انا الشاعر ولا همي ترى الإعلام والشاشه=انا لامن نويت القاف جت بالقاف جنـيــّـه
انا الشاعر يجيه القاف بعض الوقت بفراشه=انا من لا نواله قاف جاب القاف من نيــّــه
انا كم هو عدد وصفي وخير الوصف لي باشه=انا باشة شعر وصفي ولاني من حراميــّــه
اجيب القاف من راسي وقاف(ن) مابعد ناشه=من الشــعــّــار من ياصل يقول القاف ذا لــيــّــه
وهذا الوقت به ناس(ن) على ماقيل غشاشه= ولابه حد للـشــعــّــار انا سميه محميــّــه
طيور(ن) بالفلا طارت ولاهي يوم منحاشه=وحتى الصيد مابه صيد كل الصيد محصيــّــه
اقول القول كل شاعر يشيل الشوك منقاشه=انا ماني مخلي دام جبت العلم مخفيــّــه
انا واضح وضوح الشمس شاعر عارف(ن) جاشه=اعرف إن الثمن عندي وكل شي(ن) وله ديــّــه
انا ماديتي المليون انا شاعر زمن عاشه=على الكلمة على المعنى على قيفان مبنيــّــه
انا ما انبش على رزقي على الله دوم منباشه=رزقني خالقي والا ترى له حكمته فيــّــه
اقوله علم ياصلكم مسلسل طاش من طاشه؟=على الشاشات عدوله وكم مليون مجنيــّــه
ترانا فالزمن والله كما اللي شال رشاشه=يدورله على قيمه عساه يصير شخصيــّــه
تـِـشوفون الطيور اليوم بين الحر وخفــّــاشه=خفافيش(ن)تطير وطار حر الطير وحنديـــّــه
طيور(ن) طايره بالليل وطير الحر مغباشه=يطير وسارح الغبشه وصاد اليوم قمريــّــه
انا ماشيّ يرعبني ولالي نفس رعـّـاشه=انا ما خاف من ذولا ولا من ذي ومن ذيــّــه
انا ماهبش حقوق الغير ولالي نفس هباشه=ولاعيني تغظ الطرف لاجا الحق معميــّــه
انا مرضى ابيع القاف لهل الكاش وإن كاشه=شراني يوم انا بكتب ترى فالشعر مرثـيــّــه
اقول إن الشعر له لاش . وإني صاير(ن)لاشه=واشق الصدر من جنبي ليا جنبي بجنبيــّــه
واموت أحسن وأخير لي واعطي العيش عيــّــاشه=واخلــّــي للزمن شــعــّــار خلوا القاف مشريــّــه
يقشون القوافي قش وقت وفيه قشــّــاشه=يبيعون القوافي كان بانت يوم نقديــّــه
قوافي الشـِـعر نقراها وكن القاف حشاشه=مهاجمها نصا المرمى وشات القاف عرضيــّــه
انا وش هي سواتي غير اشق الثوب وقماشه= واعد من الخساير عد عدي جاوز الميـّـه
انا مابا اصير اللي رفع بالصوت وهواشه=سمع له كل من مره وله كل يوم هدّيــّــه
ربشني القاف انا شاعر وزادوا اليوم إرباشه= ربشني قافنا صاير على ماقيل حريــّــه
احوش الحق له دامي انا للحق حوّاشه=احوشه لجل تاصل له علوم القاف خطيـــّـــه
عـَـمـَـشـْـه وجاه في عينه وكل(ن) جاه معماشه= عيون(ن) لاقرت خطي تقول الخط برقيــّــه
ترى ذيب(ن)فرس عرشه حمى فرسه ومعراشه=وانا لاقلت لي قول(ن) مارد القول مثنيــّــه
اقول إن المطر وبله ترى ماعادل إرشاشه=وانا مثل السحابه غيث احب القاف مسقيـّـه
معاني الكلمات
ترى ذيب(ن) فرس >> فرس : بمعني فرس الفريسة
عرشه:من عـَـرَشَ > اي نـَـهـَـشَ اللحم والعظم
لاتصدقين
العرض العادي
