الليل طال وجاوبت حزة الضيق
صافحتها قوة ماهو طيب مني
واجتاحني هم كبر هضبة طويق
وجنتني طواري سابقه واحتوني
ثم طوقتني ضيقة الصدر تطويق
عيت تفارقني ولا تحل عني
جلست انا والضيق للوضع ماطيق
من حر مابي قمت اهوجس واوني
لاجيت انام اغفي دقيقة ثم افيق
ابا المنام وهم قلبي امتحني
افز من نومي وانا ناشف الريق
متوتر وخايف وحالي متدني
تطري علي ايام حب وعشاشيق
مع واحد عنه ظروفي حدني
اللي غلاته ثابتة بالمعاليق
ابيه والاحوال ماساعدني
واللي فراقه شقق القلب تشقيق
والحال ناحل والعروق نشفني
لاجيت اباضحك في وجيه المخاليق
قالو ملامح ضحكتك ماظهرني
قلت اكتم بصدري جروح وتشاهيق
واحاول اخفيهن ولا يختفني
واضحك واجامل لو على خاطري ضيق
لكن دموعي دايم يفضحني
وماكل من يبكي يقال السبب ضيق
ولا كل من يضحك يقال متهني
من حر ما فيه كتبت الطواريق
كتبت والعبرات حيل خنقني
ويالله ياربي عليك التوافيق
طالبك تبعد ضيقة الصدر عني
العرض العادي
