18-04-2009, 01:11 AM
|
رقم المشاركة : 11
|
|
( ود جديد )
|
سوري ارسلت المقطع مرتين اعتذر
|
|
|
|
|
19-04-2009, 12:39 AM
|
رقم المشاركة : 12
|
|
( ود جديد )
|
|
|
|
|
|
21-04-2009, 01:31 AM
|
رقم المشاركة : 13
|
|
( ود جديد )
|
طلعت النتايج بالجرايد : طلع اسم الهنوف والجازي وسهى ومنال , طبعا كانت النتائج عبارة عن اسماء ناجحات فقط بدون تقدير او نسبة , وراحوا يستلمون الملفات , كانت الجازي تتمنى تشوف هشام لأخر مرة , لانها خلاص تخرجت وماعاد راح ترجع المدرسة , لكن الغرفة كانت مسكرة ومااحد عندها , نجحت الجازي بتقدير ممتاز نسبة 93 , الهنوف جيدجدا 84 , سهى ومنال ماشاء الله طقم 81 , بعد اسبوع راح يكون التقديم على الكلية , خلال الأسبوع هذا, ابو الجازي قرر يسافر أمريكا , القرار كان مفاجئ قال لهم ان الشغل راح يبعثه ست شهور ويرجع , لكن السبب الحقيقي كان !!!
في بيت أسماء :
ماجد : مبروووك جوجو والله طلعتي دافورة
الجازي : لا نزلت كثير الترم الاول جبت 97 راح مني كثير لان اختبار الرياضيات والكيمياء زفت فيه
أسماء : والله رفعتي راسنا , مو حظي , اخ بس , ترى ابوك قال مافي واسطات ان قبلوك الكلية ولا اجلسي بالبيت
الهنوف : لاااااا مالي شغل فيه , وبعدين سمعتي جوجو تقولك الرياضيات والكيمياء كانوا صعبين هم الي خسفوا بدرجاتي , شوفي الانجليزي وش جايبه فيه ناقصه خمس درجات بس
اسماء : هذا الي فالحه فيه انتي بس
جاسم : يناظر بكل شوق ولهفه ل الجازي ويقول مبروك جوجو تستاهلين كل خير
الجازي : بنظرات باردة وخاليه من أي احساس او مشاعر , الله يبارك فيك
دخلت اسماء واريج الغرفه يسولفون , والهنوف قالت ل الجازي تعالي فوق الغرفة , ناخذ راحتنا , دخلوا غرفة الهنوف , لقوا على السرير كيسين , التفت الهنوف على الباب , لقت جاسم واقف ويبتسم , رجعت الهنوف وضمت اخوها , الله لايحرمني منك ,
جاسم : ولا يحرمني منك . الا الجازي مافي الله لا يحرمني منك ؟
الجازي : ليه
الهنوف : بنت هذي الأكياس هدايا من جاسم
الجازي : اها شكرا
جاسم : بـــس شكرا ؟
الجازي : بس
جاسم : على العموم الأسبوع الجاي حفلتكم حجزت لكم ب الانتر اعزموا كل صديقاتكم , الجازي ترى مثل مالهنوف صاحبة الحفلة انتي بعد , وصدقيني كل شي انا مسوي منه اثنين لك ول الهنوف ,
الجازي : يعطيك العافية
كانت هدية الهنوف , جهاز نوكيا اخر موديل , كان جاسم يعرف وش كثر اخته تحب اجهزة الجوال , اما هدية الجازي , كانت ميدالية ذهب , كان يعرف وش كثر الجازي تحب الميداليات , الميدالية كان عليها حرف g حرف ومعها وردة حمرا ,
الهنوف : جوجو والله جاسم يحبك شوفي تلاقين هديتك اغلى من هديتي , بس انا موهامني من اغلى , اهم شي بالنهاية جاب لكل وحده الشي الي تحبه , فكري بالموضوع
الجازي : أي موضوع , الهدية والحفلة مشكور ومايقصر
الهنوف : لا فكرة زواجك من اخوي
الجازي : بنت انا باقي لي اربع سنوات دراسة ومستحيل اتزوج وانا ادرس , يااني ادرس يااتزوج ماقدر اسوي شغلتين في نفس الوقت , ولوووو فكرت بالزواج بيكون جاسم اخر رجال افكر فيه
الهنوف : طيب وش الي تغير , انتي كنتي تحبينه وتموتين فيه
الجازي : تقدرين تقولين مشاعر مراهقة
الهنوف : على فكرة ترى انتي الى اليوم تعتبرين مراهقة ومابعد خلصتي من المرحلة هذي
الجازي : لا يالهنوف انا تعديت مرحلة المراهقه من دخلت الثانوي , انتي ماتدرين كيف انا عايشه ؟ انتي عارفه كيف حياتي , تحملت اشياء اكبر مني , انا تعباااااااانه وابي ارتاااااااااااااااح , تكفين لاعاد تفتحين موضوع الزواج من اخوك ارجوك , صدقيني ماعاد افكر فيه ولا يجي على بالي , والي خلق الجازي خلق الف غيرها.
كان التقديم على حسب النسبة كل يوم نسبة , السبت من 100/90 , الاحد من 89/80 و.......الخ , طبعا أول يوم كانت الجازي بتروح ولا في احد يوصلها , مافي الاااااا جاسم , اتفقت الهنوف تجي هي وجاسم ويمرون الجازي تروح تقدم الملف , وصل عند الباب , الهنوف : الجازي انا عند الباب يالله انزلي , ركبت السيارة السلام , ردوا وعليكم السلام , دخلت الكلية قدمت الملف , قالت الي تقابل : ناقصة ورقة المستشفى لازم تسوين تحليل دم ,
الجازي : تلوي بوزها , طيب وتسحب الملف , الهنوف وش اسوي
الهنوف : نروح المستشفى وصلوا المستشفى ونزل معهم جاسم , الهنوف والجازي قالوا احنا بنسوي التحليل مرة وحده , اخذت من الهنوف , وقامت واخذت من الجازي وطلعوا من الغرفة , شوي تمشي الجازي الا تحس الدنيا تدور فيها ومادرت بنفسها الا وهي تطيح ويجي جاسم بسرعه ويمسكها وتطيح بين يده , يشيلها ويحطها على السرير في اقرب غرفة , جاء الدكتور , سلامات وش فيها ,
جاسم : اغمى عليها , اخذت التحليل وهي تمشي طاحت
الدكتور : اها اكيد مااكلت الله يهديها بس , صحاها الدكتور , وراح جاسم وجاب لها شوكلاته , اكلت الشوكلاته وصارت احسن , راحت الكلية وقدمت ملفها , وهم راجعين , قال جاسم عازمكم على المطعم اختاروا
الهنوف : يم يمي , انا ابي كودو
جاسم : والحلوين
الجازي : ماترد
الهنوف : التفت على الجازي , جوجو موافقة كودو ؟
الجازي : لا ابي اروح البيت
الهنوف : يوووه منك ياجوجو اعتبري الغدا عشان قومتك بالسلامة
الجازي : أي مكان عادي
جاسم : طيب كودو , دخلوا المطعم وطلبوا , وطوول الوقت جاسم سرحان في الجازي , يتابع حركاتها وكلامها , كانت الجازي مو معطية أي اهتمام لوجود جاسم ولاااا كانه موجود تسولف وتضحك وكل شي عادي واوكي , جاسم كان مكتفي بالنظرات ومتابعة جوجو , اكلوا وخلصوا
الجازي : مشكور جاسم على العزيمة نردها لك ب الافراح
جاسم : العفو هذا واجبنا , اممممم عندي طلب ياجوجو
الجازي : تفضل
جاسم : ابيك تركبين قدام
الجازي : لا
الهنوف : احلى ياجاسم مااقدر على الرومانسية , خلاص انا موافقة
الجازي : بس انا مابي اركب
جاسم : ماتبين هاه , طيب اجل دوروا على الي يوصلكم البيت , انا ماراح احرك السيارة الا والجازي راكبة قدام
الهنوف : ياليل الرومانسية , الجازي , تكفين انا ماعاد فيني حيل اركبي قدامي وفكينااا
الجازي : كانت تعبانه ومافيها حيل , قررت تعطيه على كيفه , المهم توصل البيت وترتاح , اركبت الجازي قدام , وجاسم الفرحة مو شايلته , يحط سي دي ويطلع سي دي واستقر على أغنية ياحظ عينك تنام الليل مرتااحه ..............
|
|
|
|
|
26-04-2009, 01:32 AM
|
رقم المشاركة : 14
|
|
( ود جديد )
|
تم قبول الطالبات :
الهنوف والجازي وسهى ومنال قسم الفيزياء. مر أسبوع
جلسوا على طاولة وقرروا تكون طاولتهم الخاصة , جابوا ستيكرز وحطوا اسمائهم عليها ولصقوها على الطاولة , اليوم الثاني لما تجمعوا الصباح قبل ماتبدأ المحاضرة , في بنتين يناظرون لهم شوي قربوا البنتين , السلام عليكم
ردوا البنات السلام
رشا : هلا فيكم معكم رشا الفلاني
وعد : انا وعد الفلاني
الجازي : تشرفنا آمروا ؟
رشا : ما يآمر عليك عدووو , حابين نتعرف اذا في مجال
الجازي : اوكي مافي مشكلة تشرفنا , انا الجازي وهذي الهنوف , وهذي سهى وهذي منال
منال : تفضلوا اجلسوا ,
الهنوف : منال ركزي مافيه الا اربع كراسي ,
الجازي : ممكن تسحبون كراسي وتتفضلون
سحبوا كراسي وجلسوا
وعد : انتوا أي قسم
سهى : كلنا طقم فيزياء , ماشاء الله علينا عبقريات
رشا ووعد : هههههههههه
الجازي : احم احم , ماعليك منهم ترى مافي غيري العبقرية بينهم , ولا هم النسبة ماساعدت
الهنوف : جوجو لا تنشرين الغسيل من أول جلسه لو سمحتي
البنات : هههههههههههههههههههههه
الجازي : وانتوا ؟
وعد : كان ودنا نكون بنفس القسم بس مو مشكلة , احنا قسم حاسب
سهى : انتوا والله العبقريات دامكم حاسب مو بعض الناس
الجازي : روحي بس , الفيزياء أصعب من هذا الجهاز الي كأنه آاله حاسبه كبيرة
البنات : هههههههههههههههههههههههههههي
رشا : اوف وش هالتعبير , شكلك ماتحبين الحاسب
الجازي : ابدا ماعرف له اصلا
الهنوف : صحيح , ماتعرف له لو تقولين لها وش يعني ايميل , تقولك أيــــــــش ؟
رشا : لهدرجة عاد
سهى : لا فوفو تمزح مو لهدرجة بس من جد حتى ايميل ماعندها ماتحب الحاسب والنت ابدا
وعد : اهاا , بس انتي غريبه
رشا : تناظر في الجازي ؟
الجازي : يؤ وش فيك تناظرين لي كذا
رشا : انتي والهنوف خوات ؟
الهنوف : ايه , بس الفرق اني بيضه وهي محترقه خخخخخخخ خلص الحبر عليها
البنات : هههههههه
الجازي : بايخه , ماتضحك , ماعليك منها انا الزين كله اصير اخت الشينه هذي
وعد : يؤ , الحين قولوا الجد انتوا خوات ولا لا
الجازي : اسكتي يالفوفو انا الكبيرة وانا اتكلم , ياستي احنا مو خوات ولكن , انا اعتبرها اختي الصغيرة وتقرص خد الهنوف
الهنوف : وجع وخري
الجازي : دقيقه اشوف الساعه يووووه تأخرنا
سهى : خلينا نطنش المحاضرة هذي , نعتبرها عربون تعارف مع البنات
الجازي : بنات من اول السنه اهمال
الهنوف : عشان خاطري المره هذي بس ,
الجازي : طيب المره هذي وبس , احم ماضيفنا البنات , وش تأكلون
الهنوف : انا بروح اشتري لكم
الجازي : بنت لا مافيه عشان تجيبين لك ساندويشتين , اجلسي بس
سهى : ترى اليوم يومك , بس شوفي البنات وش يبون
وعد : طلعت بوكها ,
الجازي : بنت وش جالسه تسوين , اليوم العزيمة علي , دخلي البوك
رشا : تسلمين لنا
وعد : طيب ماقلتوا لي انتوا خوات ولا لا
الجازي : انا اقولك السالفه , انا وهي نصير بنات خاله وبنفس الوقت بنات عم , امي وامها مسوين فيها حبيبات وكل وحده تزوجت ولد عمها , ادري تخربطتوا , الزبده ان في بنتين وحده اسمها أريج والثانية اسماء , الي هم امي وام الهنوف , حلو تزوجوا عيال عمهم عبدالعزيز وعبدالله واصلا هم اخوان , يعني خوات تزوجوا اخوان , عشان كذا نتشابه انا وهي , واذا على اللون , ترى هي تفحط عشان يصير لونها برونزي ولا يصير تصير كأنه محترقه من كثر ماجلدها يحمرر
الهنوف : بنت مااقولك لاتنشرين الغسيل انثبري بس
الجازي : ايه كل تضحك علي وتقولي يالسودة , بس أي حريم يشفوني يقولون صحيح انها سمرا بس حلوة ,
الهنوف : اصلا المثل وش يقول الابيض نص الجمال
الجازي : والمثل الثاني يقول , الأسمر كـــــــــل الجمال
منال : بسكم هواش قدام البنات خلاص فشلتونا , بكرة لو جينا وماجوا عندنا في الطاولة ماالومهم من فضايحكم
البنات : ههههههههههههههي
الجازي : يالله المحاضرة الثانية , بدأت ,
بالصدفة جمعوا قسم الحاسب والفيزياء بمحاضره لماده عامه وجلسوا جنب بعض , لما كانت المشرفه تنادي الاسماء , جوزا عبدالله الفلاني
الجازي : ماترد تسولف مع وعد
الهنوف : الجازي ردي وصل اسمك
الجازي : نعم
وعد : التفت , عليها بنت هي قالت جوزا ماقالت الجازي
سهى , صحيح اسمها الحقيقي جوزا , بس من يوم واحنا بالثانوي نناديها الجازي , راح عليها , اصلا هي ماتحب احد يقولها جوزا , ياجوجو أو الجازي.
صاروا شلة 6 بنات , وعد ورشا من بنات الخبر , بس كل يوم يجون ويروحون من الخبر الى الجبيل ,
مرت سنة كاملة على سفرة عبدالله ابو الجازي , وطبعا الجازي , شاطرة وحطت كل طاقتها بالدراسة ونجحت بتقدير ممتاز , منال بعد نجحت بس حملت مادتين اماااا الهنوف وسهى بقوا للاعادة , ووعد ورشا نجحوا.
رجع عبدالله البيت ودق على زوجته وبنته وقالهم تعالوا البيت انا وصلت امس بالليل.
اريج : حست بنغزة بقلبها , لما دخلت البيت ,
الجازي : اول ماشافت ابوها راحت تركض وضمته ,
شوي الا قال : ابيكم تمسكون اعصابكم , وتسمعون كلامي إلى الآخر , انا بدون لف ودوران , تزوجت وجبت عيال توأم
أريج : تضرب على صدرها , وش قلت ؟
الجازي : مجرد تعبير يدل على تعجبها ,
عبدالله : سلمى , تعالي
دخلت عليهم وحده طويلة ومليان جسمها وبيضا وشقرة لكنها مو حلوة , ومعها عيال توأم , بنت وولد
عبدالله : هذي زوجتي سلمى , امريكيه مسلمة , وهذولا عيالي , عندهم 5 شهور ,
اريج : ترى انا الين الحين مو مصدقه كلامك شكلك تمزح
عبدالله : سلمى خذي الاطفال وروحي داخل
جلس عبدالله وجلست الجازي واريج
عبدالله : بشرح لك الوضع , انا رحت امريكا لاني كنت مريض بالسرطان , سرطان الرئه , رحت اعالج , رحت وكنت حاط في بالي اني ماعاد بعيش مره ثانية , ولكن الحمد لله سويت عملية ونجحت وبعدها تزوجت , انا ابي عيال ياريج وانتي ماتقدرين تجيبن انتي ماعندك رحم , صدقيني انا ماحدني على الزواج الا العيال , ابي ولد , والحمد لله جبت توأم بنت وولد , سامي وسامية
اريج : تبكي ووتتكلم لقهر , ونار تولع في داخلها , الله من زين اسماء عيالك , مالت عليك وعلى الي تزوجتها , انت شفت شكلها , عاد لما فكرت تتزوج مافكرت الا بالبقرة هذي
الجازي : جاتها الضحكه واكتمتها
عبدالله : قولي الي تبينه ادري من حر مافيك جالسه تغلطين لكن اخر مره اسمح لك تغلطين علي او على زوجتي او عيالي قدامي سمعتي
اريج : وهذي آخر مره تشوفني فيها , انت حقير ونذل مافاد فيك كل الي سويته لك
عبدالله : انتي ماقصرتي بس اكثر شي احتاجه انتي ماتقدرين عليه , ماتقدرين تحققينه لي , الي هو العياااااااال
عبدالله : بابا جوجو انتي وش رايك ؟
الجازي : انا !! من متى اخذت رأيي بشي , لكن انا ماعندي أي تعليق على الي حصل هذي حياتك وانت حر فيها
اريج : ضربت الجازي على فخذها , حر فيها ,لا من قال انه حر , هو في رقبته زوجه وبنت , انتي بكلامك هذا كأنك تأيدين الي سواه ابوك
وقفت الجازي : يما , يبا , تفاهموا على مستقبلكم وبلغوني عن اذنكم
عبدالله : الجازي خلك هنا , انا قررت
اريج : لا ياعبدالله , انا بقولك شي , تراني احبك وانت عارف وش كثر حبي لك , لكن من هاللحظة انا كرهتك كثر ماحبيتك , وابيك الحين الحين تطلقني , لان ماعاد لي مكان في حياتك
عبدالله : اريج وش هاللكلام , اريج انتي اول حب في حياتي وانتي ام الجازي , ام بنتي الكبيرة
اريج : هذا كان زمان , لكن من بعد ماتزوجت مزرعة البقرالي داخل , انا ماعاد لي مكان في قلبك وطلقني الحين الحين ,
عبدالله : انا مابي الامور توصل معاك للطريق هذا
الجازي : يماااا يبا , اعطوني اهتمام , حسسوني اني موجوده بحياتكم الى متى وانتوا كذا وبعدين
عبدالله : انتي ماتسمعين امك وش تقول ؟ تبي الطلاق بعد هالعمر اطلقها
اريج : وانت بعد هالعمر تتزوج علي ياعبدالله , ياحسافة بس على عمري الي ضيعته معاك
الجازي : اووووووووووف انا طالعه غرفتي و انتوا فكروا وقرروا مثل ماتبون لان انا مااهمكم وانتوا عمركم ماحسستوني بقميتي ,
اريج : تبكي , وتناظر عبدالله زوجها وحبيبها وولد عمها وابو بنتها , حبهاااا الي من طلعت على الدنيا ماتشوف غيره , كيف كذا بيوم وليله يرجع وماسك بيده زوجه لااااا وفوق انه متزوج جاب عيال يعني اكيد انه تزوج من اول ماتشافى يمكن تزوجها اول ماراح , وقفت وقالت انا رايحه بيت اختي واتمنى ورقتي توصلني هناك.
|
|
|
|
|
31-05-2009, 03:50 AM
|
رقم المشاركة : 15
|
|
( ود جديد )
|
في الكلية :
الهنوف: يكفي يالجازي قطعتي قلبي لك اسبوع وانتي تبكين
الجازي : يالهنوف وش اسوي , انا ماهمني طلاق امي , لكن امي تنام وتصحى وهي تقول انتي السبب , لاني جبتك وبعدها شالوا رحمي انا ماعاد قدرت اجيب عيال والنتيجة ابوك تزوج علي
انا وش ذنبي , انا الي قلت لربي سو فيهم كذا , كل شوي تعيد هالكلام , تعبت والله مو قادرة
الهنوف : مابي البنات يدرون بشي ,
الجازي : لا لازم يدرون مافيها شي لا صارت امي مطلقة , الي فيها اني انا الي تعبانه بالموضوع مو هي
البنات : لما عرفوا عن الجازي , قالوا نبي نطلعها من المود الي فيها , قالوا نبي نطلع نتغدا برى , لكن الجازي رفضت لان مزاجها مايسمح ,
طلق عبدالله اريج , بعد زواج دام 25 سنة , نص عمرها راح معاه وهو راضي بحياته معها وش الي تغير , الي تغير اشياء كثيرة ,
اجرت اريج شقه وسكنت فيها هي وبنتها , وطبعا عبدالله كان يرسل لبنته المصروف , وكانت الجازي تزور ابوها مره بالاسبوع وكانت تنبسط كثير , زوجة ابوها كانت طيبة وحبوبة
سهى : الجازي , شخبار زوجة ابوك
الجازي : عسل , مع انها بقرة على قولة امي , بس قبلها طيب وحنونه , تدلعني والله وابوي يغار من دلعها لي
وعد : ياي ابوك حركات فلاوي شكله
الجازي : ابوي والله يجنن بس امي الي مخربة الموضوع هههههه
رشا : كيف نفسية امك ؟
الجازي : أسالي عن نفسيتي مو نفسية امي , امي صارت زينه مادري اشوفها تسهر عند التلفزيون آخر الليل وتسمع أغاني صايرة رومانسية , طيبه حبوبه معاي مادري وش عندها ؟
بدأت سنة جديدة :
اريج : الجازي أبي اكلمك بموضوع
الجازي : تقصر على التلفزيون هلا يما وش موضوعك
أريج : جاسم
الجازي : وش فيه
أريج : خطبك , وانتي لازم توافقين , نسوي الملكة الحين والزواج بالصيف
الجازي : فتحت فمها تبي تتكلم
أريج : ولا تخافين راح يخليك تكملين دراسة
الجازي : وانا مو موافقة وجاسم لو يكون آخر رجال بالدنيا ماتزوجته
أريج : ليه وش ناقصه , جمال ومال واخلاق , واهم شي يحبك
الجازي :والله ابوي جمال ومال واخلاق ويحبك وش كانت نهاية هالحب ؟. كان الطلاق , هذا وانتو تحبون بعض تطلقتوا كيف انا الي ماحبه , انا ماراح اتزوج جاسم
أريج : بس انتي لازم تتزوجين , انا ابي افرح فيك ورجاء لاتجيبين طاري ابوك لي مره ثانية , ماعاد ابي اسمع طاريه
الجازي : زواج ماراح اتزوج , وبعدين تعالي , امس آخر اللي من كنتي تكلمين ؟
أريج : نــــــــعم , من متى تحاسبيني , هي انتي انتبهي على نفسك واعرفي من تكلمين , انا امك
الجازي : ادري أنك امي ولما تكون امي غلط لازم انبهها
أريج : تغير الموضوع , بنت لازم تتزوجين , انا ابي اشوف حياتي
الجازي : وانت الحين مو شايفه حياتك ؟
أريج : لا بصراحة انا احتاج ل رجال بحياتي
الجازي : تحتاجين رجال بحياتك ؟؟؟ طيب لما تحتاجين الرجال , انا وش ذنبي اتزوج واحد ماحبه ولا ابيه
أريج : لا ابي افرح فيك وبعدها اشوف نفسي
الجازي : يماااا لاتلفين وتدورين وين تبين توصلين , وش قصدك من كلمة محتاجة رجال بحياتي ؟
أريج : انا اقولك مثل ماابوك عاش حياته وتزوج انا بعد ابي اشوف حياتي واتزوج
الجازي : يماااااااااااااااااااا , بعد هالعمر تبين تتزوجين , اهااااااا لحظة لحظة , الحين فهمت الي امس كنتي تكلمينه عريس الغفله , يماااااااااا اصحي وش حركات المراهقه الي تسوينها!!
أريج : بنت احترميني انا امك
الجازي : للاسف يا ماما كان ودي احترمك بس انتي ماعلمتيني الاحترام
أريج : بنت
الجازي : يما قولي الي في خاطرك
أريج : انا يا الجازي قررت اتزوج مسيار
الجازي : يماااااااااااااااااااااااااااااااااا زواج ومسيار ؟؟ انتي مافكرتي فيني يايما , مافكرتي ب أي نظرة راح انظرلك ماخفتي تطيحين من عيني
اريج : انا ماسويت شي غلط تراه زواج على سنة الله ورسوله
الجازي : ماشاء الله عليك , انتي تبين اتزوج جاسم عشان اطلع من البيت ويخلى لك الجو , انتي وعريسك , يماااااااا حرام عليك الي تسوينه فيني والله حرام وش تبين الناس يقولون علينا
أريج : يابنتي زواجي هذا راح ينقذ اشياء كثيرة ,
الجازي : ليه راح تتزوجين امير؟ الا ماعلمتيني من سعيد الحظ
أريج : نزلت عيونها بحياء على الأرض , وقالت : صاحب العمارة , تدرين قال لما نتزوج راح ابطل اخذ اجار منكم
الجازي :تصفق لامها , اووووه ماشاء الله الزواج منك غنيمة , مطلقة وعندها شقه وماتجيب عيال ومتصابيه , كل المواصفات المطلوبه في زواج المسيار موجوده فيك , براافوا
أريج : بنت عيب تكلميني بالطريقه هذي بعدين احنا الرباحنين ماعاد بنصرف فلوس على الاجار راح نستفيد من الفلوس وراح يعطيني مصروف ولاتخافين بس اربعاء وخميس راح يكون عندي
الجازي : وانا باليومين هذي وين لازم اكون موجوده
اريج : الخميس عند ابوك كالعادة اما الاربعاء عند خالتك
الجازي : يما انتي مافكرتي مستقبلي وش راح يكون ؟ لما امي ترفضني وابوي يرفض حياتي معاه , تدرين انا وش ممكن اصير , اكون ( **** ) انتوا تبوني اعيش بالشارع , ترى الشارع جاهز ويستقبل كل بنت بايعه نفسها , كلاب الشوراع كثير وهم بالخدمه , يما انتي تبيني اضيع
اريج : لا طبعا مابيك تضيعين
الجازي : بزواجك هذا راح اضيع , راح اختار حياة غلط ,
أريج : زواجي راح يحقق لك كل الي تتمنينه
الجازي: يما تدرين وش اتمنى انا , ام واب يحبوني واعيش بوسطهم , تقدرين بزواجك هذا تحققينهم لي ؟ طبعا لا
اريج : مو مهتمه لدموع بنتها الي تبكي , مو مهتمه للضياع الي يحتار بعيون الجازي , كل همها تتزوج من خالد , اسمعي ترى ملكتي الخميس , حبيت اعطيك خبر
الجازي : ماشاء الله قررتي وجهزتي كل شي , ليه علمتيني بالموعد , كان خليتها مفاجأة
أريج : ساكته وعارفه رد بنتها المستهزئ فيه , اعذريني يابنتي بس الخميس نامي عند ابوك لاني
الجازي : لانك بيومها راح تكوني عروسه , راح تمثلين دور ( ***** ) مع الرجال الي بزواجه منك مايبي الا جسد وبس
اريج : طررررررخ كف على وجهها , انتي قلية ادب وماتربيتي , من وين بتجيبن الادب طالعه على ابوك
الجازي : لا طالعه عليك , لفت بجسمها وشعرها الي تناثر على ظهرها راحت غرفتها وبكت بكاء مرير , ونامت ب احضان سريرها ولعبتها سالي ,
الأم : بشرت المعرس انها اخيرا علمت بنتها بالخبر والخميس الموعد.
لملمت الجازي اغراضها وقررت تشوف حياتها مثل ماتبي , مثل امها اختارت حياتها . راحت بيت خالتها تبكي على صدر خالتها , امها الروحية , تبكي وتحس بحنان خالتها مع كل كلمة تقولها وكل لمسه.
الجازي : ياخالتي شوفي وجهي , بكرة كيف اروح الكلية و وش اقول للبنات اقولهم امي تبي تزوج ولما عارضت ضربتني وانا اطول منها , وش اقول , انتي ماشفتيها كيف تتكلم بكل شموخ مو هامها شي , اكرهها مااحبها ماعاد ابي اشوفها
اسماء : لا ياحبيبتي مابيك تقولين الكلام هذا , هذي امك مهما كان
الجازي : لاتقولين امي , انا ماعندي ام الا انتي وبس , صدقيني هي ماتعني لي شي
جاسم : كان يشوف دموع الجازي وقلبه يتقطع المشكلة مابيده شي يسويه , مابيده حيله , ولاكان انتقم لها من الانسانه الي اذت مشاعر الجازي وجرحتها وخلت دموعها الغالية تنزل ,
يوم الخميس الجازي مابكت ولا زعلت واخذت وعد على نفسها انها ماتنزل دمعه على امها لانها ماتستاهل دموعها , ووعدت نفسها انها تعيش حياتها بالطول والعرض , مايهمها احد , كانت تتنقل بالعيشه يومين عند خالتها واربع ايام عند ابوها ويوم تروح تشوف امها مجرد السلام وعليكم السلام شبخارك دقايق وتمشي , ماتدري ليه كانت كل احد رجلها توصلها لشقة امها , مع انها ماتحمل لها أي مشاعر , لكنها كانت تلاقي نفسها كل يوم احد تروح تسال عن امها وامها كانت تحاول تخفف عن ذنبها اتجاه بنتها , كانت كل مره تجيب لها شي , يافلوس يا ساعه يا ذهب , تحاول تتقرب من بنتها لكن الجازي كانت تاخذ الشي , مو شرط يعجبها ساعات تطلع من الشقه وترميه بالزباله وساعات تعطيه شغالة خالتها او شغالة ابوها كانت مجرد انها تاخذه حتى بدون شكرا , بس تبي تخسر امها وزوج امها لووووووووووول
|
|
|
|
|
31-05-2009, 03:51 AM
|
رقم المشاركة : 16
|
|
( ود جديد )
|
|
|
|
|
|
العرض العادي
