مهــــلاً يـآقـــدر..... روآآآيــهـ رآئع ــــهــ....!!!

[شوقي لوليف روحي]

يع ــطيكـم الع ــآفيـهـ....


هيـآ بسـم للــه نبــدأ.....





الاجازة مملة وروتين فظيع لولا زيارات اخوالي لنا وخالتي فادية اللي جات عندنا وغيرت الجو علينا .. لأنها كانت زعلانه من زوجها عبدالعزيز عشان عصب عليها وعطاها كف وخالتي مو متعودة منه الا الدلال شالت شنطتها وجات عند خالي ناصر بجده ..
قلت لها وانا جالسه على الأرض قدامها وهي حزينه وكل شوي تمسح دموعها : طيب طالما انك تحبينه كذا ليه تتركينه وتعصبين عليه
- ماتدرين ياديمة ليه عصب علي
- ليه ..؟
- مااقدر اقول لاحد .. الموضوع كبير وانا لايمكن اعيش مع عبدالعزيز لين يبرر لي مو يقول لاتتدخلين
- دايما متهورة ياخالتي .. ليه ماجلستي بالبيت عادي خاصميه بس مو تكبرين الموضوع ..
- ديمه الله يخليك اتركيني بحالي .. عمرك ماوقفتي بصفي دايما تلوميني
- صدقيني ياخالتي انا بس اصحيك وانبهك حتى ماتغلطين يعني ......
قاطعتني وهي تبكي : تكفين ديمه اسكتي ماابغى اعصب عليك انتي كمان ..!
تركتها ورحت لغرفتي بس قبل مااطلع قلت : اذا دق عليك ردي عليه لاتطنشينه ..
دخلت غرفتي وأأأأأيييييي حسيت بصداع موطبيعي لاااااه مو زي كل مرة هذا اقوى
دقيت على الشغاله تطلع لي موية وبندول اكسترا ..
اول ماجابتها لي الشغاله اخذت حبتين ونمت بعد جهد وما صحيت الا على وجع راسي
شفت ساعة الجوال بجنبي كانت 2 نص الليل
اخذت من علبة البندول حبتين وحطيتها بفمي وشربت مويه وحاولت ارجع انام لاااا وييين انام وراسي بينفجر
اصبر شويه يمكن يبدا مفعول الدوا
استنيت ساعه وانا احس راسي فيه نار تغلي وبينفجر خلااص ماعاد فيني اتحمله
بدا جسمي يرتعش ويضعف خفت يصير لي شي واموت وانا لوحدي
صحيح انا دايما اصدع ووجعه يتفاوت احيانا مؤلم لدرجة محد يتحملها واحيانا يمر علي عادي ويروح بعد ماآخذ بندول .. بس هالمرة لاااااا غير عن كل مرة ..

ــــــــــــــــــــــــــــــــــــــــــــــــــ ـــــــــ

كانوا قاعدين بالصاله تحت اول ماجا سأل عنها قالوا طلعت تنام استغرب عادتها تسهر اش اللي نومها اليوم بدري
قالت هدى وهي مركزة على التلفزيون وتعدل التكايه من يمينها لجهتها اليسار : من المغرب تقول مصدعه وراحت تنام يمكن مانامت كويس اليوم ..!
كشر ناصر وقال :انا قلتلها مية مرة خلينا نشوف حكاية الصداع هذا بس هي موراضيه .. بوديها هاليومين مو معقوله كل شويه مصدعه وتحسب النوم علاج او حل ..!

جلسوا على التلفزيون وفادية في عالم ثاني مقهورة من زوجها اللي ماعبرها حتى بمكالمة يتطمن او يحاول يصالحها .. وناصر مقرر انه ماراح يتدخل لأنها كبيرة وتقدر تحل مشاكلها بنفسها .. الا اذا الأمر احتاج تدخله ساعتها راح يجلس معاها ويكلمها .
دق جوال ناصر طالع في الشاشة ديمة يتصل بك
- هلا ديمه
- خالي راسي مو قادرة اتحمله
- اخذتي بندول
- بصوت ماينسمع ..خا ...ل ي وخفت الصوت
فز من مكانه يجري وكان ياخذ الدرجة بثلاث اواربع درجات دخل غرفتها لقاها مغمضة عيونها وباين عليها التعب وبجنبها علبة بندول وكاس الما
اخذ عبايتها المعلقه على الشماعه ولفها عليها بطريقه أي كلام وشالها بين يدينه
نزل تحت وهو بالمنظر هذا هي شبه ميته على يدينه
صاحت هدى :ناصر اش فيها حيه ولا ميته ياويلي عليك ياديمه
فادية واقفه ماتتكلم مذهولة ومصدومه حاولت تروح معاه بس مااعطاهم فرصة يتكلمون
اخذها وكل نبضة بقلبه تدق بقوة متوتر ورجفة بجسمه ساق السيارة بسرعه جنونية
دخل يشيلها على يدينه وكأنه يشيل قلبه على يده
صحت بتعب ولازال الألم
سمع صوتها كأنه بعيد : آه راسي
قال ناصر بأسى : ديمة ..
: خالي راااااسي .... لسه الألم مرة قوي
فز بسرعة ونادى الطبيب اللي جا وبعد شويه هدت بعد ماامر الدكتور الممرضة تعطيها ابرة مسكنة
ــــــــــــــــــــــــــــــــــــــــــــــــــ ــــــــــ ــــــــــــ
: : :
رجعت للبيت مع خالي على الساعه خمسه الفجر لأني اصريت ارجع بعد ماحسيت بالعافيه وانا الحمد لله مافيني شي وطلع خالي جواله حصل حوالي 40 اتصال من خالتي وهدى اتصل عليهم يطمنهم ودخلنا البيت سلمت علي هدى وحضنتني خالتي اللي قالت سلامات ماتشوفين شر
قلت لها وانا ابتسم ولا كأني البنت اللي كانت بتموت قبل كم ساعه :الله يسلمك والشر مايجيك
مسكت يدي وسألتني بلهفة :ايش صار لك ياديمة
- راسي ماادري شو صار له بس الم بحياتي ماحسيته.. حاولت اتحمل بس ماانتبهت لنفسي الا بالمستشفى
- كويس انك لحقتي واتصلتي على ناصر .. بس الحمد لله
جا صوت خالي اللي قال : هي بس ماخذه مسكن لكن اذا حسيتي بشي اليوم نروح للمستشفى نشوف وش حكاية الصداع المفاجيء هذا .
رحت لغرفتي حاولت انام بس شكلي شبعانه نوم


الكل راح ينام وانا فتحت دفتري خواطري
كتبت //
اليوم الأربعاء .. نهاية آخر اسبوع في الإجازة الصيفيه
...
الخامسة نشوة بعد عاصفة هوجاء اجتاحت رأسي وكادت ان تفتك به ابتدأت باتفاق مع هبوط الشمس وانتهت بوداع مع اطلالة جديدة لها
أي غداً ينتظرك ياديمه
افرجٌ قريب ام انك ستبدأين الأنين ومعاناة الوجع
مبهمة حياتي منذ طفولتي
ومستقبلي متأرجحٌ على كفة الزمن الغادر
ايتها الأقدار افسحي للأمل باب يلج منه لحياتي
عفوك يارباه وعافيتك ...!
قفلت دفتري لأني احس ماعندي شي اكتبه ..

جلست اقرا رواية السجينه .. مؤثرة وكل مافيها حزين بس فعلاً رواية هزت القلوب .. قفلتها لأني والله مو ناقصه احزان عشان احزن اكثر ..!
انتبهت لجوالي اللي يدق خالي
- هلا
- ديمه كيفك ( بصوت نايم )
- خالي انا بخير الحمد لله انت نام اذا فيني شي بقولك
- أي شي تحسين فيه كلميني لاتقولين نايم ولا ماابي ازعجه فاهمه
- ولايهمك
- سلام



..........................


انتبهت للساعه عشره الصباح نزلت افطرت وجلست على التلفزيون .. بيتنا كئيب بدون اصوات عيال خالي ووجود هدى اللي تعودت عليها
حصلت خالتي فادية صاحية وتشيل جراح اللي موراضي ينام
اخذته منها وانا ابوسه قلت لها روحي نامي واذا نام بجيبه عندك
راحت خالتي مومصدقه اني آخذه منها عشان تكمل نوم
اخذت جراح اللي عمره ثلاث سنوات وخرجنا للحديقه عند المراجيح لعبته ودخلته المطبخ فطرته و حممته وبدلت له ملابسه لأني خليته يلعب بالتراب والمويه ...
بعد شويه نام جراح من حاله وأخذته عند امه لقيتها نايمه بس باين انها تعبانه
ياقلبي ياخالتي حبها لعبدالعزيز خلاها تتهور وهو يكابر مايكلمها مايدري انها تموت بكل لحظة .. وانا متأكدة انه يحبها اكثر من حبها له بس مو راضي يتنازل ويكلم خالتي او يجي يراضيها خاصة انها هي اللي زعلانه منه ..
رحت لغرفتي وقررت اتصل على ابوي اكيد الحين صاحي
- هلا
- هلا يبه كيفك
- هلا وغلا ببنيتي الغاليه بخير دامك بخير انتي بشريني عنك
- الحمد لله الله يديم عليك الخير ويخليك لي
- ها الترم هذا بتداومين ولا الترم الجاي
- لايبه الترم الجاي .. هذا الترم برتاح عشان اكمل وانا متحمسه
- الله يوفقك يابنتي .ديمه
- هلا يبه
- ليه يابنتي رفضتي مهند انا من زمان ماودي اكلمك في الموضوع تراه رجال ينشري
- يبه خلاص انتهى الموضوع وماصار نصيب .. الله يرزقه
- والله اني بغيته لك بس الله ماكتب الله يرزقك يابنيتي
كنت اكره السيرة هذي بس مااقدر اتكلم قدام ابوي
- يبه
- هلا
- مو عندك موعد الاسبوع هذا بالسعودي
- الا والله ذكرتيني
- لايبه لاتنسى مواعيدك الله يخليك هذا القلب مو أي كلام
- الشغل ماخذني حتى من نفسي البيت اجيه آخر الليل انام واصبح ثم اقسم يومي مابين العمار والشركة والمصنع واللي يابنيتي ماعاد افضي حتى لنفسي .
- يبه مو انت مشغل عمال خلاص لاتتعب نفسك
- يابنتي لو مااراقبهم اهملوا الدنيا
- الله يعينك يبه ويطول بعمرك
- ويخليك لي يابنيتي ... هامااطول عليك
- مع السلامه
- بحفظ الله يالغاليه

بعد ماكلمت ابوي استنيت الظهر وصليت ونمت ... صحيت العصر على ازعاج ياسمين وأسامه عند باب غرفتي فتحت لهم الباب قال أساامه: بابا يبغاك
رجعت صليت وأخذت شاور وبدلت لبست بنطلون برمودا لونه بيج وبلوزه بيضا كت ورفعت شعري شينون ونزلت خصل عشوائية من ورا وقدام حطيت قلوس وحددت حواجبي بفرشاة الحواجب ونزلت
سلمت عليهم وانا لساتني مكسلة احسني ماشبعت نوم سألني خالي عن الصداع قلت مافيني شي الحمد لله
شفت خالتي حالتها مو طبيعيه وشكلها ماعاد فيها صبر ولا تتحمل شي تعصب على عيالها لأدنى سبب وأحيان كثيرة تطنش هدى اللي تحاول تكلمها
اخذت عزام وجراح وعيال خالي وخرجنا للحديقه وشوي لحقني خالي ووصاني على نفسي بعدين قلت له يكلم عبدالعزيز مافيها شي لو بس يسأله عن الموضوع اللي بينهم واذا هو زعلان يراضيه خالي بكلمتين خاصة ان عبدالعزيز صاحب خالي وزميله من لمن كانوا صغار ...
هز راسه خالي وطلع جواله من جيبه وضغط في الارقام بعدين حطه على اذنه وعرفت اتصل على عبدالعزيز وخرج مع الباب وهو يسلم عليه ..
وانا من الكسل اللي فيني ناديت على الشغاله تنتبه لهم وماتشيل عينها من عليهم ونبهت عليها محد يفتح باب المسبح مهما كان ووصيت بسام اللي اكبر واحد فيهم بعدين رجعت لداخل البيت
كل شوي احس راسي يألمني على خفيف وبصراحه خفت يرجع لي نفس الصداع اللي البارحه الله يستر
مددت جسمي على الكنبه وهدى تتابع قناة الام بي سي على مسلسل تاريخي اما خالتي فهي بعالم آخر ونحاول نحترم سكوتها ومانبغى نثيرها ... نمت في هالجو الهادي حوالي ربع ساعه وفجأة صحيت على عاصفة ماادري زلازل او براكين تتفجر براسي حاولت ادلكه جلست من قوة الألم وانتبهت لي هدى اللي بسرعه جابت لي المسكن اللي اعطانيه الدكتور وكاس ماء اخذت زي المجنونه وبسرعه حطيتها بفمي وشربت ماء .. انتظرت يهدي لو شي بسيط بس وين شكل مافيه امل .. حاولت اطلع لغرفتي بس هدى مسكتني واتصلت على خالي غصب عني وعشر دقايق الا خالي جانا وأنا خلاااص ماعدت اتحمل وخفت يغمى علي زي البارحه قلت لخالي : تكفى خالي بروح آخذ ابرة بمووت ..
دخلت هدى بعبايتي وطرحتي وبسرعه لبستني وانا مافيني حيل راسي استناه يفرقع ،، ينفجر ،، ينقسم نصين ...
دخلت المستشفى بعد مشوار طويل لأن خالي اصر يوديني مستشفى كبير غير عن اللي امس عشان اسوي فحوصات وأشعه
دخلت خلاص وانا دموعي تنزل غصب عني
احسن شي بالمستشفيات الخاصة مافيها زحمة وانتظار ... دخلت عند الدكتور وانا مسنودة على خالي ماعاد فيني امشي .. نمت على السرير وانا اصرخ بصوت واطي واترجى خالي يخليهم يعطوني ابرة
مارضى الدكتور الا لمن شافني ابكي واصرخ من الألم ونادى الممرضة تعطيني الإبرة بعد مااشترط اني اسوي الفحوصات اليوم
اخذت الإبرة وبعد ربع ساعه حسيت بالحياة ترجع لجسدي الحمد لله ... حمدت ربي كثير
جلس الدكتور يسألني عن الصداع من متى ووين الألم تحديداً وكيف كان وايش الفرق بينه اليوم وقبل
سويت تحليل دم وسويت اشعة مغناطيسية وطلعت على اساس بكرة النتايج تطلع
قال لنا الدكتور : مبدئياً هذي اعراض الصداع النصفي او الشقيقه ..وان مالهم أي علاج لللحين ...
لكن لابد نتحقق بالتحاليل والأشعه .. واحنا راجعين للبيت طلبت من خالي نروح للبحر ابغى ارتاح وأغير جو .. خاصة لمن عرفت ان صاحبة خالتي فادية بالبيت وهدى راحت لأهلها بعد المغرب
رحت مع خالي ولفينا بالسيارة مانزلنا .. اعشق البحر بس اليوم زحمة مااحب اجيه الا وقت هادي ولا الفجر ..! اشترينا ايس كريم ولفينا شويه بالسيارة وشغلت سي دي لنوال .. الا بزعل .. كنا ساكتين وأدري ان خالي قلقان علي .. جاه اتصال شفت الرقم اللي اتصل لأن جوال خالي منزله قريب مني شفت الرقم الخاص يتصل بك عرفت انه دولي رد خالي
هلا والله
حياالله هالصوت ... الحمد لله بخير وعافيه نسأل عنك ..... اش اخبارك انت وكيف الدراسة .. ماشاء الله تبارك الله الله يوفقك ..... كلنا بخير وبنعمه .... ارسل علي رقمك مايطلع عندي ...
التفت لي خالي وطلب جوالي : ديمه هاتي جوالك بسجل لي رقم مامعاي قلم ..
خرجت جوالي من شنطتي وأعطيته له وبدا خالي يسجل الرقم ويحفظه عندي خلص مكالمه و قال : خذي انقليه لي في جهازي ..
اخذت جهازه وبديت انقله واسوي حفظ قلت باسم مين قال وهو مشغول يناظر الطريق : مهند
ماادري ليه عورني بطني لمن جاب اسمه
هذا مو اول خطيب ارفضه .... مهند يمكن الرابع وكلهم كانت سيرتهم تجي قدامي عادي حتى اثنين حظرت زواجاتهم ولاكأنهم خطبوني قبل ...
بس مهند ليه مااقدر اجيب سيرته واذا احد جاب اسمه ارتبك ..
يمكن لأن خالي كان جاد بالموضوع وابوي وعمي يبغونه وعلى قولتهم شارينه
يالله مهند راح مع فارس واللي قبلهم



...............................


وصلنا البيت بعد اشترينا قهوة تركيه ودونات لأني ماتغديت قلت باكل أي شي وخالي أخذ معاي
دخلت بكوب القهوة ورجع خالي يقول مواعد رجال عندي شغل
سلمت على الهام صاحبة خالتي فادية وقلت بطلع لغرفتي بس هم الحوا علي اجلس عندهم
جلست مع الهام اللي اكره الجلسة معاها من كثر المآسي اللي تعددها لقرايبها وأهلها ومعارفها وماتعرف تجيب سالفه تفرح .. وخالتي دايما تعتذر عنها تقول من بعد وفاة اخوها بحادث وهي عندها حالة نفسية وهذي سوالفها بعد ماكانت انسانه مرحه ومتفاءله
حمدت ربي وشكرته على النعمه اللي احنا فيها وانا افكر بحالها انتبهت لجوالي اللي يدق وعلى الشاشه اسم الغالي رديت عليه وضحكت على طول قال :تعالي لقسم الرجال افتحي لي
نطيت من الفرحه ورحت افتح له وحضني وسلمت على راسه ويده واخذ راسي ضمه لصدره وهو يقول : هلا ببنت ابوها الغاليه .. هلا بالغالية بنت الغالية ..( هذا ابوي دايما لايمكن ينسى امي الله يرحمها ) .. لف يده من ورا اكتافي وهو يدخل معاي ويسألني عن صحتي ولمن جلس قلت بروح اجيب القهوة واجي بس ناظر فيني وبسرعه قال : ديمه ..وجهك ليه اصفر عسى ماشر تحسين بشي يابنتي ؟
قلت وانا احاول اني فعلاً مافيني شي : لا مافيني شي بس مانمت زين اجازة وخالتي عندنا واليوم جاتنا حرمه العاده انام النهار كله
بس لاااا مامشت على ابويه اللي تأملني قال : انا ماقلت انتبهي لصحتك ..؟
ضحكت بشويش قلت : لاتشيل هم صحتي الحمد لله ممتازة بس بكرة ترى بروح معاك للمستشفى ..
قال : لا خالك مكلمني اروح انا وياه
بعدها خرجت اجيب القهوة وجيت لقيت ابويه يكلم بالتلفون وفهمت انه يكلم عمي ياسر ويبارك له على النقل ..
سألته : عمي نقل .؟
: ايه نقل لجده ماادري وش يبغى فيها قلت له انقل للطايف قال لا ابي جده .
... الله يستر من عمي ياسر لهجته معي ماتطمن .. قلتها بقلبي .. بعدين قلت لابوي .. : طيب كويس خله يجي هنا عشان يخدمك اشغالك اللي هنا ..
: ياسر ماهو راعي شغل الله يهديه هو يادوب قايم بوظيفته والله يستر لاينطرد منها بسبة النوم اللي يشيله
ضحكت من كلام ابويه وغيرنا الموضوع
سألني عن ام مهند
ياااذا مهند احس فيه كهرباء يلذعني لمن تجي سيرته .!
قلت بهدوء : ماعليها ... حرمه كبيرة وباين انها طيبه
قال ابوي وهو : هذي الحرمة مافيه اطيب منها تراها كانت تحب امك وامك تعتبرها بنتها .. امك في سن ولدها فواز اللي توفى وانا اكبر منه بحوالي عشر سنين
: ياحرام اكبر واحد
: ايه مات الله يرحمه وعمره 33 على طريق الجنوب في حادث وهو جاي من الطايف عنده بنت الظاهر ان عمرها الحين حوالي 14 اذا ماني غلطان .. يوم مات ابوها كان عمرها سنتين
: اها اتوقع جابت سيرتها تقول بنتنا مودينا امها تزورها وكل شوي تتصل علينا تبينا نرجع بسرعه
: ايه هي اللي ربتها وامها تزوجت
: تعرفهم زين يبه
: ايه اعرفهم من صغري
ناس اجواد . وام مهند شايلة رجالها على كفوف الراحه ماشاء الله عليها مو مثل ابوك ويضحك ضحكة بحسرة
: يبه ليه ماتتزوج وتنبسط بحياتك
: وعيالي اجيب لهم مرة ابوي يكفي انتي وسواتها معك ..؟ ولا سواتها مع عيالها ..
: صحيح عناد كل مايكلمني يقول تعالي عندنا انا محتاجك والله قلبي يعورني عليه احس فيه شي ..!
: امه تهاوشه بالرايحة والجاية ..وماعاد يطيق الجلسه في البيت وانا مو فيه
: لا يبه الله يخليك عناد مراهق انتبه عليه لا يطلع من البيت كثير
: انا آخذه معي لللمصنع والعمارة اللي ابنيها الحين واحاول اشغله واطلعه .. يجي من المردسة يمكل واجباته الظهر والعصر آخذه معي واذا رجعنا تعشى ونام وهذا جدوله ومع كذا ماتفكه من لسانها الله حسبي عليها
يبه وديه عند عمتي صالحه اتذكر انها تحب عيالك وتقول عناد كأنه ولدها
: عمتك كل وقت تقول تبيه عندها بس مستحي من زوجها ..
: لا يبه حتى زوجها يحب الأطفال .. بعدين ربي مااعطاهم عيال اكيد بيحطون عناد في عيونهم
: تبيني اشرد عيالي .. يكفي انتي ماربيتي عندي الله يرحمك يابوي كنت ابصلح الغلط قبل يجيني عيال بس رفض
: خلاص يبه كل شي مقدر ومكتوب وجلسة عناد عند عمتي في صالحه تكفى يبه الحقه قبل يلتم على شلة ولا يفكر بأشياء مو في صالحه خاصة ان سنه خطر جداً
: بكلم امه واشوف .. ولو اني اشك انها مريضة نفسياً يوم اشوفها تنهد عليه ..
الله يكتب اللي فيه خير .. قلتها وانا اسمع صوت خالي ناصر بيدخل المجلس ..
ودخل علينا يرحب ويهلي وسلم على ابوي بحرارة وسلم على راسه لأنه يعتبر ابوي اخوه الكبير
قمت وتركت خالي وأبويه يسولفون وانا رحت عند خالتي وإلهام .. حصلت هدى وعيالها وصلوا وراحت تحضر العشا دخلت اساعدها وسألتها عن اهلها قالت كلهم بخير ويسلمون عليك وابشرك حنان حامل
: واو ماشاء الله تبارك الله الف مبروك ياربي اشكثر فرحت لحنان تستاهل كل خير هالبنت .. الحمد لله ان ربي ماخيبها
رحت للتلفون بدق عليها قالت هدى هي عند اهلي ترى ودقيت رقم اهلها وردت علي سلوى سلمت عليها وسولفت معاها شويه بعدين كلمت حنان اللي كانت فرحانه ان ربي حقق لها حلمها وحملت بعد ست سنين زواج وصبر وانتظار فرج ربي.. والحمد لله ماخيبها .. وكانت بنفس الوقت خايفة انها تفقد الحلم اللي حصل لها في لحظة وينتهي كل شي معاه ..
باركت لها وقلت لاتخافين طالما انك تحصنين نفسك كل يوم ولا تنسين الدعاء والذكر خاصة في الأشهر الأولى .. واهتمي بنفسك وافرحي لاتخلين الخوف ينغص فرحك عليك ..!
قفلت منها بعد ماسولفنا حوالي عشر دقايق .. ورحت اكمل مع هدى تحضير العشاء .. كان العشا كبسة لحم وجريش ومرقوق حضرنا الكبسة في صحن كبير لأبويه وخالي ناصر وخالي سامي اللي جاي بالطريق .. والجريش والمرقوق في صحون صغيرة حضرناالعصير واللبن والسلطات .. وجا خالي قال لنا ان سامي وصل وودينا العشا للمقلط وناديتهم يجون يتعشون بعد ماسلمت على خالي سامي

......................



دمتــم فــي طـآع ــة الـرح ــمن...

شـوـوقـي لـوليـف روح ــــي....

[الجذااابة]

يعطيك العافية على طرح الرواية عزيزتي

تثبت الرواية

ولي عودة لقرائتها

[مسك العود]

يعطيك ربي ألف عافيه
ننتظر منك أكثر من كذا أحسها قليله
مشكوره

[شوقي لوليف روحي]

يع ــطيكــم الع ــآفيـــهـ

لع ـــيونكــم اليــوم دآخ ـــلـهـ وربـي....



الج ـــذآبــهـ يع ــطيكـ ربــي الع ــآفيـهـ

تسلمـــين يـآع ــسل....


مســكـ العــود .... إن شـآءاللـــه اليــوـوم أنـزل جـزء طــوـوـويل ولآ تـزعـل....

[شوقي لوليف روحي]

هـــذآ الج ـــزء لع ـــيوـوـونكـــم



"
"
"
دخلت علينا خالتي فادية وباين انها مبسوطة وكان جوالها بيدها غمزت لها وابتسمت
عرفت ان عبدالعزيز له يد بالموضوع ..!
حضرنا عشا الحريم وخلينا الشغالات يودونه للمجلس ويجهزون السفرة ورحت مع هدى لعند الهام وخالتي اللي قاعده تقرا لها شي من جوالها ولمن دخلنا سكتت وانحرجت
- الله يافاديه الحين بتخبين عني انا ولا عن ديمة ( قالته هدى وهي تسوي السفرة على الأرض )
- الحين ليه تحطون عشانا هنا ماحطيتوه على الطاولة اللي طولها مترين ( محاولة من خالتي لتغيير الموضوع )
- لا ياقلبي ناصر كل شوي داخل مانبي نحرج الهام
- هههههههههههههههههه اشتغلت الغيرة ياهدى
عدلت هدى السفرة وحطت عليها سلال الفاكهة قالت :قومي تعالي بس تعشي وهاتي ضيفتك معاك
طلعت هدى ورجعت بصينيه فيها عصير ولبن وكاسات
اكلت سلطه ومرقوق واستأذنت واخذت معاي كاس عصير بطلع لغرفتي الا يدق جوالي خالي سامي
- هلا خالي
- ديمه تعشيتي
- ايوه خلاص بغيت شي
- تعالي ابغاك برا في الحوش بس اطلعي من باب الحريم وتعالي لي بقسم الرجال
- اوف .. مشوار مافيني
- ليه تحسين بشي ..؟
- لا بس احسه مشوار بعدين خلاص خرجت وجاية لك
- يالله سلام
- سلام

وصلت عنده لقيته جالس يدخن برا
رمى سيجارته ودعس عليها قال : سلامات
قلت وانا ارشف من العصير : الله يسلمك
ناظر خالي فيني قال : بكرة تطلع النتايج وناصر بيروح يجيبها وانا بروح مع ابوك للمستشفى
فتحت عيوني وقلت : يعني انت جاي عشان تروح مع ابوي
قال وهو يرمي في فمه سيجارة :لاتنسين ان ابوك بمقام اخوي ولو يبي روحي عطيته اياها مستكثرة عليه مشوار من الطايف
- لا ماقصدي ادري ان ابوي يستاهل بس كان خالي اجل نتيجة التحاليل وراح مع ابوي وفكك من المشوار
- لا لا انتي بعد مهمه ( وخالي سامي يدخن بشراهة واحس تفكيره بعيد) ..ويكمل تدرين الشقيقه مو سهله
- تقولي والله ياخالي احس الم فظيع حتى جلست اصرخ وبكيت عشان يعطوني الإبرة اللي يشوفني يقول مدمنه وتبغى حقنة هههههههههههه
- ليتها شقيقه ولا شي ثاني هذا اللي مخوفنا
- ها اا ؟؟ زي ايش شي ثاني
- ...................... ( ينفث دخانه وهو يطالع على قدام وأحسه يطالع بعيد )
- قصدك ورم ..؟
- الله يستر انتي لاتفكرين بهذي الأشياء روحي نامي وبكرة الصبح ان شاء الله تطلع النتايج وتطمنا
- الله يستر
تركت خالي وانا تايهة وخايفة وكأني امشي في ظلام واتخبط رغم ان الإضاءة بكل مكان
شي ثاني زي ايش .. ؟ يقصد سرطان .. لوكيميا ..ولا امراض من اللي طالعة وتموت على طول .. حمى الضنك ، الوادي المتصدع ،انفلونزا الطيور ....ولا منقول لي مرض خطير بسبب الإبر اللي آخذها .. ايوه زمان كنت آخذ دم بسبب فقر الدم اللي كان يجيني .. سترك يارب .. والله خفت بجد...
طلعت لغرفتي بعد مانزلت كاس العصير بالمطبخ ماقدرت اكمله
بدلت وغسلت .. حاولت انام ماقدرت بالرغم اني مانمت كويس اليوم
سميت بالله وجلست اقرا المعوذات وآية الكرسي ونمت حوالي الساعه ثلاث الفجر .. وعلى الساعه 5 قمت اصلي لأان راسي بدا يألمني على خفيف .. وجيت برجع انام الا وراسي بدأ ببراكينه وهيجانه وثورته فتحت الباب بسرعه ورحت عند غرفة خالي دقيت الباب محد يسمع وانا مافيني حيل ولاقوة الألم كل مرة اقوى ويزيد احسه طوفان بيجتاح روحي بعد ثواني آه . خالي مايرد حتى على جواله . وهدى مقفلته ياربي . ومحد يرد رحت لغرفتي وانا بين الحياة والموت دقيت على جوال خالي مرة عاشرة ماكان يرد وجوال هدى نفس الرد اللي يعلن انها مقفلته آآآآه بموت هنا على فراشي
المشكله توهم ناموا متى بيصحون .... ياربي مااقدر اصبر الين الساعه 2 او 3 العصر ..
مو معقول الألم اقوى
جات في بالي .. خالتي فادية الحمد لله انها هنا وغرفتها قريبة مني اتصلت عليها حصلته انتظار عرفت انها تكلم زوجها ولو اموت مادرت عني وفعلاً ماردت ولا عادت اتصلت ..!
دورت رقم خالي سامي اللي تذكرت انه عندنا بالبيت حصلته ودقيت وانا خلاااص بموت
رد علي بعد ثلاث محاولات :هااااا ( بصوت نايم وكسول )
خااال ي ب موووت ال ح ق ني
: من ..؟ ديمة ..؟ لحظة جايك ..!
في ثواني الا خالي بغرفتي حتى ماحسب ان هدى ممكن تكون موجودة .. كان خوفه علي اكبر من أي شي بهاللحظة ومحد راح يلومه لأن وجع راسي بيموتي لو استنيت اكثر ..
شالني بدون شي لاعباية ولا شرشف ولا حتى طرحه نزلني للسيارة في اللي كان مدخلها لداخل البيت تذكرت عبايتي : عبايتي ياخالي آآآآآآآآآآآآآه بمووت خلاص
رجع خالي سامي يجري وجاب عبايتي ولفها علي وآخر شي تذكرته انه شغل السيارة وفتح البوابه بالريموت وخرجنا وهو لابس بيجامته ومابدل حتى
صحيت وأنا بنفس المستشفى اللي سويت فيها التحاليل وعندي خالي سامي وخالي ناصر اللي بسرعه شافني لمن صحيت وقام سلم على راسي ويقول سامحيني ديوم نسيتك والله والجوال صامت متعود قبل ماانام اخليه صامت
تبسمت له : لا ماعليه اهم شي اني الحين مافيني شي
كان خالي سامي واقف بعيد يتأملني وساكت ماتكلم .. طالعت فيه لقيته مبدل ملابسه لابس ثوبه بس بدون شماغ .. تذكرت انه كان بالبيجامه لمن جينا ..
سألت بوهن
- كم الساعه خالي ..؟
- الساعه 3
- العصر
- ايوه كنت نايمه ومعطينك مسكن نومك
- الحمد لله يارب ..سكت بعدين قلت وانا اناظر خالي سامي.. موعد ابوي ؟
- خلاص ابوك خلص مراجعته راح معاه سامي ورجع للطايف ماقلناله عنك شي ..!
- احسن لاتقولوا له شي اصلاً هو مسوي معاي تحقيق يقول وجهك ليه اصفر وتعبان وحاولت اتعذر بقلة النوم .. خالي سامي وش فيه ؟؟
قال خالي ناصر( بابتسامه ) : مادخن وطفشان .. مانعه مايدخن هنا
ناظرنا خالي سامي قال : ترى منتي طالعة من المستشفى لين نتطمن عليك
: شو ..؟ لا الله يخليكم مااحب ........
قاطعني بسرعه وهو يجلس على الكرسي اللي بجني السرير حقي : موبكيفك ..!
ناظرت خالي ناصر اللي مسح على راسي قال : الدكتور مصر ماتطلعين لأن حالتك ... وسكت
: ورم ..؟
بسرعه خرج خالي سامي اللي كان هم الدنيا على راسه باين في وجهه ..
خالي ناصر يحاول يداري ويبين ان الموضوع سهل وهين قال :ديمه هذا استنتاج مبدأي ومو واضح والدكتور يقول حتى لو كان ورم فهو في بداياته ولازم نتأكد
قبل مايكمل رن جوال خالي ناصر شاف الرقم وقام بعد شوي عني وجلس يكلم
- هلا والله بابو بدر كيف الحال ؟ .... الحمد لله .... ابد مافينا شي بس اني بالمستشفى اكلمك وموطي صوتي ....... الله يسلمك .. ديمه عندي تعبانه شوي وعشان كذا اتصلت عليك ابيك تساعدني ....... الله يسلمك هذا العشم ..... التقارير مبدئياً تقول ان عندها ورم ....... في الراس للأسف ..! ( بأسى ) ...............ارسل عليك التقارير والأشعات والتحاليل كل شي وانت اذا تبي شي مهم علمني ابي اتأكد بس .............. الله يعطيك العافيه ماتقصر يالغالي ..!
كنت اسمع وانا اصلاً توقعت ان عندي شي خطير من قوة الصداع .. كنت خايفة يكون بالدم بس الحمد لله اذا على الورم اهون ولو انه خطير بس يمكن استئصاله وفيه امل في نجاح العملية ..
الحمد لله رب العالمين احس اني هادية ومو منفعله ... واذا بموت يعني ... من بيبكي علي .. اخوالي وابوي وكلها فترة ويلتهون بحياتهم وعيالهم وأصير ذكرى بحياتهم
دق تلفوني رديت الا خالتي فادية تبكي : سامحيني ديمة كنت
: هههههههههههههههههه عارفه والله .. لاتشيلين هم مافيني الا العافية
كانت خالتي تبكي ومنهارة : توني دريت من سامي
: الحمد لله على كل حال
: بجيك بعد شوي انا وهدى .. ترى هدى ميته بكا عندي وبتجيك معاي بعد شوية
قلت لها وانا احاول اغير الجو واخليها تفرفش شوية : اذا بتقعدون تبكون لاتجون
قالت وهي تشهق : لا لا ماراح نبكي .. بنجيك ونجيب لك شي تاكلينه
قفلت من خالتي وانا اتذكر هدى ... صدق مابين معدن الانسان الا بأوقات الشدة
هدى اللي كانت تحاول تضايقني وتحسسني اني مجرد ضيفه في بيتها ... هدى اللي كانت اغلب مشاكلها مع خالي بسبب جلستي عندهم في البيت .. هدى اللي اذا كانت طفشانه حمدت ربها اني معاها واذا لا كرهت اليوم اللي جيت فيه للبيت ...
صحيح انها متغيرة من فترة من آخر زعل بينها وبين خالي لمن سمعها تلمح لي اطلع من بيتها واني المفروض اذا انتهيت من الدراسة ارجع عند ابوي ..او اسكن بالملحق اللي فوق لأنه فاضي وراح اخذ حريتي وهي كمان تاخذ حريتها .. وخالي الله يهديه ماقصر ضربها وأهانها وقال ان هذا بيت ديمة قبل مايصير بيتك .. استوعبت هدى الدرس وللحين ماجرحتني او لمحت لي بأي كلمة بالعكس صارت تهتم فيني ودايما تقول انها ماتتخيل بيتنا بدوني ...
اليوم هدى زعلانه عشاني تخاف اني اموت ..!
الحمد لله اقل شي اذا مت محد حاقد علي ولا يكرهني







دخلوا عندي وسولفنا وكانوا جايبين لي اكل وقهوة وشاهي وحلا ومعجنات .. جلسوا معاي لين الساعه 8 العشاء .. سمعنا صوت خالي سامي وبعدها طلعوا هدى وخالتي رجعوا للبيت وجلس معاي خالي سامي اللي شايل هم الدنيا على راسه ..
سألته : ليه مسوي بنفسك كذا .. ؟
: مافيني شي .. وصد عني وبعدين وقف ودخل يده في جيبه .. احسه مرتبك كثير بس رحمه ربي بالجوال لمن دق .. اول ماسلم عليه وكلمه عرفت انه عمي ياسر وعلمه بالجناح ورقم الغرفه وقفل
رجع يناظر فيني : هذا عمك ياسر بيجي يتطمن عليك
: غريبة عمي عمره مافكر يكلمني الا ...
: الا شو .؟
قلت وانا العب بالغطا اللي علي : الا عشان صاحبه وقال لازم اوافق عليه
قال وهو كأنه يتذكر: اها لا ماعليك ناصر انهى الموضوع ..
: ايوه عرفت .. بس الله يستر
ناظرني قال: لاتشيلين هم ..
دخل علينا عمي ياسراللي كان مرة متغير عن آخر مرة شفته فيها
سلم علي وقال سلامات وقعد يسألني عن مرضي ومن متى وليه ماكنت اجي للمستشفى .. وانا بدوري ارد بإجابات مختصرة اني كنت احسبه صداع عادي .. واني اذا نمت اصحى مافيني شي ..!
خليت المجال لعمي وخالي يسولفون وانا وصلتني اشارات مفزعه من راسي
رجعت راسي على السرير وأخذت المخدة لاشعورياً وحطيتها على راسي .. ماكنت ادري اش ردة فعلهم ولادققت فيهم كنت في الاعصار اللي اجتاحني احاول ادور لي شي اتشبث فيه لحد مايتجاوزني بس لاااااااا شكله مصر يجتاحني كله معاه .. آآآآآآآآآآآآه .. آآآآآآآآآآآآآآه بموت ..
: ديمه تحملي ناديت الدكتور .. كان صوت خالي سامي اسمعه من بعيد ..
جلست اصرخ بصوت واطي .. وأبكي بألم يارب ارحمني يارب ارحمني
دخل علي الدكتور اللي قعد يسألني للمرة الثانية من فين الألم وأنا أأشر على راسي كله احسه بينفجر ..
تكلم مع الممرضه اللي اخذت كفي الأيسر وغرزت الأبرة المسكنه فيه .... مرت خمس دقايق وانا احس الألم يطفي شوي شوي ..! الحمد لله

صحيت اليوم الثاني وانا تعبانه وحيلي مهدود رحت للحمام ابغى اتوضا واصلي احس بغثيان وابغى استفرغ بس معدتي مافيها شي من امس .. حاولت اتماسك الين اكمل صلاتي .. اول ماكملتها دخل علي خالي ناصر اللي كان باين انه مهموم سلم علي وسألني عن حالتي قال : يالله جهزي نفسك بعد ثلاثة ايام بنسافر لامريكا ولا اقول خلاص انا اكلم هدى تجهز اغراضك .. انتي ماتقدرين تطلعين
: شو ..؟ خالي بسوي العملية هنا ..
بسرعه قال : لااااا .. بعدين سكت وقرب مني وقال بهدوء : ديمة انا اخترت لك مركز هيوستن للأورام في امريكا .. بعدين مهند نصحني فيه .. ويعرف دكاترة ممتازين دلني على واحد علاقته فيه كويسة وخبرة احسن من اللي هنا ..!
: خالي اللي بيصير لي هنا بيصير لي هناك والمكتوب مكتوب ماابغاك تتكلف عشاني ولا تسافر عشاني
قاطعني : ديمه خلاص الموضوع منتهي ولااسمعك تقولين هالكلام اللي اسويه لبسام وأسامه اسويه لك لأنك بنتي فاهمة ولا لا ..؟ بعدين الموضوع منتهي واليوم بروح للسفارة عشان اطلع التأشيرات بدري وترى حجزنا بالمركز وزبطنا كل شي انا ومهند باقي عليك السفر بس
مر يومين على كلام خالي وزاروني خالتي فادية وهدى وام هدى وسلوى واخوات هدى واليوم الثاني جاتني لمى وروان وندى وليلى وبصراحه كدروا علي من كثر مابكوا .. الحين المفروض هم اللي يهدوني ويهونون علي صرت انا اللي اهديهم وأهونها واسوي نفسي عادي بالرغم اني بديت اخاف وأحس اني قربت من الموت ..
اليوم موعد السفر وخايفة يرجع لي الصداع وانا بالطيارة خاصة ان المسافه طويلة ومااقدر اتحمله بصراحه يعني لو داهمني بالطيارة معناتها راح اموت ..! قلت لخالي وانا خايفة : واذا جاني الصداع وانا بالطيارة ..؟
لاتخافين بعد شوي بيعطونك مسكن مدته 24 ساعه .. حمدت ربي وشكرته .. اخذت الإبرة اللي صرت ادين لها بحياتي بعد الله .. ورحنا للبيت البس وآخذ بقية اغراضي لمن شفت عيال خالي بكيت من قلبي .. هذي اول مرة ابكي بهذا الشكل من يوم عرفت مرضي .. مااتخيل اني بتركهم ويمكن للأبد .. صحيح مو اول مرة اسافر واخليهم بس اول مرة اسافر وانا احتمال كبير ما ارجع لهم .. وانا بحالتي هذي ..
احبهم والله احسهم عيالي انا .. عاد انتم تخيلوا ام مريضة وبتروح وتخلي عيالها وراها ..ويمكن تموت وماعاد تشوفهم... آآه بس
أخذني خالي من يدي وانا كنت حاضنه ياسمين وديمه ويدي الثانيه ورا أسامه اللي احسه لازق فيني بقوة وبسام اللي كان واقف شوية عني ودموعه في عيونه رحت له وضميته ولحقني خالي ومسك يدي مرة ثانيه قال مايصير كذا ياديمه هذولا اطفال .. التفت لهم قلت وانا ابتسم ماابغى اخوفهم : اشتقت لكم كثير واحبكم كثير .. ليه مازرتوني بالمستشفى
رد بسام وهو يبتسم ويحاول مايبكي : محد يرضى ماما تقول ممنوع ..!
ابتسمت ودموعي تنزل قلت : انا بسافر واذا جيت بشتري لكم هدايا ..!
وتركتهم وطلعت لغرفتي اخذت شور وبدلت لبست بنطلون ابيض وبلوزة طويلة لونها بيج وأطرافها محدد بذهبي ..ولبست صندل ابيض وذهبي .. وأخذت شنطتي الصغيرة اللي لونها ابيض .. ونزلت وعبايتي في يدي والشغالة معاها شنطتي حقت اغراضي وملابسي .. جا خالي بسرعه قال : يالله تأخرنا
وطلعت معاه ومع خالي سامي اللي بيوصلنا للمطار .. ودعت خالي سامي وانا ابكي وهو كان مخنوق ووجهه متغير احس بخوف في عيونه مايبغى يوريني اياه وعاطاني ظهره وهو يقول الله معاك وترجعين بالسلامه ..!
انقهرت لأني خليتهم يحزنون ويبكون .. هدى ماقابلتها لأنها مقفله على نفسها غرفتها وماتقدر تشوفني .. اعرف هدى دايما تقول انا استقبل بس مااودع اللي احبهم ..!
في الطيارة .. نمت اغلب الوقت مااصحى الا اذا جينا ننزل من ولاية لولاية .. وأكون زي اللي متخدرة ابغى ارجع انام ... كل ماصحيت وانا بالطيارة اشوف خالي جالس يقرا .. سألته بملل : كم باقي ..؟
: باقي ساعتين بس نامي اريح لك
احس فيني نوم مو طبيعي بسبب المسكن اللي آخذه ،، رجعت نمت وخالي رجع يقرا ..
قربنا نوصل وقمت للحمامات ونزلت عبايتي ولبست حجاب لونه بيج وأطرافه ذهبي بنفس لون البلوزة ..
وأول مانزلنا لبست نظارتي الشمسية السوداء وصلنا الصالة الا خالي يضحك ويسبقني وانا اطالع لوين يروح .. شفته يسلم على واحد طويل كان خالي بيني وبينه بعدين هو لف واعطاني جنبه رجع لي خالي وقال ان هذا مهند وبنروح معاه لشقته .. حسيت بالدنيا تلف فيني .. مااقدر اتخيل انه يشوفني بدون غطا على وجهي واروح معاه لشقته لاوالله .. بعدين موقفي مو حلو انا اللي رفضته بدون سبب مقنع الحين اروح معاه .. لا ومليون لا قلتها بنفسي
وقلت لخالي وانا احاول اوطي صوتي على قد مااقدر : تكفى خالي بنروح فندق .. خالي طلبتك لاتحرجني ..!
مسكني خالي بمعصمي وربت على كفي بيده قال: مهند بيروح يسكن عند صاحبه واحنا بشقته عشان مايحرجك ..!
لويت فمي وقلت وانا مكشرة : هو قال كذا ..؟
: ايه قاله وقال انه آخذ اغراضه اللي يحتاجها كلها يعني مابنشوف وجهه بالشقة ابداً..!
:طيب خلاص ولو اني اشوف انا لو نروح لفندق احسن له ولنا
اخذني خالي بيدي وانا احسني ابغى ارجع ورا ماابغى امشي قدام .. قدام فيه مهند ياربي استحي منه لو مانعرفه كان احسن اجل اتغطى عنه في السعودية وهنا لا .. وقدام فيه العملية وراسي والألم يارب استر بس ..
مشيت مع خالي وانا عيوني بالأرض ركبنا السيارة وجيت ورا خالي اللي ركب قدام .. ركب مهند وانا ماالتفت له سمعته يقول كيفك ياديمة ..؟ سويت نفسي ماسمعت وجلست اطالع برا .. بعدين قال بصوت عالي : سلامات ياديمة ماتشوفين شر .. كان خالي ساكت ماادري هو مايبغى يحرجني او انه كان يفكر ومشغول ولا معترض بسكوته على مهند لمن كلمني .. قلت بصوت واطي وكلام متقطع : ا لله ي سلمـ ك . طلعت صح الحمد لله بس مدري احد سمعني ولا لا ..




"
"
"



رحنا لشقته عشان نريح وبكرة موعدنا بمركز هيوستن للأورام ...
نزل خالي ومهند وانا متردده انزل ولا استنى لين خالي يقول انزل كنت مرة مستحيه من مهند .. وعيوني بالأرض ولافكرت اني اشيلها من على الأرض .. وكل شوي اعدل نظارتي على عيوني اخاف تبين عيوني .... ولاتستغربون سخافة تفكيري لمن تمنيت ان فيه نظاره تغطي الوجه كله كان البسها قدام مهند ولا يلمح مجرد لمحه شي من وجهي ..
سمعت خالي يقول : يالله ياديمه انزلي ولا تعبانه ..؟
نزلت ومشيت ورا خالي من دون ماارد وكأن وجهي بيطيح من الحيا .. نزل مهند الشنط حقتنا وطلع قبلنا وانا وخالي وراه .. ياربي شو هالإحراج .. والله لو رحنا فندق كان اخذت راحتي على الآخر وارتحت من اللي انا فيه
شفته يفتح الباب حق الشقة وانا معترضه عليه مو يقول انه مابيدخل ولا راح يجلس بشقته ليه اجل الح علينا نجي بشقته وهو داخل قبلنا ولا عذر تحجج فيه خالي عشان ارضى اجي معاه للشقة ..
دخل الشنط ودخل خالي وانا وقفت برا الشقه مااقدر ادخل بصراحه وهو موجود .. رجع لي خالي سحبني من يدي ..: وشفيك انتي ليه ماتدخلين ...؟
: ها .. ليتنا رحنا لفندق احسن من هنا الله يسامحك ياخا ...
جانا صوت مهند اللي قطع كلامي مع خالي ..: يالله يابو بسام بيجيكم غداكم وانا اشوفك بكرة بإذن الله
قال له خالي يتغدا معاه بس رفض ومااعطى خالي فرصه يناقشه

حمدت ربي بعد ماراح مهند ..

شلت الطرحه على طول ورحت ادور على الحمام فينه لقيته وأخذت لي شور سريع وبدلت لبست بيجامه قطنيه لونها زهري ودخل خالي بعدي وأخذ شور هو كمان وبعد شويه دق الباب وفتح خالي لقاه من المطعم وأول ماشاف خالي سلم عليه ورحب فيه طلع سوري يشتغل بمطعم عربي وجايب لنا منه غدا كباب وانواع المشاوي مع سلطات انواع وأشكال .. قال ان الدكتور مهند حاسبه وسلم على خالي ومشى .. لمن سمعت صوته حنيت لجدتي .. اشتقت لها كثير .. ماادري اشوفها ولا لا خاصة انها ماتدري عن اللي صار لي .. من فترة ماكلمتها .. آخر مرة قلت لها اني بخير ماحبيت اقلقها علي ..! وابووي آآآه ياابوي اذا سأل عني ولا دق علي وش بيقولون له .. اكثر شي قهرني اني سافرت وهو مايدري ..! بس خالي سامي وعدني انه يقول له اني جاية ادور جامعه كويسة عشان اقدم على بعثه .. يقول انه بيقنع ابوي ولو اني عارفة انها ماراح تمشي على ابوي .. لأنه بالعقل لو كلام خالي سامي صحيح كان اقل شي ودعته وسلمت عليه ولا كلمته بالتلفون ..
رجعت لعالمي وحالتي وشفت الشقه اللي عبارة عن صاله تصميمها راقي وأثاثها بسيط وراقي لونه ابيض وخداديات اورنج.. وفيه مكتبة تلفزيون فيها ارفف مرصوص عليها كتب اغلبها انجليزية .. والمطبخ مفتوح على الصاله .. وغرفتين كل وحده بحمامها وحده فيها سرير ومكتب ودولاب ملابس كبير شويه والثانية فيها سرير ودولاب صغير شكله اذا جاه احد يخليه ينام بالغرفه الثانية او ان معاه احد ساكن بالشقه بس السرير الثاني باين انو جديد ومحد استخدمه حتى الدولاب مرة جديد مو زي الغرفه الكبيرة واللي سريرها باين انو مستعمل بالرغم انو نظيف ومرتب .. طبعا انا ماطلعت ولا شي من الشنطة حقتي لأن بكرة بروح للمركز وياعالم متى اطلع هذا ان طلعت ...!حتى ملابسي رجعتها بشنطتي ..

الحمد لله لسه الألم ساكن وماراح اتألم قبل بكرة بإذن الله عشان المسكن اللي اخذته بالمستشفى ...!
دخلت غسلت وفرشت اسناني بعد ماتغديت مع خالي ودخلت الغرفه اللي حسيتها انها موغرفته صليت وحاولت انام .. دخل علي خالي قال بنام في الغرفه الثانية اذا حسيتي بشي تعالي بسرعه قولي لي مو لين يزيد الألم
قلت له حاضر وطلع
نمت حوالي اربع ساعات وقمت اشوف خالي بالغرفة الثانيه دخلت بهدوء لقيته نايم وباين انه تعبان .. تركته نايم ورحت للصاله شغلت التلفزيون قلبت في القنوات ماعجبني شي ورحت اشوف الكتب
غازي القصيبي آخذ حيز كبير من الرفوف .. بدر شاكر السياب كتابين .. جبران خليل جبران وغادة السمان وأحلام مستغانمي ومحمود درويش موجوده اسماؤهم بين الكتب .. اخذت كتاب لغازي اول مرة اشوفه اسمه "دنسكو" فتحت الكتاب ابغى اقرا عن ايش يتكلم .. بس ماقريت ولا كلمه عيوني بدت تزغلل ، وراسي بدت براكينه وإعصاراته وانفجاراته .. حطيت المخدة عليه يمكن هالمرة تسوي شي مافيه فايده وكل ماله يزيد ..! رميت الكتاب من يدي على الطاولة اللي قدامي وقمت بروح لخالي اصحيه ..
ياربي باقي على مفعول المسكن ماخلص 24 ساعه لسه بمووت .. حرام خالي مانام كفايته اروح اصحيه بس غصب مافيني اتحمل .. مشيت وانا احس بيغمى علي من قوة الألم اللي سيطر على حركتي وماعدت قادرة اتحرك ..ناديت خالي بصوت متوجع بس مافيه رد .. وصلت غرفته وانا اصيح بصوت واطي ... لأن حتى الصوت يألمني اكثر .... صحى خالي مفجوع على صوتي وبسرعه قام غسل ولبس وقبل مانخرج شفته هو يكلم مهند وقال له تعال بسرعه مااعرف المركز وينه .... ايه ديمه تعبانه بالمرة عجل الحقني وقفل ..
كنت بروح البس بس ماقدرت احسني اتهاوى على الأرض .. وصحيت وانا في المستشفى وعندي ممرضة على طول قالت انها بتسوي لي تحليل دم
وأخذت مني دم وأخذتني بعد كذا لقسم الأشعه سووا لي اشعه مغناطيسية .. ورجعت لغرفتي وانا منهكة .. دخل علي بعدها الدكتور اللي قعد يسألني عن الألم وشكله .. ومن متى وكيف بداياته وكيف تطور دخل خالي علينا وفهت من كلامهم ان العملية بعد بكرة ... طلع الدكتور وجلس خالي عندي سألته : خالي ابوي درى عني واني سافرت ولا لا .؟
: ها ايه علمه ياسر .. فجعه الله يهديه ..
: غريبة ماكلمني ياويلي لايكون فيه شي .
: لاتفاولين ان شاء الله مافيه غير العافية
: بدق عليه الحين ... وانا اضغط على اسم الغالي الا طلع الجهاز مغلق ..
ناظرت بخالي وانا اضغط على جوالي بيدي : خالي ابوي فيه شي ..؟
مسح خالي على راسي وقال بحنان وهدوء: لو فيه شي اكيد بيعلموني العيال بس محد قالي شي ..بس انتي تطمني وفكري بنفسك وصحتك وادعي ربي ان الله يعافيك
ماكان يهمني الا ابوي ابغى اسمع صوته يمكن اموت ماسمعته او تطمنت عليه قلت بحالة يأس : استر يارب
.................................................. .......



لـــي ع ــودهـ مـرهـ ثـآنيــهـ إن شـآءاللــهـ....

[شوقي لوليف روحي]

بـــآـآـآـآـآكـ.....




.................................................. ...........


مر علي اليوم كله وانا بين النوم والفحوصات اللي بجد طفشتني بس عشان العافية لازم اتحمل واصبر
كان خالي يجيني يجلس شويه يتطمن ويطلع ساعتين ثلاث بعدين يرجع لي .. آخر شي الحيت عليه يروح مو محتاجه احد خاصة ان فيه ممرضة فلسطينيه حبوبه ومهتمه فيني بزيادة ..
جا يوم العملية وانا قلبي مو مرتاح من ابوي اللي كل مادقيت عليه اعطاني مقفل .. سألت خالي قبل ماادخل غرفة العمليات : الله يخليك تقول لي اذا ابويه فيه شي ولا لا ..؟
: ديمه صدقيني مافيه الا العافية بس انتي لاتفكرين الا بنفسك .
: خالي تكفى بكلمه يمكن اموت وانا ماكلمته
: اش هالكلام كلها كم ساعه وتطلعين مافيك الا العافية وبتكلمينه وتجلسين معاه . ادعي ربك انه يقومك بالسلامه وابوك تراه حساس يقول لي سامي انه مايقدر يكلمك وانت بهالاحالة يخاف يتأثر بعدين يأثر عليك .
سكت مجبرة لأني اعرف خالي نقاش زي هذا معاه مايوصل لنتيجه . حاولت اصدق بس الشك مسيطر علي ان ابوي فيه شي خاصة ان عنده القلب والضغط والسكر .. وأي صدمة تأثر عليه .. :"يارب استر" .. كنت ارددها باستمرار .
دخلوني غرفة العمليات ورددت بعض الآيات اللي انا حافظتها بعد ماقريت المعوذات وآية الكرسي وتوكلت على الله حسيت ان ابرة البنج بدت تخدرني .. وفي ثواني غبت عن الدنيا .
صحيت وانا احسني احلم تذكرت الم راسي .. امريكا .. العملية .. بس لسه ماادري ويني الأكيد اني مو بغرفة العمليات ..
فتحت عيوني اكثر بشوف انا رجعت للدنيا ولا اني في القبر ولا وين ..
لا شكلي بالمستشفى في غرفة ثانية وعندي مريان الممرضة الفلسطينية اللي اول ماشافتني ابتسمت .حمدت ربي وشكرته اني موجودة .. طلعت الممرضة ورجعت لي بسرعة ومعاها واحد عرفت انه دكتور من البالطو بس مو الدكتور ويليام المسؤول عن حالتي واللي سوا لي العملية .: الحمد لله على السلامة . قالها . وانا انصدمت ...يوه يتكلم عربي ...؟! اوف استوعبت منهو لأني عرفت صوته .. "مـ هـ ن د" قلتها بنفسي وغمضت بقوة .. بعدين قلت: الله يسلمك ... بصوت احسه يطلع مع راسي مو من فمي من الوجع
: تحسين بألم .. وهو يطالع بالأوراق اللي بيده
: هزيت راسي بإيه وانا اطالع تحت
: كيف الألم زي الأول ولا يختلف
: لا .. اخف ..بس .. لسه فيه الم
: الحين تاخذين مسكن ويروح
سكت وانا مغمضة حقنت الممرضة المسكن في وريدي ونمت بعدها بخمس دقايق وهو جالس يكتب عندي ..

مر علي اسبوع وكل ماحسيت بألم آخذ مسكنات .. نسيت او تناسيت وجعي وعمليتي واحس بهموم الدنيا على راسي لأني مو مطمنه على ابوي .. خالي يتهرب مني واذا شافني ابكي عشان يعلمني قال مايقدر يكلمك وانتي تعبانه وسامي خايف يصير له شي اذا سمعك تعبانه واحنا نقوله ان مافيك شي بس مانعينها من الكلام في التلفون ..
ماصدقت خالي لين كلمتني خالتي فادية وقالت لي نفس كلام خالي حتى مو مزودة ولا منقصة أي كلمه .. وسألت خالي سامي وقالي نفس الكلام وزود عليه اعذار كثيرة ..
باقي لي اسبوع ثاني وارجع للسعودية بس المشكلة اني بجلس في بيت مهند ..
طلعت من المستشفى ورجعت مع خالي لشقة مهند ... احسني لسه ضعيفة مااقدر امشي ، خالي صار مايطلع من الشقة الا دقايق ويرجع ومهند كل شوي يجي ويجلسون بالصاله وانا بغرفتي مااطلع ..لقيت الغرفة مو زي ماتركتها يعني فيها اشياء ماكانت فيها .. طاولة قريبة من السرير عليها كتب لغازي القصيبي .. الجنية ، رجلٌ جاء وذهب ، العصفورية ، شقة الحرية ، والعودة سائحاً الى كاليفورنيا .. ودنسكو اللي تركته من يدي قبل ادخل المستشفى .. وديوان شعر اسمه مائة ورقة ورد لغازي القصيبي جابه خالي لي عشان يسليني اذا كان مع مهند ورقة ورد وثاني اسمه الخليج يتحدث شعراً ونثراً ..... ولقيت كمان بالغرفة استريو وسيديهات اكثرها لفيروز ومحمد عبده وفيه لرابح صقر وخالد عبدالرحمن ونوال والرويشد والجسمي وفيه لمطربين غربيين .. .. عرفت ان خالي يعرف ذوقي بالكتب والأغاني وأكيد هو اللي اختار لي هالكتب وجابها عندي .. تمنيت لو هدى معاي ولا خالتي فادية عشان خالي ياخذ راحته ويروح يتمشى مع مهند حرام احسني حابسته معاي ..
جلست يومين وخالي ومهند يجلسون لين الساعه 11 بعدين مهند يروح وخالي يدخل غرفته اللي هي غرفة مهند وينام ..
اما انا كنت انام على الساعه 12 او 1 بعد مااقرا قرآن واقرأ في ديوان مائة ورقة ورد لأن الباقية قد قريتها كلها ماعدا دنسكو اللي يذكرني بالمستشفى والألم فما حبيت ارجع اقراه .. وكنت اصحى الصباح اسمع فيروز وماسمعت غيرها بشقة مهند لأن اذا حضرت فيروز بطل كل فنانين الدنيا .. قاعدة عندي ومقتنعه فيها وماراح اغيرها...!
دخل علي خالي الساعه 9 وجاب لي فطور وجلسنا مع بعض نسولف الين دق الباب وراح خالي يفتح بعدين رجع لي بعد عشر دقايق يمك
كنت احس خالي بيقول لي كلام بس حسيته متردد قلت له بسرعه : فيه شي ياخالي ..؟
: امممم ترى مهند عازمنا على الغدا بمناسبة نجاح عمليتك
: شو ..؟
: والله انا قلت له مايجوز ومايصير وادري ان ديمه بترفض هذا اذا مازعلت مني ... بس هو اصر علي وألح وقال لي انك كنتي بين يدينه سبع ساعات ومافيها شي لوجلستي معانا
: معقوله انت اللي تقول كذا ياخالي ..؟
: ديمه انا مااقول تعالي سولفي معاه ولا اضحكي الرجال عزمنا قال ان الغدا لديمه بمناسبة نجاح عمليتها لأنه ضيفني وانتي بالمستشفى
: مستحيل ياخالي والله يخليك بنروح نجلس بفندق خلاص زودناها ..
: اذا انتي رافضة بكيفك بس ترا مافيها شي انتي متحجبة ومتسترة ولا عدنان زوج خالتك سمر ويوسف زوج صديقتك تقابلينهم في سوريا عادي ومهند لا ..!
: اولاً عدنان زوج خالتي يعني من العايلة .. ثانياً ماقد اكلت مع عدنان بسفرة وحده .. ثالثاً يوسف قابلته مرة وحده وهو اللي ناداني عشان ريناد معاه وهي اللي قالت له .. وسلمت عليهم وجلست معاهم اقل من خمس دقايق مع خالتي سمر .. كملت ودموعي تنزل .. رابعاً هالمهند مستحيل اشوفه بعد كلامه هذا وماعادني قاعده بشقته ابداً ..
: طيب طيب هدي اعصابك .. وعلى كيفك بس كرهتيه ليه ترى الرجال خيره علينا ووقفته معانا بتظل دين في رقبتي لاتقولين هالحكي الفاضي عنه المفروض تكونين مدينه له بحياتك ..
طلع خالي من عندي واعصابي متوترة .. ماادري ليه ..؟ يمكن لأن مهند وقف معانا ولاكأني رفضته بدون سبب مقنع .. ومالي وجه منه .. !
صدقوني مافيه سبب ثاني بس ماابغى احرج نفسي معاه بعدين خالي ادري انه يسوي كذا يبغاني لمهند بس لااا مستحيل مهند يخطبني مرة ثانيه ومستحيل اوافق عليه بعد مارفضته بيقول بترد لي الجميل وانا ماابغى ابني مستقبلي على عرفان وجميل وأصادر قناعاتي بشخص اللي متقدم لي ..!
سمعت جوال خالي يرن .. وكان صوته واضح لمن تكلم .. سامي خير وش فيه ......... اش قاعد تقول انت ..؟ .............. لاحول ولاقوة الا بالله طيب طيب ............. لا لا بجي بأقرب فرصة ان شاء الله .. ..... ماعليك انت بكره بخلي الدكتور يشوفها ونجي على طول .............. الله يرحمه ويجعل مثواه الجنة ..كأن خالي تكلم بصوت هادي او قال شي بعد ماقفل بس ماسمعته ..
انا سمعت مكالمة خالي ونبرة صوته فيها حزن بس على مين ياربي ..؟ ياويلي لايكون من خوالي ولا ابوي ولا احد يقرب لنا ..؟
حسبت خالي لوحده بالشقه ماكان على بالي انه مهند هنا بس سمعته يقول : عظم الله اجرك واحسن الله عزاك
: جزاك الله خير .. قصر صوتك لاتسمعنا ديمه .
كأن صوته خفت شوي وبعد شوي سمعت باب الحمام قفل وانا صرت ارتعش اصلاً سيرة الموت خلقة ترهقني فما بالكم اذا احد يقرب لنا .. ومن هذا اللي بيرجع خالي عشانه والمفروض اليوم الثلاثاء وموعدي يوم الجمعه وبيقدمه خالي لبكرة الأربعاء ...غريبة ..! ومن اللي مايبغاني اعرف انه مات ..
تذكرت ابوي ..ياويلي
قمت وانا امشي بشويش متوقعة أي صدمة تقابلني وكأني مجهزة نفسي عشانها
شفت مهند جالس على الكنبه معطيني ظهره ومنزل راسه بين يدينه ويشد شعره كأنه بيطلع من راسه شي وحسيت انه متوتر يعني هذي مصيبه ياويلي
جيت من وراه وماهمني أي شي بالدنيا الا اهلي وأبوي .. ابوي اللي من زمان احس ان فيه شي وهم كلهم يطمنوني
قلت وانا ارتجف : مين اللي مات
فز مهند من مكانه وطالع فيني وانا عيوني كلها دموع وماابغى ابكي : ها ..؟ محد مات وناظر ناحية الحمام كأنه يبغى خالي يجي ينقذه من الموقف
قلت بصوت مخنوق ودموعي كل مرة تزيد : قول الله يخليك هو ابوي ..؟ اصلاً كنت حاسة ان فيه شي ..
: لا مو ابوك هذا واحد من اصحاب خالك .. اعتقد ماتعرفينه .. سكت وهو يناظر بكل مكان في وجهي بالحمام في الأرض فعلاً مرتبك بعدين كمل : روحي ارتاحي ابوك واهلك مافيهم الا العافية
تركته ورحت عند خالي وهو بالحمام سمعت مهند يقول : تعالي بيجي الحين
مارديت عليه ودقيت على خالي وناديته بصوت مخنوق : خالي ابوي صح ..؟
مارد علي خالي .. وحسيت انه يبكي ولا هرب من مهند ولا ايش
جا مهند وأخذني بيدي .. ماكنت احس بشي في الدنيا : ديمة مو زين عليك الزعل تعالي بتخربين كل اللي سويناه انتي تتوهمين صدقيني ابوك مافيه الا الخير اذا تبيني اكلمه الحين دقيت عليه ..
: لا جهازه مقفل ..
كنت اقوله وانا احس بخوف عمري ماحسيته .. اذا ابوي راح من يبقا لي .. اذا ابوي راح كيف اعيش لاام ولا اب ولا جدتي عايشه ..! ياربي انا ولا ابوي .
نزلت دموعي وانا متجمده ومحد راضي يقول لي شي يقنع .. سمعت الحمام انفتح وخرج خالي عيونه كانت زي الدم اخذني وحط راسي على صدره قال ليه الدلع الحين يموت ابوسعيد جارنا تبكين ، تموت مزنه جدة لمى تبكين ، حتى رايد صديقي يموت تجلسين تبكين عليه ..
ناظرت فيه وانا مابين فرح وزعل .. رايد صاحب خالي اقرب الناس له .. بس اهم شي ابوي مايموت .. صحيح صرت انانية بس ابوي الا ابوي ..اصير انانية وحسودة وجشعه وكل الصفات السيئة تجي فيني اهم شي ربي يخلي لي الحنون الطيب القلب الكبير .. قلت وانا اناظر بعيون خالي : اذا مو ابوي ماراح ابكي .
ماادري ليه حسيتني ديمه هذيك الصغيرة اللي عمرها ست سنين واذا تبغى شي تلح عليه وتترجا خالها عشان يجيبه الحين اترجاه يقول ان اللي مات مو ابوي .
مسح على راسي قال انا بروح احجز على رحلة بكرة او بعد بكرة بالكثير لازم اروح تعرفين عزا رايد عاد .. وانتي خلي تلفونك عندك اذا بغيتي شي اتصلي .
مهند اللي ماكنت ادري هو موجود ولا لا طلع صوته من المطبخ شكله شافنا وراح للمطبخ مستحي يجلس معانا .. قال لخالي : انت ارتاح بروح انا احجز واجيب التذاكر لاتشيل هم .
: لا لا بطلع .. رفع يده بكاس المويه اللي فيها وأشر على خالي قال : خلني اروح معاك .
حسيت ان خالي يبغى يطلع من الجو هذا .. انا اسبب الحزن مريضة وخايفه على ابوي وابكي وماراح اخفف عن خالي قلت بصوت مخنوق : خالي اخرج انت انا مافيني شي احسني احسن .





_________________________........_________________ ___



كل شوي خالي يتصل علي واطمنه بالرغم اني كنت ابكي فيني خوف وابوي مااتصل ولا فتح جهازه ..
على الساعه تسعه دخل خالي وهمه احسه قد الجبل معقوله رايد لهالدرجة غالي عليه .. اتذكر خالي حزن على جدتي كثير بالرغم انه متعلق فيها اكثر من اخوانه كلهم الا ان حزنه هالمرة اقوى .. ماكلمته لأنه مايقدر يتكلم ولا له نفس كنت ابكي على صاحب خالي وعلى حالة خالي .. وكنت خايفة على ابوي كثييير ...
ومقهورة من مرضي يمكن حالتي النفسية لها دور في حزني ودموعي ..!
اليوم الثاني رحنا للمركز وكشف علي الدكتور وسووا لي كل الفحوصات والحمد لله طمنونا وقال لنا الدكتور تقدرون تسافرون بس تراجعون مستشفى عندكم وطبيب متخصص عشان تتطمنون اكثر ولا ارجعوا لي بعد شهر عند أي ملاحظة او اذا طرأ أي عرض عليها ..

سافرنا بالليل كنت لابسه بنطلون اسود واسع شوية وتي شيرت اسود فيها رسوم باللون الفضي والأبيض لبست حجاب اسود حرير مكمش ولبست نظارتي الطبيه واحنا خارجين ركبنا مع مهند اللي ماتكلم من يوم ركبنا الا لمن قال بتوصلون هناك يكون الصباح في جده .. رد خالي : احسن يمديني اروح للطايف ونريح هناك
لمن قال الطايف شهقت ياربي رجع لي الشك ان ابوي فيه شي ..طالعت بخالي اللي حس فيني وسمع شهقتي بس مابين لي .. ومهند التفت علي وطالعني بنظرة ماقدرت افسرها .. كنت اتوسلها تبين لي شو فيه بالضبط .. ابوي ولا لا .. احد من اخوالي ..؟ خالتي ساميه .. عمتي ولا احد من اخواني ..؟ أي شيء تفسره لي نظرته بس المهم تطمني ..
مرت علي ساعات كأنها دهر بالطيارة .. صحيح مر على عميليتي ثلاث اسابيع واني الحمد لله احس اني بخير بس ابوي ابغى اشوفه عشان افرح صدق ..
وانا مغمضة عيوني رحت افكر : ياربي بشوف ابوي اذا شفته بسوي نفسي زعلانه لأنه ماكلمني بس بحضنه بطيح في حضنه زي كل مرة .. بحط راسي على صدره وهو يمسح عليه ويشمه بعمق زي كل مرة لمن يقول هذي عافيتي ..
بسلم على يده وراسه وخدوده .. ياربي متى اوصل مشتاقه كثير لابوي .. اول مرة اطول عنه
لمن اروح عند جدتي بسوريا كان يكلمني كل يومين بس الحين احسني من زمان عنه آخر مرة شفته وكلمته ليلة يتعشى عند خالي ..
في الطيارة كانت الأفكار تتضارب في راسي .. حزن خالي على صاحبه بهذا الشكل .. دموعه اللي تنزل من عيونه وهو يحاول يداريها عشان مااشوفها
ياناس بحياتي ماشفت خالي يبكي ..الا من يوم توفى رايد ..
صمته ولا نظراته فيني احياناً احسها تكسرني من داخل .. خالي فيه شي اكبر من وفاة رايد .. لايكون هو السبب بموت رايد .. لااااااا اش هالأفكار الغبية
بس الأفكار اللي مو غبية ان خالي فيه شي اكبر من مصيبة موت رايد ..
وصلنا بعد جهد وارهاق نفسي وجسدي .. وماتصدقون لو اقولكم انها اطول رحلة بحياتي وكأنها شهر ..
بالمطار تفاجأت لمن شفت خالي ماجد هو اللي جا يستقبلنا .. اجل وين خالي سامي اللي هذا شغله اصلاً .. ياويلي لايكون خالي سامي هو اللي مات
والله صارت افكاري تجيبني وتوديني .. بس خالي سامي كلمني بعد مكالمة خالي اللي قلبت كيانه .. اجل مو هو بس اش فيه لايكون صاير عليه شي
سألت خالي ماجد بلهفة : فين خالي سامي لايكون فيه شي ..؟
: الله اكبر ياديمه كل هذا ماتبيني استقبلكم هذا وانا اللي فرحان فيك ومشتاق لك بس اخ لو دريت خليت سامي يجي وانا ريحت عمري ..
: لاوالله خالي مااقصد حتى انا مشتاقة لك بس مو من عوايد خالي سامي يترك مثل هالمناسبة
سكت خالي ماجد لمن التفت لخالي ناصر اللي مسح وجهه بمنديل وحسيته يبكي
انخرست انا ومتى اوصل للبيت اشوف هدى هي اللي بتقول لي خالي اش فيه .
وصلنا البيت بس اخذني خالي ماجد للمجلس خلاص عرفت لمن خلاني اجلس على الكنب وطالع بالأرض
قلت له وانا احسني اختنق ومااقدر اتنفس
: ابوي صح
: الله يرحمه تعب وجلس اسبوعين في العنااية و ............ صرت احس صوته يضيع واسمع صراخ واصوات في راسي واذاني كأن عليها جبل وتهاويت على الأرض

"
"
"






رحت مع خالي للطايف وأنا كل مكان امر فيه احس بعذاب وحزن .. كل شي بالطايف يذكرني بابوي .. وقفنا عند بيت ابوي ودقيت على عناد وبسرعه رد علي قلت له اطلع انا استناك .. نزلت لمن شفته ونزل خالي اللي سلم عليه قبلي بعدين سلمت عليه بعناق طويل ابوي عناد .. ريحة ابوي والولد اللي ابوي باني عليه آماله .. خليته يركب قدام وانا ركبت ورا وشفته متأثر من طريقة سلامي عليه بس مابكا .. عناد عمره 15 سنه بس من تصرفاته كأن عمره 20 او 25 .. حبيب اخته رجال وتصرفاته رجوليه بس خايفه ان امه تدمره ..
رحنا لبيت عمتي اللي استقبلتنا بالدموع وجلست عندنا وعناد معاي ترك الرجال بعد ماسلم على زوج عمتي صالحه .. سولفت معاها شوي وقلت لها عن رغبة ابوي اللي قال لي عليها وانه خايف على عناد من امه .. وحسيت عمتي تأثرت عشان عناد وبنفس الوقت انقهرت من ابوي ليه يستحي من زوجها اللي يعتبره اخوه وليه ماقال لهم وهم يدورون العيال لهم سنين ..
التفت انا بدوري لعناد وقلت له : عناد انا ادري انك تعاني عند امك وانها تتكلم عليك واحياناً تضربك .. ومنت مرتاح عندها بالبيت .. بس امك واخوانك محتاجين لك .. انت الحين رجال البيت اذا بتجلس عند عمتي وتمر عليهم باستمرار عشان هنا مصلحتك .. وهنا بترتاح .. هذا شي راح يسعدنا ويطمنا .. اما اذا بتقطعهم وتنساهم فأنت بتخيب ظن ابوي الله يرحمه فيك .. وانت شوف اذا تقدر تصبر على امك وتتحملها عادي ارجع واجلس عندها محد بيجبرك
فز عناد بسرعه قال : ياديمه انتي ماتدرين امي وش تسوي .. يوم ابوي الله يرحمه موجود كان هو اللي يمنعها لاتضربنا والحين تضربني بس انا كبير اقدر اهرب منها بس روحي شوفي جسم عادل .. وروحي شوفي سديم الصغيرة .. ياديمه امي مريضة لازم تتعالج ..
لمن سمعته يقول كذا حسيتني بنهبل ..بتجنن على اخواني ياويلي هذولا من بينقذهم .. انا مجربة ضربها وقسوتها ورميها لي مع الدرج .. طالعت في عمتي وانا مفجوعة ..
عمتي معروف عنها انها حرمه حكيمه هي اصغر من ابوي على طول يعني عمرها في الاربعين .. قالت بعد صمت دقيقه يمكن : خلك هنا ياعناد وانا بروح اليوم لجدك واتفاهم معاه عشان محد يلومنا اذا اخذت اخوانك .
: "تدرين ان امي تقول بتزوج" .قالها عناد وراسه بالأرض وأحسه مهموم ومتفشل من امه
ماردينا ولا علقنا .. يعني ابوي توه كمل شهر بموته وهي تفكر بالزواج ... لاوتقوله لعيالها الله يهديها
قام عناد بعد ماقال : عمة اش رايك اجيب اغراضي كلها عندك انا احيانا افكر اهرب من البيت بس ماادري فين اروح
: الا يمه هات اغراضك وانت واخوانك عيالي وحبي لكم من حب ابوكم الله يجعل مثواه الجنه . اليوم جيب اغراضك انت ومن بكره اتفاهم مع جدك واجيب اخوانك عندي
: عمة ترى سديم صغيرة وماتتحمل ضرب امي
انقهرت على حظ ابوي وحظ اخواني اثريني بنعمه .. الحمد لله على كل حال .
حتى سدومه الصغيرونة تعذبها ..








عدا الترم والحمد لله درجاتي كلها عاليه .. بدينا الاجازة الصيفيه من جديد يارب تكون هالإجازة عكس الإجازة الماضيه .. ماابغى اتعب ولاابغى شي ينغص علينا ..
جالسة مع خالي عبدالرحمن في الصالة ونتقهوى.. مديت عليه فنجال القهوة قال بعد مارشف من فنجاله ونزله على الطاولة : محمد اخوي كلمني عنك يبيك لرامي ولده وش رايك ..
بصراحة ضحكت ونزلت صحن الحلى اللي بيدي وقلت لخالي وانا أأشر على صدري : انا اتزوج رامي ..؟
حسيت خالي معصب من ضحكتي وطريقة سؤالي يحسبني اتريق او اتمسخر في رامي قال : ليه رامي وش فيه مو مالي عينك ..؟
انتبهت ان خالي فهمني غلط قلت : بالعكس رامي كل بنت تتمناه بس عمرك سمعت بنت تتزوج اخوها ..؟
ناظر فيني خالي وتبسم قال : لا .... سكت شوية .. بعدين غمز لي بعينه وكمل : اصلاً فيه ناس مكلميني عشانك بس قلت اشوف رايك برامي اول ..
: مين الناس ..؟
: هذا زميلي بالعمل اخوه خريج قسم اداره واقتصاد .ويشتغل في بنك الراجحي .. راتبه ممتاز ... وهم اساساً ناس ماشاء الله عليهم تجار .. بعدين سكت خالي كأنه يتذكر شي وحك راسه وكمل : المشكله انه في الرياض .
جيت بتكلم قال : انا سألت عنه وهو ماعليه كلام بصراحه .. وانتي لاتتكلمين الحين بس لاتنسين ان نفسي افرح وابي افرح فيك ياديمه ...
سكت وماعلقت بكلمه .. قعدت افكر بكلام خالي .. اتزوج واحد مااعرفه ومن الرياض .. بس كل البنات كذا يتزوجون وهم مايعرفونهم ولا قد سمعوا عنهم ومع كذا يصيرون سعداء ومرتاحين بحياتهم .. اهم شي ان خالي سأل عنه ..
فكرت زين بعدين قررت ..!
انفعلت هدى لمن قلت لها اني موافقه .. وانا بقلبي متخوفه احسني اغامر بحياتي ودراستي .وكيف ابعد عن خالي واروح الرياض هذا اللي احسه مرة صعب
قالت لي وهي معصبة : ديمه من جدك تتزوجين واحد بهذي الطريقه . وترفضين شباب كل واحد احسن من الثاني وتوافقين على واحد ماتعرفينه ولاعمرنا سمعنا فيه
وقفت بروح للمطبخ قلت ببرود : عادي القسمه ياهدى بعدين هذا سأل خالي عنه ويقول رجال وهذا خالي سامي راح للرياض يسأل عنه
مسكتني بيدي قالت : اتركي اخوالك وسؤالهم .. من سألوا بالله ..؟ ولا من بيسألون ..؟ يعني اصحابه وأهله وزملاؤه وجيرانه اكيد بيقولون كويس وطيب ورجال عشان مايقطعون نصيبه
سحبت يدي منها وقلت بحيرة وانا امشي : هدى لاتخوفيني
لحقتني هدى للمطبخ وهي تتكلم بجدية وخوف وحرص باينه في لهجتها وعيونها : الله يوفقك ياديمه بس حبيت اذكرك انك رفضتي سلمان ثم مهند وبتتزوجين هذا اللي مايزيد عن مهند او سلمان بشي ..
كأن هدى خبطتني على راسي ... اوووه تذكرت مهند ياناس .تجاهلي لكل تصرفاته و بدون سبب .. اهتمامه فيني اللي مااستاهله .. شكله ..! ياربي على شكله ..! العيون الواسعه ، الشعر الاسود الطويل ، الطول والاكتاف العريضه واليدين القويه .. اتذكر لمن مسكني يوم سألته اللي مات ابوي وقال لا ..! نظراته اللي كلها اهتمام وانا اصد عنه واتجاهلها .. كلامي عنه يوم جا يعزمني .. يووه اكيد سمعني ... بس والله ماكان من قلبي كنت متنرفزة من خالي وقلقانه على ابوي ..!
يالله يمكن مهند رجع لأنه كان بآخر ترم لمن سويت العمليه وراح يرجع للسعودية ..ماسمعت عنه شي الا مرة سمعت خالي ناصر يكلمه بس مااهتميت وش يقولون .... يمكن الرجال الحين متزوج ولا خاطب ...... سنه كامله يمدي تغير فيها اشياء كثيرة .. يالله الله يهنيه ويسعده .
تركت هدى ورحت عند خالي اللي كان جالس عند التلفزيون وجلست بجنبه بناء على امر منه ....!
طبعاً كبداية أي حديث مع خالي عن وزني وليه مااسمن وانا كالعادة اقول له زاد وزني عن اول .. واحلف له اني آكل .. الحين وصل وزني 54 الحمد لله تحسن كبير
سألني خالي عن رأيي بالعريس قلت اللي تشوفه وانا متردده من داخلي خاصة بعد كلام هدى .. بس سويت نفسي عادي قدام خالي .. ابغى افرح خالي بأي شي وادري اني لو انخطبت راح يفرح من قلبه وكمان ابغى اشيل مسئوليتي من خالي احسني تعبته معاي كثير ..

"
"

"
"

[شوقي لوليف روحي]

عدا على الموضوع حوالي اسبوع .. كنت اكلم عنااد اخوي حوالي الساعه ثلاث قبل العصر .. وكان مبسوط ومستانس عند عمتي واخواني معاهم
: ها عمري كيف الاجازة
قال بحماس : ماناقصني الا انتي وابوي الله يرحمه
حسيت بعناد يقتلني بكلمته : الله يرحمه اهم شي كيف زوج عمتي معاكم ..؟
تنهد وقال : صرت اقول له ابوي الصراحه ياديمه كأنه ابوي في تعامله معي وانا احاول ارضيه واخدمه واحسسه اني ولده
: الله يرضى عليك هذا ظني فيك . طيب وعمتي مستانسه ..؟ كيف عادل وسديم لايكونون يضايقونها ..؟
ضحك وقال : لا تحبهم اكثر مني ابشرك .. ومدلعتهم حتى سديم اقول لها اوديك امي تقول لا ابغى عمه صالحه .
: الحمد لله ان ربي سخر لكم عمتي وزوجها .. يالله ياعمري بخليك انا الحين وانتبه على نفسك وابغاك عناد اللي ابوي كان يكلمني عنه الله يرحمه
: وش كان يقولك عني ..؟
: كان يقول انك رجال واكبر من سنك وانه يعتمد عليك في اغلب الأمور .. وكان يقول ابيه ولد صالح ومايصاحب رفقة السوء تكفى عناد لاتخيب ظن ابوي الله يرحمه فيك .
: لاتخافين ياديمه مو عناد اللي يفسد ويصاحب الشلل الفاسده انا من البيت للمسجد واذا بغيت العب كورة مااتعدى ملعب الحارة اللي بجنب بيت عمتي ..
: الله يحفظك حبيبي .. يالله انتبه على نفسك ومع السلامه
: مع السلامه



......................................


"
"
"



ناظرني خالي وجاوبته قبل يسأل ..
:ريم بنت بدر .
: اوه اخت مهند
: يس .. قلتها وانا التفت عنه
: تفشلت فيه للحين ماضيفناه كل ماعزمته يقول لين انقل لجده
: ليه هو فين
: بالرياض بس بينقل بعد شهرين اعتقد اوثلاثه
: الله يوفقه
: اللهم آمين
جلس خالي ناصر معاي وقعد يكلمني عن الورث قلت لاتكلمني ماابغى شي بتنازل لاخواني .. قال لي : مو بكيفك ابوك كاتب العمارة الجديده لعناد واللي مأجرها في الشفا لسديم .. اما العمارة اللي في مكة كتبها لعادل .. وانتي كتب لك عمارة الشهداء .. وعمايره الباقيه قسمها بين اخوانه وكتب لاخته صالحه اربع شقق ومصنع البلوك اللي في السيل .. ولام عناد الفيلا اللي هي فيها ولو انها ماتستاهل بس هو ماينسى احد ..
فتحت فمي مذهوله هذي اكبر عمارة ليه انا .. كمل خالي : وانتي شريك في الشركة حقته لك النص بالضبط
دمعت عيوني : ليه يسوي كذا حلال عياله والحين عماني اش بيقولون ..
: من بيتكلم ..؟ وعياله مأمن مستقبلهم .. ابوك عنده خير وتراه وصى ان عبدالوهاب زوج صالحه هو يكون الوصي عليهم ويكون مسؤول على حلالهم ،، وعبدالوهاب كان متفق معه قبل لايموت الله يرحمه .. وكان مأمنه على عياله وبيني وبينك ياديمه عبدالوهاب قد المسؤوليه ورجال امين .. ماينخاف على اخوانك معه .. خاصة انه يعتبرهم عياله ..
دمعت عيوني : آآآآآآآآآآه كان حاس انه بيخليهم
: ديمه مانبي حزن الله يرضى لي عليك .
: خالي انت المسؤول عن كل شي تكفى لاتدخلني في هالأشياء وكل اللي لي حلال عليك تصرف فيه كأنه حلالك ..!
: انا بحط لك فلوسك في البنك وبعطيك بطاقة صراف لأني عارف انك عاقلة وماتخربين حلالك .
كمل خالي بأسى : فيه ناس يدفع لهم شهرياً الف ريال كاتب اساميهم يقول اجارات المحلات اللي بعمارة عادل تراها لهم لين تهد العمارة ..
الله يرحمه ابوي خيره على الناس حتى بعد موته .. يارب وسع عليه قبره واجعل مثواه الجنه
..
كملنا سهرتنا انا وخالي وهدى وعيالهم وطلعنا ننام بعد الفجر ..اول مادخلت غرفتي جاتني رساله من خالتي سمر تعاتبني اني مااكلمها ..... بجد اشتقت لهم واشتقت لبيت جدتي والحياة هناك
خلاص قررت اطلب من خالي اني اروح لجدتي ..
اليوم الثاني طلبت خالي وماتردد بالموافقة الحمد لله ورحت عند جدتي اسبوعين انبسطت في بيت جدتي واغلب وقتي قضيته مع خالتي سمر وجدتي والأسواق الشعبية اللي اموت فيها بسوريا ...
رجعت لجده بعدها وكنت اقضي ايام الإجازة مابين الطايف وجده ومرتين رحت للمدينه مع خالي وهدى بكل مرة نجلس اسبوع .... وكانت سهراتنا بجده كثيرة من ملاهي لزواجات لمطاعم للكورنيش اللي كنا نقضي بعض الليالي عليه وأحيانا لين تشرق الشمس نفطر عليه ونرجع بيتنا ...



............







رجعنا للدراسة وبديت سنه جديدة وترم ثاني كنت فيه متفوقه وأوشكت على اكمال الرسالة بس اكيد لازم انتظر ومااستعجل .. عسى الله يوفق بس .
عدت سنه كاملة كانت روتينيه اكثر منها هادية وعادية .. مااذكر ان فيها شي مميز الا ان لمى حامل وعلى بداية حملها
والله من زمان عنها لمى .. ماصرت اكلمها زي اول من بعد زواجها ..
اخذت جوالي ودقيت عليها طلع لي صوتها تعبان وسألتها من ايش قالت ان الحمل متعبها كثير .. وعاتبتني كثير ليه ماازورها ولا اتطمن عليها .. اعتذرت منها ووعدتها اني اجيها اليوم ..
قفلت من لمى ورحت لبست .. بعدها كلمت خالي قلت له اني بروح للمى وهو من سمع اسم لمى عرف ان مافيه مجال للنقاش وافق على طول
خرجت مع السواق لبيت لمى اللي ماشفته الا ثلاث مرات واليوم الرابعه .. بس كنت اقابلها عند اهلها حتى مااحرج زوجها في بيته ..!
كانت متغيره نحفانه وماتحب الأكل .. وأغلب العطورات كارهتها .. جبت معاي أكل من بيتنا .. وأكلت معاي الحمد لله وجلسنا نسولف الين جات الساعه 9 موعد رجعة زوجها ودقيت على السواق اللي كان قريب من بيت لمى وجا اخذني بعد ماحاولت فيني اجيها بكرة بس اعتذرت منها لأني بصراحه مستحيه من زوجها .. اش بيقول عني كل شوي ناطة له ...!
وصلت البيت شفت خالي وناداني اجلس عنده قعد يسولف لي عن الفلوس اللي حطها برصيدي وكيف عبدالوهاب زوج عمتي صالحه ماسك اعمال ابوي بإخلاص .. وانه مبسوط باخواني يقول احس كأنه راجع عشرين سنه ورا ومايفارقه عناد وين مايروح ياخذه .. انبسطت لاخواني وعمتي وزوجها من كل قلبي ..
الحمد لله ان ربي ماخسر ابوي الله يرحمه وانه عياله ماتركهم بدون ولي رزقهم ربي بعمتي وزوجها اللي حلَّوا محل الأم والأب ...
بس ابوي ماراح احد يعوضه ... مهما كان محد بيعوضه لا زوج عمتي ولا عمتي ولا انا ولا أي احد بالدنيا .. حنية ابوي علينا ماتقاس بحنية بشر مهما ابدى وأعطى ومنحنا بس ابوي غير .. اشتقت له ... والله اشتقت له كم لي عنه ..؟ تذكرت ملامحه اللي ماغابت عني ابداً وماراح تغيب .. بالرغم اني ماتجرأت وفتحت صوره وصوري معاه ..تذكرت كلامه لي ودلعه لي وطريقته اذا سلم علي .. الديم نظر عين ابوها .. الديم غلا ابوها .. الديم بنية ابوها .. اشتقت احط راسي على صدره وهو يدخل يده بشعري ويشم راسي بقوة وهو يضحك ويقول خلاص تعافيت ..
الله يرحمك يبه ويجعل مثواك جنان الخلد ... طلعت من عند خالي وانا محملة بالذكريات والقهر والحسرة على ابوي .. حزني على ابوي اكثر من حزني على جدتي وامي وكل الناس .. بس ربي عوضني بخالي ناصر اللي بمكانة امي وابوي واهلي وعزتي في الدنيا ..!

نمت بعد ماجاتني هدى وحاولت تطلعني من جو الحزن اللي اثارته الذكريات والورث واهتمام ابوي فيني وخوفه علي من الدنيا وتأمين مستقبلي انا واخواني ..


يوم الثلاثاء كان خالي يكلم ويحلف وصوته واصل وهو يقول والله ان عشاك عندنا رضيت ولا مارضيت .. خالي يلح ويصر الين قرر وحسم الموضوع ان عشا الطرف الثاني اللي على التلفون عندنا يوم الخميس ..!
قفل ورجع لنا انا وهدى اللي كنا جالسات بالصالة قال : مهند واهله عندنا يوم الخميس وتراني بسوي عشا كبير .. التفت على هدى قال : ابي كل شي يبيض الوجه ..وطالعني وكمل..: ديمه الله الله بسلطات ديمه وعصيراتها ..
فرحت بأهل مهند اخواته عسولات وأمه طيبة الدنيا وكل ماتذكرت كلام ابوي عنها الله يرحمه حبيتها اكثر ..بس هو .. مااحب اتذكره .. احسني اهرب من التفكير فيه ..
بدينا انا وهدى شغل من يوم الاربعاء بالليل .. جهزنا الصحون والكاسات والدلال والترامس وكل الأغراض اللي تخص الضيوف وكانت بالخزانة ..
والخميس الظهر سوينا العصاير .. والسلطات وطبعاً ماحطينا عليها ملح ولا خل حتى ماتخرب ..! .. ولو اني مااعرف اسوي شي وعمري مادخلت المطبخ الا نادراً .. بس تخصصي حلا وسلطات وعصاير .. وأتفنن فيهم ..
سوينا سته انواع حلا للحريم بس وحطيناها بالثلاجه ..لأن الرجال رفض خالي انا نحط لهم حلا يقول الرجال نحط بس تمر مع القهوة ...... والمعجنات قلنا بنجيبها من برا مايمدينا نسويها يادوب نلبس ونرجع نسوي القهوة لأن الضيوف مرة كثير سواء الحريم ولا الرجال .
لبست تنورة بيضا طويلة قماشها ناعم وجايه بشكل كلوش هادي وبلوزة لونها ابيض وزهري بدون اكمام وواسعه وطويلة شوي .. لبست اكسسوار زهري وابيض متماشي مع لبسي ومرة مناسب .. وخليت شعري مفتوح وحطيت مكياج زهري وقلوس زهري .. وهدى لبست تنورة سودا وطويلة فيها فصوص فيروزي وبلوزة لونها فيروزي اكمامها قصيره وهي واسعه ومفتوحه مع الجوانب كانت قمة في الشياكه واكسسوارتاها مناسبه اسود وفيروزي ومسكت نص شعرها اللي يوصل لنص ظهرها بشباصة وخلت الباقي مفتوح ..
بدوا الناس يجون وجوا اهل مهند سلمت علي امه بحرارة وماكأني رفضت ولدها اللي تموت عليه .. وبناتها كمان سلموا علي بحب وحنان .. ياربي قلوبهم مرة طيبه .. كان خالي حاط عشا الرجال بحديقة بيتنا لأنها مرة كبيرة وتكفي الرجال
والحريم كانوا داخل البيت .. طبعا عزمت صاحباتي بالجامعه لمى وروان اللي كانت خلاص بتولد .. وندى وليلى .. وزينه ودانه .. اما عفاف اعتذرت بحجة ان زوجها مايخليها تروح لبيوت ناس مايعرفهم هو .. جات خالتي فادية وهند زوجة خالي ماجد وغادة زوجة خالي سامي وكل وحدة جابت شغالتها اللي ريحونا كثير ..
جلست مع صاحباتي بعد ماناديت ريم عندنا وجاتنا غادة لأنها تقريباً في سني وجوا ايمان ونادية اخوات هدى .. وسميرة اخت مهند جلست مع خالتي فادية وهند وسلوى وحنان اخت هدى .... وام مهند جلست مع ام هدى وام لمى وجارتنا ام سعيد وانبسطوا .. يمكن هدى هي الوحيدة اللي ماقدرت تجلس وانا احيانا اروح اوقف معاها شوية وأجيب قهوة وشاهي وحلا اقهوي الحريم .. حتى خالتي وهند وغادة كل شوية يقومون يساعدون هدى .. أخيراً جبنا العشا وتعشينا .. وكان بيتنا حفلة من الصغار وجلسات الحريم والعشا بس الحمد لله فيه حوالي خمس شغالات .. وحلفت على هدى تروح تجلس انا اشرف على الشغالات .. وقفت معاهم وكلفت كل وحده منهن بشغله اللي تغسل واللي تكنس واللي تسوي القهوة والشاهي بعد العشا .. واللي تمسك الصغار وتغسلهم عشان اشكالهم تقرف وراح يعدمون البيت علينا .. وشغالتنا الكبيرة كلفتها تشرف عليهن وحطيتها مكاني لأنها هي اكثر وحده تعبت اليوم .. ورجعت جلست مع ريم وايمان ونادية وسولفنا ..وكانت ايمان تعلق علي وتذكرني بخطبة سلمان وحبه الجنوني لي وانا سكتها قلت لاتذكريني .. سألتنا ريم عن الموضوع وقالت لها ايمان لأن هدى علمتهم بالتفصيل عن الخطبة وان خالي ماوافق عليه وقال انه مايناسبني ابداً لأن شخصيته ضعيفه واني اعزه من صغري بس ماعمري تخيلته لي زوج ..
ضحكت ريم منها وقالت كلمة خربطتني كثير بالرغم انها تمزح : تستاهلين ليه ترفضين مهند .. ولا وحده تطول ان الدكتور مهند بن بدر يخطبها وترفضه ..
سويت نفسي اضحك وانا احسني مرتبكه بعدين قلت : يووه ياقدمك ياريم تصدقين نسيت الموضوع هذا من قدمه له سنتين ... بعدين حبيبتي ابغى لي واحد يكون حنون مو ياخذني يبغاني احن عليه وانا ادور الحنان عنده ..
خبطتني ريم وهي تدافع عن اخوها وتضحك : اسكتي مهند لو سمعك ذبحك .. بعدين هو احن انسان في الدنيا .. !
: يادبه امزح معاك .. لاتصدقين بعدين مهند ماراح انسى وقفته معانا للأبد .. والله يقدرنا نرد له جمايله ..
: مممممممم يعني لو اطلب منك شي توافقين لأنه يُعتبر رد جميل لمهند
: انتي تامرين بعدين اذا لك انفذه لأنك غاليه مو رد جميل لمهند ..
: انتي توافقين ولا لا ..؟
: ممممممممم آمري
: خلاص استني اقولك شوي
خبطتها ايمان اللي مسوية انها تمون عليها من بدري : هي انتي استحي يعني تبين تطردينا
: ايوه سر بينا بس مصيركم بتعرفونه من هدى
ضحكنا وانا انشغلت باللي تبغاه مني ريم ياربي متى يروحون اهل هدى ابغى اعرف هذي اشتبغى مني
مرت ساعتين وانا اصبر نفسي واقول مصيري بعرف ان شاء الله ليه استعجل .
بعد ماطلعوا اهل هدى مابقي الا ام مهند واخته سميرة وخالتي فادية وزوجات اخوالي اللي بيجلسون عندنا اخذت ريم لغرفتي قلت تعالي نطلع فوق اريح لنا وانا بقلبي بختلي فيها بشوف اش تبغى حسيت البنت جاده ..
طلعنا غرفتي وهي تتأمل بيتنا وتمدحه :واو ماشاء الله عليه بيتكم كبير وكل مكان احلى من الثاني كل زاوية فيه خيال ..
: تسلمين حبيبتي بس تعالي نجلس بغرفتي
دخلت غرفتي واعجبتها كثير غرفتي كانت واسعه لونها ابيض ومفارشها الوانها تفاحي وأبيض .. فيها دولاب مكون من رفوف للتحف بس انا مخليته للدباديب حقتي والشموع والصور حقتي وحقت خالي وعيال خالي و اكثر شي اعجب ريم هي صوري
جلست على المكتب حقي بعد مااتفرجت على الصور وانا بقلبي نار ابغى اعرف اش تبغى مني
: ريم قبل شوي تبغين مني شي وماقدرتي تقولينه قدام البنات
: بصراحة ياديمه ابغى اعرف شي واحد ..
: شو ..؟
: مهند موصيني اسألك السؤال هذا وبس .. وامانه عليك تقولين الصدق .. واذا ماتبين تجاوبين عادي انتي حرة
: هههههههههههههههه هاتي اسئلتك انتي واخوك
ماضحكت لأنها كانت جادة .. قالت : لو مهند يخطبك مرة ثانية توافقين ..؟
ارتبكت كثير شو هالسؤال المفاجيء قلت وانا اصد عنها : شو هالسؤال ..؟ هههههه فاجأتيني ..!
حاولت اسوي نفسي طبيعيه بس مو قادرة .. احس وجهي زي النار ويديني ترتجف ..!
عضت على شفايفها بقلق واضح عليها قالت : مهند يقول انك ماراح توافقين وانك تكرهينه واحتمال انك تحبين ..!
ضحكت على تفسيره الغبي : ههههههههههههه اول شي مااكرهه ولا احبه .. بعدين مهند انسان عادي مر في حياتي كأي طبيب صح انه وقف معانا وهذا شي ما ننساه له وزي ماقلت لك الله يقدرنا نرد جمايله .. ثانيا احب مااحب مو من حق أي احد يعرف ..!
: ديمه مهند خطبك ورفضتيه .. بعدين عزمك مرة وقلتي انك كرهتيه
: هو قالك ..؟
: مرة قالها لي بالغلط .. ترى مهند مايحب يكلم احد عن خصوصياته ..!
: قلت لك مااكرهه ولمن سمعني كنت تعبانه ولي اسبابي ..
: طيب هو قال انه بيخطبك مرة ثانية وثالثه وعاشرة .. شكله متعلق ( وتغمز لي بعينها وتضحك ) وقال انه ماراح يتزوج غيرك .. وانا بصراحه ماادري ايش اقول حتى انتي رفضتيه بدون سبب مقنع .. عاد صدق تحبين ..؟
: ههههههههههههههههههههه ايوه قلبي مليان .. بس للأسف اخوك مو فيه ..
: ترى بقوله ديمه قلبها مشغول وانت مالك نصيب فيه
: قوليه يمكن يروح يدور على نصيبه بعيد عني لأنه راح يتعب .. وان شاء الله يلاقي وحده احسن مني وتناسبه اكثر مني ..



"
"
"


"
"

طلعت من عند ريم بروح اجيب لنا عصير وشي ناكله احسني جيعانه ومرتبكه كمان .. وابغى اخرج من جو ريم وكلامها المربك ..
رجعت لها وفي يدي فيها صينية فيها عصير وفطاير ..لقيتها تكلم وأول ماشافتني قفلت وهي احسها معصبة وتخاصم ؟؟
قلت لها وانا اعطيها الكاس ومعاه صحن فطاير بالجبنه
: خير اش فيك احسك مو على بعضك ..؟
: قلت لمهند ديمه ماتبيك وقلبها مليان مو لك وانت روح دور على نصيبك بعيد عنها .
: مجنونة انتي .. لايروح هذا يقول لخالي وتجي مصيبة على راسي
: لا ماعليك ماراح يقول لخالك ولا راح يجيب لك مشاكل اعرفه زين .. بس حلف انه بيروح يكلم خالك ويخطبك الحين
: مايمل اخوك ..؟ ولا مايفهم ..؟ انا ماابغاه .. غصب يعني
كانت بتتكلم بس قطع جوالها كلامنا وكان مهند هو اللي يكلمها .. شفت ريم متفاجئه لأنه قالها شي .. بعدين قالت : اش قاعد تقول انت ....... لا مهند مااقدر........... والله بتزعل البنت
رجعت وحطت يدها على التلفون وقالت بفتح السبيكر يقول خليها تسمع ..انا كنت متجمده وكاره هالحركه اجل بيكلمني وهو ببيت خالي صدق ماعنده مروءة ..
فتحت السبيكر من دون ماتاخذ رأيي .. طلع صوته : هلا ديمه ان شاء الله انك بخير ... تراني خطبتك من ناصر قدام الرجال ..قال هي لك .. آسف ياديمه بس انتي لايمكن ياخذك احد غيري .. وعلى فكرة اول كنت ابيك رغبة بس الحين تحدي وعناد ... عاد اذا بتفشلين خالك قدام الرجال هذا شي راجع لك واذا ماتبين كلمته تنزل بالأرض لاتعلمينه اني قلت لك شي وافقي عشان ماتقهرين ناصر لأنه مايستاهل القهر خاصة منك انتي ... وآسف مرة ثانيه ... ويالله مع السلامه ..وقفل ..

بسم الله الرحمن الرحيم .. انا في حلم ولا علم .. صاحي هذا ولا يستهبل ..
ناظرت في ريم اللي كانت مفجوعه اكثر مني .. قالت : ديمه مو مصدقه ان هذا مهند ..
مارديت عليها وكملت : ديمه لاتزعلين ولاعليك من الخرابيط اللي قالها كلمته تنزل الارض ومدري ايش هذي اشياء انتهت من زمن جدي .. ماعليك واعتبريه ماقال شي .
دخلت الحمام وانا مو مستوعبه شي .. لا ماراح اتكلم لين خالي يقول شي اخاف هذا يبغاني انقهر واثير مشكله .. سمعت جوالي يدق وانا بالحمام .. خرجت بسرعه وماطالعت بريم .. لقيته خالي سامي رديت : هلا خالي
: هلاديوم انزلي لي تحت ابيك
: فيه شي
: تعالي وتعرفين
: اوكي جايه
خرجت من عند ريم اللي مسكتني بيدي قالت : ديمه ... وانا مسكت يدها بيدي الثانية
قلت : ريم انتي اختي وصاحبتي مالك علاقة باللي صار ..!


نزلت عند خالي سامي اللي كان يدخن بشراهه
اول مانزلت قال : مهند خطبك من ناصر للمرة الثانية والرجال شاريك اذا تبينه وافقي واذا ماتبينه والله اللي رفع سبع وطمن سبع ماتاخذينه ومحد يغصبك لو على قطع رقبتي .
كنت بتكلم الا خالي ماجد دخل قال بسرعه : ماعليك من احد ياديمه اذا ماتبينه قولي لا وخلي احد يفتح فمه
سكت وانا افكر باللي صار ومابينت اني عارفه الموضوع .. قلت : فين خالي ناصر ليه ماكلمني ..
رد خالي سامي : ماله وجه منك
: ليه ..؟
وكأن خالي سامي تذكر انه تسرع وارتبك بعدين قال: ها.. لأنك رفضتيه المرة الأولى ومايقدر يفاتحك بموضوعه مرة ثانيه ..
: خلوني افكر ..واشوف خالي ناصر ..
دخلت البيت وأنا احسني ابغى استفرغ .. اجل مهند يتمنن علينا باللي سواه ويهيني ويجبر خالي انه يزوجني اياه ..!
طيب يامهند انا اوريك ....
طلعت عند ريم وحاولت اسوي نفسي طبيعيه لأنها مسكينه حسيت انها مقهورة من تصرف اخوها اللي تدق عليه ويطنش ولا يعطيها مشغول .. وآخر شي قفل جواله .
قالت لي : ديمه ادري ان حركة مهند سخيفة بس .. قاطعتها بسرعه وقلت بكل برود : ماتدرين هذا النصيب ومهند شخص كويس ماينرفض ويمكن يحبني ومايبغاني اروح لغيره قلتها وانا اضحك بتريقه .. وخايف ارفضه مرة ثانيه .. ومالقى الا هالطريقه عشان يضمن اني اكون له
حسيت ريم ارتاحت من كلامي قالت : والله انك عاقلة ياديمه واتمنى تكونين من نصيب مهند لأنه مو لاقي احسن منك
ابتسمت وقلت : قبل شوي انا مو لاقيه احسن منه والحين هو ...
غيرنا الموضوع وجلسنا نسولف بالجامعه والدراسه والرسم وانا احسني اشتعل من داخلي وبحترق اذا خالي جا بشوف اش يقول ..


راحوا اهل مهند على الساعه 3 تقريباً ..وناموا كل اهل البيت هدى وخالتي فادية وغاده وهند ناموا عندنا ... الا انا استنى على جمر ..
استنيت خالي الين الساعه خمسه الفجر كنت جالسة على الدرج وباين علي القلق .. دخل خالي وباين انه تعبان وطفشان وقرفان حتى لمن شافني صد عني بعدين قال : صباح الخير ليه صاحيه
: استناك .. ابغاك بموضوع ... تكلمت وانا احسني ارتعش
: تعبان ياديمه اذا الموضوع مو مهم خليه لبكرة ..
: لو مو مهم مااستنيتك لهذا الوقت وهنا ..وأنا أأشر على الدرج
: طيب تعالي فوق وطلعت معاه وكان بيجلس بالصالة اللي فوق قلت : لا تعال بغرفتي احسن
مسك شماغه بيده وقال : اوكي يالله .. الله يستر باين انه موضوع خطير .
دخلنا غرفتي وقفلت وهو جلس على الكرسي وانا كنت واقفة وماادري كيف ابدا الموضوع
: ها ديوم وش عندك ..؟اجلسي ليه واقفه ..؟
: خالي سامي قال لي على موضوع مهند
: اووووف .. ادري انك منتي موافقه وادري انك ماتحبين مهند بس .... وسكت خالي
: بس شو ..؟
: اذا ماتبينه محد بيجبرك بس مهند مافيه منه وانا متطمن له وادري انه بيعزك ويسعدك .. ولاتنسين ان ابوك كان يتمناه لك الله يرحمه
آه يايبه لو تدري كيف مهند اهاني بخطبته لي بهذا الشكل ماكان تمنيته لي .. قلت لخالي اللي شاف دمعه بعيني : خالي اذا رفضت وش بيصير
: ماصاير شي بس بتحرجينا مع مهند بعد وقفته معانا نرفضه والمشكلة بدون سبب ..!
: خلاص خالي اللي تبيه يصير انا ماابغى اضايقك بشي .. لوتبي روحي فداك
: ايش هذا الكلام ..؟ انتي سامعه شي .. ؟ احد قايلك شي ..؟
: لا ياخالي بس ماابغى احرجك مع صاحبك ..
: اتركي هاللهجة عنك .. اذا ماتبينه محد بيجبرك .. واذا مو مقتنعه فيه لاتتخلين عن رأيك واختيارك عشاني ماعليك مني ..!
حسيت ان خالي شايل هم الدنيا .. وبكيت غصب عني وقلت له
: خالي انا موافقه على مهند ولاتسألني ليه غيرت رأيي .. وانهرت من القهر اللي فيني والله احسني مغصوبة ماابغى اكسر كلمة خالي قدام الناس .. اصلاً مهند ماكنت اكرهه ودايما اتذكره بالخير بس الحين صرت اكرهه .. ليه يسوي كذا مع خالي وليه يبغاني اوافق غصب ..
سلم خالي على راسي وقال : والله ياديمه ان مهند رجال وانا اللي اضمنه لك .. اعرفه من صغره وكل ماقابلته تمنيته لك لأني ماني لاقي احسن منه لك ..
قلت لخالي وانا ابكي : الله لايحرمني منك بس . ويخليك لي
: الحين ليه تبكين ممكن اعرف
مارديت عليه ودخلت الحمام بكيت ساعتين يمكن واكثر ...
وخرجت ماحصلت خالي ... شكله راح يبشر هدى لأنه باين انه مبسوط .. .


.......


"



,,,,,,.................,,,


"
"




بـأنتظــآر تفــآعلآتكـــم....؟؟!!

[شوقي لوليف روحي]

,,,,,,.................,,,


صحيت على هدى اللي دخلت غرفتي وشالت البطانيه من عليّ .. بس لمن شافت وجهي وعيوني مورمه رجعت البطانيه علي وجلست بجنبي
: ديمه اش صار ناصر جايني مبسوط وفرحان يقول انك وافقتي على مهند .. وانتي هنا مسوية مناحه وقالبتها حزن
آآآه تذكرت اللي صار .. مهند واهانته لي وخطبتي بطريقه قللت من قيمتي ..ولا كلامه لي .. بياخذني عناد وتحدي ..!
انا ديمه اللي كل حرمه تشوفني تحط عينها علي لولدها .. وأغلب زميلاتي كلموني عن اخوانهن ولا عيال خالاتهن او قرايبهن .... انا اللي محد يتجرأ ويخطبني الا وهو واثق من نفسه وقد انه يكون زوج ديمه ...
شافتني هدى ابكي بقهر قالت : ياويلي ياديمه احس ان فيك شي قولي لي لاتسكتين ..!
: مافيني شي .. بس محتاجه ابوي وامي معاي في وقت زي هذا
: غريبة ماقلتيه لمن وافقتي على يزيد
قلت وانا ابكي : خالي كان فرحان وذكرني بأبوي قال انه كان يتمنى مهند لي ......
وكملت وانا ابكي :.. كنت ابغاه يفرح لي ويكون معاي هو وامي
وانا بقلبي حزن سببه ثاني . مهند اهاني بحركته ورد لي حركتي ..
بس ماعليه اوريه ...
جلست هدى تعلق علي وتضحك وانا اتبسم بعدها جات خالتي فادية وهي مبسوطه وتضحك لأن خالي ناصر بلغها الخبر ..
قمت اتوضا وأصلي واحاول اسوي نفسي عادية ومافيني شي ..
قلت : يالله لو سمحتوا اطلعوا من غرفتي الحين عيالكم يلحقونكم ويخربون اغراضي . ويلبون غرفتي
قالت خالتي : الحين عيالنا بيخربون وبسام وأسامه مايطلعون منها
قلت : بسام واسامه مؤدبين
خبطتني خالتي على كتفي قالت : الشرهة مو عليك الشرهه علي انا اللي جاية ابارك لك من الفرحه
: الله يبارك فيك بس يالله لو سمحتوا ..
طلعوا كلهم وانا رحت آخذ لي شور وابدل ملابسي ونزلت عندهم تحت
لقيت هدى وخالتي وهند وغادة جالسات عند التلفزيون .. وانا رحت للجلسة الثانية بالصالة وكلمت لمى بقولها على الموضوع اللي مااقدر اتكلم مع احد فيه بكل صدق الا مع لمى
صحيح ريم عارفه السالفه .. بس ريم اخته وماابغى اقرب منه عن طريقها ..
وصحيح اهلي يدرون اني وافقت بس مايدرون ان مهند كلمني وقال لي على طريقة خطبته لي وهددني ان ماوافقت راح احرج خالي قدام الرجال وتطيح كلمته بالأرض ..وانه ماخطبني الا عناد ..!
المصيبه ان زوج المستقبل يحسب اني احب وقلبي مليان واني اكرهه ..ياربي أي حياة راح اعيش .. كيف بتكون مع مهند وكيف بيكون معاي وهو فكرته عني اني اكرهه واحب غيره ...
لمى كانت تقول خلاص ارضي بالنصيب وحاولي تتقبلين الموضوع عادي وصدقيني ياديمه انه لو مايحبك ماسوى اللي سواه .. وان محد يسوي هالسواة الا واحد خايف انك تروحين لغيره لأنه ببساطه يحبك ويموت عليك .. مااقنعني كلام لمى واضطريت اني انهي المكالمة بسرعه واقفل ..!
بعد اسبوع من اللي صار من مهند وخطبته قصدي طلبه لي من خالي .. جاني خالي بغرفتي وانا قاعده اقرا قال : ترى مهند كلنمي بخصوص الملكه .
فزيت بفزع ... : لا خالي ملكة لا مو الحين ..اصلا بكمل دراستي اول شي بعدين نفكر بالزواج اذا بينتظرني اوكي مايبغى بكيفه الله يوفقه مع غيري
: ههههههههههههههههه أي دراسه الماجستير ولا الدكتوراه ..؟
: الماجستير ... وانا بقلبي اقول ليتها الدكتوراه عشان املله بس خفت خالي يعصب ويزعل ويقول اني احاول املله مني ويخلي الزواج بأسرع وقت ..
: اها .. يعني تقريبا بعد سنه ونص ..!
: ايوه بالزبط ..
: ديمه ليه تسوين كذا اذا ماتبين مهند محد اجبرك للمرة المليون اقول لك ..
: لا خالي بس ماابغى شي يشغلني عن دراستي وهو بكرة اخاف يطلع لي يقول اتركيها خاصة ان قدامي مشوار طويل
: لاماعليك اشرطي اللي تبين وهو مايقدر يفرض عليك شي ماتبينه .. اضمنه لك لأنه بيستحي منا احنا اللي نحرص على دراستك .. بعدين هو بنفسه قال لي لازم تكمل دراستها وتاخذ الدكتوراه .
:متى قاله
: ليلة يخطبك .. وصد خالي عني قال بيغير الموضع .. المهم انتي انزلي السوق من اليوم لأن مهند كلمني يقول يبي الملكه بعد اسبوع
: شو ..؟ بعد اسبوع ..؟
: ديمه خليك عاقلة مو كل شي تعترضين عليه ..
: بس اسبوع مايكفي
: الا يكفي ونص وانتي مو محتاجه شي كلها فستان وخرابيطكم البسيطه تخلصونها بيوم واحد ..
وخرج خالي من عندي خلاني بحيرتي وقهري وماادري ايش اسوي
ياربي في كم يوم تتخربط حياتي بهالشكل خطبة بإهانه وملكة غصب عني .. ارحمني يارب وصبرني ..

بديت انزل السوق احيانا مع خالتي واحيانا هدى .. ومرة متضايقه مالي نفس بأي شيء .. مغصوبة ياناس تخيلوا انفسكم مكاني ... اشتريت فستان جاهز لونه سكري داخل معاه اللون البني الفاتح وناعم مرة كان جاي على الصدر اللون السكري وخيوط كريستاليه بنيه تتلف من ورى الرقبه .. وماسك على اعلى وسطي حزام بني بعدين جاي الفستان واسع الين تحت الركبة وكان لونه سكري وفيه فصوص كريستاليه لامعه .. ومن ورا كان طويل .. واشتريت جزمة بنيه لها خيوط تتلف حول الساق .. كان مرة ناعم وشياكه لأبعد الحدود واشتريت كمان اكسسوارات .. وهدى اخذت لها فستان لونه موف مشجر بموف غامق كان ناعم مافيه أي تكلفه كان علاقي وصدرة مفتوح شوي .. وكان مفتوح من قدام واشترت له جزمه واكسسوارات مناسبه .. وخالتي اشترت فستان تفاحي داخل معاه اللون الأسود قصير وعلاقي .. وأخذت له جزمه طويلة لونها اسود .. واكسسوار بسيط عبارة عن حلق اسود وخاتم اسود وكان عندها ساعه سودا ..
كل ماقرب يوم الملكه كل ماتوترت اكثر وكرهت نفسي .. بس يالله كلها يوم وبيعدي زي غيره .. لا ماراح يعدي زي غيره .. من بعد اليوم هذا بصير زوجة مهند .. مهند اللي اهانني بغاية الانتقام ..
يوم الاربعاء ليلة الخميس .. كنت جالسه اتفرج على التلفزيون وعندي قهوة وهدى راحت تنام لأن وراها شغل من بدري .. بس الحمد لله افتكينا من العزيمة بالبيت لأن خالي قال ان الملكة بتصير بالاستراحه حقتنا بشمال جده ..بعد ماكان بيحجز قاعه بس انا رفضت قلت هنا في البيت ومختصرة ومابنعزم احد الا جيراننا واخوالي واهل هدى وصاحباتي واصحاب خالي اذا يبغى يعني مابغاها كبيرة وقاعه وتكاليف ..
دقت علي ريم وانا في فمي حبة شكولاته وشربت عليها قهوة وشرقت من طاري ريم اللي من بعد هذيك الليلة ماكلمتني ..
: الو
: هلا ديمه .. كيفك ..؟
: الحمد لله بخير انتي كيفك وكيف امك وسميرة ..؟
:والله بخير الله يسلمك وامي عندي طايرة من الفرحة مو مصدقه انك بتاخذين مهند
: ههههه الله يسعدها دوم وأبد ولا يكدر عليها
: تدرين انا بننقل جده وبطفشك مني
فرحت من قلبي انهم بيجون : حلو والله .. الله يجعلها خيرة لكم ..
: حضرة خطيبك هو اللي اصر علينا خاصة انه كل مابغى يجينا تكون حالة امي مأساوية خايفة يصير له شي من الطريق ويلحق فواز الله يرحمه
: الله يخليكم لها .. ويخليها لكم .. ! بيني وبينك احسن والله تجون لجده تفتكون من المشاوير ومنها تقعدون مع ولدكم اللي كم سنه بعيد عنكم ولمن يرجع انتم بديرة وهو بديره .. ..... كنت اتكلم بمنتهى الجدية والعقلانية ماحطيت براسي انه مهند اللي بيكون خطيبي وزوجي بعد كم ساعه ..
: ايوه خافي على السيد مهند من الحين ..الا صحيح ديمه من جد محد ضغط عليك عشان توافقين
: الا اخوك ضغط علي . وغصبني عليه ..
: لا اقصد من اهلك ..؟
: لا والله ومحد درا انه قال لي شي ولا ان عندي خبر بالسالفه ..
: اها .. والله مهند عارفك يقول ماراح تتكلم .. وضحكت بعدين كملت : يقول ديمه اكبر من انها تعلم خالها وأعقل . وانا اكثر شخص فاهمها ..!
: الله ومن متى يعرفني هو ولا يفهمني ..؟
: ديمه تكفين تقولين لي .. انتي تكرهين مهند الحين ومجبورة عليه ولا لا ..؟
: ريم خلاص الله يخليك موضوع مامن كلامنا فايده فيه بكرة بنرتبط انا واخوك رسمي وقدامنا حياتنا ادعي لنا نتوفق بس
: الله يوفقكم ويسعدكم يارب ..صدقيني ياديمه مهند مافيه منه متفهم وحنون وطيب
: انتم في جده ولا ابها
عرفت اني اغير السالفه وضحكت قالت :هههههههههههههههههه فهمتها ..ياستي احنا في جده ..؟
: طيب كويس .. عشان ماتجون للاستراحة تعبانين .. وتكونوا قد ريحتوا
: اوكي ديوم تامرين على شي بروح انام ..
: سلامتك حبيبتي نتقابل بكرة ان شاء الله
: مع السلامه
: هلا مع السلامه .




"
"




قفلت وانا افكر بمهند .. اجل يدري اني ماراح اتكلم لخالي .. الحين اخيب ظنه وافشله عند خالي وافركش كل شي .. والله لو خالي يعرف ان شوا هذي الحركة ان ليبهذله وياويله منه ....
ولا خلاص ماعاد ينفع .. اصلاً حتى لو تكلمت خالي هو اللي بيتفشل لأنه مايرضى اني اعرف الموضوع واني وافقت عشان كلمة خالي ومافكرت بنفسي .
طلعت لغرفتي وانا احاول انام لين اذن الفجر .. قمت صليت ورجعت اتقلب في سريري والحمد لله نمت اخيرا ..
صحيت الساعه اربع العصر وانا مصدعه وهدى على راسي : ياديمه يالله قومي ماباقي وقت اللي يشوفك يقول مو ملكتها اليوم ولا وراها صالون بتروح له ولا شي
: ماني رايحه الا الساعه سته المغرب ليه اصحى الحين ..
: لا ياديمه روحي الحين احسن خلصي وتعالي للاستراحه بدري مو تروحين المغرب وماتطلعين الا الساعه 11 او 12
: ليه قالوا لك بيسوون لي عملية تجميل .. انا ماقد أخذت ساعه وهم يزبطون لي المكياج
: حبيبتي هذا مكياج ملكه وتسريحة ملكه مو زي كل مرة
: خلاص هدى روحي انتي انا مصدعه والله مالي خلق شي
: شو مصدعه ..؟ من متى وليه ماقلتي ياويلي ياديمه لايكون رجع لك ........
قاطعتها بسرعه : لا لا لايروح بالك بعيد صداع عادي بس من السهر لاتخافين
: اوه الحمد لله بس ترى بقول لخالك عن صداعك لو درى ذبحني ان ماقلت له
: بكيفك بس ترى مافيني شي .. انا اللي ذقت وجع الصداع ولو احس انه زي هذاك بنفسي قلت لخالي ..
: اوكي بخلي الشغالة تجهز غداك وانتي قومي خذي شور وانزلي يمكن يخف الصداع اذا اكلتي .
: يالله جاية وراك

طلعت هدى من عندي ورميت الغطاء عني وقمت بثقل اخذت شور وصليت الظهر والعصر استغفر الله بس نومي صاير ثقيل انام الصباح ومااصحى الا على العصر .. الله يغفر لي ويسامحني
لبست بنطلون جينز عشان اروح به للمشغل وتي شيرت مخطط بالعرض بأخضر وأورنج وبيج بكم قصير وحلقه واسع .. نزلت تحت وحصلت الشغالة حطت لي سلطة ومكرونه باللحمة والجبنه .. ولبن .. اكلت بسرعه وشربت لبن وقمت قلت الحقيني بالقهوة للصالة
سمعني خالي اللي توه نازل بيروح للاستراحه . قال : تعالي ديمه وش سالفة الصداع
: عادي خالي مو صداعي هذاك تطمن .. بس عشاني مانمت كويس والحين بشرب قهوة وبيروح لا تقلق .
: طيب متى بتروحين للمشغل ..؟
: شوية مو الحين
: بكيفك ... بس لاتتأخرين على الناس زين ..؟
: حاضر ولايهمك ..
جلست اتقهوى ودقيت على هدى اللي كانت بنفس الصالون اللي انا حاجزة فيه بشوفها خلصت ولا لا .. قالت انها لسه مابدت لأن قبلها وحده وقالت ان ليليان الكوافيرة حقتي تقول تجي الحين عندها ثلاث غيرك وكلهم يبون يخلصون بدري وطالبينها هي شخصياً ..
انقهرت بصراحه ماابغى اروح من العصر كأني عروس .. وخالي قال لي لا اتأخر ..

طلعت لبست عبايتي ودقيت على السواق اللي جا بسرعه وخرجت معاه للمشغل ..
كان فيه حادث قدامنا وشرطة موقفة الطريق وأخرنا بالطريق ووقفنا حوالي ساعة وأكثر وهدى كل شوي تدق علي وكل ماقلت انا بالطريق لسه عصبت وانا مافيدي حل غصب لازم استنى .. خلصت هدى وراحت للاستراحه وخالتي جات من الطايف جاهزة راحت للاستراحه على طول ..
اخيراً وصلت الصالون على الساعه سته الا ربع .. كانت ليليان اللبنانية تحبني كثير وانا اعرفها من سبع سنوات تقريبا من لمن كنت بالثانوية .. وكانت متحمسه لي لمن قلت لها ملكتي يوم الخميس .. تأخرت عليها وهي تتحجج للي جوا قبلي بالتلفون وبالحمام عشان اوصل وتبدا تسوي لي قبلهم .. دخلت عليها وأخذتني على طول على الغرفة من دون ماتتكلم لهم وشفت وحده عصبت وراحت تكلم صاحبة المشغل .. يوم جات صاحبة المشغل وشافتني سلمت علي وباركت لي وطلعت لهم تعتذر وخلت وحده ثانية تسوي لهم بعد مامدحت لهم شغلها وقالت انها احسن من ليليان وناس كثير يطلبونها ..!

سويت مكياج نوعاً ما ثقيل .. بس صراحة طالعة حلوة كثير .. فتحت شعري بس عملت له فلو من تحت ودخلت فيه اكسسوارات هادية وناعمة والحمد لله خرجت من المشغل راضيه عن نفسي كثير ..
رجعت لبيتنا حوالي الساعه تسعه وجوالي ماوقف رنين لدرجة ان البطاريه ضعفت وانا اصلاً شاحنتها قبل مااروح .. لمى هدى خالتي . اخوالي ناصر وسامي وماجد .. ريم وهند وغادة وجدتي اميرة اللي كلمتني وهي تبكي حوالي نص ساعه .. وخالتي سمر وخالي ايمن .. كل هذولا فرحانين لي .. حطيت جوالي بالشاحن .. ورحت البس فستاني واكسسواراتي .. بصراحة طلعت شي خيااال الحمد لله .. ابتسمت لنفسي وانا اقول ماعليه يامهند خل تصرفك ينفعك .. اكيد بيشوفني لكن وربي لانتقم منه وأرد له الصاع صاعين وانا ديمه ..!
رحت للاستراحه وأول ماشافوني هدى وخالتي وهند وغاده قعدوا يمدحون فيني اللي تقول المكياج يجنن واللي تقول فستانك مو طبيعي واللي تقول الليلة انتي عروس بمعنى الكلمه اما خالتي قالت : ديمه طول عمرها حلوة حتى بدون مكياج تاخذ العقل بس ليت مهند يقدر مين هي ديمه .. آآآه ياخالتي جيتي على الجرح .. ماتدرين مهند كيف خطبني ..
جات ام مهند بالغرفة حقتي بالاستراحه وسلمت علي بحنان ماعمري شفت له مثيل .. ودموعها كانت في عيونها قالت : والله يابنتي من اول يوم شفتك فيه وانا ادعي ربي تكونين من نصيب مهند والحمد لله انه ماخيبني .. وماجابت سيرة رفضي له المرة الأولى ..
: الله يخليك ياخالتي ويسعد قلبك دايماً وابداً .
دخلوا سميرة وريم اللي حضنتني وسلموا علي .. بعدها طلبني خالي اجي له برا
خرجت له وكان بيده دفتر كبير قال : يالله ياديمه وقعي ..!
: قول لي اول شي قلت له على شروطي
: ايه قلتها وانا متفشل منك بس وافق عليها كلها وهو فاتح فمه
: احسن ..!
: وشو احسن كأنه عدو مو بيصير زوجك
طالعت بالدفتر قلت : فين اوقع
: وقعي هنا
وقعت وخرجت وانا اتذكر شروطي اللي تضحك ماادري غبيه بقولكم عليها
اولاً نسكن مع اهله .. يمكن تستغربون هالشرط لأني ماقد سمعت ان فيه بنت تطلب انها تسكن مع اهل زوجها .. بالعكس البنات يطلبون بيت مستقل .. بصراحه هالشرط تحديداً كان انساني بحت ... لأني فكرت بأمه وبنفسي ،، امه عشان هي مسكينه وتحبه ماابغاها تحس اني بعدته عنها خاصة انها جات لجِده واستقرت هنا وكمان عشاني ماابغى اتقابل انا وياه 24 ساعه .. وكمان ابغى احس اني اعيش بوسط عيله ام واب كبار واخوات ماعمري جربت هذا الشي يمكن لأن خالي وهدى شباب وعيالهم صغار احسني ابغى عيلة تتكون من ناس كبار زي ام مهند وابوه .. وانا جاية بدخل عليهم بسلام ومحبة ماابغى اسوي مشاكل وراح اكسب امه واخواته اللي اساساً طيبات بطيبتي وتعاملي معاهم بإذن الله ..
ثاني شروطي : دراستي مايتكلم فيها ومو من حقه يقول ادرسي ولا تدرسين حتى لو اكمل بعد الدكتوراه .
ثالثاً شغاله لأني ماعمري دخلت المطبخ وأكدت على خالي يقوله اني مااعرف اطبخ ولا اغسل ولا اكنس اذا عجبه عجبه ماعجبه للحين احنا على البر . .وماابغى اغشه ..
بس هذي شروطي يعني ماكلفت عليه كثير .. بالعكس وفرت عليه الفيللا اللي كان يدور عليها بيشتريها وهم توهم مشترين فيللا كبيرة لاتقل عن 4مليون ..
اتصل علي خالي ناصر قال ان مهند بيدخل يلبسني الشبكه .. قلت مولازم انت تعال لبسني اياها ولا خل امه تلبسني مو لازم يجي ...
كويس ان خالي مو عندي احسه راح يعطيني كف لأنه عصب وقال : بلا كلام فاضي الرجال بيجي الحين انا دلعتك زياده ولا تستهبلين علي ..
بصراحة خالي عمره ماضربني ولا عصب علي كذا ومع كذا ضحكت منه لأني عارفة ان كلامي ينرفز ..
كانت المصورة تصورنا طول الوقت تصورت مع هدى وبعدين مع خالتي ثم مع غاده ومع هند كمان كل وحده صورت معاها لوحدها عشان هم يقدرون يحتفظون فيها بس انا لا .. بعدين مع ريم .وامها وسميرة اختها .. مسكت المصورة قبل لايجي مهند قلت مو تقولين سوي كذا وكذا وتقولين لخطيبي امسكها ولا المسها ياويلك .. استغربت مني قلت لها اذا امرتيني بشي ياويلك ماراح يصير لك طيب هههههههههه اول مرة اهدد احد بالطريقه هذي ..! بس كنت خايفه اخرب كل شي ان لمسني
دخل مهند مع اخوالي اللي كانوا يضحكون وفرحانين وجا عمي ياسر سلم علي على طول وانا اصلاً ماشفته من يوم طلعت من المستشفى بعد وفاة البوي الله يرحمه الا مرة وحده





كنت اناظر بالأرض وصورتنا المصورة وكان مهند جالس بجنبي واشوا مالمسني لأني كنت مرة مرتبكة
سمعت خالي يقول ماتبي تلبس خطيبتك الشبكه ولا نسيت .. بعدين يادكتور بتشبع منها الحين لبسها خلنا نطلع عنكم .
شو ..؟ يطلعون ..؟ اجلس انا وهذا لوحدنا ..؟ طيب ياخالي بتحرجني معاه ..؟
رفعت راسي وانا مفتحه عيوني .. وشفتهم ضحكوا قال خالي: خلاص ياديوم هذا زوجك عادي اذا يجلس معاك ويشوفك ..
قال خالي سامي : والله ياديمه اذا ماتبينه يجلس معاك باخذه باذنه الزم ماعلينا راحت ديوم زينة الدنيا
رد عليه عمي ياسر اللي يضحك : الحين تزوجونها وتدلعونها وش خليتوا لعيالكم انتم
تدخل خالي ماجد بهدوء : هذي ديوم اغلى حتى من عيالنا اللي تبيه يمشي غصب عن اللي مايرضى
حسيت بكلام خالي ماجد فيه معنى غامض وانا مارفعت راسي وهم يضحكون ويعلقون بس حسيت بالعبرة خنقتني لمن سمعت مهند يقول : خلاص هي الحين زوجتي غصب عنكم ومحد يتدخل فيها من اليوم غيري يقوله وهو يضحك .. وكمل : ولو سمحتوا اهجدوا ولا اطلعوا احسن بلبس حرمتي الشبكه .
كانت عيوني مليانه دموع وفتح العلبة ولبسني وانا كنت قرفانه منه ومن كلامه ومن قربه مني ومن الساعه اللي شفته وشافني فيها . اجل غصب صرت زوجته آه بس هو صادق صرت زوجته غصب
لبسني الشبكة ومسك يدي اليمين ودخل الخاتم فيها وانا اخذت الخاتم من عمي ياسر وحطيته باصبعه من فوق وتركته وهو كمل ودخله... صورتنا المصورة وكانت كل شوي تقول ياديمه مايصير هيك مابدك الصور تطلع حلوة
مارديت عليها ولا ادري اش تقصد عشان مارفعت راسي ولا عشان دموعي اللي بدت تاخذ مجراها ...
انتبهوا لي اخوالي وكلهم سلموا على راسي وباركوا لي وطلعوا .. رجع خالي ناصر بعد ماطلع ومسح على راسي قال : دموعك هذي ماابيها اذا تبين ارتاح لاتنزل ..
حسيت انها نزلت اكثر بس طلع لي منديل ومسحتها وسلم على راسي وقرب مني يهمس بإذني قال : والله اني شاري مهند وانه رجال وماخليته ياخذك الا وانا واثق انه يستاهل ديمتي .
تبسمت لخالي قال : ايوه كذا ابغاك خليني افرح وارتاح .
هزيت راسي وخرج خالي ناصر .
مارفعت راسي ورحمني ربي بدخول امه واخواته اللي سلمن عليه وعلي وباركن لنا وانا رديت بصوت عالي بس هو كان يضحك ويرد بصوت عالي وكان واقف وامه بجنبه بعدين جلس ونادت سميرة المصورة تاخذ لنا كم صورة
صورتنا وانا نفس حالتي مارفعت راسي ومتوترة من قربه مني بس جات عندي المصورة قالت بصوت واطي بس هو سمعني : ياآنسة ديمة ماطلبت منكم أي حركه بناء على رغبتك بس ياحياتي مابيصير هيك ماشفت وجهك . رجعت مكانها ورفعت راسي وصرخت المصورة بفرحه وصورتنا انا وهو بس اكثر من اربع صور وحاولت تبتسم لي وانا بدوري ابتسمت لها وصورتني على طول . بعدها طلعوا امه واخواته وبقينا لوحدنا ساكتين
كنت بقوم بس مسك يدي وسحبتها على طول منه
رجع ومسكها بقوة قال : اجلسي بعدين انا ماقمت فين بتروحين وتخليني .
مارديت عليه بس صديت عنه
: ديمه
التفت عليه لمن ناداني وهذي اول مرة اشوف وجهه قريب كذا وكان يبتسم .
.
.
.
.
.
.
.
.

قــرآءهـ ممتـــع ـــه.....

[شوقي لوليف روحي]

مـــرح ــبـآ ح ــبآيبـــي

كيفكــــم

هيــآ بسـم للــه نبــدأ....






اوف كان شكله خياال تذكرت امريكا .. عيونه واسعه .. حواجبه مو طبيعيه وخشمه يجنن وعليه ابتسامه اربكتني ورجعت اطالع ورى
تكلم مرة ثانية : الحين ليه ساكته
: مو حصل اللي تبغاه .. وافقت عليك عشان مااحرج خالي وماقلت لاحد يعني نجحت خطتك
: اوف كل هذا تكرهيني وانتي الحين مجبرة على الزواج مني ..
ياربي كأنه مو داري يحسبني موافقه حباً فيه .
مارديت عليه وانا لافة بوجهي عنه واطالع الجهة اللي بجنبي ...
: طيب قولي لي ترى احنا لسه على البر
رجعت اطالع فيه لقيته مقرب مني ويطالع فيني كنت بقول شي بس ارتبكت وحسيتني متخربطه ونسيت اللي كنت بقوله لمن شفت وجهه بعدين قلت : خلاص لو سمحت طولنا بمشي انا ..
رجع مسك يدي قال : انا بجي بعد يومين واشوفك .. لاتجيني وانتي معصبة وحاولي تتأقلمين على اني زوجك حتى لو ماني حبيبك بس هذا الواقع انا زوجك ويمكن مع الوقت نحب بعض ونتأقلم على بعض
التفت له وانا رافعه حواجبي و مفتحه عيوني على آخر شي كأني اقوله بالله عليك بس ماقدرت اطلعها الا بعيوني ..
ابتسم ووقف قال وهو يطالع فيني : ها وش قلتي اوكي ..؟
: لا مو اوكي وماراح تشوفني الا بعد الزواج ...ورجاء لاتحاول مجرد محاولة او حتى تفكر تكلمني ... اللي تبيه صار وافقت ملكنا خلاص ..
ابتسم بعد مامسك يدي بيده اليسار ومسح باصبعه على جبيني و قال : يعني بتخليني اقدم زواجنا .. كنت مخطط على انه الإجازة الجاية بس خلاااااص بنقدمه ..!
قلت ودموعي تنزل : انت عارف اني ماابغاك ليه تجبرني عليك ..
: حط اصبعه على راسه قال : كذا مزاج ،، شفتك دلوعه ومغرورة قلت اكسر راسها . واتحداها واعاندها ..
خرجت من عنده وانا ابكي ودخلت غرفتي اللي بالاستراحه على طول وبكيت من قلبي ياربي هذا حال وحده الليلة ملكتها .. دخلت علي لمى وبسرعه حضنتها وانا ابكي وجلست تهديني وقلت لها على كل اللي صار . . كانت لمى بتبرر له بس قالت :بصراحة ياديمه مرة قليل ادب وماعنده ذوق فيه احد يقول هالكلام لخطيبته .. !
دق الباب وقامت لمى تفتح كانت ريم قالت : ديمه خير حياتي ليه تبكين
مسحت دموعي وقلت وانا اشهق : مافيني شي تذكرت ابوي هو اللي ناقصني الليلة
: الله يرحمه لاتبكين عليه ادعي له احسن . ولو كان موجود ماخلاك تبكين كذا . خلاص عاد لاتنكدين علينا .
حسيت ان ريم متأثرة بس حسيت انها مو مصدقتني ان هذا هو السبب اللي يخليني ابكي كذا
جات خالتي وهدى وهند وغاده وكلهم استغربوا كانوا يحسبوني زي أي وحد تجي من عند خطيبها اذا شافها وهي تضحك وتقولهم اش قالها
: لمى وش فيها ديمه ... قالته خالتي اللي كانت تحضني وانا ابكي
قالت لمى وهي تمسح دمعه خانتها : تتدلع ..
: لا مو ديمه اللي تتدلع بالله اش قالت لك
طلعت ريم على طول وخفت ان لمى تتهور وتقول لهم شي قلت بسرعه : مافيني شي بس تمنيت ان ابوي هنا الله يرحمه
حسيت ان خالتي ارتاحت ان هذا السبب : اوه الحمد لله خوفتيني حسبت مهند قالك شي .
: لا وش بيقول شوفي الشبكه
: واو وربي تجنن ياديمه الماس وباين انها غاليه ماتقل اربعين الف
وجات هدى وهند وغادة شافوها وابدوا اعجابهم فيها .

قالت خالتي بتطلعين عند الحريم ولا بتجلسون هنا
ماكان لي خلق لااطلع ولا ادخل ولا اكلم احد احسني ابغى ارجع للبيت لأني تعبانه كثير
واتصلت على خالي قلت :ابغى ارجع للبيت ولمى معاي وابغى السواق يوصلني
قال خالي : اطلعي لي برا ابغاك بسرعه !
بس تحججت ان لمى عندي لأني حسيت انه لاحظ صوتي المتأثر من البكا وخفت يسألني ثم اتورط .
بعد ساعه كنت انا ولمى في بيتنا وهي تحاول تطلعني من جو التوتر اللي انا فيه
: ديمه امانه كيف شكله حلو ... اذا يشبه ريم وسميرة يجنن
: مايشبه لهم لا
: من احلى هم ولا هو
قلت وانا ابتسم بعد ماهديت من نوبة البكا اللي في الاستراحة ثم في السيارة : لاوالله يالمى هو احلى كل شي فيه حلو بس قهرني ومااحبه احسني اكرهه ..
: بالعكس ياديمه افرحي حلوة الحياة اذا بدايتها فيها اكشن ومواقف زي هذي النهاية بتصير حب وكلام حلو .. تشوفين بعد الزواج والله ليبوس رجولك بس ترضين عليه لأن بصراحه مافيه رجال يوقف قدام جمال ديمه ويقدر يكابر
: تكفين لمى فكينا من احلامك ورومنسيتك .. انا ماخذة واحد قلبه حجر .. انسان من صخر ولا يفكر بالحب والرومنسية ولا فيه واحد يقول لخطيبته انا خطبتك ابغى اكسر راسك .. وعناد وتحدي ..؟ اسكتي يالمى الله يخليك بحاول اتناسى لين يجي موعد زواجنا .. الله يستر منه يقول بقدم الموعد كأنه بكيفه ..
: بيني وبينك خالك مرة مزودها مخليه على كيفه .. ولا وين رايك لمن قال الملكه الاسبوع الجاي
: خالي كأنه خايف يطير من يده يقول مافيه احسن من مهند لك .. يقول تبيني ازوجك من هالشباب مايستاهلونك .. بس مهند عاجبه يقول مافيه زيه وياليته يدري مهند وش قال لي ...
ياربي ارحمني وساعدني على الأيام الجاية



""" **** **** """ ****



اتصل زوج لمى عليها وقال انه قريب من البيت يباخذها .. وقامت تلبس عبايتها ونزلنا من فوق الا هدى وخالتي داخلين وعيالهم نايمين كانت الساعه حوالي 2 .. وشغالة خالتي طلعت بعزام وخالتي كانت تشيل جراح وطلعت فوق وهدى كانت تشيل ديمه والشغالة تشيل ياسمين والشغالة الثانية تشيل أسامه اللي باين انه ثقيل عليها وهي حرام كبيرة ماتقدر تطلع الدرج وهي تشيله .. وقفتها وصحيت اسامه الين صحى وخليتها تمسكه بيدينه عشان مايطيح وتخليه يمشي على رجوله .. كان بسام مع خالي دايخ يبغى ينام وطلعه خالي فوق ورجع لي بسرعه وهدى وخالتي كل وحده دخلت غرفتها تعبانات
: ديمه تعالي ابغاك .... قاله خالي وكان صوته مرة عالي ..
قلت بحذر : هلاخالي
اشر لي اجلس قال : بالحرف الواحد تقولين لي وش صار
جلست واخذت الخدادية مسكتها بقوة قلت : ماصار شي دخلوا ااهله وتصوروا معانا وبعدها جلسنا يمكن خمس دقايق وطلعنا
: والبكا والمناحه اللي انتي مسويتها ليه ومهند طلع متغير ومتضايق طول الليل
: انا بصراحه تذكرت ابوي تمنيته معاي .. ويمكن هو تأثر لمن شاف دموعي
: طيب قلتي له وش سبب بكاك
: ها .. مممممممم بصراحه لا
: ليه خليتي الرجال يقلق ويتخربط يحسبنا غاصبينك عليه
ياسلام اجل يوم خطبني مو عارف اني راح انغصب عليه ولا احرج خالي
قلت لخالي : ماقدرت اتكلم معاه واقول له وش فيني
: ياديمه ياحبيبتي انا ماقلت لك انه خلاص زوجك يعني تكلمينه عادي .. هذا مو غريب ليه ماتفهمين
: خالي مو معقول اول يوم اقوله عن اللي فيني واللي مو فيني استنوا علي شويه اتعود عليه بعدين اقوله اللي يبي
: طيب ديوم ماعلينا لاتنكدين على نفسك ووقف خالي ... وماابي اشوف هالدموع اذا شفتها ودي اموت ولاتنزل دمعتك
صرخت : لاتقول اموت الله يجعلني اموت قبلك ويخليك لي
: طيب هدي اعصابك .. ديوم حالتك مو عاجبتني الدموع هذي وراها شي وش فيك ولا تبين تخبين علي
: لاتجيب سيرة الموت اكرهها
وحضني خالي على صدره قال : مانجيب سيرة الموت ولانكدر على الديم ولا ننغص فرحتها اللي هي خلتها دموع وزعل بس ابي وعد ان دموعك ماتنزل .
ابتسمت لحنية وطيبة خالي ناصر : خلاص . حاضر . اللي تبغاه يصير ..
ضحك خالي : الله لايحرمني هالضحكة والله مهند محظوظ اللي بتصيرين في بيته وانا اللي ماادري كيف بدخل هالبيت وانتي مو فيه
: لا ماعليك كل يومين بتشوفني اصلا مااقدر اعيش بدونكم انا
: هذا كلام أي بنت قبل الزواج بس اذا تزوجت تستقل بحياتها وزوجها
: انا لا غير عن البنات مااستغني عن اهلي مهما صار ...
: نشوف ياديوم والله الظاهر بكرة تطقين الشهرين والثلاثه ماشفناك
: خلاص تشوف .... خالي
: هلا
: بصراحه.. كلمته على الشروط ..؟
: وش ظنك اكذب عليك ..؟ هذي حياتك وقراراتك ماراح اخدعك وانا ولي امرك لازم اصير امين في هالموضوع تحديداً
حسيت بارتياح ونشوة بعدين قلت : طيب وش ردة فعلهم ..؟
: هههههههههههههههههههههههههه والله ياديمه قالوا انك غريبة وصريحه .. البنات يمدحن انفسهن وانتي قلتي مااعرف اسوي شي لااخدعكم .. ودراستي ماني تاركتها اعجبكم اعجبكم مااعجبكم الباب ههههههههههههههههههههههه
بس تدرين شرط البيت هذا كبرك في عيون كل الموجودين وكلهم استغربوه اولهم ابو مهند اللي قال بيض الله وجهها عز الله انها بنت رجال ..
والله ياديوم اني افتخر فيك وين مااروح عسى الله يخليك لي ويجعل ياسمين وديمه يمشون على نهجك
: الله يخليك لهم ويصيرون احسن مني وتشوف بسام وأسامه احسن الناس .
: يارب ياكريم .
قام خالي احس انه تعبان وشفته يتمغط قال : بروح احط راسي بس خايف الصلاة تفوتني
: اذا صحيت بدق عليكم
: ماتقصرين والله
: طيب تصبح على خير
: وانتي من اهل الخير ومبروك مرة ثانيه
: الله يبارك في عمرك ويخليك عز وسند لي .
طلع خالي وانا لحقته رحت لغرفتي بس ماقدرت انام .. ياربي ليه وافقت عليه
.. ليه خليته ينفذ مخططاته .. آه بس لوخالي مو في السالفه والله لو يموت مافكرت فيه .
صحيح ان مهند ماينرفض اول حسبته دلوع امه وقلت ماابغى اتزوج واحد امه تدللــــه ويطيح من عيني وانا اشوفها تكلمه زي الأطفال واني ابغى رجل ناضج كبير يحن علي ويهتم فيني مو متعود على الدلع والحنان ويبغاني اعطيه .. وصحيح ان اسباب رفضي له مو منطقيه بس ماقدرت اتقبله .. بعد كذا في هيوستن ماكان يكلمني الا بالمستشفى واسئلة طبيه حسيته شايف نفسه ومغرور .. بس لمن طلبني من خالي عرفت انه انسان مغرور ومايحب احد يرفض له طلب وهو قالها اصلاً .. ياربي اذا هذي بداية حياتي اجل كيف لمن اتزوجه واعيش معاه ببيت واحد
يارب الطف بي وارحمني .. ياربي والله تعبت طفولتي معاناة ووحده اول شي وفاة امي بعدين قسوة زوجة ابوي بعدين عيشتي مع خالي لوحدي لااطفال لاام لا اخوات الين تزوج وكنت لوحدي اغلب ايامي هدى بحالها وانا بحالي ماكنت احتك فيها لأنها كانت تحسسني اني دخيله على حياتها وكان كل وقتي بين الكتب .. الين تأقلمت علي والحمد لله صارت لي اكثر من اخت .. ثم معاناتي مع الصداع واللي ماكنت اقدر اخطو خطوة الا ينكد علي .. ثم اكتشافنا انه ورم هذا بحد ذاته اخذ من عمري كثير احسه كبرني كم سنه وفتح عيوني على اشياء ماكنت تخطر في بالي .. ومعاناة الألم عسى المسلم مايجربه .. ثم العملية وأبوي والغيبوبة اللي صارت لي بغيت اموت بسببها ثم يوم ربي فكني من هذا كله له الحمد والشكر مدد بلا عدد على فضله علي .. والحين يطلع لي هالمهند .. عاد مهند حياة وعمر هذا ان استمرينا .. يعني كل ايامي الجاية معاه تشير الى اني راح اعاني كثير رحمتك ياربي والله اني تعبت من الهم والمصايب ..


"
"





صحيت بعد نوم كله احلام مزعجة وكوابيس وانا مرهقه .. سألت هدى بعد ماصليت عن الشاحن حقي قالت ان فادية اخذته من غرفتك وانتي نايمه ..
ورحت لغرفة خالتي فادية لقيتها فاضية ومرتبه ومافيها شي
رجعت لهدى اسألها عن خالتي قالت ان عبدالعزيز اخذها بعد صلاة الجمعه انقهرت ماجلست معاها احسني ابغى اتكلم مع خالتي بس المشكله ان خالتي متهورة وعصبية وماتتحمل احد يغلط علي او يزعلني وأكيد بتروح لخالي وتقول له على كلام مهند وانا ماابغى اقهر خالي بعدين ماراح يتغير شي الحين خلاص ملكنا ....

كنت برجع لغرفتي الا ناداني خالي قال وهو خارج من غرفته ويمسح وجهه بمنشفة صغيرة : تراني عزمت مهند للغدا وبيجي .
انقهرت بجد قلت بعصبيه : شو ..؟ بيجي يتغدى ..؟ مو البارحة كان معاكم
استغرب خالي من اسلوبي بس رد علي ببرود : انا الحيت عليه اقل شي تعتذرين له عشان البارحه نغصتي عليه
ارتبكت قلت بسرعه وبصوت هادي هالمرة : شو اعتذر له ومااعتذر له ..؟ .. خالي لو سمحت انا ماسويت له شي وووو صديت عن خالي قلت بشجاعه : ومستحيل اقابله ..
تأفف خالي بضيقة صدر قال : لاتنسين انه زوجك واذا اخذك بيدك الحين محد بيرده
دمعت عيوني على طول ماعاد فيني اسمع اسمه ولا اتذكر مو اقابله واشوفه واسمع موال جديد منه قلت : خالي لوسمحت لاتفرض علي شي زي كذا وأي شي يخص مهند لاحد يفرض عليه شي فيه ..
طالعني خالي بنظرة عدم رضى قال : ماتبين تقولين لي وش فيه ياديمه ؟
مسحت دموعي بيديني وانا اشهق قلت : خالي الله يخليك لاتسألني ولاتجيب لي سيرة مهند خلاص بتزوجه وانا راضيه بس لاتفرضون علي اقابله ولا اكلمه لأنه مستحيل يشوفني قبل الزواج او حتى يكلمني .
مد علي خالي منديل ومسح على راسي بحنية قال وهو يحاول يهديني : خلاص اللي تبينه يصير انتي حرة محد بيجبرك انا بس شفت مهند البارحه متضايق قلت اليوم اعزمه وأخليك تقابلينه وتقولين له انك ماكنتي متضايقه منه وانك لمن كنتي تبكين عشان ابوك و ..
قاطعته بسرعه : خالي مو لازم هو مصيره بيعرف بس مو الحين خلاص خالي اذا مهند بيجي روح اجلس معاه بس اذا سأل عني قول ماتبغى .. الله يخليك خالي قول ديمه ماتبغى تقابلك ولا تحط لي اعذار من عندك
رحت بسرعه لغرفتي وانا مقهورة اول مرة اكلم خالي باسلوب زي هذا الا لمن عزمنا مهند كلمته باسلوب يشبه هذا . يعني مهند هو السبب اني اكلم خالي بالطريقة هذي في كل الحالات..
بكيت اليوم بما فيه الكفاية احسني مو قادرة اتحمل وجات في راسي فكرة ... وين كانت غايبة عني ..؟ ليه مااروح لسوريا واجلس عند جدتي كم يوم ..؟
ماخرجت من غرفتي الا الساعه خمسة العصر وشافتني هدى متضايقه قالت : ديمه وش فيك لاتخبين علي انا اختك احس انك مهمومه .. مهند له دخل ..؟
: لامهمومه ولا لمهند دخل ولا شي بس انا حاسة اني متضايقه بدون سبب انتي لاتشيلين همي ماعليك .
: تدرين ان مهند قال يبي يشوفك وقال له خالك مارضت تقابلك ؟
: احسن .. وخالي صادق ..
: اجل وربي ان فيه شي ياديمه ومهند اليوم كان مو طبيعي على قولة خالك يقول احس انه مهموم حتى خالك يقول اشك ان ديمه قايلة له شي ...
: ماقلت له شي ولا قال لي شي يمكن لأني بكيت البارحه على ابوي وامي
: الله يهديك فيه احد ينكد على نفسه بالذكريات
: خلاص هدى تكفين مااقدر ابكي ماعاد فيني ..
: طيب خلاص وآسفه ياديوم .. تبغين غدا ..؟
: لا ابغى خالي وينه ..؟
: خرج مع مهند ..
اخذت جوالي وانا بقلبي اقول خله يدري بقهره لمن يدري اني راح اسافر
دقيت على خالي ورد علي بسرعه
: هلا والله وغلا بديمتي
استحيت من خالي لمن تذكرت كلامي اليوم معاه قلت بصوت هادي : هلا خالي كيفك ؟
: بخير انتي كيفك الحين ..؟ كيف المزاج عساه احسن الحين .. ؟
رديت بسرعه وتهربت من سؤال خالي على قد مااقدر : الحمد لله .. خالي متى بتجي ..؟
حسيت خالي ارتبك لمن تغيرت لهجته وقال بجدية : ليه بغيتي شي ..؟
قلت : خالي الله يخليك بروح عند جدتي كم يوم ..
كانت هدى قاعده وشهقت ومفتحه عيونها بقووة . بس ماعلقت ...!
: ممم ليه فيك شي ..؟
نزلت دموعي غصب خفت خالي يرفض وانا لو جلست في البيت بموت من القهر قلت : مافيني شي بس محتاجه اروح الله يخليك خالي لاتردني والله نفسي اروح ..
: طيب طيب لاتبكييين .. ولايهمك انتي .. متى تبين تروحين ..؟
قلت بسرعة : خالي ياليت اليوم بس ابغى بكرة او بعده بالكثير اكون عند جدتي ..
: اوف اوف كل هذا مستعجله .
:.......................
: طيب من عندنا اغلى من ديوم الحين احجز لك وجهزي شنطتك وانا ادق عليك اقولك متى الرحلة
: تسلم ياخالي الله لايحرمني منك ويخليك لي
: ويخليك ياديوم بس افرديها شوي ترى كأني اشوفك وانتي مبوزة
: ههههههههههه لا بالعكس الحين روقت .
: عساه دايم رايقه
: طيب يالله مع السلامه
: مع السلامه

وانا اكلم خالي سمعت عنده اصوات اتوقع انه في الكوفي شوب .. والتفت لهدى اللي تناظر فيني وكأن حالي مو عاجبها ..!
ابتسمت لها وانا احسني مرتاحه كثير قلت لها : هدهود ليه تناظريني كذا
قالت وهي مكشرة وتهز راسها بأسف : ديمه وش صار لك ؟
ضحكت وتنهدت قلت : مافيني شي بس يمكن لأني حسيت حياتي راح تتغير جذرياً .. وارتبطت بشخص غريب عني احسني متخربطه .. صدقيني هدى مافيني شي يخليك تتحسرين على حالي بس وسعي صدرك .. بكرة اذا جيت من سوريا تشوفيني متغيرة ومرتاحه احسني محتاجه اجلس مع نفسي واتقبل حياتي الجديدة ..!
ابتسمت هدى وحسيتها تطمنت وارتاحت .. قالت : اجل يالله عشان خاطر بنادي الشغالة تجيب لك غدا ..
: ممممممم يالله ولو ان مالي نفس بس عشانك راح آكل ..
نادت الشغاله تجيب لي غدا وهي رجعت تسولف معاي عن ليلة البارحه وان البنات كانوا مبسوطات وفرحانات وان سميرة تقول ديمه لايقه على مهند وهو لايق عليها ..وقالت ان ريم طول الوقت تقول ياليت عمتي نورة وبنتها فاطمه جو يشوفون ديمه .. يوم سألتها ليه قالت انها من زمان حاطة عينها على مهند ولمن عرفت انه خطب بغت تموت وقعدت تسب وتسخط وتحلف انه لويموت ماراح يلاقي مثل فاطمة بنتها ..
ابتسمت لهدى وانا بقلبي اقول ليته اخذها وفكني .. ..
جابت الشغالة الغدا كان سمك ورز اكلت شوية سمك وشربت عصير وقمت اجهز شنطتي لأني ناوية اسافر بإذن الله..
دق خالي علي وانا اطبق ملابسي بالشنطة قال : والله ياديمه انا لقيت لك مقعد على طيارة الساعه 2 بس حضرة مهند يقول ماابيها تروح
رميت البلوزة اللي كنت اطبقها من يدي قلت بعصبيه : شو ..؟ اش دخله يرفض ..؟
سكت خالي شوية بعدين قال : انا قلت اوصل لك كلامه بحكم انه زوجك .. بس اذا تبين تسافرين امشي .مايقدر يردك .. وسمعت خالي يضحك حسيت ان مهند عنده ويسمعه ..
قلت بتحدي ونرفزة وقهر : طبعا بسافر بعدين اذا جيت في بيته هذيك الساعه يمنعني لكن الحين انت اللي تقدر تمنعني وتسمح لي ..
: ههههههههههههههههههههههههههههههههههههههههههههههه ايوه هذا الكلام اللي انا ابيه .
: طيب خالي يعني الليلة اروح صح ؟
: ايوه خلصي وانا امرك على الساعه 11 اوديك المطار ..
: اوكي خالي الله يخليك لي ولا يحرمني منك
كان خالي يضحك قال :ههههههههههههههههه يالله مع السلامه
قفل خالي وهو يضحك . وانا قعدت اتذكر كلام زوج المستقبل ... من الحين أوامر اجل بكرة اش بيسوي .. وتذكرت كلامه واني صرت زوجته وانه بكرة بيقول ممنوع وسوي وافعلي ولا تسوين .. بجد بموت من القهر .. رميت نفسي على السرير وبكيت بحرقة وقهر وندم وضعف ..

اخذت لي شاور ولبست وحاولت ازبط لي مكياج يخفي اثار البكا اللي ورمت عيوني وخشمي .. حطيت مكياج سريع بودرة خفيفه وبلاشر احمر وشدو احمر وماسكرا وقلوز احمر .. وماحطيت كحل لأن عيوني كانت شوي حمرا واذا حطيت حكل يبين الاحمرار اكثر .. .. كنت لابسه بنطلون ابيض وبلوزة حمرا طويلة شوي وواسعه على خصري وكانت بدون اكمام .. كانت مرة ناعمة ومعطيتني شكل انيق وناعم .. ولبست صندل ابيض عالي شوية
وخرجت جاكيت ابيض قصير على اساس البسه قبل مااخرج ونزلت مع الدرج وفي يدي شنطتي السودا الصغيرة اللي فيها جوالي وأدوات تجميل ومناديل ومحفظتي ..
بعد ساعه جلستها مع هدى اتصل علي خالي واول مافتحت الخط قال على طول : انا جالس بالحديقة اذا جات الساعه 11 اطلعي وخلي الشغالة تجيب شنطتك ..
قلت : خالي بروح مع السواق اشتري هدية لجدتي وخالتي سمر من الصيرفي ميغا مول بسرعه وارجع.
: زين بس لاتطولين
: خرجت في الحديقه على بالي خالي لوحده بعد ماارسلت الشغالة تجيب لي عبايتي وطرحتي وغطاي .. كانت الحديقه كبيرة جزء منها كان جلسة وفي الركن بآخر شي ملاهي لعيال خالي .. جيت امشي عند خالي وانا ادور عليه مو جالس على الكراسي ..ولا عند المسبح .. وقعدت ادور عليه ماشفته ..
قربت من المرسم حقي لقيت انواره مفتوحه قلت اكيد خالي هنا ..
ناديت خالي بصوت واضح ومحد رد .. معقوله مافيه احد والمرسم مفتوح .. لا مو معقوله اصلا هم مفتاحين للمرسم واحد معاي وواحد مع خالي ... من بيفتحه غيرنا وخالي اصلاً حريص عليه اكثر مني مستحيل ينساه مفتوح ..!
دخلت بشويش وكنت خايفه بس بشوف لوحاتي ثروتي واللي تعبت عليها ايام وليالي وأخذت مني وقت وجهد ..شميت ريحة دخان ... ياويلي عورني قلبي وخفت بجد من اللي هنا ويدخن خالي مايدخن .. يمكن خالي سامي بس متى جا .. لا لايكون مهند .. لا لا مستحيل بيجلس مع خالي من الظهر لين الليل ..؟
لفيت ورجعت ابي اهرب الا شخص واقف يتأمل لوحة الحنين للأبد ..
كانت لحظة لاأحسد عليها بجد ..
كان واقف بجنب اللوحة ولف علي شفته لابس ثوب ابيض وشماغ احمر ..وفي يده زقاره بصراحه كان شكله يجنن ..! نفسي ارسمه كذا ههههههههههههه لاتضحكون بس بجد عليه شكل يفتن غصب غصب غصب ..!
ماقد احد لفت نظري كثره .. ولا اعجبني كثره .. كنت في لحظة ذهول ومتفاجأه . ومقهورة اني قدامه بالشكل هذا ياليتني لابسه الجاكيت على الأقل كان استر .. وتذكرت اكتافي عريانه .. وبلحظة فتحت شعري بسرعه ابغاه يسترني .. ورجعت على ورا ..
حسيت بالأرض لفت فيني لمن سمعته يقول بهدوء : ديمه ..!
مارديت عليه ورحت امشي لين قابلت الشغالة اللي لحقتني بعبايتي كانت دموعي بتنزل بس منعتها وقلت لااااا والف لااااا.. ماراح ابكي وماراح تنزل مني دمعه بسببه .. تعبت بكا بعدين هو خطيبي يعتبر زوجي اذا شافني عادي حلال ماراح يحاسبني ربي اللي هو عندي اهم شي بعدين خالي والناس .... وبكل برود لبست عبايتي ولبست طرحتي وغطاي وخرجت للسواق للي ينتظرني برا ..قبل مااخرج شفته واقف على باب المرسم ويناظر فيني .







شو ديمه راح تعمل لنرى ؟؟؟؟؟؟






"



أستمتعـــوآ بـالقرآءهـ....

لــي عــودهـ....

[شوقي لوليف روحي]

وصلت السوق وانا طول الطريق اتذكره وأفكر ياترى وش كان بيقول لي .. يمكن بيقول شفتك زي مابغيت وكل شي اخطط له يصير .. ويمكن بيقول انتي اللي جيتني بنفسك محد جبرك ..
صورته ماراحت من بالي وأدري انه معجب فيني طبعاً بلا غرور انا الحمد لله حلوة وكل الناس يشهدون لي .. بعدين لبسي مع مكياجي كان مغري .. حتى لمن فتحت شعري اطلع احلى ... وشعري لوحده يفتن طويل وناعم وكثيف ولونه بني فاتح يعني كفيل ان مهند يحط صورتي هذي براسه لين يموت ..
بس اللي قاهرني وش دخله للمرسم ليه خالي يخليه يدخل من دون مايقول لي ..؟
ولا خلاص صار زوجي حضرته معناته له الحق يتدخل في كل خصوصياتي ..؟
المشكلة ماابغى افتح محاضر تحقيق مع خالي لو قلت له ليه تخليه يدخل ومااسمح انه يشوف لوحاتي ..!

اوووه حاولت اشيله من راسي على قد مااقدر ..و دخلت محل ذهب بسرعه واشتريت اسواره لجدتي من ذهب اصفر ومعاها خاتم بفص اسود .. هذا ذوق جدتي وراح يعجبها
اما خالتي سمر فأخذت لها اسوارة من لازوردي لأنه ناعم يناسبها .وخاتم لام خليل الطباخه اللي تشتغل عند جدتي لأني اعتبرها من اهل البيت ... ومريت بودي شوب وأخذت مجموعة هدايا مغلفة لمايا واحتياطاً اذا سهى زوجة خالي ايمن جات . و مرح صاحبة خالتي سمر.. وساعه لعم ابوسليم الجنايني حق حديقة جدتي .. وأخذت لأهله اقمشة ولحفيدته الاء العاب كثيرة وفستان حلو لأنه يحبها ودايما يحكيني عنها ويتمنى يسعدها بأي شكل واخذت لزوجته ام سليم قماش حلو وجلابيه معاها طرحة نفس اللون واخذت لهاسجاده ... ومريت العربيه للعود واخذت منها عود وثلاث خلطات دهن عود .. وعطرين رجاليه لخالي ايمن اذا حصلته ولعدنان زوج خالتي سمر ..

رجعت للبيت وانا متوترة كانت الساعة تقريباً 10 وتمنيت ماالاقي مهند مع خالي ياربي خالي مايشبع منه اذا قابله مايفارقه الا الفجر بعدين هذا وين شغله ماعنده دوام ولا اليوم الجمعه نسيت . وأهله المساكين اللي جو هنا ماشافهم من الظهر صدق مايستحي ..

دخلت بعبايتي ولقيت خالي جالس عند باب قسم الحريم ينتظرني سلمت وسألت فيه احد قال : لا
حسيت خالي فيه شي بنرة صوته زعلاان قلت : اشفيك خالي لايكون زعلان اني بسافر .. انا محتاجة
قاطعني بسرعه قال : لامو زعلان خذي اغراضك وامشي
استسلمت وقلت : الحين ؟
: ايه يالله
رحت لبست جاكيتي وعبايتي مرة ثانية وسلمت على هدى وعيالها وخليت الشغاله تطلع شنطتي ومشيت ...!
في الطريق كان خالي ساكت ولاحظت انه مشغول بشي قلت وانا ابتسم : ممكن اشاركك التفكير ..؟
طالعني قال : ممكن بس اخاف تتنرفزين
خلاص عرفت ان مهند في الموضوع قلت : لا اوعدك بس قول اش فيك
: تراني خليت مهند يشوف المرسم
مارديت عليه :................
: ردي
ماكنت ابغى انرفز خالي ولااضيق خلقه اذا قلت ليه ؟ وبينت اني معترضه انه يشوف لوحاتي فقلت متظاهرة انه مرة عادي واني مازعلت : عادي خالي اعتقد مافيها شي ..؟
حسيت ان خالي ارتاح وتنهد بعمق قال : صح مافيها شي والمفروض انتي تورينه المرسم مو انا
تبسمت بعدين كمل
: تارك الرجال يضحك ويسولف ومستانس ويوم رجعت لقيت حاله منقلب العكس طفشان ومزاجه شين قال بمشي ومارضى يجلس دقيقه وحده .. والظاهر انها عشر زقاير اللي دخنها ورا بعض
قلت بقلبي عشانه شافني ياخالي .. بس وربي هذا اول الغيث يامهند ...
قلت لخالي : ياكرهي للدخان
: اشوا ماقلتي واللي يدخنون كان ادق على سامي وياسر اقول ديمة تكرهكم وقبلهم مهند
: هههههههههههههههههه خالي سامي يدري اني مااكرهه الا احبه ومن اغلى الناس على قلبي .. وعمي ياسر احبه من حب ابوي له ..
ناظر فيني بجدية قال : باقي مهند ..!
قلت وانا اناظر الشارع كأني ابغى اهرب من خالي : مهند مااقدر احدد شعوري ناحيته وانا ماعرفته الا البارحه
: تتوقعين بتعرفين شعورك ناحيته قبل الزواج
: لاطبعا لأني ماراح اعرفه الا بعد الزواج
: انتي حرة
: كم باقي ونوصل
: خلاص عشر دقايق ونوصل .. تبين فلوس ..؟
: لا معاي الف ريال مااقدر آخذ معاي كاش اكثر من كذا تعرف السعوديين هناك والسرقات ..
: انتبهي لنفسك لااوصيك .. وخليك قد ثقتي فيك
ضحكت وقلت له : لاتوصي حريص ياخالي الغالي .. ماراح تفقد ثقتك فيني الين اموت
: الله يستر عليك ويخليك لي
:ويخليك لي . بتجلس معاي ..؟
: ايه لين تقلع ..
: خالي ماعليك انت روح وانا ادق عليك قبل ماتقلع حرام تجلس الين الساعه 2
: لا لا اسكتي بس .. راح اجلس مافيني تعب بس مهند حيرني والله .. لايكون شاف لوحة اثرت فيه ادري انه يحب الشعر والروايات ويمكن يقدر يقرا اللوحات ويفهمها ..
قلت وانا أأكد على كلام خالي واحاول ابعد عن سيرة انه شافني : يمكن بس مافيه ولا لوحه تنكد الا حقت ابوي يمكن تذكره ..!
: لاوالله مهند اعرفه مايتأثر بهالسهولة ..؟ قلبه حجر .. بس يمكن احد كلمه ولا معترض على سفرك ولا زعلان انه ماقدر يشوفك ولا
قاطعته خلاص مافيني اتحمل سيرته : هههههههه الحين انت مشغل نفسك فيه ليه ؟ يمكن من النوع المزاجي اللي يقلب فجأة ويرجع فجأة ... وانت شايل همه ..!
: لا ماعرفتيه يوم تقولين عنه كذا ..يالله انزلي
نزلنا وجلس خالي معاي بعدين اتصلت عليه هدى تقول ان سامي جا ودخل المجلس وماتدري اش تسوي .. وانه قالها لاتكلمك حتى ماترجع وتترك ديمه بس صوته باين انه تعبان .... قال لها خالي : ارسلي القهوة والشاهي عنده وانا راجع لكم ..
قال لي خالي عن خالي سامي وقال انا مضطر امشي وانتبهي لنفسك ..وانا قلت روح ماعليك ... بس والله خفت على خالي سامي ..
دقيت عليه ورد علي بصوت تعبان
قلت بلهفة : خالي وش فيك .. سلامات ..
: الله يسلمك ماكان فيني شي جيت لجده مافيني غير العافية بس احس ان جسمي فتر وصدعت وارتفعت حرارتي شكلها حمى ..
: سلامتك ماتشوف شر .. والله قلقت عليك وشكلي بكنسل الرحلة
: والله ماترجعين ولو رجعتي لازعل منك مافيني شي روحي استانسي بس .
: طيب بكلمك اول مااوصل واتطمن عليك
: خير ان شاء الله
: يالله مع السلامه
: بحفظ الله


وصلت سوريا في الصباح وكان الجو اش اقولكم بس خياااااااااااااال .. هذاك البلد يسحرني بكل الفصول .. طول السنه ايامه حلوة حتى لوفيه حر الا ان حرهم يفرق عن حرنا يجيهم امطار باستمرارا ... الصباح فتنه والليل لوحة رسام بصراحه .. مو زي جده حر ورطوبة وقرف وزحمه .. الحمد لله بس ..
دخلت بيت جدتي اللي كان معاي مفتاحه .. ونزلت شنطتي بعد مااخذت ليموزين وأنا لازم اكون حذرة في اختياري لليموزين .. او التاكسي .. ادور سواقين كبار وأشكالهم عيال حلال واذا وصلني لازم ازيده ضعف اجرته .. يستاهلون لأن عيال الحلال قليل نواجههم احنا الخليجيين بشكل عام ..
طلعت فوق ورحت سيده لغرفتي بدلت ولبست بيجامه كمها طويل وبنطلونها كمان طويل ... كانت غرفتي زي ماهي بس السرير والكنب متغطي بشراشف بيضا عشان الغبار مايعدمها .. ورحت لغرفة جدتي فتحت الباب بشويش .. لقيتها نايمه ..قلت حرام اصحيها .. ونزلت تحت لقيت ام خليل الطباخه اللي لمن شافتني طارت فيني فرحانه وسلمت عليها وأعطيتها هديتها قلت جيبي لي فطور بالحديقه لأن الورد فيها يغري وريحة الريحان منعشتني من اول مادخلت ..
جابت لي الشغالة الفطور ... افطرت وانا فكري مشغول بالسعودية واللي صار لي هناك ..
رحت امشي بالحديقة .. كل شي زي ماتركته اخر مرة الأشجار خضرا رغم الصيف والحرارة .. الورود بكل الوانها احمر وأصفر وابيض وبنفسجي .. كانت فرحانه بالصباح وبالحياة وبالهوا والشمس .. حتى عمو ابوسليم شكله هو هو بخطوط التجاعيد اللي غزت وجهه ، بهمته ونشاطه واخلاصه ، بأغنياته وهو ينسق الأشجار ويسقيها .. والراديو حقه اللي اشتريته له قبل سنه مايفارقه .. لمحته وحطيت على شعري حجاب طويل .. وقربت منه سمعته يكلم الشجرة الكبيرة كالعاده ويخاصمها انه اوراقها تتساقط بكثرة .. شفته يلومها وكأنه يقول خليك قوية مثل ابوسليم ..كل شي حولي زي ماهو بس انا اللي متغيره .. رحت ديمه البنت اللي تحلم بحياة حلوة ومستقبل مشرق وأسرة اهم اركانها الأمان والسعادة ..ورجعت ديمه ( متزوجه ) ومستقبل راح يكون ممتليء بالعناد والقهر والتحدي بعيدا عن العطاء والبذل والأمان اهم شي ... آه ياشجرة الزيتون ليتني اكون مثلك صامده وقويه .. وصابرة رغم تقلبات المناخ وحرارة الشمس وهطول المطر الغزير فجأة .. وقسوة عمو ابو سليم عليك بمقصه الطويل .. ياليت مهند كان حلم وراح اصحى منه .. ولا ياليتني اصير قوية عشان اواجهه الأيام الجاية .. ومايقهرني بكلامه وتصرفاته وتحديه لي ..

شفت عم ابوسليم قريب مني وانتبه لي .. قال وهو متفاجأ : مين ..؟ ديمه لك يااهلا وسهلا ايمتى وصلتي يابنتي ..
: اهلين فيك ياعمو .. اليوم وصلت ولسه ماقابلت جدتي لأنها نايمه .. انت كيفك وكيف اهلك
: كتر خير الله منيح يابنتي .. كيف صحتك هلا طمنيني
: الحمد لله بخير .. وترى ياعمو جبت لك هدية سامحني مو قد المقام بس عشان كنت مستعجلة البارحة قررت اجي هنا ..
: جيتك لهون يابنتي هي اكبر هدية .. ولك انتي بتردي الروح للي بيشوفك
: هههههههههه الله يخليك ياعمو ويطول بعمرك .. يالله عن اذنك
: اهلا وسهلا فيك يابنتي اذنك معك

رجعت للفيلا بعد ماقطفت لي نرجسة اغرتني .. وكانت الساعه عشر خلاص موعد قومة جدتي الحين .. رحت لغرفتها لقيتها مو في سريرها .. وسمعت صوت الما بالحمام .. ورجعت اخذت هدية عمو ابوسليم وهي الساعه وأغراض حفيدته آلاء ومن العود اللي جبته .. واغراض زوجته .. ونزلت بوديه له
رحت عنده لقيته لساته يتكلم مع الأشجار بس هالمرة مع الورود الحمراء ( الجوري ) وهو يقول : باين زعلانين اليوم .. مابدكون تغنوا لي .. لك غنوا انتو اجمل اشي بالدنيا .. انتوا الحب .. يعني الحياة .. يلا غنوا ..
قاطعته وانا اضحك .... : يمكن زعلته ياعمو عشان كذا ماغنى
: ههههههههههههههه لك بزعل كل الدني ومابزعل الورد انا .. بس هو هيك احيانا بيغار وباينتو غيران من النرجس لأنك أطفتي منو وما أطفتي لك وردة حمرا .
: هههههههههههههه الله يسعدك ياعمو .. خذ هذي هديتك وهدية آلاء وام سليم وسامحني مو قد مقامكم ..
: خجلتيني معك والله ... ليه يابنتي بتتكلفي .. خيرك وخير ابوك الله يرحمه مغرئنا ..
: لاتقول كذا ياعمو انت عزيز علينا ونعتبرك من بيت جدتي مو غريب
: كتر خيرك يابنتي .. وفتح الكيس حق آلاء وكمل : هلا آلاء رح تطير من الفرحه لك الله يفتحها بوجهك وينولك مرادك ياديمة يابنت نور
: هههههههههههههههه ايوه هذي الدعوة ابغاها كل يوم قولها .. يالله سلم على خالتي ام سليم وبوس لي آلاء
: يوصل يابنتي .. مع السلامه


هل ستسعد بسفرها للشام؟؟؟

وهروبها هذا لمتى؟؟؟؟!!!!!!!



رجعت لقيت جدتي تحت ولسه ماعرفت اني عندهم .. دخلت بشويش وهي مشغوله بالمكتبة ترتب المجلات تحت .. قلت وانا اضحك : صباح الخير لجدتي الحلوة الكسولة .. يانوامه كل هذا نوم ..؟
ناظرت جدتي فيني مو مستوعبه .. بعدين ضحكت : ولك شو هالصباح .. يامية اهلا وسهلا
حضنتني جدتي وقعدت تبوس فيني مثل كل مرة ازورهم فيها .. وهي تبكي وتحضني وتهلي وترحب ..
بعد ماسلمنا على بعض وسألتني عن اخباري وأخبار اهلي جلست معاها وهي تفطر وانا اخذت عصير برتقال وجلست مقابله لها ..
: مبروك حياتي الخطوبة الله يوفئك ياديمة وان شاء الله يكون بيستاهلك
: الله يبارك فيك .. وانا بقلبي خايفه جدتي تسألني عنه لأني جاية ارتاح من التفكير فيه ماابغاه يلحقني لهنا ...
جلست مع جدتي ساعتين يمكن وانا خلاص دايخه ابغى انام .. صحيح نمت بالطيارة بس مو كفاية احسني مواصلة من امس للحين .. حتى من زين نوم امس اللي كله احلام وكوابيس ...!
طلعت لغرفتي ورميت نفسي على السرير ودقايق بس الا نمت بعمق
صحيت الساعه 8 العشاء وانا احسني طلعت كل التعب اللي فيني من كم يوم ..
قمت صليت كل الفروض اللي فاتتني ودقيت على خالي سامي اللي باين انه احسن من امس .. وقال لي انه لسه بجده مابيروح للطايف الا اذا راحت منه الحمى لأن خالي ناصر حلف مايروح لين يتطمن عليه ... وسألته عن خالي ناصر قال انه بخير .. ووبعدين قفلت مع خالي سامي ونزلت ..
لقيت خالتي سمر عندنا سلمت عليها وحضنتني وباركت لي وأخذتني بيدي قالت : تعي احكي لي
: شو احكي لك ..؟ وانا اضحك
: بدك هلا تحكي لي عن مهند من طأطأ للسلام عليكم
: هههههههههههههههه لا الله يخليك خلينا من مهند وسيرته خليني اروق معاك مرة مشتاقه لك .
: بس حطي ببالك راح تحكي لي ازا مو هلا بعدين
: اوكي بس الحين خلينا نجلس مع جدتي
: يلا ..
كنت مقفلة جوالي ماابغى احد يدق علي ... وخوالي يعرفون رقم بيت جدتي وجوال جدتي يكلموني عليهم ..
جلست مع جدتي وخالتي وسهرنا في الحديقه .... وام خليل والشغاله الاندنوسية جلسوا يشوون لنا في جو خيالي .. لمن تعشينا على الساعه 3 الفجر قالت جدتي انها تعبانه وبتطلع تنام .. جلست انا وخالتي وصرت انتهي من سالفه وابدا بسالفه بعيده عن مهند اللي اخاف انها تجيب سيرته .. واحاول اسألها عن مواضيع واخليها تقول لي كل شي بالتفصيل .. طولنا واحنا نسولف الين رحمني زوجها قال انه قريب من البيت وبيدخل يسلم علي وياخذها بسرعه .. لبست عبايتي وحجابي اللي كنت ماخذتها معاي تحسباً اذا دخل علينا احد غريب لأني كنت لابسه تنورة قصيرة وبدي .. دخل عدنان وسلم علي من بعيد ونادى خالتي سمر اللي رجعت معاي لجواة البيت عشان تاخذ شنطتها .. سلمت عليها قالت : لساتك ماحكيتي لي اشي عن مهند وحكاية خطوبتك المفاجئة .
: روحي لاتتأخري على زوجك وبعدين نتقابل وأحكي لك .
: يلا تصبحي على خير
: وانتي من اهله .. باي


اوف . الحمد لله عدت الليلة على خير .. طلعت لغرفتي وفتحت جوالي لقيت رسالة من لمى تقول كلميني وتسألني عن اخباري وهي اصلاً ماتدري ان سافرت .. وبعد شوي دق علي رقم غريب من السعودية بس مارديت .. وقفلت جوالي بعدها على طول ونمت ..

اليوم الثاني رحت عند مايا ولقيتها مسوية حفلة وعازمة اغلب صاحباتها بمناسبة زيارتي لها .. تعرفت على البنات كانت لينا ونوال وسهام ورغد كلهم حبوبات قعدوا البنات يرقصون وحاولوا فيني ارقص مارضيت .. انا اصلاً ماقد رقصت في زواجاتنا ومناسباتنا الا زواجات اخوالي يادوب اوقف خمس دقايق اتحرك فيها مع الاغنية شويه اسم اني رقصت واخرج
مو هنا ارقص لا والبنات حريفات ومبدعات بصراحه يتاميلن مو زيي احسني هبلة مااعرف ازبط لو حركة وحده .. جات لمى بعد ماردت على التلفون اللي دق قالت : ديمه اتصلت ام خليل تئول افتحي تلفونك لأنو خالك بدياك ضروري ..!
فتحت تلفوني وانا عارفه ان خالي بس بيطمن يشوفني وين اروح اصلاً أي مشوار اروح له اذا كنت بسوريا يكون عنده خبر .. واليوم لمن دقيت عليه مارد علي وارسلت له رساله اني رايحه عند مايا عازمتني ..
دق تلفوني على طول لقيته خالي ماجد
: هلا خالي
: هلا بك ديوم .. وش هالسفرة المفاجئة
: هههههههههههههههه اشتقت لجدتي .. بعدين الدراسة قربت قلت آخذ فترة استجمام قبلها
قال بجدية خوفتني : اها فترة استجمام صبحية ملكتك ..؟
قلت بضحكه : ملكة مو زواج ..!
: ديمه يمكن تشوفيني دايما ساكت وتحسبيني مو فاهم عليك .. انا اكثر واحد اعرف وش فيك من دون ماتتكلمين وكنت عارف انك منتي مرتاحه لمهند وانك بكيتي ليلة الملكة لأنك ماتبينه بس ليه وافقتي ..؟
بلعت ريقي وارتجفت من كلام خالي اللي فاجأني قلت بارتباك : خالي اشفيك ..؟ ليه تقول كذا .. ؟
: ديمه .. انا مانمت للحين من يوم قالت لي هند انك جيتيهم منهارة
قاطعته : خالي بكيت عشان تذكرت ابوي بس ..
قاطعني : لا ياديمه انا عارفك وفاهم عليك لكن ورب البيت لو انتي مغصوبة على مهند مايصير طيب . انتي عندي اهم من ناصر وسامي وعيالي اللي هم عيالي فاهمة ..؟
عاد خالي ماجد دايماً هادي بس اذا عصب مايعرف احد قلت وانا احاول اهديه : خالي والله العظيم ان خالي ناصر مااجبرني وقال لي مية مرة اذا مو مقتنعه محد بيغصبك ولا جاب لي طاري الملكة انا اللي ناديته وعاتبته انه ماكلمني بالموضوع اول الناس وخلاكم انتم تكلموني قبل ..!
حسيت خالي يتنهد ويتأفف قال : طيب مهند قال لك شي ..؟
: لا بالعكس ماقال شي .. خالي الله يخليك لاتكبر الموضوع مايستاهل .. يمكن انا دلوعه بزياده ..
: اتمنى ياديمه انه مو كبير .. طيب تحسين نفسك مبسوطه ..
قلت بعد مابلعت ريقي وحاولت اسوي نفسي طبيعيه : الحمد لله بس انت لاتشيل هم عساني ماافقدك
: والله ماادري مو راضي يدخل راسي كلامك .. بس اتمنى انه صدق
: لاصدق ياخالي .. بس طمن بالك الله يخليك .
: طيب يالله تامرين على شي .
: سلامتك وانتبه لنفسك ولاتفكر بهذا الموضوع ترى مافيه شي من اللي براسك
: اوكي .. انتي انتبهي لنفسك واستانسي .. !ويالله مع السلامه
: مع السلامه