ياليتها يومنها غابت تغيب=يالله عساها لاتعود سليمة
غابت وقلنا فاقدين نفل طيب=كانت وكنا نشوفها مثل غيمة
من وكّل امره لإمرأه بد مايخيب=ماتشوف ياغازي النوايا سقيمه
ياطيب النيه وياراعي الطيب=الطيب مايلقح برحم العقيمه
إيه أسعفوني بباند من قبل لااجيب=عيد بناس ماتعرف الحشيمة
ياناثر الالماس ولاغيرة تجيب=شف مجهر العرّاف وش حط قيمه
هو يمدح الماس ولكن نسى يصيب=سرح بفكرة لاقي له غنيمه
فاتتك ولا معديه منك ياذيب=الشعر من حري توالى نظيمة
فتره تعدل ثم عود على العيب=عادت لعادتها القديمة حليمه
مبداي باللي يعلم السر والغيب=الواحد المعبود ؛ منجي كليمه
بديت باسمه دون عدّ(ن) وتحسيب=واعوذ به من هرج زور ونميمه
ومن بعد ذكره خط سير المناديب=للذيب اللي فيه المراجل قديمه
الصاحب اللي ما تفوته مواجيب=عذب المعاني ساقها لي نسيمه
حر(ن) ؛ تعلاّ نايفات المراقيب=اليا رمى صاب الهدف في صميمه!
معرّب الجدين ؛ ما احتاج تعريب=على المعالي من اكفوفه وسيمه
النايف ؛ اللي يستحق التراحيب=يثور ؛ ما يرضى لغيره ظليمه!
يكرم جنابه ؛ ما تجيه العذاريب=رائد ؛ ويملك بالمكارم قسيمه
ياصاحبي ؛ لا يلحقك شكٍ وريب=صاحبك ؛ لو جار الزمن ما يضيمه
اليا نوى بطشه ؛ عطيب المضاريب=ولا هو بخير ؛ اللي يحطّه خصيمه
الوقت شاهد ؛ والليالي تجاريب=وسود النوايا ، عاقبتها وخيمه!
ودنياك ما تخفاك ؛ دوم بتقاليب=ما كل دمعه ؛ من قلوب(ن) رحيمه!
متفاوت(ن) فيها ؛ زلال المشاريب=والعلم يظهر فاهمه من غشيمه
وختامها صلّوا على طاهر الجيب=الهاشمي ؛ واعداد همّال ديمه
العرض العادي
