عقب ما أقفت أيامك حبيبي قول وش خلّت؟!
طوتني و أنكرت ذكراي.. خذت من عمري ونالت
..
أنا تخنقني دموعي على ذكراك لا هلّت
عساي أصبر على همّي إذا ما غيبتك طالت
..
عروق الحب من عقبك إلى هاليوم ما بلّت
جروحي لا حكت ليتك تصدّق كل ما قالت
..
تروح و ترجع طيوفك على ليلي و لا ملّت
فلا هي باللي تواسي ولا هي باللي تعالت
..
تحسب أشواقي ف بعدك مع كثر الجفا قلّت
و أنا أشوفها تزداد في قلبي و لا زالت
..
حبيبي كان عالفرقى ياليت المشكلة انحلّت !
أنا مشكلتي أكبر من ظروف بيننا حالت
..
تلوم أفعالي و تدري .. على كثر الغلا دلّت
و ليته تشفع لقلبي دموع العين لو سالت
..
مع حبك عرفت انه خلايا عقلي انشلّت
ظنوني فيك خانتني .. و على أوهامي احتالت
..
سعت بجيوشها فيني غزت دنياي و احتلّت
كثير هموم و آلامٍ على أيامي توالت
..
خذاني الخوف كم مرة و روح آمالي انسلّت
تملكني الأسى فيها و أمور الحكم له آلت
..
أباد أحلامي لآخرها و جيوشه فيني تسلّت
خذت يا كم وكم جرحت وكم في قلبي اغتالت
..
جروح أشوفها تبرى مع الأيام لا ولّت
و جرحك ممتحن قلبي و شمس الضيم ما مالت
..
طلبتك تغفر لحبّي .. و لو بي خطوته زلّت
كثر ما حطت أشواقي بقلبي وكثر ما شالت
العرض العادي
