--------------------------------------------------------------------------------
محد(ن) على يديك النواعم ضربها
منت بـ على كل الذي صار مغصوب
محد(ن) تيّـقن بك ولا احد(ن) حسبها
تبي تسكتني الا قلت مكتوب
مانعترض لكنك انته سببها
ممنوعك الي تزعمه صار مرغوب
بصيرتك مدري وش الي حجبها
ضاقت بك دروب وضيّـعتها دروب
النار في جسمي توهج لهبها
خطر(ن) علي عظام جسمي لها تذوب
كاسات مرك قلبي الي شربها
ماعتدت اذوق المر من يد محبوب
مدري وش الي في حياتك قلبها
تبي الصراحه انته قتال القلوب
فاتت واشوف انه تزايد كربها
عسى الفرج يأتي وينحـل مكروب
ماغيرك احد(ن) تل روحي وجلبها
ثم بعتها برخيص من غير متعوب
في سوق حبك لين رسم نصبها
وتركتني حيّ مع الناس مصلوب
ودفنت روحك يوم ورق شببّـها
حسبك لـ وحدك وانت بي دوم مصحوب
اسرجت خيلي ثم غيري ركبها
خيّـالها ماله على الخيل منصوب
طارت بها ريح العواتي هدبها
في ليلة(ن) لا سلم فيها ولا حروب
اخترت من سو الخلايق عربها
دامك تخيرته فـ انا منك مسحوب
نفس(ن) حرمها الله ونفس(ن) وهبها
هذا له طلابه وهذاك مطلوب
الا جروحي زاد فيها عطبها
بغيت انا الفكه وعوّدت منشوب
الياس فيني هز نفسي وغلبها
وانا الي معلق بـ قلبه ومقضوب
نفسي ولو عافت قدرها غصبها
ترضى بـ واقعها ولو كان مزروب
غنيت ليله كل حزني طربها
مرات اهيجنها ومرات مسحوب
وجمعت في نبرات صوتي عتبها
وعن غلطتي استسمح اليوم واتوب
ضوي طفت عقبك ورمد حطبها
حرام عقبك لا ولا عود مشبوب
حتى معاميلي على الجال تبها
جنبت خلق الله كما حال مجروب
حالي بك اصلح حال واجمل وهبها
حالي بدونك من عوافيه منهوب
صدك خطف ضحكات عيني وسلبها
ولا ترا وصلك يرد الفرح نوب
محد(ن) على يديك النواعم ضربها
ومنت بـ على كل الذي صار مغصوب
العرض العادي
