هب النسيم بزين ريح التباشير
وراه غيمن يكحله نور براق
صوت الرعد كنه ينادي على الطير
غداق وبل القطر ياطير غداق
غشا السما زبره حراويه عصير
حقوق من كف المخاييل تنساق
الغيم مكنونه يبيحه شخاتير
رحمة جليل الملك قسام الارزاق
اسيول من روس المراقب مسايير
رحبها قاعن كواها التشفاق
ومزون تنكف ساعه وساعه تغير
تفيض مدتها بلا هدم واغراق
من كثر ما هلت على الارض بالخير
فز النبات يعانق المزنه عناق
صوره تكفي العين عن كل تصوير
ترضي بروعتها صعيبين الاذواق
وش عاد باقي يابعيد النفاكير
جو المدينه ماهو اليوم منطاق
ودي اسوق الرجل في الارض واسير
القلب له عامن من الهم ما راق
لاجيت لي رقه زهرها نواوير
داعب خجلها حسن من نور الاشراق
صوت ام سالم للوناسه تعابير
والارض لبست ثوب من خضر الاوراق
ماداجها خاطي السلف والمظاهير
يدوجها من للمكاشيت تواق
انزل بها والقى معزه وتقدير
تحشم خفوقي من غثاء هم بواق
ساعه بها تسوى الذهب والدنانير
انا وفرشي والمعاميل ورواق
شبيت ضوي ثم حبكت المباهير
وعدلت راسي والفكر للشعر راق
وذكرت خلي الله يذكره بالخير
قرة عيون الحب وانظار الاشواق
اللي بعيني عن جميع البشر غير
بحسنه ووصفه وذوقه والاخلاق
ليته معي ننهج بالاحلام ونطير
في جو عشقن ماله حدود واافاق
نوطا على روس العنا والمعاذير
ونرمي ورانا صد والام وافراق
تضحك امانينا بحسن المقادير
شهد الفرح من كاسه العذب ينذاق
يدري بان جيته رووح التباشير
غيثه فرح قلبي وطلته براق
العرض العادي
