بسم الله ,,
أقل مايقال :
\
/
\
لا يا ذلول الشعر وأطوي بي مهاميه الجزال=أخايل الجزله وفكري لا بغاها نالها
قدام لا أسوق المعاني الشارده سوق الدلال=اللي يشادي خضاب بنت الهيلعي فنجـالها
مزن الهواجس هلّ وابل حرفها والشعر سال=بشعاب بيضٍ تصطفق من جالها لا جالها
الشعر خطوه لا بغيته صار للخطوه مجال=وأوسع الخطوة وأقول أبيات ما احدٍ قالها
والهزله الهزله مخلي قافها لراع الهزال =اللي ليا منــْها دعته الهايفه غنّالها
شاعر ومتمكن وجزل وما يجيب إلا الجَزال =ويشوش راسه لاسمع صوت (الحداوي) شالها
شاعر واعصب عمامتي لا قالوا الفزعه تعال =الدم عندي ينطبخ والخيل من خيالها
شاعر تميمي يفتخر في لابته حد الهبال=يفدى خشم عقّالها ويفدى خشم جهّالها
وعند أختصار المسئله أبسئل العالم سؤال=عدنان وش هي حيلته لامن سطى عيّالها.؟
صاح التميمي ياتميم اليوم وقفات الرجال=جتك الصواريم الحرار اللي تفل حبالها
هذا يقول ابشر بها وهذا يقول اليوم طال=والله فلا تحل القهاوي دون عزم رجالها
حنا لهم متجهزينٍ قدمكم بين الجبـال=مثل الأسود اللي تحرى الصيده وتحتالها !
وقامت على روس العداء تلعب محاديب الصقال = بيدين من تفدى الوطن لا عاضبت بعيالها
لين الهنادي أرتوت من دمهم وقت النزال=والدوله اللي طامعه راحت تجر اذيالها
السيف يفعل مانبي والدم فالميدان سال= مصايب ٍ فوق الاعادي ينهمر همالها
نصمل على خوض المعارك والحمل يبغى جمال = وما للحمول إن كبرت القالات غير جمالها
والناصري حميـّـر أخو عبطا بدع كلمة ,وقـال = يا عزتي للي غزانا و عزوته عزّالها
ويومن أبو سيف الفداوي جآه مفتاح بعجال = رح وانشد الظفره تقول إنه وفاء وأوفا لها
عشنا رجال معززين مكرمين ولانزال=على الشرف صلنا ونلنا طيبها وجزالها
يشهد لنـا التاريخ - لـنــّــا - بالشدايد كالجبـال = قوم على درب الشهـامه راجحٍ مكيالها
حنا الفهود الضاريه وشيوخ وافين الخصال=وحنا الجبال الراسيه من هازها ماطالها
من لاذ بحمانا وخاف من المضره والقتال=نضفي عليه من البلاوي قبل مايحدالها
تاريخنا كالشمس لكن غير قابل للزوال=أكد له محمد ( نبي ) الخلق في دجـالها
جنوب ولا غرب ولا شرق ولا من شمال=في كل صوب وكل حالٍ ماتغير حالها
كل القبايل غيرنا فيهم صواريم الرجال=اللي تفاخر لا حظر وقت الفخر برجالها
يأبو تميم الناصري يامن رقى روس الطوال=يابن الرجال الوافيه والطيب ساس خصالها
عبدالمجيد اللي خويه ماشكى ضيم الليال=من شان حق صويحبه زم الحمول وشالها
أثنيت يمك وجهتي وأشتد فكري للثقال=كيف القصيم وجوها والغاط كيف أحوالها
كيف النواصر مزبن الخايف كريمين السبال = اللابه اللي طيب الله بالمكارم فالها
اشفق على الطيب شفاقة ضامي الما للزلال=اللي حداة القيض في مضماة يزمي لالها
جذبت دلوي ياصحيبي عقب فتلك يالحبال=أزمهن زم الجمال اللي تزم اثقالها
/
\
/
\
وسلامت روسكم
العرض الشجري
