قصه تجنن
قبل امس جيت ابروح للمسجد اصلي العصر الا وينط ولدي خالد ( 4 سنوات ) يقول ابجي معك اصلي ..
قلت يابن الحلال فكنا من خبالك في المسجد
اخر مرة وديته معي وحنا في الركعة الثانية سجدنا الا ويقوم الورع يدعس على شماغ الي ورانا .. والضعيف ذاك يرفع من السجود وحالته حالة طاقية طايحة وراه وشماغ داعس عليه هالبزر لا وخربها زود ... اخذ عقاله ونطله على اللي في الصف الاول ..
بيني وبينكم بغيت اخذه وننحاش من المسجد لاني يوم سلمت اكتشفت ان الرجال الي كان يبهذل فيه هو راعي البيت الي انا مستاجر منه ومتأخر عليه في الايجار
عاد قلت له وقتها يالله يابابا البس اباخذك معي تصلي ..
شوي الا وتنط بنتي ملاك ( 3 سنوات ) تقول : وانا ابلبس واجي معكم
قلت لها : لايابابا المسجد بس يروحوا له الرجال
قالت : انا رجال
قلت لها : لا انتي حرمة
قالت : لا ماابغى .. انا رجال
المهم شيل وحط والبنت تصيح والا تبي تصير رجال ..
وفعلا اخذتها للمسجد وعلى حظي جيت في الصف الاول وراء الامام لانها صلاة عصر ويالله مسجدنا يكمل صف واحد في هالوقت ..
طبعا كبر الامام وانا ادعي ربي ان عيالي مايسوون شي ..
عدت الركعة الاولى ..
شوي الا خالد يسولف لملاك يقول لها : طفي اللمبة
انا مافهمت وش يقصدون ؟؟
شوي واحنا ساجدين الا اسمع صوت الامام يرفع من السجود بصوت ضعيف يالله نسمعه ..
قمنا الا مفاجأة ...
بنتي ملاك طفت الزر الي فيه الميكرفون
وفهمت وش كانوا يقصدون باللمبة ... اثرها لمبة الميكرفون حق الامام ..
طبعا الامام دف يده وشغل الزر حق الميكرفون ..
وشوي الا خالد يطقها سوالف لملاك بصوت عالي ويقول : انا اسوي زي كراش..
ويضرب برجله الي جنبه يصلي
( طبعا كراش لعبة اطفال على البلاي ستيشن 2 )
وشوي الا ملاك تروح وتجيب لها كتاب محطوط جنب الامام وتجلس كنها تتصفح مجلة ..
ويالله خلصت الصلاة ...
ومن يومها الامام يقول لي : ورى ماتجيب امهم معكم بالمرة
طبعا من يومها وانا ابحث وابحث حول الطرق المهمة للتعامل مع الاطفال دون ان تترك فيهم اي اثر او عقد نفسية ...
مثلا ..
بنتي ملاك تبي تكون رجال .. لانها تشوف اخوها خالد وعيال عمها وعيال عمتها وغالب الي حولها عيال ...
ودايم تشوف كيف يتفاخرون انهم رجال ..
وان هاللعبة للرجال والكورة للرجال ومن هالسوالف ...
فصارت تصدقون اذا احد قال لها انتي بنت تصيح ...
اودي خالد اخوها للحلاق اقص شعره .. تقول انها بعد تبي تقص شعرها ..
تقول لها انتي بنت .... تقلبها صياح وتصمم : انا رجال
حتى الملابس اذا راحت مع امها للسوق ماتبي بلوزة وتنورة والا فساتين ..
تبي ملابس ولادية ..
تبي برمودا ..
تبي فنيلة الاتحاد
والله ياعالم حتى العابها ..
تبي سيارات ,, كورة
لكن عروسة او من هالامور ماتبيها
ومرة موديهم لدكتور اسنان اكشف على اسنانهم ...
واسولف مع الدكتور وعطاني فكرة حلوة ..
قال : مشكلتكم انكم خلقتوا جو في البيت خلى الولد هو الافضل ..
هو الاقوى ..
هو الذي له كل شي ..
وهو المصرح له بمرافقة الاب والخروج متى ماشاء ...
وقال لي ..
حاول تعدد مزايا البنت او الحرمة ..
وبتلقاها اقتنعت ..
وفعلا ...
شرت لها امها سجادة وجلال صلاة صغيرة وصارت تقول لها : من يصلي معي واوديه السوق ؟؟
تنط ملاك فورا ..
وصارت ماتبي ولا عد تفكر في المسجد او الروحة معي ..
ثم بدت مشكلة الالعاب تنحل ..
لان امها يوم ودتها معها لبيت اختها وورتها كيف البنات عندهم عرايس والعاب الطبخ ونجحت الفكرة ..
ملاك تغير العابها الى بناتية ..
وحتى ملابسها تغيرت ..
واصبحت امها ايضا تطلب من كل من حولها ان يثنوا على البنت ..
وفعلا ملاك اخيرا ..
تفتخر انها بنت ..
اجتمعنا انا وامها ...
وحسينا بالانتصار ...
وقررنا ..
لازم اخذ هدية بسيطة لهالدكتور الي اعطاني هالنصيحة ..
وفعلا يستاهل ...
شريت الهدية ...
ولبست ..
وقلت لخالد وملاك غيروا ثيابكم وتعالوا معي ...
جت ملاك لابسة فستانها الحلو ..
شوي ...
الا خالد ولدي وصل ..
ولكن ..........
كان مختلف ....
كان لابس تنورة من ملابس ملاك
!!!!!!!!
قلت له : افا .. ليش كذا ...
هذا وانت رجال وانت تر....
بدا يصيح وقال : لا لا ... انا حرمة
حاولت فيه : الا يقول حرمة
وشوي الا ويتضارب هو وملاك ...
هي تقول انا حرمة لحالي ..
وهومصمم انه حرمة معها ..
اخذت الهدية الي كنت ابوديها للدكتور ..
فتحت الباب ..
لقيت عامل نظافة ينظف جنب الباب ..
قلت له : صديق خذ هذه ..
استغرب ..
قلت له : انتبه تجيب ولد وبنت في عمر متقارب ..
نصيحة !!
العرض العادي
