" جــــدهـ " ..
صحت من النوم على صوت الجوال ..
تثاوبت وردت وهي مغمضه عيونها : ايوووا ؟!
جاها صوته الي تعشقه : يالبى النايمين انا معليه ياقلبي ازعجتك ..
ميار فاقت وعدلت جلستها : اهلييين مجودي ..
امجد ابتسم : ياعيون مجودك انتي كيفك حياتي ؟!
ميار : تماام كيف انتا ؟
امجد : بخير ياقلبي .. غريبه نايمه دا الوقت توقعتك صاحيه ؟
ميار باستغراب : ليه الساعه كم ؟
امجد : 8 ياحلووه كل دا نوم ياحبي ؟
ميار : ههههههه والله راحت عليا نومه امس مانمت كويس وقلت اتمدد شويه ..
امجد : نومة العافيه ان شاء الله ..
ميار : الله يعافيك ..
امجد : وكيفها اختك دحين ؟
ميار بحزن : ماتحسنت على حالها ..
امجد : الله يقومها بالسلامه ان شاء الله لا تشيلي هم شده وتزول باذن الله ..
ميار ابتسمت : الله يسلمك ياقلبي ..
امجد : وهـ وهـ ياناس ( تنهد ) فديتك وفديت قلبك الطيب ياشيخه ..
ميار بخجل : تسلم ... تيب حبيبي انا بقوم اخدلي شاور واكل لي لقمه وارجع اكلمك ..
امجد : حمام الهنا ياروحي والف عافيه على قلبك ..
ميار : تسلملي يارب ..
امجد : يلا تيك كير اوووكي ..
ميار : ان شاء الله وانتا كمان ..
امجد : من عيوني .. باي ..
ميار : باي ..
سكرت منـه وابتسمت بحلم >> آآهـ ياقلبي خلاص مني قادره اصبر اموووت فيه << ..
دخلت للإتوآليت " وانتو بكرآمه " واخدتلها شاور ونزلت تتعشا ..
دخلت للصآله ومآلقت إلآ سآمي متمدد ع الكنبه ويتفرج ع التي في ..
ميار : مساء الخير ..
سامي ابتسم : مساء النوور.. مابغيتي تقومي ؟
ميار جلست جنبه : هههه راحت عليا نومه .. كيفك ؟
سامي ابتسم غصب عنه : بخير ..
ميار ربتت على كتفه : لا تشيل هم ياسامي قريب ربي بيفرجهاا ..
سامي تنهد : اااهـ بس لو اعرف ليه مها سوت كدا .. ايش الي كان جابرها على طريق الحرام واحنا مو مقصرين معاها في حاجه ليه حطت راسنا بالتراب آآآآهـ بس لو اشوفها راح اذبحها بيديني ..
ميار : لا تقول ياسامي مهما كان هادي اختك وكل انسان يغلط وهيا صغيره وماتعرف عن الدنيا شي اكيد صاحبات السوء دلوها لدا الطريق الي كانت غافله عنو .. انتبه ياسامي لا تسوي شي قبل لا تعرف اسبابو وتدرسو مزبوط .. لا تضيع اختك من يدك على غلطه لو كانت كبيره بس بجهل او بفضول منها لتجربة هالشي .. والغلط قبل مايكون فيها يرجعلنا بالبدايه .. من فين كانت تجيب الفلوس ؟ كيف كانت تطلع وتجي ومحد سآئل عنها ؟ محد لاحظ عليها دا الشي الا لمن اخدناها للمستشفى .. غلطتنا ياسامي قبل لا تكون غلطتها محد اهتم فيها ولا فتحلها قلبو ووجهها للطريق الصح وحذرها من شياطين الانس الي وصلوها للي هيا فيه ..
سامي ابتسم وحس بالراحه من كلام اخته : الله يسهل ..
ميار ابتسمت : فين ماما ؟
سامي : ماتعرفيها يعني من صار الي صار وهيا في غرفتها وماتبغه تشوف احد ..
ميار : لا حول ولا قوة الا بالله .. ربي كريم ..
سامي : ونعم بالله ..
ميار بتردد : اولاد عمي يدروا بلي سار ؟
سامي : لاااا واصحك تقوليلهم فاهمه .. نشمت خلق الله فينا وبالذات عيال عمي الي يستنوا الزله مننا عشان يمسكوها علينا ..
ميار : طيب..
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;; ;;;;;;;
في بيت " فـــرح " ..
دخلت لغرفة اختها مبتسمه وتحس براحه غريبه : فجوره
فجر طلعت من الاتواليت " وانتو بكرامه " : هلااا
فرح قعدت ع السرير : اقوولك .. انتي جيه معانا ؟
فجر ابتسمت : فين ؟
فرح استغربت : المانيا ؟
فجر : ايوا ان شاء الله بس بزبط اشغالي وارتب اموري الكم يوم دي وجايه معاكم اكيد ..
فرح : الحمد الله على بالي بتقعدي هنا زي كل مره ..
فجر : هههههههههه انتي عارفه الشركه ومشاغلها بس دي المره حابه اغير جو وان شاء الله الشغل بيمشي تمام ماعليه ..
فرح بينها وبين نفسها >> الشباب طول بعرض.. والبنت الي ماسكه شركتهم وحلالهم والله اخر زمن << ..
فجر : وفتوشه ؟
فرح هزت راسها : والله مادري عنها دي البنت مره غريبه ..
فجر : الله يهديها كل مالها بتبعد عننا ولا حتى لها حس بالبيت ..
فرح >> وانا الي بعرف ايش الي فيها بالضبط ..؟! << ..
وفي غرفه أخرى ..
جآلس ع السرير وقدامه اللاب توب ..
باله مشغول في دراسته والشركه وحياته ..
يحس انه مو قادر يستمتع بطعم الدنيا او يعيشها زي أي انسان تاني ؟!
مع انه كل شي متوفرله .. وطموحه بدأ يحققه وتعدى اول خطوه ..
ومستقبله مضمون ..
كل شي مهيء له .. بس قلبــــــه هو الي واجعه ؟!
** في نفسه **
اش مشكلتك ياقلب ؟!
ليه شايل هـم كبير انتا مو قدهـ ؟!
ليه تحس بضيقه وخنقه ووحدهـ ..
يمكن اكبر همومك انه ماعندك هـــم ؟!
آآآهـ يارب طفشت من حياة الدراسه والشغل والاصحاب .. ابغه شي جديد ابغه اعيش حياه تانيه
حيآه أحلى من الي انا عايشها بكثير ..
بس كيف ومتى ومع ميــن ؟!
تعب من التفكير وسكر اللاب توب وطلع للبلكونه يغير جوو ..
الجو كان رطب بس فيه هوآء ..
جلس ع الكرسي وولع سيجارته ..
بس وصل لإذنه صوت مو غريب عليه ابدااا ..
صوت وحده من اخواته ..
وقف وقرب من حافة البلكونه عشان يسمع كويس ..
<><><><>
حبيبي خلاص احنا اتفقنا صح ولا لاء ؟!
لاء ماليا صلاح انتا وعدتني وبعدين تفاهمنا على كل حاجه ليه تحب تعيد وتزيد ؟!
من جد ؟؟
ياعمري الله لا يحرمني منك والله امووووووت فيك ..
ان شاء الله من عيوني اصلا باقيلي كم صفحه واخلص ..
تسسلملي بس اخلص حأكلمك اوكي ..
يلا باي ..
<><><><>
<><><><>
وقف شويه مصدوم يحاول يستوعب الي سمعه ..
ويميز الصوت ..
فاتنه ؟! كيف مستحيل ايش بتسوي ومين دا الي تكلمو ؟!
فاتنه الهاديه الرقيقه الي مالها حس يطلع منها دا الشي ..
اخد نفس وهوا يشد قبضة يده بقووهـ يحاول يمسك اعصاابه ..
>> لا يافهد مو دحين لا تسويها .. لا تكلمها دي الفتره .. وقت اختبارات ولا تشتت تركيزها وتضيع دراستها ..
هيـن يافاتنه انتي بس خلصي اختباراتك وحسابك معايا مالو اااخـر .. <<
زادت الضيقه والطفش الي يحس فيه .. جو البيت كتمه ويضايق وزياده على كدا اختـه الي تكلم من وراهم ..
الي كان متوقعها اهدأ واعقل وحده من اخواته يطلع منها كدا ؟!
>> بس هين قاعد على قلبك ونشوف اخرتها ومين يطلع الزفت الي تكلميه << ..
تأفف وطلع من الغرفه ..
::
وفي غرفه ثآنيه من البيـت ..
>> انا ليه رافض فكرة زواجي من ملاك ؟!
بنت كامله والكمال لله ويكفي اني اعرف اخلاقها كويس ؟!
بس فيه شي في قلبي رافضها يمكن لاني احسها زي اختي ؟!
ولا عشاني مجبور عليها ؟!
والله ماني عارف ايش اسوي ولا كيف اوقف بوجه امي ..
والله ماقدر ازعلها بس هيا الله يهديها تحب تمشي كل شي بكيفها ..
يارب خيرتك .. <<
طلع من الغرفه بعد ماغير ملابسـه ..
سكر الباب وابتسم لمن شاف اخوهـ واقف عند الاصنصير بس مبين عليه العصبيه والضيقه ..
فراس : هلا والله ..
فهد لف لناحية الصوت وابتسم على خفيف : هلا فيك ..
فراس قرب لعنده : اشوفك لابس طالع مكان ؟
فهد : ايوا طفشان وجو البيت يجيب الهم .. تطلع معايا ؟
فراس ابتسم : قداااام ..
****************************
العرض العادي
