الزواج عن طريق الانترنت
هذه قصه خرافيه تعالج مشكله اجتمااعيه الكثير منا غارق فيها.اتمنى تعجبكم .كنت اتصفح بعض المواقع واعجبني هذا الموضووع وقد نقل عن شخص مجهوول.القصه طويله بس ممتعه اتمنى تعجبك.ونستفيد منها كلنا.!!!!!!!!!!!!! بداية القصه
انا شاب سعودي ومستقيم (لاتقولون مثلث لانها بتصير بايخه) وما اطيق الانحراف ومنذ نعومة اظافري وانا متولع بشي اسمه امرأة وصرت اكبر وحب النساء في قلبي يكبر ويكبر ويكبر......الى ان وصلت سن العشرين وعندها بدا الحب يصير توّلع والتوّلع يصير احتراق ...يعني ماتتصورون بنت متلففه في بشتها وش يمكن تسوي فيني وشلون عاد اذا كانت من الطلعات الجديد براقع فوقها طرحه ولا اللثام ولا البشت السترتش ( افهم ليه مامنعوه من اول الا يدخل ويشوفونه ثم يكتشفون انه فتنه) المهم مرة وانا في احد الاسواق مع الوالده الله يحفظها واثر امي مثل عادتها تنقز في احد المحلات واطل الا هو مليان حريم قلت ياولد فك عمرك وانتظر برا المحل ...وشوي ولاتجيني بنت مهوّله بنفسها فاتشه الا شوي يعني هذا ازين وصف لها وقالت لي عن اذنك حسبتها تبي تحتك بي(وووععع يعني من زيني) وعلى بالي ثقل وابتسم لها وترد علي وهي معصبه ابي ادخل المحل ...طاح وجهي المهم وتعدي من جنبي والتفت عليها ولا لابسة عباة استرتش وذاك الجسم الواضح المعالم واجلس اتصبب عرق واحس اني بانهار وبعدها بشوي تطلع الوالده ونطلع من السوق كله ونركب السيارة , الوالده متعوده علي اذا ركبت معي اشغل المسجل على اخره..وتو الوالده مسميه بالله ولاتسمع .( يميمتي ابي اتزوج زوجينييييي ) قالت لي امي ياولدي انت مشغل مواويل صباح اللامي ولا عوض دوخي ...وش ذا الصوت اللي يروّع قلت يمّه هذا صوتي انا اكلمك ابي اتزوج انا عبدالعزيز ولدك ابي اتزوج ...وتدلي امي تسمي وتقول وش بلاك ياوليدي توك صغير وش زواجه وانا امك اعقل بس قلت يمّه وش صغيره عمري 21 خط شنبي وتقولين صغير ...قالت ياولدي والله من عرض هالشنب مايندري شنب ولا بقايا فيمتو ..طيب ياوليدي اذا تزوجت الحين من بيصرف عليك وانت طالب وباقي لك كم سنة على التخرج تعوّذ من ابليس بس ياوليدي ...قلت يمّه صدق ماصرت اصبر ولا اقدر اكتم في نفسي كاني قدر طبخ زوجوني يعني زوجوني ..يعني تزوجون كل اخواني وانا لا....قالت ياوليدي ومن بتقبل بك وانت طالب .قلت بنات الحلال واجد ولابد تلتقون واحده تقبل بي .....وسكتت الوالده وجلست تتحمد الله ويوم رجعنا للبيت وتطمر امي وتدق على ابوي بالجوال وتقول له يجي ضروري ويوصل الوالد ويجتمع مع امي لمدة ساعتين ......وانا اتقرفص في الصاله ...ويطلع ابوي ويقول لي:بعد المشاورات والمداولات والا انا اقاطعه اخلص ياشيخ وش قررتوا ...قال لي خلااص وافقنا بنزوجك والله يعيننا عليك وعلى مصاريف زواجك....وانا اجلس اتنطط من الفرحه ......وبدت امي وزوجات اخواني يدورون لي على بنت ..وكل شوي اقول لامي يمّاه تراني ابي البنت اللي باتزوجها تكون فيها كل معالم الانوثة فاهمه علي كل معالم الانوثة هذا اهم شي ...قالت لي امي زين ياوليدي (وانا على بالي انها فاهمه) قلت زين ....وبعد اسبوعين تبشرني امي انها لقت لي واحده وتقول لي تضبط بنروح نخطبها لك الليله بعد صلاة العشاء,ورحت للحلاق زي العاده واستعديت للموعد المهم في حياتي ...وكل اللي قالته لي امي عنها ان اسمها ريوف.
وبالفعل رحت انا وابوي واخواني لبيت ابو ريوف ويجلس ابوي وابوها يخرطون (الله وكيلكم جلسوا ساعتين ماجابو طاريي او طاري خطبه) وبعد شوي يجي بزر قصدي ابو نسب ربي يحرسة في ثاني متوسط ويقول لابوها : يبه ترا امي تقول خل عبدالعزيز يدخل المقلط ..والا انا انقز قبل ابوها( عارف بتقولون واحد ما صدق ) ويقضبني ابوي من يدي واحسب ان بشتي ناشب في شي والا اسحبه بقوة مادريت الا ابوي فارش على الارض ..المهم دخلت مع عم المستقبل للمقلط ..ووش اشوف هناك ....لابارك الله فيهم شابيّن 3 نجفات تقول كشافات استاد الملك فهد في عيوني وتجي البنت قبالي والله وكيلكم ما شفت شي ولاهمني وجهها بالمقام الاول بكثر ماتهمني المعالم الانثويه وربكم ماكتب لي اميزها بس كل شي ذيك الليله تم على خير ...وتمت الخطبه ,ولان ابوها قفل فقد قرر اني ما اشوفها مرة اخرى الا ليلة الزواج ...وفعلا تجي ليلة الزفاف ووقتها اشوف زوجتي ووش كانت زوجتي,, عليها وجه, وشلون اوصفه احترت جرح مو جرح الا جرح عميق ...وجهها شي واضح ولافيه ادني عيب ولا حتى حبة خال بس الزين ما يكمل نحيفه وعصلاا كلها على بعضها بالفستان والذهب مايجي وزنها 45 كيلو بس كنت على نياتي احس جمالها يعني قوامها ووجهها بيغطي على هالشي بس اكتشفت ان الجمال اللي يوصفونه في الشعر والاغاني كله زايل ولاهو صدق مع الظلام يختفي أي والله كل هالحلا والجمال يختفي في الطلام حسيت انا مااقدر انسجم مع الموقف ماتتصورون كيف انسدت نفسي المهم حاولت اتاقلم مع هالوضع عل وعسى ...جلسنا اسبوع ماغير اعشيها واغديها وافطرها لحم ودسم وحلويات بس مافي فايده الشيخه من اول لقمة تشبع واذا جا العشا مالها نفس يعني هي هي ماتغير فيها شي ,هذا اذا مانقص وزنها ...وللاسف الشديد كل ماحاولت انسجم مااقدرت على طول لدرجة اخر ليلة نمت في ملحق بيتنا ....وفي صباح اليوم الثامن قلت لها يابنت الناس: صدقيني انك حلوة واخلاق وعلى ادب ودين وحشمة ومافيك شي ينتعيب بس بصراحة وبدون زعل ماتناسبيني ولا فيك الشي اللي ابيه معليش لازم نفترق,كان حكيي ماعجبها بدت تبكي وتنوح بس صار الطلاق ......وتزعل علي الوالده لان العروسة من اختيارها ومن جماعتها يعني من بعيد شوي ..وقالت لي امي :ياقليل الادب وانت تحسب بنات الناس لعبة بين يديك ولا شايفنا نرمي الفلوس زي الرز علشان تتزوج وبعد اسبوع تطلق صدق انك قليل حيا ..قلت لها يمّه معاك البنت مو حلوة الا جرح الا قمر وقمر 14 بعد بس مافيها علامات الانوثة اللي ابيها ..قالت لي امي وش تخربط انت وش انوثته وانا مزوجينك ولد, عما يعمييك ويقطع آذانيك ..قلت لها لحظة شوي واطمر واجيب لها صورة (كلوديا شمالي) في احد حفلاتها قلت لها شفتي هذي ,هذا علامات الانوثة اللي اقصدها شفتي وشلون ممتليه ربي يحرسها من العين مو مثل ريوف كلها على بعضها مافيها شي يرج الا شعرها هو اللي بس يتحرك ....ومادريت الا بامي ترجمني بالبيالات ياقليل الادب والله لو ادري انك تعرف هذي اللي تشلع سيقانها (تشلع=تظهر) قدام الناس والله العظيم اني لاامك ولا اعرفك ...قلت لاحول... لاتزعلين اصبري شوي واطمر واجيب لها صورة (زينب العسكري) قلت تشوفين يمّه هذي كم تعطينها من وزن وشوفي وش حليلاتها متستره ومتحشمه ...هالمره امي استخدمت ادوات حاده وصارت ترمي علي نعولها وقالت هذا اللي ناقص مابقى الا تجيب طاش ماطاش في بيتنا ....قلت لها يمّه افهمينيي بس ...قالت اسمع انت ,انت ما منك رجا انا غسلت يدي منك دور على اللي تبي بنفسك ولاتستشيرني ابدا اذا لقيت اللي تبي عطني خبر نروح نخطبها لك ويكون علمك لو تطلقها بعدين ترا خلاص Game Overمو تقول اخطبوا لي مرة اخرى.
المهم انا قبلت التحدي ولاني مو راعي مغازل وترقيم,,جبتها من الاخر يعني من اول دقيقة مالي حل الا الانترنت . حبيب عمري وقلبي وصارت رسالتي في الانترنت اني ابحث عن زوجة المستقبل (حلوة,فيها معالم الانوثه ,أي شي ثاني مو مهم)....وبديت بالايسيكيو كونه من اقدم البرامج معي على الانترنت....وبلشت في الايسيكيو دورت البني على اللسته حقتي ولانفع صرت اسوي سيرش على بنات سعوديات من الرياض ومن جده ولا الشرقيه ولافي فايده,تهزيء بشكل واضح اقول للبنت ودي اتعرف ترد علي احترم نفسك وبلا قلة ادب اقول لها غرضي شريف ترد علي كلهم يقولون كذا العب غيرها ياشاطر ..اقول لها ادور بنت اتزوجها يردون علي خل امك تدور لك مو على النت وانواع الكشكشه والاجنور الين الظاهر وقتها اسمي تعمم على كل بنات السعوديه.,,.لين قابلت بنت في الايسييكو قلت في نفسي هالمره ماني قايل لها ادور زوجه وبالفعل ضبطت معي وتعرفت عليها وتعرفت علي وصرنا نعرف بعض كثير وبعد علاقة عمرها اسبوعين صارحتها اني ادور على بنت اتزوجها........
واذا البنت تنصدم وتتفاجأ قالت لي خلاص كلم ابوي ,,,,,علمتها قصتي الاولى وقلت لها لاتفهميني غلط بس قبل ما اخطبك لازم اشوفك والله يعلم ان نيتي شريفه ...قالت لي اسمع انا مو ملكة جمال بس حلوة وجسمي زين بس المشكله في صوتي صوتي بشع مره ما تتصور كيف....قلت اذا على صوتك عادي ااهم شي اشوفك وبالفعل واعدتني في مطعم في العليا انتظرتها عند بوابة قسم العوائل ولا بنتين ينزلون من سيارة كاديلاك اسود وتجي يمي واحده منهم تسالني انت عبدالعزيز قلت ايه ...وندخل احنا الثلاثة طلعت اللي تكلمت معي بنت خالتها وهي ساكته وتفتش لي عن وجهها على فكره اسمها مضاوي ويوم فتشت مضاوي الا وجهها حلووووو وجسمها زين يعني فيها تضاريس انثويه قلت بس هذي زوجة المستقبل لاوبنت نعمة بعد بس المشكله طول الوقت ساكته وطلبنا العشا وهي ساكته انا بصراحة اعجبت فيها مره كثر ماهي حلوة ...والاكثر من كذا خجلها مموتني فيها ...ويجينا العشا صحن معكرونه ( في المطعم الايطالي) وتوني بادي ادب فيه ومن يقدر يلومني طاير من الفرحه الا واسمع صوت...
والله ماتوقعت اني اسوي كذا في يوم من الايام ياعبدالعزيز صدق الحب يعمل المستحيل .....قلت وانا في مرحلة اللاشعور .سم يابو الشباب وش سويت عسا ما صدمت ...(والله صوتها مو شين الا يروع صوت تمساح غاص بتفاحه في وسط حلقه) والتفت واناظرها حسيت ان كلامي جرحها ...قمت على بالي بارقعها :آسف ياعيوني كنت افكر في واحد من الشباب.,, قالت من جد,, ولا انا اغص بالسباغتي من كثر ما صوتها وجع اذني...قلت ايه من جد ومن ابو وام بعد قالت لي وش فيك ياحياتي شكلك متنكد,, قلت من دون وعي اسكتي بس ...الا وبنت خالتها تناظرني ...قلت وانا بارقع الوضع مكثرين الفلفل في السباغتي الله ياخذ اعمارهم(والله انه كان الذ طبق سباغتي في حياتي بس وش اسوي..),, قالت يعني انت خلاص بتتزوجني (يميين بالله صوتها يروع ماينوصف تقولون صعيدي حارس استراحه) وتووني باقول ايه اكيد,, الا وينط اللاشعور عندي ويقول لاااا ما اقدر صوتك بشع بشع لااااااااااااا ,,ومن الالم والوعه تركت صحن السباغتي وطلعت تركتها والله العظيم الكريم غصب عني صوتها يذكرني بالفرامل اذا انعدمت الفحمات يروع بشكل حبيت اعتذر للبنت وارسل لها على الايسيكيو المسكينه من الالم مو بس سوت لي اجنور الا حذفت الايسكيو بكبره حتى انا حسيت اني انخدعت بالايسيكيو وطاح من عيني كله وصارت حالتي عدم...يعني ياربي وين القا زوجة المستقبل وين ياربي ..
.وتركت النت كله اسبوع كامل وصدف ان قابلني واحد من الشباب وشرحت له القصة وقال لي خبل انت تدور زوجة لك على الايسيكيو اصلا كل البنات اللي في الايسيكيو ماراح يصدقوونك وحتى وين راح تلقى الصادقه سالته بشغف وش الحل طيب امي وغسلت يدها مني..قالت لي دبر عمرك بعمرك ...قال مالك الا النت ميتنج .,,,سالته وش النت ميتنج ؟؟ قال لي برنامج فيه كاميرا ومايك يعني تشوف صورة البنت وتسمع صوتها وتعرف بعدين وش تقرر تتزوجها ولالا....قلت حلوو والله هذا الكلام المضبوط.وثاني يوم اطق لي كاميرا واروح للنت ميتنج.
وتكررت مأساة الايسيكيو في النت ميتنج كل ماقلت لبنت ودي اتعرف عليك لاني ابحث عن زوجة اللي تطلع على طول واللي تجلس تتريق علي واللي تمدح في نفسها واذا قلت لها شغلي الكاميرا قالت روح العب بعيد واللي لعنتني وشتمت فيني واللي تقول لي كاميرتها محروقة ولافيه فايده ابد الى ما ان اصابني الياس...منه وقلت لنفسي ضاع الامل في شوفتك واقبل الياس واشوف حلمي مات قدام عيني.....
وفي ليلة ظلما مافيها قمر دقت علي واحده اسمها (بروك شيلدز) خبري بها امريكيه مادريت الانها تسلم علي وتحكي معي عربي وتطلع بنت من جده وامزح معها بعد مادب الياس فيني قلت لها شغلي لي الكاميرا...ومااشوف الا كاميرتها تشتغل واحايلها ساعتين واخيرا توافق انها توريني وجهها وتسمعني صوتها بس طلعت وجهها وهي متلثمة وانا اللي انطبخ يابنت الحلال وش بيظرك والله ترى نيتي شريفة مرة ...قالت لي لا ياحبيبي ان كنت تحوبني وعاوز تتجوزني تعال لجده عندي وانا مستعده اتقابل معك واشوفك وتشوفني اش رايك؟؟قلت خلاص الخميس الجاي في جده عندكم وين بيتكم بس..ضحكت (الله صوتها حلو ومقارنة بذيك البنت هذي صوتها يجنن ) ايش بيتنا الله يهديك عاوز ابوي يقتلني تعالي في الشاليه حقنا في الدره انا واخواتي هناك الويك اند الجاي ...شاليهنا رقم (لا لا ماني قايل) المهم يوم الخميس من الساعه 9 صباحا وانا في جده وقدام مكتب تاجير سيارات ياربي وش استاجر كورولا ولا موستنغ ...واقوي قلبي واستاجر موستنغ كشف وعلى الدردووووووورة(دلع درة العروس) واوصل البوابه ورفض يدخلني وساعتين من الحلف ان اهلي هناك وان مرة اخوي تولد والرجال ماطاع يدخلني اخرتها قلت له انا من تبع الاميره فلانه وتوني مخلص ايره الا يقول لي تفضل طال عمرك طلعت من عنده وادخل للدره وانا اقول في نفسي اللهم دمهم لنا نعمة واحفظها من الزوال وانطلق الى داخل الدردووورة باسرع ماعندي وامر على المرسى ولا وش اشوف بنت ملكة جمال وترقص على احد اغاني علي بن محمد ورغم اني ما اطيقه نزلت وشريت كل اشرطته (على بالي انه التوب ون في الدردووورةه) المهم وماغير الفلف في الدردوووورة وعلي بن محمد يردح (صوت علي بن محمد ازين من صوت البنت اللي تعرفت عليها في الايسيكو) المهم وبعد ساعتين لف وانا مهيء نفسي لبروك شيلدز السعوديه ومستبشر بجمال البنت اللي كانت ترقص في المرسى ...واوصل للشاليه حقهم وانزل واطق الجرس ...ويرد علي صوت نويعم مو ناعم نويعم ..مييين؟؟قلت انا عبدالعزيز ....قالت يادمك عبدالعزيز مين ..هيّأ امشي انقلع ....(افا ) قلت لها انا عبدالعزيز بلاك هورس في النت ميتنج اش بك يابروك شيلدز هاه عرفتيني دحينا ...قالت آه قول كذا انتا بلاك هورس ماغيره جاك البلاا في شكلك قول كدا من الاول, شوي ونازلة لك....وانا اقول عسى تطلع جميله مثل البنت اللي بالمرسى ...وتطقني الرطوبه والحر وارجع لسيارتي ...وانتظر بروك شيلدز تنزل ...وشووي وينفتح الباب ويطلعون 3 بنات ,,,استنوا بنات هذا تصنيف الدوله لهم بس اللي شفته انا بعينيي خالد مسعد واحمد جميل وعبدالله سليمان طالعين لي يعني شي بصراحه مااقدر اوصفه المهم تحكي واحده منهم ...بلاااكي ازيك وحشتني انا بروك شيلدز ماعرفتني صح؟؟؟ قلت لها توني عرفتك زيين ومخيس وشين... صحيح الاصوات تخدع, وادعس بالسياره على اقصى سرعه وبعد دقيقة ارجع بالريوس واسالهم بالله هذي دهانات ايش بالله ممكن اعرف اذا مايزعجكم,, ثم ادعس بالسياره مرة ثانيه لان الوسطى اللي تشبه احمد جميل تحركت فخفت تزلق على السيارة تكسر فيها شي وبس ماطاوعني قلبي اروح كذا وارجع مرة ثاني قصدي ثالثة وارمي في وجهها قصدي وجههم والله ماصرت افرق لونهم ممتص شعاع الشمس كله اشرطة علي بن محمد في وجهها والله ماحد يلومني مافي شي مبين بالمره ماهنا فرق بالمره...ومن الدردوووورة على المطار عدل شبعت صدمات خلاص انا مافيّا كرهت النت ميتنج والنت كله معه وقطعت اشتراكي واصبحت متيقن من اني بقية عمري باقضيه عزوبي....
وفي مرة من المرااارييييير وانا مار بجنب انترنت كافيه,وتاخذني الخطوة ولحظة ضعف وادخل للانترنت كافيه بصراحة ماقدرت اقاوم ولا اشوف تجمهرات وش القصة ياشباب وش القصة الا شباب متجمهرين على برامج البودي فون والفايرتالك والفري تيل وتزدااد الاغراءات ولا اقدر امسك نفسي واخذ لي ساعه على الانترنت واجلس واستخدم الفري تيل واحوس واحوس....ولافي فايده وشوي والقى بنت مسمية نفسها لؤلؤة الخبر .
وابدى اسولف كتابة معها ثم يتطور الوضع واشغل لها المايك وتشغل لي المايك عليها صوت صدق هذا اللي يسمونه صروت يطيح الطير من السما وطالبة في الثانوي بعد واسمها نوره ...بس ماهي مقتنعه بالزواج المبكر وخصوصا عن طريق الانترنت ...صدقوني هالبنت دخلت مزاجي عشعشت في نخنايش مخي صرت افكر فيها دايم...ومن اجلها رجعت الى عالم الانترنت واشتركت من جديد وصرت كل يوم اقابلها في النت ساعتين ووصفت لي شكلها ..ومو بس كذا الا ارسلت لي صورتها ...حسيت ان احلامي في الحياة تحققت وان كل شي كنت افكر فيه صار بيني وبينه فشخه ...وجلسنا شهر على الانترنت اني اقنعها اننا لازم نتزوج وان هذي هي النهاية الصحيحية لعلاقتنا ,المهم في الاخير البنت وافقت (الحمدلله يارب) وقررت اني اواعدها في سوق الراشد في الخبر يوم الاربعاء على ان يوم الخميس اروح اقابل ابوها ...وبالفعل شفتها يوم الاربعاء ولا القمر واقول لها بكرة الوعد بكره ....قالت لي وهي مرتاعه لا, بلمت وش القصة مو احنا متفقين وخالصين وش صار ..قالت شف بصراحة احنا من قبيله ولنا عاداتنا وتقاليدنا ...وانا من يوم طلعت على الدنيا وانا محجوزة لواحد من عيال عمي...وانا احايل فيها وابي اقنعها,, في الاخير اسرعت وقالت انت حر ومشت....وثاني يوم اروح وانا مكشخ لبيتهم واقابل ابوها ومن قرادة حظي كان عنده اجتماع العايله ,وادخل واقول له كل السالفه وهنا بدت المصايب تهل ..س: من وين عرفتها؟؟؟ابد شافتها واحده من الجماعه كانت في مناسبه عندكم في الشرقيه قبل شهر ...فحبيت اجي واجس النبض واشوفها الشوفة الشرعيه....س:وش دراك يمكن البنت مخطوبه ولا بس كذا على عماها؟؟خفت اقول له لا اعرف انها مو مخطوبه يقوم يطرز وجهي بنعاله فقلت السليم لاوالله ياعمي جيت على عماها.....شوي ويخزني ابوها بعينه وقال شف ياولدي مايندرى صدقك من كذبك بس البنت مخطوبه لواحد من عيال عمها الثلاثة ..,,,قلت له يا اونكل يا اونكل ترى قضية الحجز وولد عمها صارت قديمه اكل عليها الدهر وشرب وما امداني اخلص هرجتي الا اكبر 3 في المجلس يفزون مادريت انهم هم المماليح الثلاثة ....ومن يوم شفتهم مقبلين علي ...قلت في نفسي كل شي الا المراجل بس اذا جا وقت الجلد النفس عندي بالف رجال....واهج ومن الروعه تركت البشت عندهم,,ومايردني الا جسر الملك فهد واصير لاجيء سياسي في البحرين مادريت ان لعايلتهم فرع في البحرين وهوى واقطع الخليج سباحه واريح في جزر حوار ومنها الى قطر واكون لاجىء سياسي وعائلي في قطر.
وفي قطر حسيت اني بقايا انسان ومات الطموح كرهت النت وكرهت الزواج,,,ومن ارض الدوحه حلفت ما اطري الزواج ابد ابد خلاص الماضي ودعته...وماتمر ايام الا اقابل واحده طويله و شقرا وجسمها زين ..ياربي وش هالغزال قطريه ومن وين الدوحه ولا الوكره ولا دخان ولامن وين ...واتعرف عليها وتطلع بنت فرنسيه جات قطر للسياحه (ايه هذي السياحه) وتحضر بطولة التنس اللي هناك...المهم قلت في نفسي ان صابت ولا ماضرت احد واتميلح واصدمها بكتفي ..على بالي زي الافلام المصريه بتطيح البنت واروح اقومها واسبل في عينها...وما امداني اصدم بها الا وانا اللي متسدح على الارض (البنت متغذيه صح ..جسمها حلو) وتجي يمي بكل شهامة الفرنسيين وتمد لي يدها وتقومني ...عادي عادي قومتني ولا قومتها في الاخير باسبل في عيونها ..وش عيونها زرق, عيونها زرق مافيها تراخوما ولا موية زرقا, عيونها زرق وحلوات ..قلت بس هذي حبيبة العمر واعزمها على كوفي شوب واتعرف عليها واعرف انها ماتزوجت الى الان ...قلت بس خلاص يازوزة (ادلع نفسي ) هذي زوجتي وياقلبي اذا مالقيت نصيبك في بلادك فمونيكا الفرنسيه هي علاجك...بس للاسف الزين مايكمل البطولة تخلص اليوم وهي مسافره بكره لانها ماقدرت تتحمل الحر ...خذيت ايميلها ورقمها ودلتني على برنامج Icuu.نتقابل هناك.
وجيت على نفسي ورجعت الى المملكه متخفي علشان مايصيدوني اهل نورة ويقنصوني ...واشترك في النت من جديد وكل يوم ورغم فارق التوقيت ارتز في تالي الليل بحسب توقيت باريس وعلى برنامج الicuu وماغير شغل بهالكاميرا وسواليف صحيح اني ثور الله في ارضه في الفرنسي بس في الانجليش لبلب وبديت اتعلم فرنسي بس في الاخير هي صارت تحكي عربي احسن مني ...بس يوم عن يوم مونيكا تطيح الميانه بقوة...بدتها قالت لي :ازيزوو انا احب الولد ازا في صدرهي شار(يعني صدره مشعر) وطقيت صدري قلت انا صدري غابه ...ضحكت وقالت لي: ازا داني ارى(يعني اخلص وورني ) ...يؤ وش تبي ذي كنت امزح معها قلبت جد. بس قلت زوجة المستقبل وتتدلع على زوجها ..واطمر واقفل الباب وكنت وقتها لابس جينز وتي شيرت وافصخ التي شيرت وينفضني البرد..........وتصير النفضه اللي فيني رجفه ...وشوي وتقول لي هبيبي دأني ارى اكتر...قلت لها غربلس الله وش اكثر من كذا وش انتي ناوية عليه....قالت هيا ياهبيبي لاتخجل سوف نتزوج هيا... واصير من البرد كاني جوال نوكيا وهي تضحك على الكاميرا واتشقشق ايما تشقق ..وتقول لي هبيبي شكرا جزيلا لقد امتعتني كسيرا لكن حان الان وقت النوم...وتوداعنا ...اما انا اصابتني حرقة ولوعة الانفلونزا بعد كل الي صار ,اجل مهوّل بعمري ماعلي شي في عز الشتا وترتفع حرارتي وثاني ليله اجي على الوعد الي هو بتوقيت باريس ولا القاها ..واقول حجة الغايب معه واجي اليوم اللي بعده ونفس الشي ما القاها ...وتزداد حرارتي من الانفلونزا والحب( ياشين الحب اذا جا معه انفلونزا ) المهم جلست اسبوع على هالحال لاحس ولا خبر,,, وفي ليله اشيك ايميلي والقا ايميل منها ويفز قلبي... مونيكا حياتي , موني موني مانستني اكيد جاتها ظروف صعبه وافتح الايميل والقا الرساله التاليه ...
(هبيبي ازيزو ,لقد كنت انسان لتيف جدا مئي ,ولقد اهببتك واجد واجد تو متش ,ولكن ياهبيبي نسيت ان اخبركا اني اليزبيان يعني في الخليج اندكم ماتسمونه بالسوهاكيات نئم ياهبيبي نئم ......وهبيت ان اسبت لنفسي انكم في الكليج مكتلفون ئننا في فرنسا .لكنكم للاسف ياهبيبي مو غير الا انتم مسلنا تماما ,,,تاتبروننا شازيين ,,ولهازا يا هبيب الئومر ائذرني ولكني قد حفظت سورتك وانتا..............وانزلتها في موقئنا ئلى الانترنت ==اليزبيان واللي مايئجبه يكبت راسه بالجدار==......هذا كان ايميلها ومامرت دقيقة الا كل الللستة اللي عندي على الايسيكيو يرسلون لي موقع اليزبيان واللي مايئجبه يكبت راسه بالجدار ..(والله ربع نكبات).واناظر الا ووصورتي في الهوم بيج وانا زلط ملط ومتقرفص في البرد بصراحة يوم شفت نفسي حامت كبدي ....بس وش اسوي كيف احد من الفضيحه ثاني يوم في جريدة الرياض صفحة الانترنت عنوان كبير===شاب سعودي مستهتر يشوه سمعة وتاريخ بلده===وافتح قناة الجزيره الاوفيصل القاسم في قناة الجزيره وفي برنامج المصارعه حقه الاتجاه المعاكس ويتحدث قصدي يصارخ شباب الخليج المستهتر ومهازله على الانترنت هل هو من الرفاهية اللتي يغرق فيها ( امحق ر فاهييه) او من الغزو الفكري الغربي الامبريالي ...وصرت انا حديث المدينه ومكة والرياض وكل المملكة وتدري امي ويدري ابوي وكل العايله وتصير ف ضيحتي في جلاجل....ويقرر مجلس العائله طردي من البيت نهائيادون النظر الى ظروفي والى مادعاني الى فعل تلك الفعله المشينه...............
ادري اني طولت عليكم بس حسيت بان هالقصه فيها فاايده كبيره جدا لنا
اتمنى لكم التوفيق
& فتى التحليه&
منقوووووووووووووول
العرض العادي
