ذبحتونا ياشركة الإحتيالات ... قصدي الإتصــــــلات ؟؟؟؟؟؟

[فارس بلا جواد]

ALIGN=CENTER]

كل عام وأنتم بألف ألف خير وعساكم من عواده أعاده الله علينا وعليكم وعلى الأمة الإسلامية في حال أحسن من هذا الحال . آمين يارب العالمين .

[/ALIGN]


وبعد التهنئة سمحوا لي أدخل بالموضوع .... أعتقد إن الكل عانا من

الإتصال عن طريق الجوال خلال اليومين الماضيين .. والسبب مايخفى

عليكم طبعاً .... الجشع والطمع الذي تتسم به شركة الأحتيالات ..

آسف قصدي الأتصالات من حلال طرح بطاقات سوا واللي ببركاتها

مابقى سرلانكي ولا باكستاني مارز الجوال وخذ ياقرقر وانا ماعندي

أعتراض على هالموضوع خل الجماعة يوسعون صدورهم ويكشخون بس

اللي قاهرني قيام الإتصالات بطرح هذي البطاقات وتصريف مئات الآلآف

من هذي البطاقات بدون توسعة للشبكة العاملة أو بتوسعة محدودة

لاتفي بالأعداد الضحمة والمتزايدة لا والمصيبة التخفيض الجديد اللي

عاملته الشركة خلوه بميه .. بمية .. ( واحسافة الثلاثة الآلآف

وخمسمية واللي بينقهر أكثر أبو عشرة الآلآف ) يعني بيوصل عدد

المشتركين إلى أكثر من عشرين مليون .. يعني أكثرمن سكان

المملكة .. يعني قابلني كان لقيت خط وإذا ماحولتوه بيجر انا وياكم ..

وأرجع واقول انا ماني ضد التخفيض بالعكس لكت ضد التحفيض إذا

بيكون على حساب الخدمة وهذا اللي قاعدة تسوية شركة الإحتيالات

وماني بمغيرها هالمرة .. والدليل عدم قيامها بتخفيض قيمة الإشتراك

الشهري من أسس الجوال ... وانا اتكلم بقهر لإني فعلاً عانيت كثير كثير

من إنقطاع الخدمة خلال اليومين اللي راحوا .. وعساها ماتطول ..

آسف .. سندرتكم ..

[طبيبة العشاق]

يآآآآآآآآآآآخي حتى أنا أعاني من هالفواتير والرسوم ..

بس وش نسوي ؟؟؟؟؟؟؟

آخرتها ، طحت لي في <<<<< سواااا >>>>>

مثل السيريلانكيين والباكستانيين اللي تقول عنهم ..

علشان علي <<<< مديونيه 4000 ريال >>>>

وبصراحة مليت وأنا أسدد في هالفواتير ..

لو أني بدال ما أسدد فيهم شاريه لي فله ولاّ أرض ولاّ شقة تمليك

في لبنان ، أصرف لي ..

والحين رايحه جايه رايحه جايه أشوف لي صرفه علشان هالفاتوره اللي تقص الظهر ..

وعساني أقدر أسددها بعد ..

والمشكله هنا :

أن جوالي المفصول بأسمــــــــــ( قـمّـة القـلـق )ـــــــــــــــي ..

أقــــــــــــــــــــــــــــــــــول بس :

أعضاء المنتدى أخوان وحبايب صح ؟؟؟؟؟؟؟؟؟؟؟؟؟؟

يعني ما يمنع أنكم ( تتقاطون ) وتسددون فاتورتي ..(وحده تلمح) ..

أهئ أهئ أهئ أهئ
*8 *8 *r *8 *8 *r *8 *8

[فارس بلا جواد]

ياطبيبة العشاق .. تحياتي ( المفلسة ) لك ..

بحصوص فواتيرك حلها في يدك .. خففي الهذره شوي وتخف فواتيرك .. ولا كان على القطة .. ( خويك أضمخ ) ..

دعابة لاتزعلين .. وبشري بالخير .

[عابرة سبيل]

بصراحه اخوي فارس عندك حق شئ يقهر خاصه في العيد ما قدرنا نحصل خط ونعايد علي اهلنا خارج المملكه والمشكله الرسوم علي ايش رسوم المفروض علي قد الخدمات نقدم الرسوم لكن شنهو نقول غير حكم القوي علي الضعيف ويعطيك العافيه
خليت الواحد يعبر عن شئ فعلا يقهر

اختك / عابرة سبيل

[فارس بلا جواد]

لاشكر على واجب ياعابرة .. فكلنا في القهر سوى .. الله لايقهرنا ولا أياكم ..

تحياتي ..

[مجموعةانسان]

والله ان معك حق اخوي فارس بلا جواد والي يقهرك زياده انهم يمدحون عمارهم في الجرايد والمجلات وهم عارفين انفسهم انهم مااحد منا راضي فيهم بس حدث ولاحرج
الحاجه تسوي كل شي


ومشكور على طرحك للموضوع

[فارس بلا جواد]

العفو يالغالي ... هذي مأساتناجميعاً
تحياتي ....

[طبيبة العشاق]

أقول بس : بلا حكي ما له طعم ولا فايده ..

الإتصالات يبي من يسوي عليهم حمله قوييييييه ويوقفهم عند حدهم ..

المهم بس لا تضيعون الموضوع ..

هــــــــــاه ؟؟ على كم [الـقـطــّـه] ؟؟؟؟

لحظه خلونا نحسبها ...................................

لو كل واحد من أعضاء المنتدى ( قط ) بــمية ريال بس ،

صدقوني راح تكفي بالرااااااحه أنها تسدد فاتورتي ،

بس الله الله بالزياده ..

ترى أنتم كريميــــــــــــــــــــن .. وأنا أستاهــــــــــــــل ..


أهئ أهئ أهئ أهئ أهئ على فاتورتي

وإسمي اللي صار في القائمه السوداااااااء *a *r *a *r *a *r

[فارس بلا جواد]

ياطبيبة العشاق ... ( داوي روحك قبل ) ...

انتي ودك تسددي فاتورتك ولا ناويا تسددين ديونك وتأمنين مستقبلك ..

لإن بحسبة بسيطة لو قط لك كل عضو بالمنتدى ((( لو .. لو ))) مية

ريال من ثلاثة آلاف وسبعمية عضو بيطلع تدرين كم ؟؟؟ بيطلع لك يابنت

الناس ثلاثمية وسبعين ألف ريال ... ها .. علينا ... تسوين روحك

ماتدرين .... بعد لو قايلة من عشرة ريال كان تحمسوا الجماعة لكن عيد

وعقب رمضان وعيد جاي في الطريق وتبين أمية ريال .. غني .. غني ..

ماطولك ياليل .............................ماطولك ياليل .........

*t *r *a

[متأمل]

السلام عليكم ورحمة الله وبركاته
الحقيقة أنا أبشارك بها الموضوع من القهر اللي مر بي ..
في ليلة العيد المسألة ماهي معايدة أو اتصال لسلام أو غيره
المسألة إني اشتريت بضاعة من مدينة غير مدينتنا واستأجرت سيارة كبيرة تشيل هذه البضاعة ( طبعا البضاعة شيء خاص لا يروح بالكم بعيد )
المهم
اتفقنا على الجوال .. وصاحب السيارة باكستاني معه جوال يستقبل ولايرسل

ويوم وصل مدينتنا وأنا انتظره بفارغ الصبر .. دقيت عليه ورد علي وقال إنه وصل لكن ما يعرف وين الطريق قلت له خلاص أنا أريد أن أصلي العشاء ثم اتصل عليك علشان نتواعد في مكان معين ( أو مربع )

المهم صلينا ولعل الشبكة أصابها ما أصابها والناس ماصدقت إنه عيد إلا خذ مكالمات .... والله أعلم إن الشياطين المصفدة بعدما انطلقت تكلم بعد على هالزحمة ،،،،،،
وأنا أحاول أتصل عليه لكن دون فائدة ولا جدوى ..
المهم أنا أصابني إحباط وبديت أدور في شوارع المدينة ( مدينة لكن غير منورة ) بحثا عن تلك السيارة
وفي يدي اليمنى الدركسون وفي اليسرى الجوال ..
وعين على اليمين وعين على اليسار عاد لاتصدقون ( أخاف تقولون حول )
المهم مضت الساعات ولم أستطع إلا بعد مدة طويلة وسبحان الله مكالمة مني لم أستطع إلا أن أكلمه إلا ثواني وانقطع الخط لكن بفضل الله قال كلمة بأنه عند المحل الفلاني ثم أتيته فوجدت المسكين رافعا يديه فرحا بقدومي
كل ذلك حتى يرجع ذلك المسكين إلى المدينة التي أتى منها // قبل الفجر ..
فهل شكرة الاتصالات الموقرة تتحمل جزءا من المشاكل التي تحدث ..؟؟؟؟
طبعا مشكلتي قد تكون بسيطة أمام مشاكل المرضى أو النساء الذين يريدون أن يتصلو بذويهم ولم يستطيعوا تلك الليلة والتي بعدها والتي بعدها أيضا ...

لكن كما سمعت من أحد زملائي أن الناس لو أقاموا دعوة أو احتجاج لكان من صالحهم لكن إيش هي التعويضات!!!!!!..
الآن شركة الاتصالات تأخذ رسم يومي على خدمة الجوال قدره ريالين .. فكم ريال ضاع على المشتركين عموما في تلك الأيام ؟
لكن حسبنا الله ونعم الوكيل ...
والحمد لله أولا وآخرا

وشكرا على أخينا فارس بلا جواد على طرح الموضوع ،،،على الأقل لنفضفض قليلا


وعيد سعيد ... وكل عام وشركة الاتصالات ........ <<<< أكمل الفراغ السابق