زاح الظلام وشعشع الفجر نوره
وانا عيوني يابو حمد سهارا
تقول عيني عن كراها امعسوره
لين اشرقت شمس الضحى بالنهارا
على الذي بالقلب شيّد اجسوره
ابو ثمان مثل ضوح الانوارا
والعين عين اللي وكر في اصخوره
عين اشقر" لاشاف خرب الحبارا
والخد براق" نشا من ابحوره
مزن الظلام اللي بروقه توارا
والقرن الاشقر يوم تمشط اشعوره
تنزل كما نهر" اشعوره تبارا
لو ماشقت عيني بعده امعذوره
ماشفت زيه مع جميع العذارا
في هالزمن هذا وماضي اعصوره
على الوطى ماداج مثله وسارا
هذا الذي عليه نفسي غيوره
حتى من اهله يافتى الجود اغارا
هو الذي يآمر وينهى بشوره
وامشي على مايقول غصب" اجبارا
يقدر يسرني على كل اموره
يامر وانفذله ما أرد اعتذارا
وانا الذي شربت علقم امروره
عقب الحلا شربت كاس المرار
وسلامتكم