(!) قصة طريفة! لتلطيف جو.. الشعراء(!)

[الـعـاطفي]

اسعد الله اوقاتكم بكل خير..


وكل عام وانتم بخير


هذي قصة حقيقية


حدثت قبل سنين


هذا واحد سمع ابوه انه شاعر


فجلس معه ابوه


وقال: ياوليدي سمعت انك قصاد


وحنا مابنا قصاد


لكن زين اللي يطلع من عايلتنا قصاد!!


سمعنا ياوليدي


قال اسمع يايبه


ونتي ونة خلوج ٍ بالقيض عطشانه وتوَِلد..


ويا نعم ٍ لك بأخو سهية.. حطاط بالصحن راسين..


راس كبش.. وراس حايل.. معزىً كلهن ضواين؟؟


فطلع ابو الخيزرانه وكان شديد

قال والله ياوليدي حنا مابنا قصاد


لكن ما اذكر ان الناس كانت تضحك علينا؟؟


قم لعن الله ابو هالوجه!!

والله ان سمعت هالنكاثيات

انه ما يربح صدرك

وسحب عليه الخيزران

_________


انتهت القصة


فعلاً فيه ناس تقول من (هالنكاثيات)


ويعتقد فعلاً انها شعر موزون!!


معنى كلمة نكاثيات اي خرابيط


والنكوث هي قطع القماش البالي الخربان


يطلقونه الشعار على هذه الفئة


تحياتي واحترامي

[العـ راعي ـليا]

هذا طلع قصّاادٍ يهوّل

يالعاااطفي ...

يازين رد الشااايب عليه .

يعطيك العاااافي ولا هنت

دمت بوود

[خالد العلي]

الله لا يخيب لك رجا يالعاطفي

.
عز الله انك لطفت الجو


وافي

وعلمك غانم

[الـعـاطفي]

راع العليا

مايعتاز قصاد من نوع خاص

__________

خالد واياك يالغالي
__________


سعدت بحظوركم وشعوركم

تحياتي واحترامي واشواقي

[صدق النوايا]

العاطفي
الله يو فقك دنيا واخره
ومشكور على القصه
ونا من اول يوم قريت لك فيه
وشفت وجهك عرفت انك را عي قلب كبير
وعقل را جح
وشخصيه
يلتم حولها الجميع لا نك كبير والكبير الله
الله يعطيك العافيه

[الـعـاطفي]

يابعد روحي هالوجه


تسلم يالغالي


وانت كبير وشاعر حساس كمان


الله يعافيك يالغالي

تحياتي واحترامي واشواقي

[*+* مـهــآآآآجــرة *+*]

)*) العآآآطفي)*)

الله يوسع صدرك بالعآآآفية

قصة جميلة وطريفة

صح لسآآآنك وربي لا هآآآنك

بشوق لجديدك الرآآآئع

كل الشكر "

[الـعـاطفي]

هلا والله بالشاعرة مهاجرة

أنشالله دوم وساعة الصدر

لا والبارح حصل لبوش جلد بالنعول الله يكرمك

كثرت المواقف الطريفه بالعالم

تحياتي واحترامي

[فــهــد الشمـري]

قصه جميلة



بس ابوه الله يهداهـ حطم الولد على طول جاب الخيزران


عادي الواحد اول شيء لازم يجيب نكاثيات بعدين مع الوقت تضبط معه


بس المصيبه اللي يستمر على كذا


بس رد الوالد على ولده جامد


يعطيك العافية بندر وكثر لنا من هالقصص الجميلة

[الـعـاطفي]

بس هذا فضحهم يافهد


بكل مجلس يقول هالنكاثيات ومعتقد في نفسه انها فعلاً قصايد موزونه

وما ينفع فيه الا الخيزران من ابوهـ

وياكثرهم اللي كذا


دايم والله يافهد يشاوروني بنكاثياتهم وما امسك نفسي واضحك


فيزعلون بالبداية لكن في الاخير اعلمهم


حتى مايضحكون عليهم الناس


كان فيه واحد من اصدقائي



اقولك اسمه بعدين


كتب عندي نكاثية بالمجلس


يقول

قم ياحظي واترك عنك كل من داج!

قم ياحظي وخذ كل احتياطي؟؟

سابق ما ينفعك كثر التمنى في الزجاج


فرديت عليه انا بنكاثيه مثله



قلت قم ياحظ (فلان) لا تصير بارد تقل ثلاجة بوسطه دجاج



قم ياحظ فلان واترك اهل الإزعاج


قم ياحظ فلان الله يرزقك بالمزيونه المغناج


قم ياحظ فلان وخل المحبة لك منهاج


قم ياحظ فلان ولا يهمك شماتة بدوي راعي نعاج


اقصد فيها نفسي اني بدوي حتى مايزعل علينا


فلما ارسلتها له بالجوال

توقع وش قال؟؟


قال والله يابندر حلوه لكن اعتقد ينقصها الوزن



قلت اكيد ما راح اكون بقوة شعرك يافلان


في الاخير علمته ولا زعل مني قعد يضحك


وبدى يتعلم يلحن ويغني كل قصيدة يقولها


لذلك لا تقارن يافهودي البدايات بالنكاثيات


في بداياتنا كنا نستحي كثير من ان نعلم اي احد بقصايدنا


وكنا في بيئة قصايدها كلها موزونه يافهد

تصدق وتأمن بالله

لي حوالي 17 سنه وانا اكتب الشعر

ولا درى عني ابوي إلا قبل اشهر قليلة فقط

بالأضافه لأخوي الكبير


ماكنت اعلمهم ابد

بالرغم من انهم شعراء

كنت اقصد عليهم ولا اقولهم ان القصيدة لي


مشكور فهودي على المرور

تحياتي واحترامي