الصدق مفتـاح القلـوب المقافيـل
ياماحـلا طعمـه ولونـه وريحـه
لونه بياض وريحتـه كنهـا الهيـل
والذ مـن طعـم الشفـاة المليحـه
بس اعذورني ماعلى الوصف تهويل
ايجمل الاخلاق لـو هـي شحيحـه
له وقفةٍ عنـد النسـا والرجاجيـل
مايثبـت الا فالنفـوس الصحيحـه
لوّه مـره ماضيعوه المشاكيـل
ولوّه رجـل مافيـه بنـتٍ تزيحـه
اتعب على الصادق وكب المهابيـل
هذي نصيحه كان تبغى نصيحـه
والكـذب ماحبـه ولا فيـه تحليـل
ياخنز ريحـه والوصايـف قبيحـه
لونـه سـوادٍ مجهـمٍ كنـه الليـل
واجمل وصوفه سرعته في مطيحـه
ماتلقطه مرات لـو جبـت دربيـل
لكن تحرّص يـوم تسمـع فحيحـه
حبلـه قصيـر وقطّعتـه المقابيـل
هراجـة المقفـي تعـدّه ذبيـحـه
امسيلمه وابليـس والقـال والقيـل
ذولا معازيمـه وياهـي فضيحـه
جنب عن الكـذاب مافيـه تبجيـل
لاحـلـه الله لا ولا الله يبـيـحـه
العرض العادي
