انا عضو جديد واسمي شمس الشمال (( ندري مكتوب هنااااك ..غير هالحتسي شعندك)) ومدام اني جديد حبيت اول موضوع يكون مجرد تعارف (( الا قل ماعندك سالفه )) صدقوني انا حبيت هالنتدى (( قلبها غزل )) انا جاي من هبايب الشمال النديه حايل بعد حيي وميتي وطوايف اهلي (( زبدة الهرج.. خش بالموضوع ))
هذا سلمكم الله يومني وغد يعني ولد صغير بلهجتنا مو يعني سافل المهم كنت متميز بالحاره واكثر شي يميزني اني احسن لاعب كوره
وكانو يلقبوني بالضب (( الا قل يعيرونك )) واذكر مره من المرات صار دوري بالحاره وشاركنا فيها وفزنا كل مبارياتنا لين وصلنا دور الاربعه اللي لازم نقابل فريق الحاره اللي ورانا وكنا دايم خناقات معاهم ومشاكل
المهم قبل المباره الحساسه استعدينا تدريبات ولياقه وزحمه ويوم المباراه تعال وشف الجماهير شلون مكتضه ((من وين سارق الكلمه))
واذكر من حساسية المباراه حتى فليحان كان حاضر وفليحان هذا واحد ماله بالكوره لو تساله منو ماجد عبدالله قالك اخو عبدالمجيد عبدالله
المهم بدت المباراه وكان طقمنا فنايل النصر القديمه من تحت الثوب طبعا ((من البرد))وطقمهم فنايل علاقي وسراويل سنه (( من الحر)) والجمهور يصفق ويشجع ويوم جتني الكوره الجماهير قامت تشجعني ومن زود الحماس شت الكوره اقوى ماعندي ابيها للقول الا الكوره
ماتحركت من مكانه وذاك الصوت طوووووووب الا الكوره منفقعه .. ساعتها قمت اطالع للجماهير الا واحد جايني ابتسمت له احسبه واحد من المعجبين وماامداني اكمل ابتسامتي وعينك ماتشوف الا النور قمت
اشوف الملعب فوق والسما تحت ورفس وطراقات والعالم يتفرجون صرت بغيبوبه خمس ساعات عاد عقبها عرفت انه ابو سعد منظم الدوره زعلان اني فقعت كورتهم ... ابو سعد قرر اننا خسرانين 2-0 لاننا فقعنا
الكوره .. رحناله نترجاه يابو سعد تكفى مايصير كذا تراك ظلمتنا .. قال ولكم وجه بعد قلنا عد المباراه قال ماتنعاد الا تجيبون عشرين ريال حق
الكوره .. رحنا لبيت خويلد خوينا نتشاور .. المشكله لو نجمع فلوسنا وفلوس ابوسعد وفلوس الحاره اللي ورانا وااللي وراهم واللي وراهم ..الخ ..ماكملنا خمسطعش ريال ..
خطرت فكره لسعودوه .. انا يوم رجدني ابوسعد انجرح اصبع رجلي وطلع
دم ... رحنا لبوسعد ..قال ابو سعد خير وش عندكم؟؟ جبتو العشرين؟؟ قال خويلد لا ؟؟ قال ابوسعد اجل وش جايبكم ؟؟ قال خويلد جينا نحتج
؟؟قال وش عليه؟؟ قال خويلد على كورتكم .. مهي قانونيه .. شوف وش سوت باصبع لاعبنا طلعت دمه ..مديت رجلي لبو سعد اوريه....تغير وجهه وهز راسه وقال اردلكم خبر بكرا...
رحنا الحاره ومن بكرا الا هذا بو سعد يقول يالربع مباراتكم بعد بكرا عدناها وقبلنا احتجاجكم ...قمنا نتدرب ونستعد ..الفريق الثاني انقهرو
وراحو لبو سعد يحتجون لان واحد من فريقهم يقول ان الكوره قانونيه و انه شايف ابو سعد يتفخ الكوره في بنشر المزرعه .. وبنشر المزرعه هذا
احسن بنشر ...جانا ابو سعد قال بكرا اجتماع ... رحنا للاجتماع بالبراحه اللي قدام بوفية سعيدان قال ابوسعد يالربع الكوره انفقعت
وصعب نعرف قانونيتها ...ومحادثات ومشاورات اخر شي اتفقنا على اننا نجري سباق ركض بين واحد مننا وواحد منهم والفايز يتاهل ويفوز
بالمباراه والسباق من حارتنا لين حارتهم .. وافقنا بس طحنا بمشكله ..ربعنا بطيئين وماحولك احد بالركض يعني دجينا ..قلنا مالنا الا
نجيب الهندي شاهين على انه من عيال الحاره ومحد يدري وهذا يشتغل بدكان بحارتنا ومشهور بسرعته كانو يسرقون من دكانه عصير
وعسكريم ويتركهم لين يروحون ثم يقفل دكانه ويرمي نعوله عند الدكان وخذ ركض لين يتلهم قبل ماياصلون لبيوتهم المهم جبنا شاهين ولبسناه
ثوب ((ماكنا نعترف بشي اسمه بدلة رياضه)) وطاقية ام جنيه وشرابات واحد ازرق واحد اخضر مقطع وسميناه ((عبدالسلام)) يعني مرقعين السالفه)) المهم بدا السباق ومايحتاج شاهين فاز وبفارق كبيييير ..
رحنا لعبنا النهائي وفزنا بالكاس واهدينا الكاس لشاهين واذكر كلمته يوم اهديناه الكاس ((انا في يهدي هذا كاس مال ماما ومال بابا ومال
جمهور نفرات مال هاره)) وعطاك ابتسامه وخذ تصوير وعلقنا صورته بارشيف الحاره ....
واذكر من سوالفي قبل كنت شويييت يعني شوتاتي قويه وكان فيه دوري داخل المدرسه وشاركت بمباراه بالدوري ضد فريق صف رابع جيم
وجتني الكوره وشت اقوى ماعندي على القول اللي ماكان فيه شبك مادريت الا هي لاصقه بخشم مدرس العلوم ..النظاره يمين وهو يسار
المهم اسعفوه وقام بالسلامه بعد اسبوع بس حقد علي وسقطني بالرابع ثلاث سنوات لين جبت له حمدان واحد من ربعي جسم ماشالله عليه ومايخاف من احد دخلت الصف واشرت على المدرس قلت لحمدان هذاك هو ... مايمدي المصري يقول عاوز اييييه الا سبعطعش سن طايحين ونظارته الطبيه ومايمديه يدنق بيجيب النظاره الا خشمه ونعوله والنظاره جنب بعض وضرب وبقوس وطراقات لين تركناه يقول وهو يبكي
حينننننجججحححح حنجحووووووووووووه حنجحووووووووه ..
واذكر كنا نلعب بالحاره كوره واشوتلك الكوره وتصدم بالعارضه الخشب وتطيح العارضه على موتر ابو سليمان جارنا كان ددسن 77 شبك وبالحوض عنز وتيس .. العنز انفلقت والتيس صابه شلل ونصفي والموتر انعدم وابوسليمان انهبل ...طبعا تبون تعرفون وش سويت يوم عرف ابوسليمان اني انا السبب؟؟؟؟؟
ابد انحشت لحاره ثانيه وسكنت ببيت مهجور وصرت لاجئ عند هكالحاره وارسلت واحد منهم واحد ينادي اهلي عشان نسكن بحارتهم .. جو اهلي واستاجرنا بيت وسكنا وليومك هذا وابوسليمان يدور المسكين ....
ارجو اني ماكون مغطتكم بهالسالفه بس تكفون داخلن على الله ثم عليكم لحد يعلم ابوسليمان اني هنا
اخوكم
شمس الشمال
العرض العادي
