العيد ياليت مت ولا تحريته=في العيد حالي على الرحمن مشكاته
ياعيد وين الذي بالقلب حبيته=وين الذي كان يسعدني بهمساته
لوجيت ابوصف حبيب الروح مااوفيته=تعجز جميع المعاني عن وصوفاته
الشمس تخجل ليا طلت على بيته=ويغار ورد الهدا من حمرةاشفاته
نظرت للبدر في ليلة وجاريته=وقلت خلي تغيظك كل ميزاته
واثبت للبدر يوم اني تحديته=خلي هو الشمس وحدودي مداراته
خلي بقلبه مساري ما تعديته=وهو على خارطة قلبي مساراته
حبه على الراس انا شلته وحطيته=تاج بكل الغلا زينت شرفاته
حب فريد بسما العشاق عليته=حب ملا الكون فاضت به مجراته
ابعلنه للملا من بعد اسريته=وازود العاشقين ببصمة اثباته
قلبي على شان حب الزين صفيته=من كل حب قديم ومن علاقاته
تطير بالقلب من شوقي عفاريته=واطوي المسافات حبا في ملاقاته
والجمس ما احسب لبنزينه ولا زيته=والكامري له شريت احدث موديلاته
لو كان خلي في اقصى الكون وافيته=يهون دربه ولو طالت مسافاته
أمشي لخل يرد الروح لا جيته=أموت واحيا بنظراته وبسماته
كم يوم لا قاني الغالي ولاقيته=وكم ليل ياماسهرت ارقب صباحاته
وكم دمع عن خلي اخفيته وداريته=وكم مرة العين تعجز عن مداراته
دمعة فرح كل ما شفته وضميته=وشميت طيبه على شاله وغطواته
ودمعة فرح لا اتصل فيني وناجيته=ودمعة حزن في غيابه وقت اجازاته
وكم ونة جر من قلبه وهديته=ومسحت دمعة حزن من فوق وجناته
والعيد يا كم مع الغالي تمنيته=واشاركه في ليالي العيد فرحاته
لكن خسارة حبيبي اللي ترجيته=نوى يضحي وكنت اول ضحياته
ياحسرة القلب عيدي ماتهنيته=يوم ان كلا تعالت فيه ضحكاته
هذا الذي ما تخيلته وظنيته=في العيد يبخل حبيبي باتصالاته
ياما اختلفنا وصافاني وصافيته=والكل ينسى خطا خله وزلاته
واليوم ياعيد لا شفته ولااوحيته=تعطل ارسال خلي من محطاته
كم يوم رقمه من الجوال دقيته=لا رد خلي ولا جتني رسالاته
ياليت يسمع ونيني يوم جريته=والقلب معتل من كثرة مناداته
كني يتيم فقد حضن امه الميته=لا حان موعد رضاعه زاد صرخاته
ياعيد بالله لا زرته ومريته=قل له حبيبك يبلغ لك تحياته
عيدك مبارك عليك اسمه وتوقيته=يعود لك وانت في صحة بخيراته
قل له ترى صاحبك بالهجر عنيته=ياليت قلبك يحسسك بمعاناته
ياليت ترجع تضمد جرح ادميته=وانت الطبيب الذي يشفي جراحاته
صاحبك زادت جروحه بعد جافيته=واشوف موته بدت تظهر علاماته
لو ما رحمته وهو حي وواسيته=بالله لا مات وش تنفع مواساته
لا جاك علمه ودمع العين هليته=وش ينفعه لا بكيت بيوم معزاته
ياعيد قل له تراني قبل وصيته=لا ضمني قبري الضيق وظلماته
يرش قبري بطيب فيه شميته=ويفرد على تربته من بعض طرحاته
قل له لوانه نساني ما تناسيته=هو نبض قلبي وشريانه ودقاته
حتى لو الموت من هجره تقهويته=غلاه في القلب يسوا كل نبضاته
ياليت يرجع حبيب الروح ياليته=واسخر النفس في حبه ومرضاته
ويكون عيدي ليا شفته وحييته=واغسل غبار الحزن من نهر جناته
وانسى زمان شديد الحزن قاسيته=واعيش باقي حياتي رهن اشاراته
ياليت في الجن عندي ولد عفريته=يجيب لي صاحبي لا قلت له هاته
ضاقت بي الارض لين الصبر مليته=والقلب معلن حداده عن مسراته
ياالله يامحيي الانسان ومميته=ترد لي صاحبي من بعد غيباته
العرض الشجري
